TRAINED NURSES TEN THIL PHUT VANGIN KAWNG ZAWH DAWN

Aizawl | August 22, 2018: Trained Nurses Association of India (TNAI) te chuan nimin August 21 khan an President Pi Lalremmawii hovin Chanchinbumite kawmin, Naktuk August ni 23, 2018 hian India ram pumah Common Rally neiin kawng an zawh dawn a. TNAI, Mizoram State Branch te pawhin chawhma dar 10:30 ah Govt. High School Field atanga Vanapa Hall thlengin kawng an zawh tur thu an sawi.

An thil phut hrang hrangte hi :
1.State sorkar hnuaia thawk Nurse ten Central sorkar hnuaia thawkte hlawh leh hamthatna hmuh ang zat hmuh ve, 
2. Nursing post ruak hnawhkhah
3. Nurse te hlawh tlem lutuka rawih leh a nghet lo (contract) a lak thin tihtawp 
4. Indian Nursing Council in Nurse pkhatin damlo a enkawl zat tur a bituk anga inenkawl theih nan Nurse a tam thei ang lak belh  
5. Supreme Court thupek anga private hospital hnuaia thawkte Rs. 20,000/- aia tlem lo hlawh pek te a ni.


TNAI Mizoram Branch te hian Mizoram sorkar hnuaia post ruak hrang hrang : Staff Nurse 107, Ward Superintendent 40, Public Health Nurse 11, Tutor 2, Mizoram College of Nursing Principal post 1, Health Worker 116, Health Supervisor 106, Community Health Officer 20 te hnawhkhah thuai an phut a. Nurse te hlawh tlem lutuk leh a nghet lo ‘contract’ a lak tihtawp an duh thu an sawi.

Hlawh chungchangah Mizoram sorkar hnuaia thawk leh Central Pay late chu Pay Band ah inang mahse Grade Pay ah an inthlau hle thung a. State hnuaiah Nurse te Grade Pay Rs. 4400 a nih laiin Central Pay late GP chu 4600 a ni a. Mizoram State ah Ward Superintendent te Grade Pay 4600 a nih laiin Central Pay te chu 4800 a ni a. Nursing Superintendent te Grade Pay phei chu Mizoram ah 5400 a nih laiin Central Pay ah chuan 6600 daih a ni a. Mizoram sorkar hnuaia thawkten Nursing Allowances thla tin Rs. 3200 an hmuh laiin Central Pay la te chuan Rs. 4800 an hmu a. Washing Allowance ah Mizoram a thawk ten thla tin Rs. 300, Central Pay la ten Rs. 450; Uniform allowance ah state hnuaia thawk ten thla tin Rs 500, Central pay ten Rs. 750 an hmu a, OT allowance phei chu Mizoram sorkara thawk ten an hmuh miah loh laiin Central Pay la te chuan thla tin Rs. 360 an dawng a.  Allowance  hrang hrangah Mizoram sorkara thawk Nurse ten Central  Pay late an phak lohna belhkhawm hi Rs. 3540 lai a ni.

January 29, 2016 a Supreme Court thuchhuakah chuan private hospital a Nurse te hlawh hi, khum 50 aia tlemah Rs. 20,000 aiin a tlem tur a ni lova. Khum 50 - 100 ah State sorkara thawkte hlawh aiin 25% aia tamin a tlem tur a ni lova; khum 100-200 ah state sorkara thawkte hlawh aiin 10% aia tamin a tlem tur a ni lova; khum 200 aia tamah phei chuan state sorkar hlawh angin an pe tur a ni, tih a ni a. Supreme Court leh India sorkar thuchhuah angin thla khata Nurse hlawh hi Rs. 20,000 aia tlem lo tur a nih laiin, Aizawl a private hospital tam zawk chuan thla khatah Rs. 8000 bawr vel an pe a, a pe tam ber pawhin sing chuang awrh chauh an pe niin TNAI te chuan an sawi a. A tul ang zela hma lak chhoh an tum thu an sawi a.

Supreme court thuchhuak hi Delhi leh Kerala chuan an zawm tawh thu leh state leh UT dangte pawhin zawm tura hma an lak mek thu qan sawi bawk.


Nursing zirna hian senso a sang em em a. School of Nursing, Thingdawl  Principal-in www.tleirawl.in zawhna a chhanna ah chuan GNM hi Kum thum chhung niin, Kum khatna admission ah cheng 18,000+ vel an seng a, Mess fee ah thla tin cheng 2000 an seng bawk a, Kum 2na leh kum 3na ah Admission fee cheng 4600 chuang a nih leh thu a sawi bawk.

  Kum 3 = Thla 36, 36X2000+ chu 72,000 chuang a rawn ni a.  An zirna a tan hian a lo berah, zirna in nena inkaihhnawihah pawh cheng  nuai khat chuang an seng hrim hrim tihna a ni a.  Hei hi Sawrkar enkawl a ni a, Private a zirte phei chuan an sumsen hi a sang hle dawnin a hriat a. Cheng nuaih tel senga an inzir hnu-ah khawi hospital ah emaw cheng 6000 – 8000 vel hlawhin an inhlawh leh thin!