ZU ZUAR FANU 41

CHAPTER--41

Ziaktu: R'z Thangluah

Columnist, www.tleirawl.in

Hun leh ni a liam a,Sangtea leh Msi pawh hlim takin an in kawp chho ve ta. Mahse,an ṭhiannu chanchin engmah an hre ngailo chu mak an ti ṭhin a,Emily nu bula an zawh lahin Emily nu chuan a dam ṭhat thu in a lo chhang mai zel bawk si. Msi chuan nuam lo tih châng a ngah ṭhin khawp mai,"Emi chu engnge a an ang le? Kan pahnih vang hian hrehawm takin hun a hmang mek ang nge? Nun hlim tak a hmang zawk le? Keichu Emily lakah hian ka dam chhungin ka in thiam thei tawh ngai dawnlo a nih hi,tichung hian a ṭhian ṭha ber tiin ka la in chhal ve chu a ni sia,"a ti a,a hmai a hup a a thaw hak a. Sangtea chuan,"Tinge tiang khan i ngaihtuah a? Emily chuan nun hlim tak a hman mek i beisei ve lo em ni?,"tiin Msi chu a rawn kuah a. Msi chuan,"Khami ni aṭang khan a chanchin engmah ka la hriat loh hi. A number lah call tlang theih a ni bawk si lo,"a lo ti leh a. Sangtea chuan,"A nu ngei pawn a ṭhat thu min hrilh kha,tinge tiang khan i indawm kun reng mai le,"a ti leh a. Msi chuan,"Ka ngai êm a ni,"a lo ti zawi sap a. Sangtea chuan,"Ni e ka hrethiam che lawm;mahse,kan inhmuh leh hunah chuan hlim takin kan inhmuh ngei ka beisei tlat a sin,"a lo ti ve thung a.

Hmana Zu zuar fanu ti a hmusit taka an nuihsawh ṭhin kha,tunah chuan Doctor thiam tak leh ropui tak niin midang tan entawn tlak leh,midang tana malsawmna a lo ni ta. Amah hmusit a nuihsawh ṭhin tu te ngei chuan damna beiseiin a hnen an pan ve ta.

Tlangval fel tak kohhran leh khawtlang a in hmang em em,kohhran leh khawtlang pawhin an chhawr em em ṭhin kha. Tunah chuan,zu ngawl vei niin mi te nuihzat leh kawh rawn a lo ni ta.

Kohhran Upa fapa inkhawm pawh ngaihsak lem lo. Mahni tal tal a tal ve tawp mai,rui ve reng ṭhin pawh kha tunah chuan veng khat tlangval leh entawn tlak tia chhal ngam a lo ni ve ta.

Kum tam fe hmangaihna awmzia hre em em lo. Mahse,mipa duh deuh a nei a a hmangaih emaw ti a rei fe lo zui tawh tu ngei pawh kha. Tunah chuan,hmangaihna dik leh hmangaihtu dik tawngin a nun bul a rawn ṭan ṭha ve leh ta.

Msi leh Sangtea chuan kuhva an kheh dun malh malh a. Msi chuan,"Nizan chu ka mumangah Emi ka hmu a,ka ngaih zia chu. Ka harh chuan ka mittui a tla sin,"tiin a mumang chu a sawi siam siam a. Sangtea chuan,"Mumang te hi in ngai thutak thei lutuk a,mumang mai mai a lawm Emily chu a ṭha em em ang,"tiin Msi chu a hnem malh malh a. Msi chuan,"A chungah thil ṭhalo a thleng ang tih ka hlau êm a tin ni,"a ti leh a. Sangtea chuan,"A thim zawngin thil thlir ṭhin suh. Nangmah ngei pawn i sawi ṭhin kha,'Thil reng reng chu a eng zawnga thlir thiam tur'i tih ṭhin kha,"a ti leh a. Msi chuan,"Ni e a dik chiah lawm. Sangte,ka lawm e aw ka bulah i awm reng ṭhin a ka hmangaih che nia,"a ti a,a kuhva cheh lai chu a dah a ngawi rengin Sangtea chu a kuah vawng vawng a. Sangtea chuan,"Keipawn ka hmangaih che lawm. Engtik hunah pawh i tan ka awm reng ṭhin ang ka tih kha,"a lo ti zawi sap a. Msi biangah chuan dim te in a dawm a,"Ka hmangaih lutuk che,engtikah mah ka kalsan ngai lo ang che,"a ti a,Msi hmui sen vam ham maiah chuan duhthaw takin a fawp vawng vawng mai a.

