- Tluangpuia Hilthang
Ka unaupa lehkha zir awmpui in, zawlkhawpui lam ah chuan kan awm ve ta a. Mikhualna mahni se phak ang chen chen ah, YMA leh khawtlang ah kan ti chho ve a. Nula senior lam lo ni bawk nen, section committee member ah te min rawn ruat ve ta mai a. YMA General Conference kum a lo ni leh zel a. Mahni khaw hming pawh a YMA General Conference phei chu, la kal miah lo ka ni a. Kan Branch hruaitute chuan nula kal tur an tlem e mai ti khan, kal ve tur chuan min phut tlat mai a. Hruaitute hmai zah pawh a na a lawm ti chuan, ka kal ve ta nge nge a.
Nula panga chauh kan Branch hming chuan kan kal a. A huho in In khat ah min thlen tir vek a. A leh lam ah chuan a nuam ang reng viau mai a. Aizawl bul lawk a khaw pakhat hi, kan thlenna ah chuan an thleng ve bawk a. An ni chu mipa hlir an ni ve thung a. Thleng ho ta chu kan in nel thuai a, Pandal ah pawh kan kal ho tham tham thin. An zing ah chuan chhe lo tih deuh mai pakhat hi ka nei ve a. Chhe lo ka tih thu erawh, ka thiante tak ngial pawh chu ka hrilh chuang lo a.
Kan thiannu pakhat hian chhe lo a lo ti ve em em bawk a. Chhe lo tih ve ringawt pawh kha ka in thlahrung a ni. Conference tawp zan hian kan thiannu pakhat hian, Sanga hian vawin tlai khan chhe lo a tih thu che, min hrilh tak a sin a ti ta mai a. Sanga lah ka bul lawk ah a la thu zui a, ka lai khawp mai a. Ka tih ngaihna hre lo chuan, kei pawn ka ti ve tho a lawm ka ti ta ringawt a. Sanga lah chu a lo nui suk duh chauh mai a. Eng em em thleng lo chuan, Conference chu kan bang zui ta a.
Conference tiak tuk kan haw tur chu, Sanga chuan Linda haw hun ah lo len i phal em min han ti a. Phal te chu phal teh reng mai, kan in hlat em a i lo len peih a thu a ni mai a lawm ka ti a. Keini ai chuan Sanga te chu an chhuak hmasa zawk a. An han chhuak chu Sanga ngai chuan, ka lung hi a leng nghal em em mai a. Keini pawh chu kan haw zui ve nghal thuai a.
Conference tiak atang a kar khatna vel ah, a sawi ang ngei ngei chuan, Sanga chu a lo leng ta nge nge a. A thianpa nen an nih avang in, han in biak falna pawh kan nei chuang lo a. Chuta tang chuan Inrinni hi chuan a lo leng ve ta ziah mai a. Kan inngaizawng chho chu a ni ta mai a. Khaw hran a lo ni bawk nen, lo leng ve la a tih pawh hian ka peih ngai lo a. Inneih te thleng in a sawi chho dun ta a. Linda Kohhran dan thianghlim chu tha viau mahse, in ruk mai kan chhungkaw dinhmun en in ka duh zawk a, pawi i ti viau em te min ti a.
Amah ka duh em avang leh an dinhmun harsat zia a sawi thin avangin, awm ka tih pui viau tho mai a. Nula senior lam ka lo ni chu thu hran, mahni khaw lam ah phei chuan naupang Sunday sikul zirtirtu kan lo ni bawk si a. Zahthlak erawh a zahthlak dawn viau chuan ka hria a. Biak In hawng kher hi Inneih hi, Inneih ngheh na pawh a ni chuang hlei nem ka ti ta vel a.
Nikhat Sanga lo leng chu, keimah chauh hian ka lo awm a. Linda zanin ah in la tawh mai ila hi a ti a. Ka nau hi exam han zo phawt se, thla thar lam ah ti mai ang ti thung a. Chumi kan sawi chu I bul a mut vat vat ka chak tawh a lawm a ti a. Chu i mu tep tawh a lawm kan ti let ve thung a. Tun ah ka mu duh tih leh min sual a rual ta mai a. Ka tang ve viau na a, thla thar a in la tur tho kan nih tichuan ka khawngaih deuh a, ka in pe ta mai a. Chuta tang chuan kan chesual ta zauh zauh mai a. Kan in tuak leh deuh ang a, kum tawp lam ah in ru law law mai ang a ti ta zel a.
