SPECIAL POST
★Opeey-a khiangte
BIAK IN leh a bul vel hi kan thlamuanna hmun a nih laiin, a chang chuan, thil rapthlak pui pui a thleng thin tlat thung. Chung thilthleng 10-te chu chhiar chhin teh ang u..
★10) The Mysterious Suicide Of ‘Wm L. Toomey’ :
December ni 4, 1982 khan, pa hang ve lam deuh hi Sacred Heart Catholic Church, Boise, Idaho-a awmah chuan a lut a.
Kum 40 mi vel ni awm tak a ni a, sual thupha chawi a, Father hnena inpuanna nei tura lo kal a nih hmel. Mahse, chutih lai chuan midangin Father hnenah chuan inpuanna an lo la nei mek a. A hnu lawkah, chu pa chu chhuatah a lo let reng mai a ni.
A hnua an hmuhchhuah chu, inthahna damdawi mum cyanide capsule a dawlh a. Tu nge a nih tih hriat theihna tur thil amahah a awm reng reng lo mai a, $ 1,900 leh thuziak 'pawisa chu amah phum nana hmang tura a ziah' a ipteah a lo ak a.
Thuziak Note-ah chuan, “Wm L. Toomey" tih a in sign a, mahse, chu chu a hming dik a nih hmel lem lo. A chhan chu, Wm L. Toomey tih chu puithiam kawrfual siam thin company hming a ni miau si a ni.
December ni 21, 1981 khan, Catholic puithiam Father Patrick Ryan-a chu motel, Odessa, Texas-ah thah a lo ni tawh a. Ruak vekin a lo thi a, a kut hnungkhirhsak a ni bawk. Tin, James Harry Reyos-a'n, Father Ryan-a kha, khami hma zan khan, ka khawih a ni tiin, rui tak chungin police a call a.
Chuti na na na chu, Reyos-a chu man niin kum 20 chhung tantir a ni. Mahse, Reyos-a chuan a thu a zuk leh a, evidence atang pawhin, thil thlen zan khan, Reyos-a chu Odessa-ah a awm theiin a rinawm chiah loh.
A kum leh lawkah, Reyos-a tuapthattu a nih lohzia Evidence nemnghet turin, khatiang chiah khan midang thah an ni leh ta a ni. November 1982-ah, Catholic puithiam dang, Father Benjamin Carrier-a pawh, motel, Yuma, Arizona-ah thah a ni leh a. Father Ryan-a ang thovin, ruakin a awm a, a kut hnungkhirh a ni.
“Wm L. Toomey” khan Kawnghren buckle danglam bik a hreng a, chumi zawrhna hmun chu Arizona gift shop a ni tih an hrechhuak a, mi thenkhat rin danin, Puithiam pahnih thattu kha amah Wm L. Toomey a ni.
A sual thupha chawia Father hnena a inpuan zawha thi nghal mai turin, Cyanide capsule kha a ei a. Mahse, a inpuan hmain damdawiin hna a thawk a, Biak In chhuatah thiin a let ta der niin an rinthu sawi ta ngawt mai a ni.
__________________________________________
★9) The Disappearance Of Father Henryk Borynski :
A pian leh murna Poland ram chhuahsanin, Father Henryk Borynski chu Bradford, England-ah a pem a. Tichuan, Father Henryk Borynski chu Polish mi 1,500 cheng veho tan Catholic chaplain hna a chelh a.
Tin, Borynski chu Polish priest dang, Canon Boleslaw Martynellis thlaktu kha a ni. Tichuan, Thla 10 chhung chaplian hna a chelh ta tihah, July ni 13, 1953 tlaiah Phone call mak tak a dawng a, Polish tawngin an inbia a. Mahse, landlady pakhatin, "A tha alawm, ka kal e" tiin Borynski-a'n Phone-a an inbiak a tihtawp tak kha a lo hre fuh mial a ni.
Borynski chu a chenna atangin a chhuak a, chuta chin chu hmuh a ni leh tawh lo a ni. Chutih hun laia Bradford-a Polish mi awmho chu, an ram atanga refugees-a va awm an ni deuh vek a ni. Thuthangah chuan, Borynski-a'n a hna/dinhmun chelh lai a chelhsak tak avangin, Canon Martynellis kha a lungawi lo hle mai a.
A communist agents-te chu, Borynski-a vehthlem a hruaichhuak a that turin a tir ta a ni. A thih hma lawk khan, Borynski-a chuan, Martynellis hnen atangin Phone call a dawng a. Martynellis-a chuan Borynski-a hnenah, ka inah min rawn hmu teh a ti niin thuthang a awm bawk a ni.
