NANG NENA INTAWN LEH NGEI HI KA LA DUH CHEU ANG

Ṭhal khaw ro lai a ni a, ni khat chu Reiek Branch K.Ṭ.P. te blanket sûk hnatlang nei turin Tlawngah phür zetin kan in-trip thla a; kan zu thleng chu rin aiin mi an lo ṭhahnem phian a. Aizawl lam mi, blanket su-a hnatlang ve tho leh a ṭhen chu school naupang intihlimte an ni hlawm a.
Insûkna hmun rem ṭha pawh kan chan ve meuh tawh loh avangin lui mawng lam deuhah chuan a rem dan ang angin kan bung ve ta chawt a. Kan thlang deuh chu Aizawl lam aṭanga lui lo luangin a rawn finna lai a nih avangin ṭiauphovah te chuan bawlhlawh a var deuh tiar a. Ti chuan ei rawngbawlna hmun tur vel kan ruahman nghâl sawk sawk a.
Lungthû tur zawngin kan thlang ṭiauphova lung awm khawm chu ka zuk hai let vel a, rin loh deuhin ka lungthu zawnna lamah chuan thil ka chhar ta tlat mai! Slipper chhia—a rawng pawh a dal zo tawh, 'pinky' tih inziak erawh chu a la chhiar theih deuh a, a chat zawmna thirzai pawh a la awm ve hram hram bawk. Chu chuan ka ngaihtuahna chu kum eng emaw zat liam tawhah a hruai kir ta daih a..
***
2001 kum bul lam a ni a, pawl 11 zir turin Aizawl Bungkawn venga ka ní te ka han fin a. JL school-ah lûtin school bàn apiangin Mystique-ah music class ka kal pah bawk a, classical guitar ka zir ṭhin. Classical music lam hi ka ngainat zawng a nih avangin nuam ka ti ṭhin hle a, class pawh ka ṭhulh ngai meuh lo va.
Tlai khat music class kan bang kan room aṭanga ka chhuak chu corridor-a ka kal laiin violin room aṭang hian hmeichhe tleirawl pakhat, violin zirlai hi a rawn chhuak hlawl a; hàwn kawnga inhmu fo tawh kan nih avangin kan innuih ringawt a. Vái hmél deuh, ngo ving veng, ṭawng tam hmèl vak lo hi a ni a; class bàn apiang hian ka hmaah a haw ṭhin a, school bag a ah bakah violin, a case-a inkhung hi a khai a, Chawnga road kawng sira dawrte pakhatah hian coffee a in kawi ziah ṭhin. A uniform aṭang chuan Oikos school naupang a ni tih chu ka hria a, mahse tu nge a nih a, khawii venga awm nge a nih erawh chu ka la hre bîk lo va.
Chumi tlai chuan kan intawng remchang bawk nen kan haw rual ta nghal a. Kalkawngah chuan kan titi ve tak nâin sawi tur tam tak erawh kan hre lo.¬
“Violin maw i zir?”
“Aw, ni e. Nang?”
“Guitar, classical guitar.”
“Classical music lam i tui ve elo!? Kei pawh ka tuina ber alawm.”
“Aw, tui ve e.. Taka engtin nge ka koh ang che? Kei chu Valpui tiin min ko ṭhin a.”
“Kamala tiin min ko dawn nia.”
“Kamala a!?”
Ka mak ti hmel a hmuh chuan Gorkhali an nih thu leh Lawipu venga awm an nih thu te, hnam dang mi mah ni se, Mizorama pianga sei lian a nih thu te chu a sawi ta vek a. A lo hetih reuh vang a nih hi vai hmél pu ru chung si-a mizo ṭawng chhe të maha a pai loh ni! A ṭawngkam leh nun zia aṭang chuan mi chapo lo, polite leh confi tak si a ni tih chu a hriat reng mai a; ka zah ru reuh hle mai. Coffee a in kawi ṭhinna dawrtë kan thlen chuan nui deuh chung hian coffee in a rawt a, kan in dun a, kan in man pawh chu aman a pe mai a.
