KA LEI VANTIRHKOH - 1

BUNG-1 NA

By:- Rs Thangluah{Remz}✍🏻

Thlanmualah chuan kan ṭhian ho chuan zu in turin kan kal khawm leh a. Ni danga kan tih ṭhin ang bawkin Thanmual mawng lam pan thlakna stepah chuan kan ṭhu khawm leh laih hlawm a. Mawia chuan meizial ṭan pahin,"Zanin chu hman zana min khawihtu te kha kan va zawng dawn mi?,"a rawn ti a,a hmelah chuan a thinrim hle tih a hriat theih nghal mai a. Jo pawh chu a lo phûr hlawm khawp mai a;mahse,kei erawh ka phûr ve tlat lo,"A ho e mai,hman zanah pawh kan hneh loh êm kha,"ka lo ti thung a. Jo chuan,"Nang hi i nep bik thei lutuk mai,i rawn kal ve loh chuan mipa i ni lo tihna a ni mai,"tih pahin ka darah chuan a rawn beng thak thak a. Zanin hian an bulah ka kal lo a nihchuan Tuai tiin min nuihzat ngei dawn si a,chuvang chuan ka kal ngei a ngai a ni.

Thlanmual mawng lam aṭang chuan hmeichhe 1 hi muang changin a rawn chho a. Ka ṭhiante chuan an lo hmu ve lo hrim hrim a,kei chuan mit tla lêk lovin ka lo en pek a. Jo chuan,"Hey Mawla,khati vak vak khan hmeichhia an melh ngai lo,kawng kha ka lo kian vat vat rawh. Kan veng Kohhran Upa fanu a nih khu,"tih pahin ka lu ah chuan a rawn tuai thuak thuak a. Kei pawh chu ka ṭhutna aṭang chuan ka tawlhsawn ve vat a,chu nu pawh chuan kan ṭhutna chu a rawn thleng ve nghal bawk a. A van hmelṭha tehkher êm! Vantirhkoh ni mai hian ka hria,engkim mai kha a fuh vel vek mai a ni. Ngawi rengin min kal pel a,a perfume rimtui zia te kha aww. Ngawi rengin ka thlir zui vawng vawng a,a hnung lam aṭang pawn a van chhelo tak ém!,"Heyy,,Mawla khatin thlir zui vung vung kher suh. Keini pawn kan melh ngam ṭawk a nia,"tih pahin Mawia chuan ka luah chuan min rawn nam bu lawp a. Jo lah chuan,"Awww a ho lutuk,a vawikhat hmuh ve na nia hrethiam rawh,"tih pahin a lo nui hawk hawk thung a.

Zanah chuan ka chhungte ho chu inkhawm turin an in siam sap sap hlawm a. Ka pa chuan,"Bawiha,zanin chu inkhawm ve tawh la,"a rawn ti dam thluam a. Kei lah chuan,"Nhaaa ka peih teuh lo mai a,kan ṭhian ho in game kan khel dawn,"ka lo ti nghal hmak a. Ka pa chuan beidawn hmel takin min rawn melh a,engmah a sawi zui tawh lo. Hla Bu leh Bible a la a,ka nu nen chuan inkhawm turin min chhuahsan ta a. Kan unau hi 3 kan ni a,keimah chiah hi mipa ka ni a ka naupang ber bawk a. Mahse,kan unauah chuan ka sual ber thung a,Family Black Sheep ka ni tihna a nih chu. Ka u chuan,"Bawiha,ka pa hi ti beidawng tawh lo teh. Khawngaihin i nun hi insiamṭhat tum ve teh,"tiin ka bulah chuan a rawn ṭhu a. Ni e ka u hian a sawi dik a ni,ka nu leh ka pa te hian ka tan nitin an ṭawngṭai ṭhin tih pawh ka hria. Mahse,ṭhat lam aiin sual lam ka pan zawk zel chu a ni si.