Mahse, Martynellis-a chuan Phone atanga an inbiak loh thu sawiin tan a khawh ve tlat thung. Thla khat hnuah, Martynellis-a chuan, Mi pahnihin a inah an rawn bei thut a, Borynski-a bo tak thuah khan ngawi tlat turin an vau niin a insawi a. Chumi atanga kum hnih a veiin, Heart attack-in Martynellis-a chu a thi ve leh a. Tichuan, Father Borynski-a bo chhan chu chhuichhuah theih a ni lo hlen ta a ni.
__________________________________________
★8) The Ghost Of St. Mark’s Episcopal Church :
St. Mark’s Episcopal Church chu kum 1868-a sak kha a ni a, Cheyenne, Wyoming-a historical landmark niin an sawi. Thuthanga a lan danin, a hrang nghe nghe a, Thlarau chuan story dangdai tak a nei bawk a ni.
Kum 1886-ah, Biak In Tower siam nan ruahmanna rel fel a ni a. Chumi atan chuan Swedish stonemasons pahnih hire an ni a, mahse, Tower siam zawh hmain an bo ta daih a ni. Chuvangchuan, kum 1927 thleng khan, Tower chu sak zawh lohvin a awm ta reng a ni.
Thil nihphung chu, Biak Inah chuan, thil rapawm leh Thlarau inlar hmuh a ni thin a. Tower siam chhunzawm an tum apiangin, Thawktute'n an hlau hle a, an sak zawh hmain chhunzawm ngam tawh lovin, an tlanbosan zel a ni. Kum 10 kal ta khan, Reverend Eugene Todd chu St. Mark Biak Inah pastor-in a awm a.
Ani pawh chuan Thil mak tak tak hriat a nei nual bawk. Tin, Denver-a nursing home-ah koh a ni a, chutah chuan damlo thi lek lek tawh a lo awm a. Damlo chuan hun liam taa thilthleng chanchin a lo hrilh a.
Tun hmaa Swedish stonemasons pahnih bo tate a, a pakhat zawk kha a nih thu a lo hrilh a. stonemason pakhat dang zawk erawh an Bell Tower siam mekah chesualin a thi a, ama thaha an puh hlauvin Bang hnuaiah a thianpa ruang chu a phum a, a tlanbo ta tih, damlo chuan pastor chu a hrilh ta vek a ni.
A thianpa ruang phum chu an va hai nachungin, hmuh an nei lem lo. Mahse, damlo thusawi chuan rin a hlawh hle a, mite'n thlarau leh thilmak an hmuh thin pawh kha, a thianpa thla chu niin an ring ta ber a ni.
__________________________________________
★7) The Murder Of Father Alfred Kunz :
March ni 4, 1998 khan, Dane, Wisconsin-ah, kum 67-a upa Father Alfred Kunz-a thah a ni a. Kunz-a chu St. Michael Catholic Church-a puithiam niin, puithiam hna chu kum 32 lai lo thawk tawh a ni a.
Biak In chhunga parochial school-ah a hrawk zai thler niin a lo thi a ni. Rin dan pakhatah chuan, Satanist-hovin an thatah an ngai a ni. A thih hmain, Kunz-a chu exorcist, Malachi Martin nen Biak In thil pawimawh buaipuiin an tuldun thei hle a ni.
Tin, Martin chuan, tualthahna thlen lai kha, Kunz-a khan, Wisconsin mi, a kawchhunga ramhuai lut nia an sawi chu hnawtchhuak turin a inbuatsaih lai a ni a, a thih danhmang atang khan, Satanist-ho thiltih a ang tlat niin a sawi.
Thuthang dang awm leh chu, Kunz-a leh a hnuaia thawk hmeichhe pakhat nen, sex lamah pawh inzawmna thuk tak an nei a. Chu chu hmeichhe dangte'n erin amah Kunz-a an thah phah ta a ni.
Chutih laiin, Dane County sheriff’s office khan, mi rinhlelh deuh a nei a, chu an mi rinhlelh chuan tualthahna thlen hnu lawkah town a chhuahsan kha a ni a. Mahse, police-in evidence tha tak an neih theih tak si lohvah chuan, han man ngawt theih a ni ta chuang lo a. Father Kunz-a thih chhan chu hriat theih a ni ta lo a ni.
__________________________________________
★6) The Papua New Guinea UFO Sightings :
April 1959-ah, mi zah hlawh em em, Anglican puithiam Father William Gill-a chu Boianai village, Papua New Guinea-ah Missionary-in a awm a.
