9th August, 2018 : Pu Lalfakmawia (40), Khanpui khua, a ram riahnaa Thawhlehni atanga chin hriat loha bo chu tukin dar 8 khan a ruang hmuh a ni a, leiminin a lo chhilh.
Khanpui leh Tualbung inrina bul, Khanpui atanga 10 kms vela hla, Hriangtlang Zaua lo nei Pu Lalfakmawia te nupa hi hlo thloin ram lamah an tap deuh chawt a, kar kalta Inrinni khan a nupui Pi Lalmuanchhani chu ration la turin khuaa a haw a, Nilaini zinga a lo let leh chuan an pa a hmuh loh avangin ri-a riak ve dangte a zawt kual a, Thawhlehni zinga a thing ek thawm an hriat bak chu chhanna dang a awm lo. Chuvangin ram riak ve dangte nen an phek zawn ta a, Nilaini nilenga an beidawn hnuin tukin khan Khanpui to Tualbung kawng laia riakten Thawhlehni chhun dar 12 vela kawng min a awm thu leh au thawm ni awm tak an hriat thu sawiin an belchiang ta a, uluk zawka an en hnuin leimin hian a lo chhilh ngei tih an hre thei ta a (Kawng lai hnathawkte hian leimin-a au thawm an hriat hi lehlam tawn tawna awmte an him avangin an ngaih a tha zui mai a ni). JCB hmanga leimin hi haiin tukin dar 8 vel khan a ruang hi an lachhuak ta a ni.
An lo mawng thlang kawngpui ko-a a awm laiin Pu Lalfakmawia hi leimin a chimpui niin ruang hmutute chuan an ring. Khanpui leh Tualbung inkar kawng hi laih tlang a la nih loh avangin an ram riahna atang hian Tualbung-Saitual-Seling lam atangin ruang an phur haw a ni.
No comments:
Thanks for your comment.