Inkhawm an kal rem hnu chuan ka insiam ve ta a. Ka ṭhiante 2 chuan taxi stand-ah min lo nghak reng tawh tih hre mah i la,ka insiam chu ka hmanhmawh lo khawp mai. Ka rilru leh mitthlaah chuan kha hmeichhia bawk kha a ni awm chu,vawikhat tal hmuh leh ka châk khawp mai. Ka insiam chu ka rei deuh a ni ngei ang,Jo chuan min rawn call ta;

"Aw ka rawn kal dawn,"

"Muangchang vak zel ṭhin suh,"

"Aww ka hria e,ka rawn kal a ni mai,"

Phone chu ka hang up a,ka jacket ipteah chuan ka ak nghal a. Engemaw palh thut a in ven na turin,chemte lian lutuk lo chu ka pai tel bawk a. Mask ka vuah a,kan nau 1 lehkha zira kan bula awm bulah chuan,"Ka ṭhiante nen game kan khel dawn a,ka rawn haw tlai maithei aw. Ka pa te kha i lo hrilh mai dawn nia aw,"tiin ka chhuahsan nghal a,ka ṭhiante awmna lam chu ka pan ding nghal chawt a.

(Website kal zelna atan fakna awm hi khawngaih takin han click zauh rawh le)

Jo chuan,"Kan hman chuan kal i la,anni pawh an inpeih tawh a nih hmel,"a lo ti nghal a. Mawia chuan,"Nia kal ang u,"tih pahin a bike chu a ti nung nghal a,Mawia bike ah chuan ka chuang kai ve nghal bawk a. Mawia chuan,"Bawiha,i pa in i bike a la hren sak che mi a?,"a rawn ti a,"Aw hren sak e maw le,tunlai phei chu ka mark a chhe thei lutuk a engmah pawh ka dil ngam lo,"ka lo ti vat a. Mawia chuan,"Zanin bak chu keipawh ka chhungten ka bike hi khalh chhuah an phal tawh lo. Ka patea an kawl tir dawn,"a lo ti ve bawk a,"A va ho thei ve aw;mahse,lungngai suh ka mark ka ti ṭha ve dawn lawm,"ka lo ti thla ve rawk a.

Kan sualpui tur te chuan min lo nghak reng tawh a. 3 ve ve kan ni a,chu tih loh ah chuan midang 5 am awm bawk a. Chung ho chu min lo en tur hrim hrim a rawn kal an ni thung a. Jo chuan a bike chu a ti thi a,a helmet a hlip a bike aṭang chuan a chhuk nalh a. Keini pawh chu kan chhuk thla rang khawp mai,zanin chu kan rui over lo bawk a min hneh tawh bik lo tawp ang. Pum ruaah chuan kan ṭhian 3 chu kan lian vak lo,Jo hi a lian ber a ni a 5'8 vela sang a ni a. Kei hi 5'6 vel ka ni a,Mawia ve thung erawh hi chu 5'4 vel chiah a ni thung. Mahse,kan zam bik lo kan hma a mi 3 dingte chu 5'10 an hawlh thuak thuakin ka ring a ni. Zam map lovin kan hma zawn a mi te ṭheuh chu kan melh rûn hlawm a. 

Kan sir aṭang chuan palian deuh 1 hi a rawn pen chhuak a,"Awle kan nghak chhuak ta e. A mal malin a fair in in fight ang,tlawm zawk an awm hma chu in insual char char tur a ni,"tih pahin weed chu a blow khu tulh tulh mai a. Mawia chuan min rawn melh pahin,"Hman zana min hnek tu kha keichuan ka bei ang,kawrdum ha saw,"a rawn ti sar sar a. Jo chuan,"Kei chuan kawr sen ha aw,"a rawn ti ve thung a,ka fight tur chu a chiang ta hman zana a hnar ka hnek thi sak pa kha a ni. Min melh dan chu min hnek chak zek zek tih ka hre mai,hman zan kha chuan kan ruih êm vangin kan hneh lo mai a ni. Zaninah erawh chuan kan rui over lova,a hminga taikwando black belt ve ngat kan ni ve bawk a,min cho sual khawp ang le.

