I LOVE U

'I LOVE U' tih hi Sapṭawng dik a nilo tih hre mahila 'Ka Hmangaih Che' tihna a ni tih erawh hrelo chu khawvelah hian an tlêm hle ang. Heti ang hian ka ṭhianpa chuan a thil tawn min hrilh a-

"College ka zawm dawnah hian ngaihzawng pakhat ka nei a, ka nupui turah ngaiin ka rilru zawng zawng ka pe a, mahse thla nga emaw lek kan inngaihzawn hnuah min ṭhen leh si a, ka rilru natzia kha aw!

"Chhel takin ka tuar hram hram a, mahni intihlum duhna hial nei khawpin ka nun a beidawngin ka rilru a na hle a. Ka ṭhian ṭhenkhatte phei chuan hmangaihna ka lâknat em avangin nupui a ka neih theihloh tur chu ngaihzawng nei tawhlo turin duhsaktakin min hrilh hial a. 

"Chutia rilruna leh baihvai taka ka awm lai chuan hmeichhe pakhat hi ka nunah a lo lang hlawl a. Kan College aṭangin an veng chu a hlat vangin inhmuh zen zen a rem lem lova. A tirah chuan ka ngaihzawng hmasa kha ka rilruah a thih theih tlat loh avangin ka ngaihsak tak tak theilo a, min lo be ṭha ve neuh neuh tute pawh ka be pah reng tho. 

"Mahse chu nula chuan chhel takin min ngaizawng lui ta char char a. Kei pawh chuan nêp zolo in ka rilruah hmun a chang thûk telh telh a. A tirah ka hmangaihlo a, a hmel leh a pian te pawh ka hmeichhe duhzawng a ni lem lo. 

"Mahse nghet taka min hmangaih miau avang chuan ka rilru chu a nei tam ta telh telh a, thil tam tak kan ti dun in ka bialnu hmasa aia thûk in kan inkar chu a ṭha in kum 2 vel zet chu kan inngaizawng ve ta reng mai a. Kum 2 hnuah phei chuan ka duhthusam hi a ni ta tawlh tawlh a, amah lo chu nupuia neih pawh ka tum ta lem lo.

"Kan inhmuh ve changa Bazar kan kal dun te hian ka kalsan hlawk hlawk zel a, ka hnungah min lo zui hnak hak zel a, ka kal rualpui thiamlo a, kan nui tawp zel. Zanah kan inbiak in ka sawi tur leh ka beisei tur zawng zawng a hrechiang a. Mize danglam tak ka neih hi lawm takin min pawm sak a, min zilhin in min hau fo ṭhin.

"Awm dun theilo mahila ani nen chuan Krismas pawh vawi 2 chu kan hmang ve hman a. Krismas lai te hian ngaihzawng ka la nei ve ngai lo a, ka hlim phah em em ṭhin."

"Mahse nitin a inhmu ve thei talo leh kan hun hman dan inanglo chuan kan inkarah harsatna min siam a, kan inhau zingin kan inṭhen titih ta fo mai a. A chang chuan a hahthlakin a beidawnthlak em em ṭhin.

"Kei lah mi 'care' thiamlo tak mai ka lo nisi a, a tawpah chuan kan inkar chu a khi chat thuk ta hle a. Phone a inbiak ringawt chuan siam ṭhat zawh rual a ni ta lo a. Siam ṭhat tum in an vengah zankhat riakin ka kal a.  Kan inkar chu ka theihtawp chhuah a chinfel ka tum nen, kan inṭhen hlen ta tak tak a. Chumi zanah chuan an inkawt ah blanket sin in zankhua in ka ṭhu tlaivar a. 

"Zinglam dar 4 velah chuan ka ipte ka dap a. Class kan kal laia lehkhabu ka kenloh avanga ka ṭhianpa lehkhapuan min pek te takte chu ka dap fuh a. Ka hmangaih zia te, a tello a nung thei ka nih tawhloh zia te, khawngaihtaka min ngaidam tura ngenna te chu ziah ka duh takzet a-a chhan chu tun bak hi ka ngen thei tawh dawn lo tih ka inhria a.

