tleirawl.in| 05 June 2018: Vawiin 5th June 2018 chawhma dar 11:00 khan MZP Headquarters Saitual chuan Saitual Town Area chhunga zirlai titha chawimawina hun an hmang a. Pu R. Vanlalvena MLA chuan khuallian niin a hmanpui a, MZP General Headquarters Aizawl atangin President L.Ramdinliana Renthlei, H. Lalthianghlima Asst. General Secretary leh hruaitu dang ten an hmanpui bawk a ni.
He huna khuallian Pu R. Vanlalvena MLA chuan thusawi in, "Pawl 10 leh 12 kan nih hun lai hi tan lak kan ngaih hunlai tak a ni a, zirlai kan nih lai hian insum theihna kan neih a ngai a, thlemna sual kan tawk vek dawn a ruihtheih thil laka te kan fihlim a ngai a ni. Zirlaiten nu leh pa te leh zirtirtu te thu kan awi tur a ni a, nu leh pa leh zirtirtu thu kan awi hian malsawmna kan dawng dawn a ni."a ti a. Khuallian chuan, hun hi a hlu a zirlai te hian hun kan hman thiam a ngai a ni. Zirlaite hian khawtlang leh kan ram leh hnam tan kan thiamna te hi hmang ila, ram leh hnam humhalhna pawimawh ber pakhat chu education hi a ni, a ti bawk.
He huna thusawitu dang L. Ramdinliana Renthlei President MZP General Headquarters chuan, "Zirlai titha te MZP in kan chawimawi chhan Mizo zirlaite ah inelna thianghlim awm se kan duh a, kan thenawm hnamdang el pha turin zirna hi uar ila kan duh a ni. Class 10 leh class 12 result kan en chuan zirtirtu hlawh tam zawk sorkar enkawl school aia zirtirtu hlawh tlem zawk private school ten result an nei tha zawk ziah mai hi mak ka ti a. Sorkar enkawl school a zirtirtu ten inenfiah kan ngai a ni. Sorkar enkawl school a zirtirtu in thlau lutuk hi semrual a nih theih nan MZP chuan hmalak kan tum a, Thingtlang lama zirtirtu an indaih loh em em laiin khawpui lam Aizawl ah chuan zirlai 15 awmna ah zirtirtu 9 te an awm a a inkhairual lo lutuk a zirtirtu semrual a nih theih nan MZP chuan hma kan la dawn a ni."a ti a. MZP chu ram leh hnam leh zirlai ten min mamawh na apiangah kan pen chhuak zel dawn a, kan ram tan hian theihtawp chhuah in hma kan la zel dawn a ni a ti bawk.
MZP Headquarters Saitual te hian Saitual Town area chhunga zirlai titha first division chin chung lam class 10 leh class 12 atangin zirlai 86 hnenah chawimawina certificate an hlan a. Saitual Town area chhunga class 10 result nei tha ber Presbyterian English School Saitual leh class 12 result nei tha ber Govt. Saitual Higher Secondary School te hnenah thuziak hlan a ni bawk.
TLEIRAWL
www.tleirawl.in
E-mail: admin@tleirawl.in
No comments:
Thanks for your comment.