Kal pahin Reiek khua ka nih thu leh, Bungkawna ka ní te ina ka awm thu te chu ka hrilh ve a. Rei lo tëah kan in peng chu kan thleng ta dêr mai.
“In in a va hnai bik ve.. A nih phawt aw, bye.”
“Bye le..”
La thlahlel ru tak chungin ka vai liam a, vawiin tlai chu hàwn kawng a tawi duh ngei mai!
Chuti ang chu kan tlai tin dàn a nih tâkah chuan, tui záwng inang na nâ nâ chu kan lo inngaina ta viau mai a. A lo rei deuh a, inngainatna chu inngaihzawnnain a luahlàn lo thei ta lo! Tichuan hmangaihna chu Kamala-i nena kan buaipui ber a lo ni ta a. A fel a; a nù a; a thianghlim a; a chhe lo bawk a; chuti ang hmeichhia chu ka thinlung duh zawng tak a ni rëng a ni.
##
Vawi khat chu Chawlni tlai hian casual dress mai mai nen ka léng thla a, an luhká ka thlen hma deuh chuan a violin tum ri hi ka hria a; ka piece ngainat berte zinga mi Johann Pachelbel-a 'Canon' ngei mai kha a lo tum a ni. Chawlhni tlai boruak lunglenthlak tak kára chuti ang ri hriat chu a inhmeh tak zet a, ka ngaithla zo phawt a, ka lut ta chauh a. Chü thing in upa ve tawh tak, a chhung thim deuh ruài leh chhuat tliang han maia tleirawl duhawm tak chuan a violin ken lai chu dahin nui sáng hian min lo welcome a. Ka luh hmaa a violin tum ri ka hriat thu leh mawi ka tihzia te chu ka hrilh a, a läwm thiam hle a.
“I lo lenga i va’n fel.”
“Chutia mi? Vawiin i inkhawm em?
“Aw, khawm e.”
“Nang pawh i inkhawma i va’n fel!”
A nui ringawt a. Kamala-i te chhungkua hi Mizo ni lo mah se, Kristian an ni a, Kamala-i pawh hi Non-Mizo (Masihi Sangati)-ah a inkhawm ṭhin a ni. Chumi tlai chuan a châk ang ngeiin an veng tàwpa ngaw thelh nuam deuh hmunah ka zuk lènpui a, hemi tlai hi kan la hlim ber ṭum a ni awm e.
Boruak a thiangin khua a nuam hle a, kan infiam a, fiamthu te thawhin kan nui dun bäwk bäwk a; kan infiamna lamah a slipper ka la rah chahsak zui! Pump house fencing ṭawnna thirzai hmangin a slipper chat chu ka zawmsak nawk nawk a, a slipper-ah chuan ‘pinky’ tih hi cute deuh hian a inziak a, a mawi ka tih thu leh inhmeh ka tih thu te chu ka hrilh a, a nui sen sen a; ka siam zawh chuan khua pawh a lo tlai ve ta deuh a, chu tlai boruak nuam tak kárah chuan duh takin kan infâwp vawng vawng a, kan haw ta a.
##
Tlai khat chu class kan bàn hmà deuh avangin kan ina lo leng kawi turin ka sawm a, lo kal a zah ṭhinna chhan ber ka ní te nupa office an la bàn loh avangin lo lèn chu a hreh lem lo va. In chunga ka room-ah kan chho va.
“Taka i slipper kha..?”
Nui chung hian, “A thar ka lei tawh; mahse, a hlui kha chu ka dah ṭha reng dawn.”
“Ngati maw?”
“Khami tlai kha a nuam êm a, hriat reng nan ka duh alawm.”