"Thil tamtak ziah tur nei mahila a ziahna tur pen ka nei tlat silo a. Lehkhapuan chu ka'n en vang vang a. Ka ha chuan ka seh pawp a, 'Ka Hmangaih Che' tih chu ziah ka tum a. Mahse hâ mai hmanga han seh chuan a thler duh hle a, lehkhapuan chu a chhe zo tak ngial dawn a. 

"'I LOVE YOU' tih chu ziah a awl zawk ka ring ta a. Ka hâ chuan ka'n seh leh ta a, ka seh-ziak zel a. Mahse 'You' ti tur chuan lehkha chuan a daih dawn takloh avangin 'U' chu ka hmangin 'I LOVE U' tih chu ka ziak ta a. Chu chuan ka sawi duh zawng zawng leh ka sawi chhan ber chu a fun kim ta ber tho mai. Chu lehkha chu an 'Sintex' buah chuan lunga delh bet in zing dar nga  ah an in kalsan in kan veng lam pan tur motor ah ka chuan san ta a.

"Ka kal nawn tawh ngai dawn lo tih ka inhrechhiang em em a. Motor a ka chuan lai te chuan ka phone battery low chung chungin min lo text em tih ka en chho fo a. Kan veng ka thlen dawna min lo text a ka awmna min zawh meuh chuan ṭah hawm hawm mai ka chak a. Mahse ka bulah mi an awm ve avangin ka ṭap thei silo!

"Ka room thlen vat vat a ṭah hawm hawm chu ka duh takzet a. Kan veng chu thleng har ka inti hle. Kan veng ka thlen hnuah ka room ah lût in mi dang hriat hlau tak in ka ṭap hawm hawm a, ka lungchhe takzet a ni. Ka sûn a ni ber a, ka chhungte boral ta se chu aia nasa chuan ka lungchhiat a ka ṭah nasat ka ring lo.

"Ka hmangaih tak tak hman a. Min kalsan tu ai a awh zo em em a....mahse amah ngei pawhin min kalsan leh tak si ah chuan ka lo 'pass' tawh zirlai aia har zawk kha 'pass' leh tum ka beihnawn a ngai dawn a ni."

Ka tawn hnu a nih miau avangin ka ṭhianpa thusawi chu ka hrethiam a, ka natpui a, a damdawi erawh khuarei chiah a nih zia ka hriatpui!

Miss

Amah chu nula a ni a, Saptawng chuan 'Miss' a ni. 

Miss World emaw, Miss Universe emaw chu sawiloh - heti ang chi ah hian 'Miss' a la ni ngailo hrim hrim!

Mahse Zirtirtu a nih avangin a sikul naupangte chuan 'Miss' tiin kartluan in sikul chawlh tihloh ah chuan 'Miss' an ti chamchi a. Sunday ah pawh Sunday Sikul zirtirtu a nih ve avangin 'Miss' tiin an ko bawk.

Sikul chawlh te, Inrinni ah te, zanah te hian 'miss' a ni tho bawk -  a chhanchu tuemaw chuan a ngai thei em em a. Zanah te hian a 'miss' thu a hrilh chamchi a. Hunawl a neih hlek chuan tuemaw chuan a 'miss' zia hi awm leh mawi pawh thliar loin, zah pawh dawnloin a 'miss' thu hi a hrilh mawlh mawlh zel. 

Sikul a naupangte 'miss' aia nasa hian zan lam leh a hunawl neih ah hian 'miss' a ni zual a. Inrinni chhunah phei chuan 'Real miss' a ni thin.

Zing lam darkhat ah pawh a mut chhuak chung chung hi 'miss' a la ni fan a. Zan chhum bung tawh a mut hnu ah - zing dar 6 ah pawh mut khamlo chung chungin 'miss' a nih avangin kaihthawh a ni a, a thu dawn hmasak ber leh a hriat hmasak ber chu 'miss' tih tho a ni! 

Chuvangin amah chu 'miss' diktak a ni a. Kar tluanin, nikhatah darkar sawmhnih pali chhung hian 'miss' a ni. 

'Miss' hi a 'miss' ngailo a, englaipawhin 'miss' a ni reng thin.

Miss, I miss you so much!

