ZU ZUAR FANU 28

CHAPTER--28
*R'z Thangluah✍🏻*

"Umm tikhan a nuam deuh,i van thiam em em,"tih pahin Kimkimi chuan ngaihno bei leh beisei nei deuh hian Max chu a rawn melh a. Max chuan,"Aaaa a nuam tak tak maw?,"a hawi sawn vat a,chu hmeichhe tleirawl chhelo zet hmaah chuan a zam chhe nghal der nia. Hetiang hian hmeichhe dang bulah a la awm ngai miah lo. Kimkimi pum a zûtna kut chu lak sawn a tum a;mahse,Kimkimi zawk chuan Max-a kut chu a lo vuan a,"La sawn rih suh,tihian a nuam lutuk. Ka dam sawng sawng mai,"tih pahin Max chu a rawn melh leh ralh ṭhin a. Max erawh chu a lo lâi chhe nghal em em zel mai bawk si,chu tak chuan Kimkimi chu phûrna a pe a,"U Max,engtiknge Aizawlah i haw dawn?,"a rawn ti a. Max chuan,"Dam a Pathianin rem a tih chuan Thawhleh Ni hi ka tum dan chu a nia,"a lo ti vat a. Kimkim chu a rawn ṭhu chhuak a,"I haw daih chuan ka ngai dawn che e,"tih pahin Max-a kawngah chuan a rawn kuah a. Max chuan han tih vak ngaihna a hre bik lo a ni,"Aa nia nangpawh i ngaihawm dawn tho lawm,"a âw te chu a khur leh dar dar tawh a. Kimkimi lah chuan a kuah nghet telh telh thung si,"Min hruai haw ve daih la,"tih pahin Max-a darah chuan a khabe a rawn nghat a. Max chuan,"I nu ten an phal lovang,"a lo ti ringawt a. Kimkimi chu a nui seih a,"I van duhawm tak,i hmuiah hian ka fawp chak e,"Max chu a kuai her a,a hmuiah chuan a fawh sak nghal vang vang a. A tirah chuan Max chuan engtinmah a chhang let lo;mahse,Kimkimi chu hmeichhe zei tak a nih vang a ni ngei ang Max pawh chuan a dawh hle hle thei tawh bik lo. Kimkimi chu a thiam ang tawkin a chhang let ve a,a hmeichhiain a zir bawk a. Chumi zanah chuan duhthaw takin damlai par chu an tlan dun a,Kimkimi chu a hlim takzet a ni. A chhanchu,a mipa duh em em nen hun nuam tak an hmang dun thei a. Mahse,Max erawh chuan a thinlungah in thiamlohna lian tak a nei thung a,a haw hunah Msi leh a chhungte a hmu ngam dawn em ni? A rilru chu a hah a ni;,"Mahse,he thil thleng hi tuman an hre hleinem ka sawi loh chuan tuman an hre lovang,"ti rilru nuah nuah chungin amah leh amah chu a thiam a in chan chawp leh rih a.

Kimkimi chuan,"I ta ka nih hi hre reng ang che aw,nangpawh ka ta i ni tawh. Tikhan,pumkhat kan ni tawh a inṭhen thei kan ni tawh lo,"tiin Max chu a rawn kuah a. Max erawh chuan,"In ha ang inkhawm an bang ṭep ang,"tiin a tho a, a inha ṭha mawlh mawlh a. Kimkimi chuan,"Duat,i haw hunah chuan min hruai ve mai la,ka ngai dawn che sin,"tih pahin Max chu a rawn kuah leh a. Max chuan,"Tunah rih chuan ka la hruai haw ringawt thei lo che lawm. Aizawlah ka han haw chho phawt a nga,ka rawn kal leh dawn tho a. Chumi hunah chuan engkim kan sawifel dawn nia aw,"tiin Kimkimi biangah chuan a fawh sak zauh a,"In ha la,inkhawm an bang ṭep ang,"tiin Kimkimi thuamhnaw let nuai chu a ham khawm a,Kimkimi chu a pe a. Room aṭang chuan a chhuahsan nghal a.

Inkhawm ban chuan Sangtea chu Msi te kawtah chuan a lo ding leh vang tawh a. Notei chuan,"Heyy...lubuk,i inkhawm lo leh pek a ni maw?,"tih pahin Sangtea samah chuan a va tuai sak a. Sangtea chuan,"Inkhawm hi maw ka pension tawh a,"tih pahin a lo nui hak hak a. Msi chuan,"Biak In kawng pawh i hre tawhlo ang nang hi,"a lo ti ve bawk a. Nui hawk hawk chungin an 3 chuan Msi te Inah chuan an in zui lut a.