Ka nui ringawt a; kil khata ka Yamaha classical guitar intung chu ka va la a, ka khuma ṭhu chungin music kan play dun ta a. Canon bawk kha guitar-in bul ka’n ṭan a, violin-in min rawn zàwm nghal a; ni tla tur sen phút chuan ka room chhung chu a rawn kâp sen reih a, chuti ang reng reng chuan ka music play mood-ah ka la cheng ngai lo; ani pawh chuti bawk. Kan play zawh chuan nui deuh chung hian a rawn hawi a, ka lo nui ve a, muang chángin kan inhnaih a, kan infawp ta a.. Kan mood pawh a dang zo ta..
Guitar leh violin chu dìm tëin ka dah a, khumah chuan ka kuài mú a, khawvela ka hmeichhe ît ber chungah chuan ka bawk ta reng mai! Ka mipa nihna lo tho nghalin, a tàwp thlen ka inhuam nghal dèr a; ani erawh chuan a duh lo va, a ṭang hle a. Mahse khawvela a mipa hmangaih ber bulah chuan a ṭang tluan thei ta bik lo.. Ti chuan, chu hmunah chuan a neih chhun, a thianghlimna chu ka laksak ta a ni..
Chumi tlai chuan an veng tawntirh thleng ka zuk thlah a, an veng thlen hma deuh kawng sira hand railing awmnaah chuan chawlh a rawt a. Kan khua, Reiek tlang kara ni tla tur chu kan thlir dun a, rilru thaw ipik tih hriat tak hian a thaw halh a, a hmél aṭang chuan ṭah vak a châk a ni tih chu ka hre thiam a.
“Valpui..”
“Umm..”
“Kei chu engtikah mah hmeichhe virgin ka ni ve tawh ngai dawn si lova ti raw..?”
Chu zawhna, a chhanna chiang sâ reng chu chhàn a va har si êm! Hmeichhe virgin a nih lai, nichin mai kha a ngai a ni tih chu ka hre thiam a; nichin mai mah ni se, koh kir theih a ni tawh si lo.. Chatuan atan a hloh hlen dawn ta a ni—a lo va hlu êm!
Chumi tlai aṭang chuan kan nun hlimawm leh thianghlim tak ṭhin chu pawlh nut a lo ni ta a; a hmaa kan hlim ang khan vawi khat mah kan hlim leh ngai ta lo. A neih zawng zawng min hlan tawh avangin min zah a, ka kalsan mai ang tih chu a hlauh ber a ni. Min chàn a hlauh avangin ka thu a hnial ngam ngai lo va, hreh tak chung pawhin ka tan a inphal ta fo va, nau pài hlau rilru hah reng rengin hun kan hmang chho ta a ni.
Hun a lo inher a, class XII kan nih thleng pawh chuan kan la inkawp ve reng a. Ani chuan min thlahlelin, min hmangaih tulh tulh emaw tih mai tur hi a ni a; kei erawh chuan bul kan ṭan tirh lai kha ka pha ta meuh lo, kan lo inzui rei ve tawh bawk nen ngaiah ka nei ve deuh tawh ni te hian ka hria a. Mahse chuti chung chung pawh chuan kan la ni ve reng tho va.
##
Ni leh thla a lo ral a, favang ní liamin thlasik rim a rawn nam thar leh a; heti ang hun a lo thlen chang hian kan khua ka ngai thar ṭhin. Tichuan kum tawp a lo ni a, thlasik chawlh hmang turin kan khuaah ka haw thla a. Mahse chu thlasik boruak, Krismas vuak vêt ni bawkah chuan Kamala-i tana rinawm chu har ka ti ta hle mai.. Min hmu pha lo bawk nen ka rinawm zo ta ngang lo va, hmeichhe dang ka kawp ta a ni.
Ka chak lohna ngai bawk kha lo tho lehin, Kamala-i nena kan tlûkna ṭhinah tho khan chu nu nen pawh chuan kan tlu ve leh ta nge nge a. Rilru chhungril erawh a nuam duh lo khawp mai, dik tak chuan Kamala-i lakah hian ka inthiam thei lo a ni, min hmangaih ngawih ngawih a, ka tan engkim a huam a; chutih laiin kei ti mai mai hian ka lo khawsa thung si..