Pathian Hmangaihna

Mizoram Synod Choir (2018-2020) in Official a an Music Video pahnihna ‘Pathian Hmangaihna’ tih chu January ni 4, 2019 khan an ti chhuak a. A thu leh a thluk pawh a nalhin a satute pawh hian nung takin an sa a. He hla phuahtu hi tuna Conductor ni mek T.Laldintluanga phuah leh bawk a ni. 

T. Laldintluanga hla phuah ho hi kan en chuan Pathian hmangaihna hian a nun hi a hneh hle tih a hriat a. Tin, Pathian khawngaihna leh hmangaihna vanga rawngbawlna chanvo hlu tak hi chelh thin kan nihzia he hla phuahtu hian a hmu chiang hle a. Tuna a hla phuah thar ber chung chang hi ka va zawt a, heti ang hian min lo hrilh a, ka lawm hle.

“He hla hi Bawngkawn Chhim Veng Kohhran in ‘Hla phuahtu Zan’ ti a hun hmang turin min sawm zan atanga lo piang a ni a. Chumi tura ka inbuatsaih lai chuan ka hun hmantawh dan te ka ngaihtuah let a. Naupangte ka nih atanga tun a dinhmun te ka thlir let hian Pathian min hruaina leh hmangaihna hi ropui ka ti em em a. Ka hla thunawn ang hian  Pathian min hmangaihna chu a thar zel a, min hruaina zawng zawng – kei misual tak a rawngbawltu nive tura min thlang te hi ropui ka tiin ka ziak chhuak in ka sawi chhuak thiam thlawt lo a. Pathian min hmangaih zia ka chhut hian mi dangte tana ka inpek tawkloh zia leh ka hmangaihna nep zia te hi ka inhrechiang tawlh tawlh a. Chuvangin ka dam chhungin tlinglo leh chaklo tak chung pawhin Pathian rawngbawl zel hi ka tih tur a nih zia leh a hmangaihna hi puangchhuak zel tur ka nih zia hi ka inhrechiang em em a; tichuan he hla hi ka phuah ta. Ni 15 May 2018 ah khan ka phuah zo thei ta a ni.”

He hla phuahtu sawi ang hian Pathian min hmangaihzia hi a chhut ngun peih a piangte chuan a ropuizia leh a thuk zia hi an hrechiang nawn thin a. Keini misual boral mai tur kha a hmangaihna leh khawngaihna kaltlangin Lal Isua min pe a, a rawngbawltu ah min thlang ve duh hi a va hlu in a va lawmawm em! 

Chuvangin he hla phuahtu sawi ang hian kan dam chhungin kan theihna chu tlem in beitham hle mahse theihtawp chhuahin Pathian hi fak mawlh mawlh ang khai! He hla lo ngaihthla tu zawng zawng te Pathian in mawlsawm rawh se!

Hla link: https://youtu.be/U9e-UxGOcgY

Pathian Hmangaihna

Phuahtu: T. Laldintluanga

Satu: Mizoram Synod Choir

Ka chhut nawn fo thin Pathian hmangaihna hi

Zing, chhun, zan englaipaw’n a hnai reng

Ka chakloh ber lai paw’n min ensan lo

Min hmangaih, min thlahthlam ve ngailo.

A chuai ve lo, a thar zel thin

A chul theilo Pathian hmangaihna thu hi

Min hruiaina chanchin ngaihnawm hi ziak dawn ila

Ka hun leh theihna te hian a tlin lovang

Hmangaihna zau ber Pathian hmangaihna chuan

Lal Isua, fa mal neihchhun min pe

Midang tan ka thiltih tlem zia chhut hian

Ka hmangaih nep zia ka hmu chiang thin

Ka damchhung zawng hian ka theihna tlem talin

Lalpa chu fak mai tur ka lo ni

Misual kei rawngbawltuah min thlang hi

A hmangaih ropuizia ti chiang tu

A tawp nan:

Min hruaina chanchin ngaihnawm hi ziak dawn ila

Hmangaihna chanchin, chanchin mawi ber a ni ang

Ngaia ka neih fê hnuah che pawh hian hmelṭha ka la ti fan che

Amah chu hmeichhe fel tak a ni a, a hming hi sawi ila Zofate zawng zawng chuan kan hre nghal ngei ang- Tv ah a lan ṭhin avangin.

