Cuap harhdamnak siatsuah theitu nitin umtlan dan pawl

Cuap hi thaw hipnak lamzin ih a thupi zetnak hmun pakhat a si. Asinan, mi tamzet in cuap harhdamnak hi kan ngaihsak lemlo. Cuap harhdamnak a that lawngah kan taksa dangdang ih thaw (oxygen) khawp-kham ten a thleng thei dingih taksa sunglam ih hnatuannak pawl tha ten a tuah thei ding a si. Cuap harhdamnak siatsuah theitu umtlan pawl kan run tarlang ding.

Thli bal lakih umnak

Tur, leikhu le thli balter thei khu pawl hi hmuntin ah an um. Na inn, hnatuannak zung, lole lamzin pawl ah an um thei. Thlibal pawl hi a cang theitawk in hrial aw. Na inn sung ah leikhu pawl umtam lo dingin nitin thianfai a tul ih na motor pawl khal nitin thiangfai tuah sak a tul. Leikhu tamnak hmun ih na feh ding a sile hmaituamnak (mask) hman ding. Leikhu tamnak hmun kiangkap ah ziangtik hman ah lek hlah (exercise tuah hlah). Na tuah pang a sile, hi a bal zet mi thli (leikhu) pawl cu cuap sung na hip ngah thei ruangah a si.

Exercise tuahlonak

Leknak, Exercise tuahnak in taksa le zungzam pawl a ti cak tha thei ih cuap harhdamnak hrang khal ah a tha zet. Kan lek (excercise) tik ah taksa in thlithiang (oxygen) a tul hleice ruangah cuap in hna a tuan nasa. Anih (leknak) in cuap hnatuannak hrang tha a pek. Thaw napi hip ih thaw suak tivek exercise pawl nitin tuah sak ding.

Kuak fawp  

Kuat fawh hi cuap harhdamnak hrang tihnung bik a siih cuap cancer tiang a suak ter thei. Cuitlun ah awmpit nat, na-ta-si cuap nat le zeng nat tiang a suak phah thei. Kuak fawp tik ah tur-sia pawl cuap ah direct in an thleng cih. Carbon mai-naw-seih, ni-ko tin le kan-ta-ya-si pawl hi kuak sungih tel tur-sia pawl an si. Kuak ruangah na-ta-si cuap thling nat  a ngah theih. Thaw thawtnak zin ti te in thaw thawt a ti har thei. Kuak fawp ruangah cuap cancer thawn thih theinak hi zatek 80-90, lungtha lo (hna-lung nat) ruangah thih theinak zatek 30, cancer ruangah thih theinak zatek 30 a um ih ka sung, dang le phu cancer tiang a suak phah thei. Kuak fawh bannak in harhdamnak ah tam zet a that phah. Kuak ban hnu minutes sungte khal ah cuap le thisen hri pawl amah ten a remawk ruangah a si.

Kut khawlh dah lo

Kut khawlh hi taksa sungah natnak hrik pawl lut thei lo dingih kilhimnak a si. Ei-in hlan le ei-in theh ah kut khawlh theu aw. Dai ngah tuk-khui tam caan ah thilri pakhat khat kan hmang (keng) lole mi pakhat thawn kan cibaiawk theh tinten kut khawlh aw. Kut thianghliam ruangah cuap ih lut ding hrik pawl a ti mal thei.

Taksa rit kilkhawi lo

Tawl tuk khal harhdamnak hrangah a that lo vekin thau tuk khal harhdamnak hrang a tha lo. Na taksa pianghmang le a milaw in na rit lawngah cuap harhdamnak hrang a bawm ding. Thau tuk ruangah na-ta-si timi cuap natnak a ngah thei vekin vaitamin tlaksam ruangah thaw thawtnak lamzin ah buaibainak a suak thei.

Tidai khawpkham lo

Na taksa sunglam hrang tidai dat ngah tha thei dingin tidai khawpkham ten in aw.Tidai dat a tamnak in thaw thawtnak lamzin le cuap sung hrang thathnemnak tampi a nei. Tidai khawpkham ten in lonak in thlan a suak ter ih cuap sung natnak hrik pawl a lut ter thei.

Tikcu khel ih zohawkternak

Harhdamnak a tha tiih ruahawk lai ah taksa sungah nat hrik a lut zo tla a si thei. Natnak kha tuanten hawl hmuh a sile tikcu khel in runsuah ih tuamhlawm thei a si ruangah be siat hlan ah a tha thei.

Fehnak kip ah pavua lole tissue ken lonak

Mi tamnak hmun ah cuap sung natnak hi olsam ten kai a theih. Curuangah mipi tamnak hmun na feh tik ah na hnar le ka kha cang thei tawk ih kilhimnak hrang mask thawn hmai tuam, pavua thawn lole tissue thawn hmai hup tivek pawl tuah ding. Cuap harhdamnak hrang bawmtu kawpi par, apple, pe pawl, thau tam mi nga pawl ei theu ding.

Dr. Khin Moe Moe