Msi chuan,"Ee Note,i u hian a rawn bia che u em? Vawiin hi min la rawn be miah lo,"tih pahin a phone chu a kheuh nghal nuap nuap a. Notei chuan,"Aih be bik miahlo,zawh che ka tum ve chiah a. Ngatinge le? A hma kha chuan zingah leh zanah min lo be ziah ṭhin sia,"a ti a,a ngaihna a hriat hmel bik loh hmel hle mai a. Msi chuan,"A zinnaah khan tower a chhia a tia,network hi a nei thei tawhlo a niang a?,"a lo ti leh a. Sangtea chuan,"Max chu mi puitling tak a ni lawm,ngaihtuah suh u. Engmah a thleng lovang,"a lo ti ve bawk a. An ti ti malh malh lai chuan Notei chuan phone call a dawng a,"Awwii..Mama,a nih hi kan la lawk nge aw,"a ti a,a la nghal a;

"Aw Mam,i ṭha em?,"

"Aw ṭha e,tunlai chu network a awm hlei thei lova buaithlak khawp mai,in damṭha em?,"

"Aw damṭha e,inkhawm kan bang chiah a. UMsi te Inah ka lut kawi a,i be duh em?,"

"Umm pawi hleinem," Notei chuan Msi chu phone a pe a;

"Umm,i inkhawm em?,"

"Zanin chu ka chawl ta mai,"

"A ti leh ta,nih engtiknge i lo haw theih ang?,"

"Thawhleh Ni hi ka tum dan chu a nia,"

"Nia lo haw vat rawh kan ngai tawh che,"

"Imm lo haw vat ang,Notei kha ka lo be leh lawk aw,"

"Awle,"Msi chuan Notei chu phone a pe leh a;

"Aw,"

"Thawhleh Ni ah zing chaw eikhamah muang changin ka rawn chho ang aw. Ka nu te kha chu ka rawn call buai tawhlo mai ang,hei zan a rei zel dawn. Tlangah ka chho leh a,a vawt vur mai. Chuan,naktuk chu in ziahfel tur neuh neuh ka nei ka rawn be hmanlo ang che u aw. Thawhleh Ni ah ka rawn chhuah dawnah ka rawn hrilh leh dawn che u nia,Mangṭha phawt u aw,"

"Awle nangpawh mangṭha le,in enkawl ṭha la aw,"

"Awle ka dah aw,"

"Awle,"


Notei chuan,"Tunah pawh tlangah a kal nihchu,Thawhleh Ni zing chaw eikhamah a rawn chho ang. Lo lungleng lutuk lo la aw,"tih pahin Msi chu a va melh zauh a. Msi chuan,"Nia a lo haw ṭep tawh lawm,"tih pah chuan a lo nui sâng a. Sangtea chuan,"Keipawh ka lung a leng ve tho a,min ngaihsak lo e,"tih pahin a lo indawm kun nasa mai a. Notei chuan,"Awii kan tlangval hi a lung a leng a nih hi. Khawnge i duatlaii?,"tih pahin a lo nui har har a. Sangtea chuan,"Dawr bungrua la in China-ah a kal lawm,"a lo ti vat a. Msi chuan,"Val lunglenga hian sumdawng hausa a ngai anih hi,kan hnêm thiamlo che nia aw,"a lo ti a,a nui zui hawk hawk a. Sangtea chuan,"In sual e mai min hnêm tawp suh u,thingpui pawh min lum sak i tum lo,"a lo ti deuh hmuk a. Notei chuan,"Awii in la cute vel tawp ta ni,innu a lo haw hun chu aw i mark a ṭha dawn e,"a ti a,a nui leh har har a. Msi chuan,"An nu zin hi chu keini 2 hian kan tuar ziah mai tiraw? Thingpui lum sak ngai ziah bawk sia,"tih pahin a nui sun sun a. Sangtea chuan,"Ka lung a leng lutuk a,thingpui pawh ka lem thei dawn mawn le?,"tih pahin a meizial chu a ṭan nghal a. Notei chuan,"Awiii Lubuk,i over mai nihchu,"tih pahin Sangtea sam chu a rawn tuai leh a. An 3 chuan an nui ho bawk bawk a.