Tum khat chu, Gill-a chuan Hla taka tlang chung vela eng (light) mak tak thlawk a hmu a. Chutiang chiah chu June 26 tlaiah a hmu nawn leh a, mahse, chumi tum chuan, Biak In pawnah Father Gill-a lo pawh, lo thlir vetu an awm nual a. An awmna a rawn thlawh hnaih deuh chuan, light chu thleng pianzia lian tak ang mai hi a lo ni a.
witnesses-te sawi danin, alien ni awm tak kha thlawhna chunga an kal vel lai kha an hmu tlat a ni. 45 minutes vel a awm hnuah a thlawk liam leh ta a. A hnu darkar khatah, a rawn thlawk leh a, chumi tum chuan, thil eng tak tak dangte pawh an rawn thlawktel ta nual a ni. Darkar 4 chhung chu boruakah che lovin an awm a, an thlawk bo leh ta vek a.
A tuk tlaiah, an rawn thlawk nawn leh ta tho a. Chumi tum chuan, Father Gill-a leh a thawhpui pakhatin, thlawhna chunga Alien ni awm tak ding chu ban vaiin an signal chhin a.
Mak tak maiin, ban an rawn vailet ve tlat a ni! A tuk zan a lo ni a, UFO pariat lai an hmu leh a, chu chu an hmuh tawpna a ni ta a ni.
__________________________________________
★5) The Murders of Harold And Thelma Swain :
kum 1985 khan, Harold Swain-a chu Rising Daughter Baptist Church, Waverly, Georgia-a Pastor puibawmtu Deacon a ni a. March ni 11 tlai lamah, Biak Ina Bible study session an neih laiin mikhual danglam tak mai hi a lo kal a.
Biak In chhung leh pawn inkarah Harold-a leh Mikhual chu an intawk a, mikhual chuan silai phawrhin Harold-a chu a kap nawn zawt zawt a. Harold-a nupui Thelma-i chu a pasal tanpui turin a tlan phei a, ani pawh chu a lo kaphlum a.
Mikhual chu a tlanbo nghal a, a tarmit pahnih a thlauh thung. 2000 kum khan, Dennis Perry chu ringhlelin an man a. A chhan chu, a hma kar hnih khan, Harold-a thaha lo vautu a ni a. Mahse, evidence atanga a lan danin, Perry chu tualthattu a nih leh hmel bawk si lo.
Tualthahna a thlen lai vel khan, Biak In atanga darkar 6 kala awm, Atlanta-ah hna a thawk daih niin Perry chuan a sawi a. Chubakah, Perry chu mit tha tak a ni a, tarmit bun tur awm a ni tlat si lo. Chutianga thu a buai tak nuaih avang chuan, thil chhuichhuah theih loh zinga mi a ni zui ta a ni.
__________________________________________
★4) The Abandonment Of Baby Jacob Gerard :
February 27, 1994 zingkar khan, Holy Counselor Lutheran Church, Vernon, New Jersey-ah inkhawmna hun an hmang a. Biak In tukverh atang chuan, pawn lama vur karah naute pianghlim ruang an hmu a.
Naute chu Mipa niin, 3 kilograms (7 lb) vela rit a ni a, blanket pan taka tuam a, a laihrui pawh a lo la awm a ni. Ni thum hnua a taksa an endik chuan, Biak in pawn khaw vawt takah naute chu hnutchhiah a ni a, khaw vawt lutuk tuar lovin a thi a, a taksa chu vurin a hmet khawng ta vek a ni.
A laihrui chu cheh bun ni lovin pawh bun a ni a. Chumi awmzia chu Hospital-a hrin a ni lo! Naute pual chuan Biak Inah hunserh inkhawm hman a ni a, Biak In hnunga awm, North Hardyston Cemetery-ah phum a ni ta a ni.
Thi tawh mah se, Naute hmingah chuan Jacob Gerard tih an phuah a, amaherawhchu, tu fa nge tih hriatchhuah theih a ni ta chuang lo a ni.
__________________________________________
★3) The Rothwell Bone Crypt :
Holy Trinity Church chu 13th century-a sak kha a ni a, Rothwell town, England-a awm a ni. Mahse, Biak in hnuaiah chuan, mitthi dahna room (charnel chapel) a awm a, mihring ruh a awm khat tlat mai a, chu chu “Bone Crypt” tih a ni.
An chhut danin, tu tih hriat loh Mi 1,500 vela tam ruh a ni. Chu room chu char phui tlat ni mah se, thuthanga a lan danin, kum 1700 chho khan, thlan laitu pakhatin, tihpalh thilthuin, Biak in chhungah thil pawimawh a tih vel laiin, chhuat a rap awng a, a tlu thla rawk rawk a.
Tichuan, room ruk chu a hmuchhuak ta a, ruh tam lutuk a hmu chu, a hlau lutuk a, a atphah ta hial niin an sawi.