Kum a lo thar a, zirna chhunzawm turin Aizawlah ka chho leh a. Kamala-i chu rinawmna nena bul ṭan tharpui ka tum a ni. Ani paw’n min lo ngai tawh hle a, ti chuan rilru tharin kum bul kan ṭan dun a, tunhma zawng aia ka ngaihsak zâwk avangin a hlim țhin hle a, ka bula a awm hi chuan a thla a muang hle țhin; mahse, thla tam pawh a la liam hmain vawiin thlenga ka nun tidanglam vektu lehkhathawn ka dawng ta tlat mai! Thlasik chawlh ka hmanpuinu khan rilru hah takin nau a pai thu min rawn hrilh a ni!
Ka thu hriat chuan min ṭháwng hle a! Mumang ni se ka ti hle mai; mahse, a ni si lo. Kamala-i nena kan inkar boruak a nawm thar lai leh neuh neuh kan neih loh lai tak a ni a, mahse chu chu tihchhiata a awm a ngai dawn ta a ni..
Tlai khat kan class bang chu an veng tawntirh thleng ka zuk thlah a, hmäna ka zuk thlah ṭuma chawlh a rawtna hmun, hand railing awmnaah khan chawlh ka rawt ve thung a. A hma ang bawk khan ni tla tur chu kan thlir dun leh a, mawi a tih thu chu nui séng chung hian a sawi a. Tlai ni eng mawi tak hnuaia a hlim hmél duhawm tak chu a va’n mawi tak em! Mahse rei lo tëah chu a hlim hmél chu tihdanglamin a awm dawn si..
“Kamala.”
“Umm..”
“Inṭhen tawh phawt ka duh a ni!”
“Eng a!?”
“Inṭhen ka duh.”
“Engati teh thut nge a?”
Hreh leh harsa ti tak chungin ka chanchin chu ka hrilh ta tawp a. A awih mai lo, chuti ang tur chuan min ring phal lo a ni. Mahse dâwt a ni lo va, a awih a ngai si. Thu tak ka sawi a ni tih a hriat chuan a hmel a lo danglam a, rilru nat hmèl takin a heh hnuai lam chu a pet fan fan a; a mit khap a lo rang a, a biangah chuan mittui a lo luang a; sawi zui tur kan hre tawh lo.
Rei ngial kan ngawih dun reng hnu chuan rawmawlin a mittui chu a hrù a, engmah sawi lovin a haw ta nal nal a, a hrehawm duh ngei mai. A kal liam thleng chuan ka thlir reng a; tichuan, chumi tlai chu Kamala-i nena kan inkár tâwpna a lo ni ta.. A duh lo chung a thianghlimna ka lâksak a, keimah vangin rilru hah reng rengin hun a hmang ṭhin a, hlim taka siam ka tum ve lai takin 'ti ang chu kan dinhmun a ni leh ta si.. A va’n hrehawm êm.
Thup hlen theih a nih miau loh avangin ka chanchin chu ka pa te paw’n an lo hre ve ta a, mahse ka pa ngaihdan tur chu a ka hre sa mai a, 'Sáwn i thlak a nih chuan i sáwn thlakna chu i nei ngei tur a ni; mi tihfahrah a ṭha lo.' tih hi min zilh fona ṭhin a ni. A fapa neih chhun, beiseina sang tak nena a lo thlir ve reng ṭhin chuti anga ka awm ta mai chu a rilru a na a ni tih ka hria a, hrehawm pawh ka ti hle a ni.
Tichuan ka pa duh dan angin ka sáwn thlakna nen chuan kum kan tling âwrh tihin kan innei a, nun ka uluk loh vangin ka tum aia hmain nupui ka neih phah a, ka nih tur ang pawh ka ni pha ta lo a ni. Mahse, Pathian hi a ṭha êm a, vawiin thlengin a zarah nghei lovin kan la awm ve a, K.Ṭ.P.-ah te phak ang tawka inhmang vein, ka thlarau lam nun phei chuan a ṭhat phah zawk emaw tih hial tur a ni.