Kum 2014 kum tâwp lam aṭangin Facebook kal tlanga inhmelhriat kan ni a. Messenger lamah te kan inbe ve ṭhin a, a pa damlo cancer chanchin te kei mai mai hi min lo hrilh ve ṭhin a, ka lawm hlê!

Chutia kan inbiak ve fe hnuah chuan kum 2016 kum tir ah a phone number ka dil ve a, phal takin min lo pe a - ka lawm hle. A phone number chu WhatsApp ah hmang nghalin Reliance company a ni nghe nghe a. Tûn hnuah Airtel ah a leh tâk thu min hrilh.

Kum 2016 ah Pathian thu zir tura ka interview dawn ṭum in an in ah zingkarah kan inhmu a, a nau te nen thlâ kan la ho a. Chu chu ka hmuh hmasakna ber a ni a, zanah ka mumangah ka hmu nasa hle. College kan luh dawnah Istiri min pe a, mahse College in Istiri kan lo neihsa avangin kan in lamah ka hãwn a, tun thleng hian kan la hmang. 

Ngaihzawn chi a nilo a, kan tan ngaihzawn phâk a ni lo a. Ka sawi tawh angin mi zawng zawng hriat a nih avangin a buai hle a, kan imhmu ngai zen zen lo a, hmuh pawh ka hmu ngam zen zen lo.

A pa boral in ₹500/- in ka zuk râl ve a, an chhungkua pawh an lo lawm der thiam hle. Chumi hnuah chuan kan inhmu zauh zauh a. Vawikhat chu kan College ah a ṭhiannu nen an lo kal a, chumi ṭum chuan ₹500/- ngawt mai min pe a, ka hrilh haiin ka lawm hle a. Kan zirlaipui kan u te ho in thla an lo lakpui liam liam a, 'Innu thla kan lakpui a nia' tiin min fiam zui nghe nghe. 

January ni 11 khan an veng Vaivakawn ah ka ṭhianpa nen Bike in kan kal a, a ke hmalam chirh danna chu a ṭhat loh avangin kan thlâk dawn a, hmanrua kan lo neih mai loh avangin ka ṭhiannu chu ka han phone a, an inkawt ah kan han thlak a.

Thingpui te min lo siam a, kum thar chibai te kan inbuk a. Chumi pah chuan ₹500/- ngawt mai min pe leh hrâm a! Ka lawmin ka zak ang reng hle a. Lawmthu pawh hrilh mumallo in kan haw dawn ah ka 'selfie' pui zuai a, WhatsApp status ah te ka hmang nghe nghe a. Vanneiththlak kan ti dawn nge vanduaithlak kan ti dawn - zing lamah thla kan la dun ziah a, mahse hmelṭha ka ti tho!

Hemi zan hian ka mumangah ka hmu nasa hle a, a tuk tlai ah amah pawh ka va hrilh nghe nghe a, a nui nasa hle. He thu hi ka va hrilh a -

"Ngaia ka neih fê hnuah che pawh hian hmelṭha ka la ti fan che"

Ka WhatsApp status ah ka hmang a, ka ṭhiante ho in tunge a nih min zawt a, a thlalak hmuh te min dil a, mahse ka sawi ngam teuh lo! Chu ka WhatsApp status pawh chu amah ngeiin pawhin a lo hmu a, a lawm der thiam in a nuih pawh a za ve hle!

Heti ang a Mizo hmeichhe fel leh zahawm, Mizo nih tinuam tu kan nei hi kan vannei a, a hmelhriat ka ni ve pawh hi ka lawm hle! Lo dam zel ang che Z......

Kutphah te reuh te

Stephen Hill-a chu American mi, zaithiam leh hla phuah thiam a niin Missouri ah a piang a. Kum 2001 ah khan Christmas: A Time for Joy tih album ah 'Five Little Fingers' tih Krismas hla a sa a. You tube lama kan en chuan Stephen Hill hian he hla hi naupangte bulah sa in mipui tamtakin an thlir a nih kha. He hla mawi tak satu hi 5th August 2012 khan 'heart attack' avangin kum 55 mi chauh niin a boral a ni.

