AZZ KHA

Pawl 5 kan zir kum, kum 1999 ah kan kan U pakhat hian a putea te in ah AZZ Cassette hawh tur hian min tir a. Thuawih takin AZZ Cassette hawh chuan ka kal a. Chu Cassette chu ka rind an chuan Sap Mipa Zaithiam ho cassette ni tur ah ka ngai a. Khatih lai khan kum 10 a upa ka ni.

AZZ Cassette keng chuan kan U te in ah chuan ka let chho  leh a, chutah AZZ chu a’n chhuah ta a. Sap nilo in Mizo Mipa Rap/Zai a lo ni reng tih ka hriat chuan nalh ka ti ta em em a. Hmun dangah kallo in hemi ni hian AZZ zai chu ka ngaithla tar eng mai a. Chuta tang chuan AZZ ka duhna hi vawiin thleng hian a la reh hlen theilo.

Khatih hun lai khan tun angin mitin ban phakah internet hi hmuh tur a la awm lo a. Zaithiam te chanchin pawh hi hriat zung zung a har em em a. AZZ ho chanchin pawh chu hre chak em em mahila ka hre thei lo a, Aizawl Zuangtui a mi an ni tih erawh chu min hrilh thin a. Mahse hetih hun lai hian Aizawl pawh kan la kal lo a, zirlaibu a kan zir bak Aizawl chanchin hriat kan nei lo.

Vawikhat chu pawl 5 kan zirpui kan thianpa nutei te in luah ah hian sikul tan hma in kan peng a. Chutah  chuan Lelte Chanchinbu, hlai tak mai hi a lo let reng mai a.  Ka thianpa chu a nutei nen an inbiak mawlh mawlh lai chuan Lelte chu ka’n keu thuak thuak a, a phek tawp ber ah hian AZZ hla sak ‘Han bei ve la’ tih ngei mai kha a hla thu an lo dah a, ka lawm zia kha aw! 

Mahse khatih hun lai khan kan la naupan bakah ka thianpa nutei te kha ka nel em em silo a, AZZ hla chu hmanhmawh tawkin vawi 3 vel ka chhiar nawn a. A ‘rap’ lai thu vel te chu ka chhiar nawn tlut tlut a. An chanchinbu chu ka awt in dil kha ka chak em em a, mahse ka ngam ta lo a. A hnu ah kan va kal leh chuan Lelte chanchinbu chu a lo awm tawh lo a, ka ui zia kha aw! Hmanni ah kum 1999 Issue hi Internet vel ah an dah em tiin ka zawng a, mahse ka hmu zo lo. Kum 1999 eng thla chhuak ah emaw ber chuan ‘Han bei ve la’ tih AZZ sak hi a awm tih erawh chu ka la hre chiang hle!  Chuta tang chuan Lelte chanchinbu hi ka hmuh apiang in ka chhiar ta ziah a, vawiin thleng pawhin ka hmuh chuan Lelte hi ka la chhiar ziah thin. 

AZZ ho chu hmuh ka chak thei em em a, AZZ lampum te hi kan inrinsiak nasa thei! Ka thiante hian Doordarshan vel ah AZZ an lo zai thu leh min hriatchhuah thin thu hi min lo hrilh thin a. Tv kan nei ve silo a, mi in ah ka len te hian Doordarshan channel kha hmetchhuak se ka ti em em thin. Tin, doordarshan kan en lai te hian AZZ kha lo zai se ka ti takzet thin bawk.

Chuti ang chuan AZZ hmuh chak reng reng chuan hun kha kan hmang chho ve a. An album hmasa ber a an hming ziah – Henry, Ramthianga leh RL Fanai tih te chu ka hre hneh khawp mai! ‘Rap’ kha an thiam bakah ‘rap’ tello a an zai te mawi kan ti em em thin a. A hun lai kha chuan  an ‘rap’ tih loh hla thu dang zawng kha chu ka vawngchhuak vek zel!

Pawl riat kan zir kum 2002 kum ah khan AZZ chuan Album an lo release leh ta hlauh mai a. An album a an thlalak dah te kha ka en nasa in ka duh khawplo em em thin a. Aizawl kala Zuangtui ah AZZ hi hmuh kha ka chak em em thin. Chuti taka ka atchilh avang chuan ka ni fapa pawl 8 ka zirpui khan a pa hnen ah AZZ-II album chu lei tur in a ngen ta a, ka va han ngaithla nasa thei tak! Class kan kalloh a hunawl kan neih apiang khan AZZ hla chu kan ngaithla a, a ‘rap’ lai te kha kan chham pui zuah zuah zel!

Mizo hmeichhe zaithiam kan ngaihsan Lalngengpuii’n a zaipuina ‘Leng dun ang’ Music Video kha Kohhran chanchinbu, cyclostyle-a ka print tir thinna in ah an lo chhuah a, zahloh chuan chhuah in vawi 5 vel ka’n ‘play’ nawn tir the reng ah! Chaw min ei san a, khawthim hnu, chanchinbu an an her zawh vek tawh hnu ah ka haw – AZZ Music Video ka en avang chuan.  

Chu lo leh AZZ zai ka hmuh leh chu eng function ber nge ka hre tawh lo, zan ah Ramthianga leh Henry-a’n ‘A rukin kan inru mai tur’ tih an sak dun kha. Ka duh khawp lo thei em em a, an ‘rap’ lai tak te hi ka en chak em em thin. Chumi hnuah pawl 10 kan zir kum nge ka hre tawhlo- ka thianpa hian ‘Ka ngai bik lo’ng’ tih music video an siam kha an in ah en turin min sawm vang vang a, vawi 7 aia tam mah ka’n ‘play’ nawn pek kha! An bulah awma an hla hi play a, “Hei tu aw nge, he mi ‘rap’ mek hi nangmah em ni? etc…” tia zawh bawrh bawrh ka chak thin. Tun hnuah hian You Tube ah te an zai hi ka en leh thin a, mahse ka la khamkhawp lo khawp mai!

Facebook lo lar tak hnu te hian AZZ member te hming kha ka va zawng ‘risk’ nasa thei tak! Tun hnu ah vanneihthlak takin Ramthianga nen hian Facebook lamah kan in tawng fu ve ta nawlh a. AZZ chanchin vel erawh a boruak in a zir tawhlo a, tui tak leh thui tak in kan sawi thei tawh lo. Ramthianga pawhin AZZ chu an nun hlui lam a ni tawh avangin a ngaihven tawh lo tih min hrilh. 

An hla sak tawngkam thenkhat te leh  an incheina avang te erawh chuan chhungkuaa han ngaihthlak chi ni em em loh chang a awm a. Chung vel ah chuan keima mimal chu min tibuailo in ka nun ah nghawng em em a neilo. Mahse mak tak maiin ka ngaisangin ka duh ve em em ringawt mai a. Tun ah pawh hian an album hmasa a an hla te chu ka la ngaithla fo thin. Vawiin thlengin hla leh rimawi ngaihthlak ka tanna bul ber chu AZZ hi an ni tih erawh ka hre reng thin.   

Mizo zingah ‘rap’ music lo tichhuak hmasa ber tu an nihna te avang hian ka ngaisang pawh a ni hran lo a. An nun dan leh an ‘style’ te hi ka duh em em pawh a ni chuang lo. Mahse zaithiam ka tiin ka duh ve em em a, kum 1999 atangin vawiin thlengin ka rilru ah AZZ hi an la cham ta reng a ni.