Amaherawhchu, chung ruh tam tak chu khawia mi nge ni hlawm tih hi tuma'n an hrechhuak thei tlat lo! theory lar tak pakhatah chuan, Hripui vanga thi an nih ngei rin a ni a.
Rin dan dang lehah erawh, Biak in awmna piah deuh lawka kum 1645-a Battle of Naseby indonaa sipai thi tate kha an nih hmel hle bawk! Tin, a tirah tak chuan, church graveyard-ah phum an ni a, a hnuah, hmun danhah dahsawn an ni leh a.
16th century khan, a bul maiah 'Jesus Hospital' sak a ni a, ruang tam tak chu an laichhuak leh a, Chapel-ah an dahkhawm ta a ni. Tun thlengin Bone Crypt chu a awm chhan chhuichhuah theih loh a ni ta a ni.
__________________________________________
★2) The Murder Of Irene Garza :
April ni 16, 1960 khan, kum 25-a upa school teacher, tun hma lama beauty queen lo ni tawh, Irene Garza chuan, Sacred Heart Catholic church-a, Father hnenah a sual a va puang a. Chu chu McAllen, Texas-a awm a ni.
Mahse, chumi hnu chuan In lamah a haw leh ta miah lo a ni. Ni nga hnu ah, a ruang chu town pawna Canal-ah chhar a ni a. A Lu-ah thil bil taka kutthlakna hnuhma a awm a, a thih hmaa pawngsual niin a lang bawk a ni.
A hnu lawkah, Canal-ah chuan slide viewer hmuh a ni leh a, Cord sei tak a awm tel bawk a, chu chu Garza-i kut phuarbehna atana hman ni awm tak pawh a ni. slide viewer neitu chu Sacred Heart-a Father John Feit a ni a, ani hi Garza-i bo hmaa sual a va inpuanna Father kha a ni.
Garza-i thah a nih hma thla lawk khan, Father Feit chu Biak in chhungah tleirawl pawngsual tum tia puh a lo ni tawh a ni. Inkhin buai duh lo a, court a dil hnuin, $500 chawitir a ni nghe nghe a ni. Garza-i bo zan khan, Feit-a tarmit glass a keh a, a kutah hamna hnuhma a awm bawk. Chu erawh, ama tih pem palh niin a sawi thung.
Feit-a chu rinhlelhkai theihna turin eng emaw awm mah se, Catholic puithiam meuhvina chutiang thil sual a tih chu tuma rin a ni lo. A hnu ah, Missouri-a monastery lamah transfer a ni ta daih a ni.
Kum sawm hnu ah, witnesses pahnihin, Feit-a'n Garza-i a thah thu kan hnenah a inpuang an ti a. Mahse, district attorney chuan, chutiang ngawtin Feit-a thubuai siamsak theihna tur evidence a awm lo a ni a ti a.
Chubakah, witness pakhat zawk kha a dam rei ta lo lehzel bawk a ni. Tunah chuan, Father Feit-a chu kum 80 a chuang tawh a, mahse, Irene Garza-i thih chungchanga tualthattu nia rinhlelh lian tak a la ni reng tho a, thu chiang erawh hriat theih a ni ta lo a ni.
__________________________________________
★1) The Miraculous Survival Of The West End Baptist Church Choir :
March ni 1, 1950 tlai lam chuan, Beatrice, Nebraska-a awm West End Baptist Church chu Thil puak a thlen hnuin a chhe hneh hle a. Chu thil puak chu Lei atanga Gas leak vang a ni. Biak Ina Zaipawl hla zir ziah thin 15-te an thi miah lo chu thil mak ve tak a ni.
Zaipawlho hla zir hun tur chu kha chhiatna thlen zan 7:20 PM kha ruat a ni a. Zaipawl member-ho chu hun vawng dik em em thin ni mah se, hemi zan hian, mak takin an tlai vek mai a ni. zan 7:27-a Biak In a puah vak lai khan tuma'n Biak In an la thleng lo.
Zaipawl director leh a fanu khan, khami zan khan tan hun hma 30 minute vela kal tum an ni a. Mahse, a fanu a lo mutthilh avangin, an thlen tlai phah ta a ni. pastor leh a nupui pawh chu, an fanuin a thuamhnawa thil a tihbuak vangin an tlai phah a.
Zaipawl member zinga pahnihte pawh an Cars a nun theih loh avangin an thleng tlai bawk. Zaipawl member dangte pawh chu, an hna neuh neuh, Lehkhathawn ziah, homework tih leh Radio an ngaihthlak vangtein an thleng tlai ve leh bawk a ni.
Chutianga an thlen tlai vek avang chuan tumah thi an awm lo va, Pathian vemhimna niin a lang.(Opeey-a khiangte)
Source:WAGK & WIKIPEDIA
★★★
No comments:
Thanks for your comment.