Emily te chu kawngkhar pawh kik lem lovin an rawn lut hlawl mai a. Msi'n Emily hmel a hmu chu a hlim kher mai,a ṭhutna aṭangin a tho nghal a Emily awmna lam chu a pan nghal a,"Bawih,ka ngai lutuk che. I ṭha em? Tinge engmah sawi lovin min kalbo san a,"tih mawlh mawlh pahin ṭap deuh pur chungin Emily chu a kuah nghal a. Emily chuan,"Keipawn ka ngai lutuk che sin. Chuan,engmah sawi lova ka kalbo san che vangin tihpalh lutuk aw;mahse,thu lawmawm hrilh tur che ka nei a sin,"tih pahin Msi mittui luang chu a hruk hul sak mawlh mawlh a. Msi chuan,"Eng thu nge?,"a lo ti vat a. Emily chuan a bula tlangval hmel fel tak ding chu a en a,"Hei hi ka hmangaih a nih hi,a hming chu Hriata a nia. A fel lutuk a sin,a ni nen hian nun bul kan ṭan chho ve mek a ni,"tiin Hriata chu a hmelhriat tir nghal a. Msi chuan,"Awii a ni maw? A van lawmawm tak êm! Ka van hlim tak ṭhianpa,ka ṭhiannu hi hlim deihin siam ang che aw,"a ti zui mawlh mawlh a. Hriata chuan,"Tehreng mai engtiklai pawha a bula awm reng turin ka in peih reng e,"a lo ti ve bawk a. Msi chuan,"Lo ṭhu phawt teh u,keichu ka hlim lutuk hi ka thaw te hi a tawp mai dawnin ka hria,"tiin nui var var chungin a âwm a dawm a. 

Emily chuan,"Chuan maw,hei hi Sangtea chu a nia. Chuan,hei hi ka ṭhian ṭha ber Msi chu a nia,"tiin Hriata chu a hrilh a. Hriata chuan,"Ka hmu che u chu ka lawm khawp mai. Emily hnen aṭang hian in chanchin duhawm tak tak te ka lo hre tawh a,in chungah hian lawmthu sawi sen loh ka ba in ka hria,"a lo ti ve bawk a. Sangtea chuan,"Ee Ṭhianpa,i chungah hian lawmthu sawi kan ba zawk a sin. Kan ṭhiannu i lo enkawl tawhna zawng zawng avang khan kan lawm takzet a nia,"a lo ti ve bawk a. Emily leh Msi te pahnih lah chuan sawi tur an ngah em em mai leh nghal,an bulah chuan mipa 2 te chuan ngawi rengin an lo nghak tawp mai a.

Max chu zu vangin a taksa chu a chhe mek a,a nupui lah chu nalh zet zet a in chei in an chhuak ziai ziai reng mai bawk si. Hun liam tawh a ngaihtuah let a,Msi kha engvanga phatsan nge a nih? Ngatinge a phatsan? Msi tluka hmeichhe fel leh ṭha hi an awm a ring tawh lo a ni. Mahse,tunah chuan Msi chu a tan chuan vana rah ang a ni ta si. A rinawm loh rah chu a tel mek a ni,an fanu lah an enkawl theih loh avangin a nu te In lamah a awm a ngai bawk a. A zu in nasat lutuk avangin a hna aṭangin suspend a ni leh tawh bawk a,a pa lahin a ngaihtuah duh tawh bawk si lo. A nun chu a hahthlak takzet a ni,nitin ṭhiante nen Rv ah Zu la turin an kal ziah a. A kutah pawisa a awm tawh chuan Zu manah a hmang zo nghal vek ṭhin;a nun chu hahthlak ti ve viau ṭhin mah se,a nun chu sim a tum chuang lova.

Notei chuan,"Nu,tunlai UKimkimi awmdan hian min ti zak thei khawp mai,"a lo ti hlak hlak a. A nu chuan,"Ni e a buaithlak a nih hi tiraw? I u lah chu nitin a rui reng a,harhfim lai a nei ngai bawk si lo. I pa lah chuan a hnungchhawn tawh bawk si,a hahthlak a ni,"a lo ti ve bawk a. Notei chuan,"A fanu hian a nu zia hi chhun lo hram se ka ti ngawt mai,"a ti leh a. A nu chuan,"Msi kha phatsan lovin lo pawm ta se,hetiang hi kan thleng hauhlo ang maw le,"a ti leh a. Notei chuan,"Dik chiah mai,U Msi te anga hmeichhe fel hi chu an vang tawh viau ang. A pasal chu a vannei ve ngawt ang,"a lo ti leh mawlh mawlh a.

"Pasal nei tawh i ni tih hi i inhrelo nge? I hrelo der zawk le? Nula ang maiin tinge i khawsak a? Nilo nula ang mai pawh a ni lo,KS ang maiin i khawsa a nih hi. Zanah i chhuak a,zan rei tak tak thlengin i chhuak a. Fanu i nei tih pawh i hre lo em ni?,"Max chuan a nupui zan leng tur chu a ânkhum zek mai a. Kimkimi chuan,"Ve a che,nanga zu rui khan min zilh ve khang lang lo mai teh aw. Ka duh duh naah ka chhuak ang,nangpawh i duh duh naah i kal a,i rui ṭhin tho a ni lawm ni?,"a ti ve pang pang mai a. Max chuan,"Kei min ngaihtuah lo anihpawn i fanu tal hi chu ngaihtuah ve ta che. A lo len hunah eng ang in a ngaih ang che tih te hi ngaihtuah ve ta che,"a ti leh a. Kimkimi chuan,"Hmmp nangpawh rui reng lo khan i fanu chu enkawl mai ta che. Keichuan hrehawm takin thla 9 chhung ka pai a,chumi hnuah harsa takin ka hring chhuak leh a. A bak chu lo buaipui ve mai tawh rawh,"tiin thinrim zetin a chhuak tau nghawng nghawng mai a. Max chuan,"I va han rapthlak tak e aw,ramsa pawh i tluk lo,"a ti zui nang nang a.