"Awii kei hi engmah ka ngaihtuah lova,naktukah test tur kan nei tak e. Ka haw san mai ang che u,"tiin a tho nghal vut a. Msi chuan,"Ṭha deuhin zir tur aw,"tiin a thlah liam a. Notei chuan,"Awle tehreng mai,muttui phawt u aw,"tiin a chhuahsan ta a.

Sangtea chuan thingpui in rik hrawih pahin,"I nu hi khawnge?,"a ti a. Msi chuan,"Kohhran hmeichhe hovin hla an en a,an lo la haw lova,"a lo ti vat a. Sangtea chuan,"Max chu i ngai tawh viau ang a,"tih pahin a nui suk a. Msi chuan,"Nia a ngaihawm ve khawp mai,zin tawhlo se a ṭha ang,"a ti a,a nui ve suk a. Sangtea chuan,"Max te ang mipa fel leh ṭha,puitling bawk si i tawng hi chu i vannei ngawt mai,"a ti a,thingpui chu a lem ri khalh a. Msi chuan,"Nangpawh ka ṭhiannu Emily te anga,hmeichhe fel leh hmelṭha puitling bawk si i tawng hi chu i vanneiin ka tiin ka lawmpui takzet che a ni,"a lo ti ve bawk a. Sangtea chuan,"Max chuan a duat che em?,"a ti leh a. Msi chuan nuih sak pahin,"Umm zei viau lo mah se,a ma tawkah chuan min duat thiam ve khawp mai,"a lo ti vat a. Sangtea chuan,"Mipa zei deuh chu duh reng reng loh tur,an lerh duh tlangpui,"a ti leh a. Msi chuan,"Nia a dik ang,Max hi chuan lerh dan pawh a thiamlo ang,"tih pahin a nui sen sen a. Sangtea chuan hlim taka Msi nui hmel chu a thlir ning thei thlawt lo a ni,"Tikhan nui reng ang che aw,hlim taka i nui hmel ka hmuh hian keipawh hi ka hlim ṭhin a sin,"tiin Msi kutah chuan a lo vuan a. Msi chuan,"Aaaah...aww nia ka hlim reng dawn lawm. Mahse,i kut hi,"tih pahin Sangtea chu a rawn melh zauh a. Sangtea lah chuan a kut laksawn a hnehin,a vuan nghet sauh sauh a,"Ka hmangaih che a,i hlimna hi ka ngai pawimawh ber ṭhin. Chuvang chuan a nia,ka hmeichhe hmangaih miah loh hnenah hmangaih biahthu ka hlan ṭhin. I ṭhiannu ka tihnat chuan i na ve zel ṭhin tih ka hria,a chhanchu i ṭhiannu hi i tan chuan a hlu takzet a ni tih pawh ka hria. Chuvang chuan i ṭhiannu hi ka tina tawhlo ang tih ka tiam a che,"Msi kut a vawnna chu zawi muangin a thlah riai riai a. Msi chuan a áw a thian kharh a,"Awle a ṭha e,khatiang thu i sawi vang khan ka lawm takzet a ni,"a lo ti ve mawlh mawlh bawk a.

Msi chu a hnaa kal turin a insiam malh malh lai chuan a khuma a phone chu a rawn ri a,lo call tu chu number hlang a ni. Mahse,Msi chuan a chhang nghal vat a;

"Aw Hello,"

"Dr. Msi a ni em aw?,"

"Aw ni e,khawi aṭangin nge aw?,"

"Ee hetah ITI Veng aṭangin a nia,vawiinah OPD ah i ṭhut dawn leh dawn loh kan hre duh a,"

"Ee aw ṭhu dawn e,Medicine ah ka ṭhu ang aw,"

"Awle kan lawm lutuk e aw,"

"Awle keipawh ka lawm e,"


"Nu,vawiin chu rawn haw hma ka tum deuh tawh dawn nia aw,"tiin a nu chu a kuah a. Pi Ruati chuan,"Umm i rawn haw tlai dawn chuan min rawn hrilh tawh la aw,"a lo ti vat a. Msi chuan,"Awle hrilh tawh ngei ngei ang che,nih ka kal aw bye,"a chhuak a. Pi Ruati chuan,"Awle bye le,fimkhur la aw,"tiin a chah zui nghal mawlh mawlh a. Msi chuan,"Awle tehreng mai,"tih pahin Hospital-a kal tur chuan a chhuak phei nghal a.