***
Tichuan, chuta chin chu Kamala-i nen chuan vawi khat mah kan inhmu leh tawh lo va; kum sawm chuang lai liam tawh mah se, rilru chuan a la hre ve reng ṭhin. Vawiin phei chu dik tak chuan ṭiauphova ka slipper chhar khan ka lung a tileng tak zet a, a tä ngei kha a ni tih ka hre si. Hmanah kha chuan dah ṭhat reng a duh ṭhin kha a ni a; mahse tunah chuan ni khua a lo rei ve ta a, he slipper chhia pawh hi ngaihhlutna nei tawh lovin a paih ve ta a ni ngei ang.
Chawhnu uai thla lam hret a lo ni ta a, school naupang intihlim leh blanket sùa hnatlang ve thote pawh chu nuam ti takin kan awmna lamah te chuan an rawn vei sek hlawm a; a ṭhen haw turin an inko khawm ṭan a. Keini chuan kan blanket sûk chu kan la nghâk thli thlawr rih a. Slipper chhia chu kengin mi vei sekna sir deuhah chuan ka ṭhu a, Kamala-i nena kan nunhlui kha ka chhui kir mai mai a. Chutia ka ngaihtuahna ka kawm mai mai lai chuan,
“Khä slipper kha engtin nge i neih theih!?” hmeichhe aw ki sang deuh hian a rawn ti thut a. Ka han hawi chhuak a. Het! Kamala-i a ni reng mai! Ani lahin kei ka lo ni chu mak a ti bawk! Kan hamhaih dun hle a. Ka slipper ken lai chu muang changin a rawn la a. “Engtin nge hetah hian kan inhmuh theih!?” mak ti takin ka’n ti a. Maubawka private school pakhata a thawh thu leh an school naupangte intihhlimpui paha tui pump-na hmuna tui an tihthianghlim dan zir chianpuia rawn kal an nih thu chu a sawi a. Tum loh lutuka kan han inhmu nawlh mai chu a mak duh ngei mai!
Ka tho va, mi zîk huai huaina hmun chu kalsanin, kan thlang deuh lui tuia lungpui lawrah chuan tuia ke chiah chungin kan ṭhu dun a; a keṭhiah te chu a màwi ngaiin a lo la mawi reng a. Ti chuan a slipper chhia ka chhar dan te chu ka hrilh a, ani pawh chuan a dah ṭhat reng ṭhin thu leh a hriat loh hlàna a nú in tifaiin a lo paih thu te chu min hrilh a; ti chuan Tlawng thlengin tuiin a rawn lèn thla ta a ni tih chu kan hre thiam dun nghal mai a. A hmu leh thei chu a lawm hle a ni tih hriat tak hian slipper chu a khawih neuh neuh a, a awm dan ațang chuan a lung a leng ve a ni tih chu ka hre thiam a, slipper chat zawmna lai chu en chian deuh pah hian a rawn nui chhuak a.
“Hemi tlaia kan ninhleizia kha." A nuih chhunzawm a.
“Nia ti raw.. kan ninhlei aiah i slipper a la chat zui." Nui chung hian ka lo ti ve a. Kan nui dun kar kar a; mahse, a nui hmél phènah chuan mittui hnai tlat hian ka hria a.. A rawn țawng chhuak leh a,
“Khatih lai kha chuan rilru hahna turte kha kan nei ngai si lo va, rilru thianghlim takin kan inkawm a, thil ho të të-ah pawh kan hlim êm êm țhin kha a nia.."
“Nia ti raw, khang hun lai kha ka ngái țhin asin aw..”
“Kei deuh.. Tunah chuan nula senior kan lo ni ve ta reng mai sia.”
“Chu pasal i la nei na nge a!?”
“Umm.. La nei nang.”
“'Ngati nge tun thleng thlenga i la neih loh a!?”