Naute in kum 1 pawh a tlin hma hauhin a nu chuan a uire san ta nge nge a. Max-a te chhungkua chu an buai map map khawp mai,"A va hahthlak ṭhin em ve aw,Kimkimi chuan pasal a um a maw? A va tlawm thlak ve aw,"Max-a pa chu In chhung dungah chuan a tei kual sek mai a. Notei chuan naute chu a pua a,"Bawihtei hi chu tihian keiman ka enkawl a nga,pasal neih a ngailo ni mai lawm,"tih pahin naute biangah chuan a fawh sak zauh a. Max-a pa bawk chuan,"Khawng Max-a pawh hi a awm reng reng a? A lo rui thle leh tawh a mi a?,"a ti a,a hmelah chuan an chhungkaw chunga thil thleng vang chuan a thinrim takzet tih a lang nghal a. Max-a nu chuan,"An Inah a awm kha,"a lo ti zawi sup a. Max-a pa chuan,"Phone teh,"a ti bung nghut a. Max-a nu chuan Max chu a call nghal a;mahse,vawi tam fe a call hnu pawn chhanna a dawng thei lo. Max-a pa thinrim erawh a hma aiin a nasa a,"A chatthla leh tawh a niang chu maw le,keiman ka ca kaitho a nge,"tiin a chhuak nghal a,a nupui chuan a rawn zui nghal bawk a.

Kawnghar chu chhung lamah a lo in kalh a,"Rawn hawng teh i muhil a mi?,"Max-a pa chuan kawngkhar chu a chum dawt dawt a. Mahse,In chhung lam aṭang chuan eng thawm mah a awm lo a ni. Max-a nu chu a ngaih a ṭha thei tawhlo a,"Bawiha pa,thlang lam tukverh aṭangin luh dan kan ngaihtuah mai dawn mi? Hetiang ringawt chuan a ngaihṭhat thlak loh e mai,"a rawn ti a. A pasal chuan,"Ummmh kan tum poh a niang chu,"tiin Max te In thlang lam ah chuan an chhuk a,Max te In hi a sang vak lova puitling tan chuan thlang lam tukverh aṭang chuan luh a awlsam a ni.

Max-pa chu tukverh aṭang a luh tum chuan saza chu a zawh phei a,tukverh pawh chu a lo in hawng huau a. Mahse,In chhungah chuan eng thil nge a hmuh tak le? A fapa ngei chu an ceiling fan-ah chuan a lo in khai zuar mai le,"Bawih a Nu,kawngkhar lamah lo han awm rawh vat vat in,"tih pahin tukverh aṭang chuan a zuang lut nghal a,kawngkhar inkalh chu a hawng nghal sawk sawk a. Chumi hnuah a fapa lo inkhai zuar chu chhan tumin a bei nghal a. A nupui erawh a lo ṭap pur thung a,"Bawiha,eng thil nge i tih tak hi?,"a ti mawlh mawlh a. A pasal chuan,"A taksa a la lum e,a mar pawh ka la hmu e ;mahse,a phu zawi khawp mai Msi kha call nghal teh,"tih pahin a fapa thi chhawnga let reng chu a bawihsawm nghal mawlh mawlh a.

Msi leh nurse 4 vel chuan Max chu an buaipui nghal mawlh mawlh a,pawn lamah chuan Max-a chhungte chuan an lo nghak ṭhap bawk a. Nurse 1 chuan,"Keichu ka beidawng tawh,duh aiin a harh chhuak har mah mah a ni,"a lo ti zuai raih a. Msi chuan,"A enkawltu ber khatianga i beidawn mai te chuan damlo i enkawl dam thei dawnlo a sin. Beidawng mah ta che,a nunna hi kan la chhan hman em em ang. Kal tur nise,a tirah khan a kal tawh ang,"a lo ti thung a.

Msi chu hmel hlim sângin a rawn chhuak a,"Engkim a ṭha vek tawh e,a thaw leh a mar phu te phawh a pangngai tawh e aw. Mahse,tunah chuan a la hmuh theih rih lova,nakinah a hmuh theih hunah nurse in an rawn hrilh dawn che u nia. Mi zai tur ka nei a,ka kalsan phawt ang che u aw. Nakinah ka rawn kal leh ang,"tiin Max-a nu leh pa te chu a kalsan ta a.