Damdawiinah chuan mipui chhiar sen loh chu an lo zi nuai nuai tawh a. Reilo te a ṭhu chawl a,ziah fel tur neuh neuh a neih ho chu a ziak fel nghal sawk sawk a. Chumi hnuah OPD lamah duty turin a phei leh nghal a.

OPD lamah pawh chuan an lo tam tawh khawp mai,a ṭhutna hmun turah chuan a ṭhu nghal a. Doctor dang erawh hmuh tur an la awm lo,an clinic-ah an la buai aniang a ti mai a. A dawhkan a lehkha vel chu a rem fel a,damlo hming kohtu bulah chuan,"Keichu ka in peih tawh e aw,rawn ko tawh la min nghak rei tawh hlawm bawk sia. An tan pawh a ninawm ve thei a,"tiin a hrilh a. Damlo hming lam tu chuan,"Awle,"tih pahin damlo ho hming chu an card in dawt dan chuan a lam ṭan ta a.

Nu 1 kum 30 vel mi hian a fanu ni awm tak kum 4 mi vel chu a rawn kai a,in thlahrun hmel takin Msi dawhkan hmaa ṭhutnaah chuan a rawn ṭhu phei a. Msi chuan nui sâng chungin,"I fanu mi a? A hmelṭha hle mai a,"tih pahin naute biangah chuan a piai zauh a,chu nu chuan,"Aw ni e,zinga rawn phone tu che kha keimah ka nia,"a lo ti vat a. Msi chuan,"Ee anihchu aww naute hi mi i entir tur chu?,"a lo ti nghal vat a. Chunu chuan,"Aw ni e nizan hmasa ṭang khan a khawsik hi a reh hlei thei lova,a khua asik lah hian a tlun leh vak ṭhin a. Nachhawkna in a chhawk chhung chiah hi a ni mai,a khawsik reh hun chu,"tiin a fanu damloh dan chu a sawi nghal mawlh mawlh a.

Msi chuan,"Aww a va zia lo ve aw,naute hmelṭha deuh hi tinge a lo dam loh mai mai le aw,"tih pahin naute pang chu a kut chuan a dek a,"A pang chu a sa vur mai,i khawsik hi check lawk ang aw,"tih pahin khawsik enna chu naupang zakhnuaiah chuan a rawn zep a,"Naute hmelṭha hi a damloh kan phal tawh lo a nia tiraw? I hmelṭha bawk si,,"tiin a nui sâng a. Reilo te hnuah khawsik enna chuan tûût tûût a rawn ti ta a,Msi chuan a phawi nghal a,"Rin aiin a khawsik hi a sang daih mai a,tun hnaiah ruah te a do em?,"tiin Naute nu chu a zawt leh a. Naute nu chuan,"Aih do lo,a school kalnaah pawh keiman ka thlah a,ban hunah ka hruai leh thlap ṭhin a. School a kal bak hi chu pawnah a chhuak vak ngai meuh lo,"a lo ti vat a. Msi chuan,"Nihchuan na dang a sawi ngai em?,"a ti leh a. Naute nu chuan,"Umm a zun hian a tai bawr vel hi na a ti ṭhin a,"a ti leh a.

"Nihchuan,a zunkawng lam fello a ni maithei a ni. A zun kan test dawn nia aw,"tiin bur fim tereuhte hi a rawn pe a,"Pawnah sawn zunna a awm a,tahchuan va zun tir la a zun chu hetah hian in dawh a nga. Heta rawn kal tawh lovin Lab ah i kalpui dawn nia aw,"tiin a hrilh a. Naute nu chuan,"Awii kal dan ka van thiam awmlo ve aw,"a lo ti a. Msi chuan,"Lehkhaah hian ka ziak a nga,in kal dawn nia aw,"tiin an kaldan tur chu a ziahsak a,"Chuan OPD Card leh hemi hi keng bawk ula aw,chuan a result nghah chhung chu a rei lovang. A result chhuah veleh hetah i rawn kalpui leh dawn nia aw,"tiin a hrilh thlap a. Naute nu chuan,"Awle kan lawm lutuk e,"tiin a fanu naupangte chu a kai a,zun test tir tur chuan an kal chhuak nghal a.