Internet lamah te ka theih tawpin ka'n zawng na in he hla thu 'simple' tak leh mawi tak mai hi a phuahtu leh a thluk siamtu hi hriat mai theih a ni tawh lo a. Tichuan tun laia Pathian in a hman em em Mizo Gospel Band - One In Christ te chuan kumin 2018 chhunga an music video parukna an siam ah he hla hi Mizo tawngin Alvin Lalruatfela chuan 'Kutphah te reuh te' tia letling an sa a. You Tube lamah en theihin a awm a. Naupangte leh puitling te tan pawh a ngaithlak nuam tak ni turin mawi takin an sa a ni.

He hla phuahtu hi a themthiam hle a. He hla bul tan nan hian naupangte tan pawh a hriat awlsam tak turin kut zungtang 5 awm Lal Isua kut te tak te; A nu Mari'n duat taka Bethlehem ranthlenga  a mut chuan he hla phuahtu thinlung hi a khawih thu a sawi a.  

Bible a kan hmuh angin Lal Isua chuan Bethlehem khuaah khual buk chang ve lo in ran chawpekna thleng a lo pian tirh pawhin a mu a ni tih kan hriat kha. Lal Isua chu keini - naupangte, puitling te, pi tar leh putar leh mi zawng zawng te chhandama kan awm theihna turin  lo piang a nih kha. Chuvangin Lal Isua kan tana lo piang hi hlim leh lawm taka fak leh chawimawia chibai buk turin i inbuatsaih ang u.

Kut phah te reuh te
Lettu: Alvin-a
Satu: One In Christ

Khat, hnih, thum, li,
Kutzungtang panga te tak té,
Van Lal fa, Mari hrai duhlai.
Ran thlenga zal chu zaidam leh nunnem,
A kut te tak té chuan ka thinlung hi a chelh.

Khualbukah hmun an chang lova,
Bethlehem an lo thlen in.
Ran in tlawmah nau a piang,
A sakhming chu Lal Isu.

Lal Isua a lo piang a,
Puitling naupang chhandam nan.
Chibai buka fak hla mawi remin,
Hringmi tan malsawmna lo ni.

Miss

Amah chu nula a ni a, Saptawng chuan 'Miss' a ni. 

Miss World emaw, Miss Universe emaw chu sawiloh - heti ang chi ah hian 'Miss' a la ni ngailo hrim hrim!

Mahse Zirtirtu a nih avangin a sikul naupangte chuan 'Miss' tiin kartluan in sikul chawlh tihloh ah chuan 'Miss' an ti chamchi a. Sunday ah pawh Sunday Sikul zirtirtu a nih ve avangin 'Miss' tiin an ko bawk.

Sikul chawlh te, Inrinni ah te, zanah te hian 'miss' a ni tho bawk -  a chhanchu tuemaw chuan a ngai thei em em a. Zanah te hian a 'miss' thu a hrilh chamchi a. Hunawl a neih hlek chuan tuemaw chuan a 'miss' zia hi awm leh mawi pawh thliar loin, zah pawh dawnloin a 'miss' thu hi a hrilh mawlh mawlh zel. 

Sikul a naupangte 'miss' aia nasa hian zan lam leh a hunawl neih ah hian 'miss' a ni zual a. Inrinni chhunah phei chuan 'Real miss' a ni thin.

Zing lam darkhat ah pawh a mut chhuak chung chung hi 'miss' a la ni fan a. Zan chhum bung tawh a mut hnu ah - zing dar 6 ah pawh mut khamlo chung chungin 'miss' a nih avangin kaihthawh a ni a, a thu dawn hmasak ber leh a hriat hmasak ber chu 'miss' tih tho a ni! 

Chuvangin amah chu 'miss' diktak a ni a. Kar tluanin, nikhatah darkar sawmhnih pali chhung hian 'miss' a ni. 

'Miss' hi a 'miss' ngailo a, englaipawhin 'miss' a ni reng thin.

Miss, I miss you so much!