Han tih thei vak awm chuang hek lo, kum a tawp tep tawh tho a lawm ti chuan, ka nawr duh bik ta lo a. Chesual reng ta chu ka thi a hul ta mai. Kan han in test chu ka lo rai a lo ni a. In ru vat zawk mai ang, ka mualpho hma in ka ti a. Chuta ka thu hriat chu, ka damchhung a ka nun vawna tu tur a lo ni ta reng a ni. Linda nupui nei lai ka ni a, min duh tih ka hriat khan mutpui ka chak lutuk che a, chetsual pui tum che in ka bum mai mai che a nih kha. Lo leng tur a ka sawm te kha chu, i lo len tak tak peih ka ring chuang lo a. In tih rinawm tum nana in ruk nen khan, ka sawi mai a nih kha a ti ta mai a.
Chu thu kan hria chu ka mit sulh mai a. Naute hi ti tla mai ila, ka tibuai chhunzawm tawh lo ang che. Nang chu nula pangai ang in i awm chhunzawm leh mai dawn a lawm. Zanin ah lo in ngaihtuah lang in, naktuk a chanchin kan in hrilh dawn nia. Sum leh pai ngai zawng zawng chu ka tum vek ang an tih chhunzawm a. Engmah han sawi na chang pawh ka hre lo a. Biak pawh min be mumal tawh lo chuan, a haw nghal ta daih a. Zan mutna ah chuan ka in ngaihtuah nasa ta kher mai. Mi nupa kar ah ka lo tla zep reng chu a ni si a, ka va han zak tak em. Ka nu leh pa ten an han hria ang a, an thin a va han rim dawn tak em. Naute hi ti thla mai ila, kan fel tlang chu a ni mai a. Mahse ka damchung in ka in thiam in ka ring tawh si lo. Thlutlukna mumal pawh nei lo in, zing lam ah chuan ka lo muhil ta a.
Zing kan harh chu, vawin ah Sanga a lokal dawn a. Engtin nge ka lo chhan tak ang, tih chu ka ngaihtuah leh hmasa ber a. Kan khua ah naupang sunday sikul zirtirtu niin, naupangte sual that loh zia ka hrilh fo thin a. Kan lo tihsual palh a nih pawn, thup mai lo in mualpho pui ngam tur a ni a. Pathian hnen ah ngaihdam kan dil phawt chuan, engtiang a sual nasa pawh min ngaidam thei a ni ka ti thin kha a ni a. Kha kha ka zirlai naupangte tan a sawi ka ni a. Tun ah chuan kan tan leh ka pum a naute lo piang tur tan, kha thu kha a la dik reng a. Chuvang in naute hi ti tla lo in, ka tihsual rah chu ka mualpho pui ngam tur a ni, tiin thlutlukna chu ka siam ta a.
Sanga lokal chuan Linda engnge i thlutlukna chu a rawn ti a. Sanga, Pathian hma ah thil ka tisual tawh a, Ka thil tisual thup nan ka pum a naute chu ka paih thei tawh lo. In nu lak ah khan, a ngaihdamna sang ber min lo dilsak la. Naute hi chu keiman ka enkawl thei mai ang. Naute pa i nih ang erawh chuan, sawn man erawh kan rawn dil ang che ka ti ta a.
Sanga chuan min tih mualpho i va chak ve. Nupui nei lai ka ni ka tih tawh kha, ka nupui in a hriat chuan min then ngei ngei ang. Khawngaih in ti thla hram mai rawh teh min han ti leh a. Sanga ka duh lutuk che avang in khua pawh lo hmu lo a, nang lah tlangval ang in i rawn in sawi bawk si. Ka pahnih a thiam loh nimahse, a tak tak ah chuan i thiam lohna hi a nasa zawk a sin. Chuvang chuan kan tihsual rah hi, kan mualpho pui dun a ngai ta a nih hi ka ti ta hmak a. Sanga chuan i thu thu le, sawn man chu kan lo pek ring reng reng suh a ti a, min haw san nghal ta nal nal a.