“Hmanah chuan ka nei ve ṭep a, mahse a rem leh ta lo a ni.”
“'Ngati nge a? A va’n zia lo ve.”
“Englo a nia, kan thawhpuipa pakhat nen hian kan inngaizawng ve ṭhin a, amah chu mizo a nia. Min duh ve thei lutuk a, kawng engkima min hriatthiam ṭhin avangin kei paw'n ka duh ve khawp mai a. Mahse ka thianghlim tawh loh avang hian a lakah inthlahrun rûkna riau ka nei ṭhin a, ani lah a fel ropui sia. Ama’rawhchu inneih te hial a sawi rik takah chuan a la hriat tho tho dawn avangin hrilh loh chi niin ka hre lo va, chuan, nangmah nena kan chanchin kha ka hrilh ta a.”
“Chuan?”
“Rin loh deuhin pawi a tih loh thu leh min hriat thiam thu a sawi a, ka lawm hle mai a, ka tháwl deuh huai hian ka hria a; mahse, a lo rei a, a chhungril a lo dam tak tak thei lo hi a lo ni a; nula thianghlim tak anga a ngaih chuti ang ka lo ni reng chu mak a ti lutuk a, hriat thiam har a ti a ni. A tawpah phei chuan min kalsan ta nge nge a. Inneih hial kan sawi rik tawh laia chutia kan awm leh ta mai chu ka rilru a na lutuk a, ta ṭang phei kha chuan pasal neih hi ka tum leh tawh ngai lo.
“Mahni insit rûknain ka khat a, tling lo leh tenawm riau hian ka inhria a, mahni ka inrintawk vèna zawng zawng pawh a bo zo tawh; ka nun hi a hrehawm lutuk.” A mitah chuan mittui a lo hnám a. “Nang ka lo hmangaih che kha a pawi a ni. Dik tak chuan nangmah vang hian ka nun pumpui hi a chhiat phah asin.” A insút hlawp hlawp a, a bianga mittui lo luang chu a hru a. A sawi zawm thei tawh lo. Kha leh chen a rilru hrehawmna sawi chhuak thei lovin a lo awm ṭhin a, a’n sawi chhuah meuh chuan a lungchhiatna chu a thup zo lo a ni ber mai. A insút a, a mittui chu a lo luang zung zung a.. Sawi tur a va’n váng duh êm..
Rei lo të atana nawmna ka thlâkhleh avangin hmeichhe pakhat nun pum ka tihchhiatsak a, keimah vanga a hrehawm tawrh hi a nasa lutuk a ni; a laka ka khawsak dan zawng zawng kha ka ngaihtuah lêt a, ka inchhir ngawih ngawih a; mahse, siam ṭhat theih rual a ni tawh si lo..
Ka inthiam lo hmél a hmuh chuan innuai kâwi niaih chung hian he thu hi a la rawn sawi leh hram a, "Mahse Valpui, inthiam lo duh reng reng suh, ka haw miah lo che a nia; dik tak chuan keimah hi ka inhaw zawk a ni—'ti ang taka ka nun i tihchhiat hnu pawh a, ka la huat theih loh cheu che vang hian.."
Chu țawngkam chuan mipa biangah hian mittui a va luantir teuh ngai êm! Heti ang khawpa min hmangaihtu min hmangaihna hi kei mi bawlhhlawh hian nawmchenna remchangah ka lo hmang hlauh thung si.. Ka va tenawm êm.. A rawn țawng chhuak leh a.
"Ka pi kha a thih ni thlengin Kristian-ah a inlet ve thei ta lo va, mihringte hi kum tam tak liam hnuah kan piang nawn lehin a ring țhin. Ka pi rin dan kha a lo dik a, kan piang nawn leh a nih pawhin, Valpui, kum maktaduai chuang liam hnuah pawh nang nena intawn leh ngei hi ka la duh cheu ang; mahse, tun ang ni tawh lo hian—inchhirna tur nei miah lova dam chhung hun hmang dun ve tawh turin.."


(fiction)