Mawia te chu an in fight hmasa ber a,an pumrua en chuan pafa ni áwm an ni. Mahse,Mawia chuan a hlau vak bik lo khawp mai,a tawpah chuan a palian zawk chu a tlawm zawkah a ṭang ta. Lei charah chuan che sawn thei lovin a tlusawp reng mai a,Jo te hun a thleng ve ta. Jo pawh chuan a tumpui pa chu a hlau vak bik lo khawp mai;mahse,rin aiin a hneh lo. Jo zawk chu a ri chawrh chawrh reng mai a,a tlawm tawh dawn emaw ka tih hnuah Jo chuan a tumpui pa khabeah chuan a rawn chhohdawm mai chu,a pa lian zawk chu a let tual mai le. Mawia nen chuan kan lo âu nasa mai a,ka tumpui pa tur lah chuan min rawn fuck🖕🏿 reng mai si. Ka hun a thleng ve ta le;mahse,ka in rin hman hma in ka bekah a rawn ri chawrh mai. Ka lu a hai mawih a,ka tlu nghal der mai;mahse,tluk rei ka tum lo ka in beng kang leh nghal a,"Mipa i nih chuan ka in rin loh laiin min bei tawh suh aw,Tuaia,"ka ti nghal bawrh bawrh a. Ka kut ka kut ka hum ruh a,a hnarah tak chuan ka hnek ve ta siah mai,a hnar aṭang chuan thi a rawn chhuak nghal ngiai ngiai a. A tlu mai dawn emaw ka tia,a tlu miah lo a pai chawn chawn a,a rawn nui huk huk a,"Naupang,tuai min ti maw? Kha aw mipa ka nih hi,"tih pahin ka lam panin a rawn tlan phei a,ka kawngah min man bet a min nawr ta chiam mai a. Mahse,tluk mai ka tum bik lo ka theih tawpin ka nawr let ve a,a tukhum leh a nak velah chuan ka theih ang angin ka hnek bawk a. Mahse,ka kawng min kuahna erawh a na ve khawp mai. Ka theihtawpa na in ka nawr let ve a,ka ṭan hmun siam rem pahin ka in her hret a. Ka theih tawpa na in a nakah chuan ka hnek leh ta chawrh chawrh mai a,vawi 4 vel ka hnek hnu chuan a zawi ve ta. Lei charah chuan a tlu ve ngat mai a,ka beka min hnek na erawh a la na veng veng mai.

"Tho rawh,nizanah khawiah nge i chhuah a?,"ka pa chuan min lo sawi nawk nawk mai a,a hmel chu a dur hle bawk a. Ka in perh tho rang kher mai,"Ka ṭhiante nen game kan khel a,"ka ti zawi sup a,". Ka pa chuan min melh chiang kel kawl khawp mai,ka pa hi pa zaidam tak ni mah se,a thinrim chu hlauhawm tak a ni,"Game khelhnaah chuan i bek hi i sawh em ni? Zu rim te chu i la rawn nam leh nghal a. I nu rilru hah zia hi i hria em?,"a ti bawrh bawrh mai a. Ka nu chuan ngawi rengin min lo thlir tlawk tlawk bawk a,"Ka pa ka tihpalh,tiang khan ka awm tawh lo ang,"ka ti zawi leh sup a. Ka pa chuan ka mitah tak min en a,"Ka fapa neih chhun i ni a,hetiang mai mai a nung tur hian ka enkawl lo che tih hria ang che. Vawiin aṭangin pawnah i chhuak tawh lo ang,rawn tho la in tifai la chaw ei ang che,"a ti hmarh hmarh a,ka nu nen chuan ka room aṭang chuan min chhuahsan leh ta rih a.

Kar 1 chhung chu Inah chuan min khung ve ta ran mai. Ka phone min hren sak a,computer erawh ka khawih min phal sak thung a. Nileng lengin game ka khel a,a changin ka nu eirawngbawl te ka pui ṭhin. Ka nu chuan ka kutah a rawn vuan a,"Bawiha,tinge tiang hian i nun tak mai le? I pa nen hian i tan kan ṭawngṭai reng tih hi theihnghilh suh ang che aw,khawiah pawh kal la min hre reng ṭhin ang che aw,"a ti zawi sep sep a,a sawi zawng chuan a biangah mittui a lo luang ngiai ngiai a. Ka nu mittui tla ka vawikhat hmuhna a ni a,ka rilru pawh a khei zar mai,"Nu,ka tihpalh lutuk ṭha deuhin ka nung tawh ang. I thu ka awih a nga,ka pa thu pawh ka awih bawk ang. Ka u te thu pawh ka awih a nga,ka rui tawh ngai lo ang,"ka ti mawlh mawlh mai a. Ka nu chuan,"Bawiha,ka hmangaih lutuk che nia aw,"tih pahin min rawn kuah a,ni e ka nu hi chuan min hmangaih takzet a ni tih ka hria. Ka u te leh pa pawn min hmangaih lutuk;mahse,keimah hian ka zir lo a ni. Nitin thu ṭha tinreng min hrilh chung pawn ka hre lo der zel a,an thu chu ka ngai pawimawh ngai lo a ni. Vawiin aṭang chuan pangngai deuh a nun ka tum tawh a nga,ka ṭhian sualte pawh thlah mai lovin kawng dik kawhhmuh tu nih ka tum tawh zawk ang.

