I HARSATNA CHU I THLANG ANG PEI NING ATIH

I HARSATNA CHU I THLANG ANG PEI NING ATIH


-- Ramneisang Faiheng




Mitin hi ei hringnun inhervel dan  a hin lungkim lo le lawm kim loin ei um seng ti hi ei hrietin,nun harsatna le beidawngna,thlaphangna le lungkhamna tawp-in-tai hrim um lo chu ei tuok seng ti chu ngaituo hranpa ngailoa ei hril thei a nih. A iengpo khawm nisien ei thu thairang chieng lema ei hriet theina dingin tekhithu hei la in belchieng ei tih.


Manta thur(Tomato)  hi a sel chu ei them chun a puotienga inthawka them chun Sakhatna tak neiin chang takin a um; a kâng chun a damna lai hrim umlo ti thei hiela hriet Rawhmang mei chunga tuilum hmanga  ei suong chun a changna po chun innem tieng panin,ama a sakhatna um po chu bohmangin kut hmawra them khawmi innem tak a hung ni ta thung anih. Chunaw ang takin,Artui ve thung chu a tuomtu khawr var ei chukkawi a a letling zawnga si chun a sunga atak a hlutna po lungral nghal el thei dingin a um thung,dawmna thirtleng hmang lo chun a kawr chukkawi hnung chun chawi le laksawn thei ani ta ngai naw thung, chuong a sunga um, tui ang ela um chu Tui in  mei hmanga suong ani chun intuitak khawm nisien sakhatin a hung um thunga a kawr chukkawi ania khek thlak vawng ani hnung khawm chun luongral el zai a rel ta nawh. Ama chu intuitak khawm nisien sakhata umin dawmna thlirtleng ngai loin kut lawnga dit ang anga chawi thei a hung ni ta thung anih.

Manta thur le Artui hai hi tui le tuomtu kawr nei ve ve khawm ni hai sienla Tui le mei hmanga  sawngbawl an ni chun  an nina nasatakin an thlaka,a pangngai hrim an aw ta naw. Mihriem khawm ei hringnun harsatna le beidawngna tuok ding le tuok mek eini ti ei in hmainawa, harsatna  i tuok mek khan Artui ang am,Manta thur angin a siem che a...? Nangmaa sakhatna,selna huoisenna kha nekchepin a sukhnuoi che am.?

Thuvar pakhat chun hienghin ati, "Harsatna hi mi huoisen ta ding chun Thiembûk anih,Mi dawizep ta ding chun Sahrang ang anih" alo tia, Ani khawp el, Harsatna hi mi huoisen ta ding chun inchuklai thatak inchuktirtu, Thiem zirna in haia inthawka inchuk thei nilo, Tangka sum le pai hauna leia inchawk el theilo,a tul hun huna hmang thei dinga a-ngiel-a-ngan a inchuktirtu anih. Harsatna hi mi tamtak chun an chauin an thluksiet pui hlaka, Harsatna ngampa deua hmasawntu hai chun Kha harsatna ngam taka an hmasawn ngamna lei khan  a khela Lawmna ding chu an hmu hlak anih. Harsatna hrim hrim hi khawlai hmun khawm nisien Lawmna in a zui hlak, kha lawmna insangtak hmu ding chun huoisen taka hmasawn kha ei thaw ding le ei pumpel theilo Harsatna tuok phawt kha ani hlak. Mitin in ang khernaw ni,ei harsatna tuok hai, a thenin Nunghak-tlangval inkar harsatna tuok ei ta, a thenin  Insung khawsak relbawlna a dam,nupa karthu harsatna dam,Tarpi-tarpi kar thu a dam,inkuom le kieng hai le karthu a dam, ruol le pai hai kara dam harsatna hi a chi a tam,Ei nghatna zawn senga harsatna chu a um anih. Harsatna i tuok  ding kha nang i dit thlangna anih.

Harsatna ei tuok ding hai hi mawlmang taka ngaituo chun tu'n am harsatna chu a tuok ding chu thlang ata...? Harsatna tuoklo ding hringnun chu ei thlang lem fur chu ring a um. Anachu harsatna ei tuok ding hi ei dit thlangna ani nalawm ie....
Mihriem haihin hmatieng pana a tam lem beiseiin Tum ei nei senga, ei tum hai in ang kher naw nih. Ei tum hai ei hmutheina ding chun harsatna ei tuok ding hi ani ringawt el bawk sia, Ropuina zawngtu chun Tangka sum amani,mi hai hmusitna am ani tuok ata, Hminginthangna hnawttu hai chun mi hai sawiselna tuok thung a tih. Chuong ang bawkin, tangka sum hnawttu hai chun tangka sum thlaksamna le tangka suma ringumnawna dam,tangka leia mi khiksawna dam tuok an tih. Chu ang chu ani,harsatna ei ditthlangna anina san, Ei tum a lienin a'n sang po le ei tuok ding harsatna kha an hrawl thunga, ei tum a chin po le ei tuok  harsatna a nep thung. Harsatna nep tak tuok nuom leia tum tenau deu neitu ruok chu mi inhnar hringnun nei chu an ta dingin van a ra ang ani nawk thung. Harsatna tuok derlo hringnun neitu chu mi Puitling ni ngai bawk naw ni a, harsatna in a sawizawi lo mihriem hrim hrim,an mihriem chanpui chunga hriethiemna an thlasam hlaka, an thlaphena um chu suongtuona neitu ta ding chun Pengpelep nghak inhnuk ang an ni hlak anih.
       
Harsatna hi mihriem siempui tlingtu umsun anih.  Harsatna huoisen taka palsuok ngamtu chu, Artui ang ela seltaka siemtu, mi hai entawn thlak,mi hai inhnar hringnun inneitirtu le Lawmna huna innuitirtu anih. Harsatna thang lo a hringnun hmangtu chun Hlawsamna ropuitak le khawvel thil laia hlutak ti thei Hlimna chu a hrietnaw kar a chan anih.


Harsatna in a hung nangchil phat che Artui am Manta thur ini inkhaikhin hlak la,harsatna chu Manta thur  anga i sakhatna,i huoisenna hnawt hmangtua in changtir ding am...? I buoina kha hnetu nina chu i pek el ding am ani...?
Annawle,Artui anga i huoisenna sawrkhawma sakhata, i kawr lakthlak a ni huna khawm inman hlawm vawng theina nun petu che ani am ti ngaituo rawle... I harsatna kha ngainepa hne ngei itum chun nangma iengtik a i la hriet ngailo huoisenna kha hung suokin hnepuitu ding chein hung suok ngei atih.