Kimkimi nu leh pa te chu huanah an kal a,a u mipa te 2 pawh chu Y.M.A hnatlangah an thawk ve ve a. Inah chuan Kimkimi leh Max chauh chu an awm leh ta a,Max chuan a hna thil vel ziah fel tur neuh neuh a neih ho chu a ziak malh malh bawk a. Kimkimi erawh chu thuamhnaw su in a buai khawp mai a.

Chhun dar 12.00noon rik dawnah chuan ruah a rawn sur leh ta buan buan mai. Kimkimi chuan,"U Max,thuamhnaw pho min lo seng pui teh,"tiin pawnah a tlanchhuak nghal. Max pawh chuan a va sengpui ve nghal sawk sawk a,an theihtawpa hmanhmawhin seng ve mah se,ruah kha a tam êm avangin an thuamhnaw ṭhenkhat ho chu a nan huh hman tho a.

"Awii ka ngei lutuk tunlai khaw awmdan hi,"tiin a âng hlawih hlawih a. Max chuan,"Fur lai chuan hetiang hi a ni ṭhin lawm,engtinnge kan tih dawn heng ho hi?,"tiin thuamhnaw hnawm chup ṭhutthlenga an vawm vûm thur chu a melh a. Kimkimi chuan,"Awii ka buaipui peih tawh lo,tikhan awm tawp rih mai rawh se,"tiin ṭhutthlengah chuan a ṭhu tau nghawng nghawng a.

Ruah chuan amah chauha sur mai chu nuam a ti biklo a ni ngei ang,thlipui nen an rawn thawk leh ta. Max chuan tukverh te chu a khar nghal sawk sawk a,kawngkhar pawh chu kalh loh chuan a in hawng leh nghal zel a Max chuan a va kalh nghal bawk a. Kawl a phê zuai zuai a,ṭek a tla chhuai chhuai bawk a,"Ka hlau a nia,kalsawn tawhlo teh,"tih pahin Kimkimi chuan Max chu a rawn kuah a. Max pawh chuan a rawn kuah ve leh mai a,"Umm ka kalsawn tawh lovang,"a lo ti a. Ṭhutthleng seiah chuan in ngheng rialin an ṭhu dun a.

Chawhnu lam dar 1.00pm ah chuan thlipui tleh pawh chuan ban zai a rel ve ta rih a. Mahse,ruahpui sur erawh chuan ban zai a la rel ve theilo a ni. Kimkimi chuan,"I taksa hi a lum nuam lutuk,"tiin Max-a beng bulah chuan zawi sap hian a rawn ti a. Max chu a lo nui suk ringawt a,Kimkimi chuan,"Khumah mu phei daih ila,hetah chuan mut a rem lo e,"tih pahin Max chu beisei nei tih hriat tak hian a melh leh ralh a. Max chuan Kimkimi mit meng mawi tak a hmuh chuan a buai zo vek ṭhin,Kimkimi sawmna pawh chu a hnar leh thei ta lo. Kimkimi chu a pawm a,room lamah a phei pui ta a.

Kimkimi leh Max chuan hun nuam tak hmangin duhthaw takin damlai pialral chu an chen dun leh ta a. Kimkimi chuan,"U Max,lo rai ta ila min nei duh a ngem?,"a ti mauh mai. Max chuan Msi a ngaihtuah chhuak zawk a,a thil tih chu a dik lo tih a hria a;mahse,tlanchhiat san turin chakna a nei tawh silo. He tleirawl hmelṭha zet zûnah hian a uai nghet tawh em em mai si. Kimkimi chuan,"Mawwwh,ka zawhna chu i hrelo mi? Min neih i tum lo mi?,"a rawn ti leh a. Max chuan,"I rai chuan ka nei ngei ang che...,"a lo ti vat a. Kimkimi chuan,"Duhawm reuh lutuk mai,min neih leh duh loh vaih aw ka in awkhlum a ni mai,"tih pahin Max chu a rawn kuah a. Max chuan,"Nei dawn chiang ee le,nang ka neih lohvin tumah neih tur ka nei hleinem,"a rawn ti a,a nui var var a,"Ka thutiam ka bawhchhe ta sa sa,vawng reng a ṭul tawh love. Kimkimi hi ka ta tur dik tak chu a nih hi,"ti rilru neuh neuh chungin Kimkimi chu a kuah a,a fawp a,a duhtawkin a khâl kual leh ta a.