A tuk ah chuan kan khua ah, ka haw chho ta nghal a. Ka nu leh pa te ka chanchin dik tak ka hrilh a. Ka pa chuan Mami a va han zahthlak tak em. I huaisenna leh tumruhna ka hmuh erawh hi chuan ka lawm bawk si. Thil kal tawh chu siam that theih a ni tawh lo a. Tun hnu ah i fimkhurna tur a, Pathian remruat ah ngai mai tlang mai ila, Eng pawh nise sawn man chu, kan thing ve hrim hrim ang a. An rilru suk thlek a zir in kan ngaihtuah tha leh dawn nia a ti ta mai a. Chu thu kan hria chu ka huphurh teh reng nen, ka thla a muang huai mai a. Nu leh pa te min hmangaihna hi chu, a va lo han nasa tak em ka ti vawng vawng mai a.
Sawn man thing chuan kan khaw pa pahnih chu, ka pa chuan a han tir ta a. An rawn haw chu min pe duh hauh lo mai. Sanga khan ka fa a ni thei lo hrim hrim. Kei chu nupui nei lai ka ni ka tih pawn, min ngaizawng lui tlat a. Midang pawh ngaihzawng a lo ngah a ni awm a. Vawikhat erawh chu kan chesual palh a, a hun leh ni ka chhut pawn a in mil thei lo a ti tlat a, an rawn ti ta mai a. Chuthu kan hria chu ka rilru hi a na vawng vawng mai a. Ka ngaihzawng hmasa ber chu a ni lo a. Ka mipa mutpui hmasa ber leh awm chhun in, a mualpho hliah khuh nan a chutiang ang hmang thei chu mak ka ti kher mai. Ka rilru na lutuk chu, ka pa Court ah kal mai ang u kan ti a. Ka pa chuan Mami pawi ti mah ta che, ti khan nangma fa liau liau a ni mai dawn a lawm. Mizo dan ang a kan tih tur kan ti zo tawh a, a bak han thlen leh a tul tawh lo. Thudik chu engtik ah emaw, a la lang chuak tho tho ang a ti a.
Naute kan hring chu mipa a lo la ni leh zel a. Kan pa hian fanu hlir an nupa a an neih thu kan hre zui a. A hming ah Israel Lalremruata kan sa a. A pa chuan tun thlengin vawikhat pawh a rawn tlawh ta lo. Ka fapa an hleitling deuh a, company thil kan ti chho ve a. Pathian malsawmna dawng in reilo te ah, Director dinhmun te hial kan thleng chho ta mai a. Tun ah rih chuan sum leh pai ah pawh mi han awt lutuk bik chu ka ni ta lo. Ka fapa a pa LDC ai pawn ka hlawh hnem ta zawk hial a ni.
Ka thil tihsual a zar ah Pathian ka hnaih phah a. Zantin a hming a maicham hung lo a mut ka thei ta lo. Chu chuan ka eizawnna leh thlarau nun ah malsawmna tamtak min pe a. Mualpho huam a ti tla lo a ka pai tlangna zar ah, fapa duhawm tak ka nun ti hlimtu kan nei leh zel a. Heng zawng zawng ka ngaihtuah chang hian, ka harsatna tawh pawh chu A hmelmawi min hmuh tirtu a lo ni ta zawk a ni.
I hnung zui tur hian Lalpa
Ka theihna te a tlem thin si a
Mite ngaiha beidawnna lo thlen chang hian in
Channa emaw ka lo ti a
Mahse i remruat hi ringtute tan
Chaklo tan chakna a lo ni
Ka Lalpa remruat dan hi
A mak in hriat thiam a har lua e
Mite ngaiha vanduaina tinreng lo thleng hi
Kei misual ber tan malsawmna
Beidawnna leh lungngaihna
Tawh chang ni lo thleng mahse
Ka Lalpa remruatna dan ah chuan
A hmel mawi min hmuh tirtu
I tlawm lai hmel hmu turin
Chapona in ka lo zawng thin che a
Mahse khawvel finna sanna te zawng hian e
I hmel mawi an hliah si thin a
Ka lungkham thin sanna leh hmingthanna te
Ka kawng daltu mai a lo ni si
hnena ka dil malsawmna khawvel ro thil zawngte hi
Nei thei ila khawvel ah nang ka ngai lawng che
I hming lam ka tum ngai lawng e
Beidawnna manganna retheihna te
Min tichaktu a lo ni e.
No comments:
Thanks for your comment.