Sunday a ni a,ka chhungte chu inkhawm turin an insiam sap sap hlawm a. Ka pa chuan,"Bawiha,vawiin chu inkhawm ve ang che aw,"a rawn ti a. Ka pa chu ka hnial hreh rual rualin inkhawm pawh ka hreh khawp mai;mahse,pangngai taka nun chu ka duh ve tawh a ni,"Awle ka lo insiam dawn nia,"tiin room lamah ka lut phei nghal a.

Aw Lalpa,khanu bawk kha ka hmu leh ta. A van hmelṭha chiang tak êm! A ṭhiannu nen chuan an rawn ti ti thla mawlh mawlh a,kei erawh chu ka bike ah ka ṭhu a kha hmeichhia hmelṭha zet kha ka lo thlir leh vauh vauh tawh mai a. A nui hmel te kha a van ṭha tak ém! Khawvel hmeichhia ka hmuh tawh ah chuan a la hmelṭha ber ngeiin ka ring a ni. Min rawn kal pel chiah tih chuan a hla bu kar aṭang chuan thil eng emaw hi a rawn tla thla nawlh mai a,rang lutuk in ka bike aṭang chuan ka chhuk a ka va chhar nghal a,"Ṭhiannu,hei i thlauh a,"tih pahin ka va ûm leh nghal a,"Awii..engtikin nge ka thlauh a? Ka van lawm tak,ka lawm lutuk aw,"tih mawlh mawlh pah chuan a nui sâng a. Kei lah chuan a hmelṭha tak chu âng phuau in ka lo en leh pek a,"Heyy...ṭhianpa,i ṭha em?,"ka hmai zawnah a kut a rawn vai fua fua mai a,ka van zak tak,"Aw ka ṭha e ka ṭha e,kal tawh rawh u,"tih pahin ka bike awmna lamah chuan ka kal phei nghal hlawk hlawk a. 

"Mawla,che chukchu thei lutuk mai,"tiin keimah leh keimah chu ka in be mawlh mawlh a. Ka chet dan nuihzatthlak tak kha a theihnghilh vat ka beisei,a theihnghilh vat loh chuan a zia dawn lo e mai. Ka bike chu ka ti nung a,kan In lam panin ka in khalh haw vûk vûk a.

Khanu bawk kha ka mitthlaah chuan a rawn lang leh ṭhin a. A nuih paha a biang sum rawn khuar te kha a van nalh dangdai tak êm! A ha var tak leh nalh tak mai te kha aww,siamtu hian engtinnge maw a siam bik le? Ka zan mutnaah nise,amah bak ngaihtuah ka nei ngai lo. Mahse,ka hmuh erawh chuan ka lai leh ṭut ṭhin bawk si,a van hahthlak ṭhin tak êm! Mipa zawng zawnga zei lo ber ka ni ngei ang,ka che chukchu thei ropui si.

Thla 1 vel chu ruihhlo khawih miah lovin ka nun ka hmang ve ta. Ka chhungte pawh an lawm khawp mai;mahse,ka ṭhiante erawh ka thlah lem chuang lo. Anni pawh rui turin min thlem ngai bik lo,ṭha tak leh thianghlim takin kan inkawm a ka chhungte pawn min khap lem lo. Mahse,ruih tur hmuh reng chuan tih ve leh mai chu a châkawm ṭhin khawp mai.

"Bawiha,khanu kha a number neih dan min lo ngaihtuah pui teh,"ka ti ve tawl mai a. Jo chu a lo nui hak hak a,"E khai,Class-VII kan nih aṭangin kan inkawm tawh a. Hmeichhe chungchang i vawikhat sawina a ni,a lawmawm lamah ngai phawt ang,"a ti ham ham mai a. Ni e a sawi dik chiah lawm,mipa ni mah i la hmeichhia hi ka ngaihsak ngai lo. Mahse,khanu zet kha chu sawi ngaihna ka hre lo a ṭha vel vek a ni tawp mai,"Mawwh Bawiha..,"ka ti leh tut tut mai a. Jo chuan,"I mak tut tut thei e mai,bialpa te pawh a lo nei ve reng maithei a sin,"a lo ti a,"Nia ni bawk si,"ka ti leh hnuhnawh a. Bialpa a lo nei a nihchuan ka rilru a na ngawt ang,leh ringawt ṭhin a hehe.