Ngaihzawng

Nula tlangval kan nih a mi ang kan nih chuan 'ngaihzawng' tih thumal hian kan nun leh rilru ah hmun laili ber a chang lo theilo a. Kan lerh vang emaw kan ngaihven bîk vang emaw nilo, amah maia Adama awm kha ṭha tilo tu remruatna la kal zel kha a ni tih kan hre awm e.

Mihring kan in an loh avangin ngaihzawng kan neihna kawng pawh a in ang lo a. Ṭhenkhat chuan an la lem lo a, ṭhenkhat erawh chuan an rilru zawng zawng an pe a, chhiatpuia thihpui ta hial pawh kan awm hi. 

Tuna kan sawi tur chu mi nun laklawh lai tak va ngaihzawn chungchang a ni a. Heta kan sawi turah hian lêr tak, ngaihzawng kawp chîng te erawh kan sawi tello. Tuna kan sawi tur chu mi tamtak harsatna tawh ṭhin chungchang a ni. 

Mi tute emaw kan duhthusam tak kan tawng a, kan bêm a, kan inngaizawng ṭhin. Mahse a chhan mumal awmlo leh an mahni lam rilru inpeih tawklohna avang te in kan inṭhen a lo ngai a, keimahni lamah a zawng zawng a kan lo inpumpêk hman tawh si avang in kan na ṭhin a nih kha. Mahni kan indem a, kan inhua in kan inrintawkna te kan hloh a. Kan nun kan tihchhiat phah in mahni hial kan intihlum ṭhin a nih hi. 

Chutih rual chiah chuan tuemaw kan hmangaih tak kan chân laiin kan nunah mi thar fel tak tak leh ṭha tak tak, kan phû hauhlo tur te pawh kan tawng ṭhin a. Chungte chu kan han nihpui rênrawn a, mahse keimahni lam la inpeih tawklohna leh kan nunhlui vang te pawhin kan han mai par thlawn tir tawp ve fo tho a nih kha. Chung mite chu keimahni ang tho in an rilru a na in an ṭap ve ngei ang tih hre mahila tih theih kan nei lo. 

Hetiang hun, kan rilru laklawh lai taka kan tawn te hi kan tan an ṭhatlohna leh tlinlohna sawi tur mumal kan hre hauhlo ang. Mahse keimahni rilru lam inpeih tawklohna avang te in kan kalsan zawk a nih kha. Chuti amg chiah chuan mi nun laklawh lai taka kan va tlazep a nih chuan keini pawh kalsan kan nih ve ṭhin kha.

Hetiang a laklawh taka nun hmang mek, ngaihzawng nei hlei theilo, an duh vang reng nilo a mi rilru tina hi tamtak an awm - keimahni ngei pawh kan nih kha. Heti anga mi rilru tihnat hi k/an duhlo a, k/an inthiamlo takzet zet ṭhin. Mahse a tuartu tan chuan engpawh nise hnâwl k/an nih miau avangin a na a, k/an ṭap lo theilo.

Heti ang mi i va ngaizawngin i va hmangaih thei, i tawng tawh ngei ang. Mahse hnawl i nih avanga i ṭap a nih pawhin bâng la, hun ṭha zawk i nei tih inhria ang che. Mahni nun tihchhiatna atan hmang reng reng suh. 

Pathianin kan tâna rem a ruat hi chu pumpelh tum mahila a theihloh. Pumpelh i tumna kawng kha kawng dik zawk a ni zel tho. I ta tur nilo pawh chuti khawpa i hmangaih theih chuan, i tana chunglam ruat chu engti fakauin nge i hmangaih ang tih  ngaihtuah ang che. 

Chu i hmangaih diktak tawng tur chuan dam la, inbuatsaih la, Lal Isua nena in damchhung hun hmangzo turin duhsakna sang ber ka hlan a che. 

A HMANGAIHNA A LO NI

Mizo te zíngah Vanneihtluanga hre lo hi kan lo awm palh a ni pawhin kan tam hauhlo ang. Amah kan hriatna ber chu a thuziah thiam em em vang a nih kha. Tun hnu ah Lengzêm chanchinbu thlakip a a tihchhuah hnuah hian kan hre chiang leh zual awm e. 

Thuziak lamah chuan Mizo fate zîngah a thiam ber pawl a ni tih hi kan pawm vek ang a. Ka sawi duh zawk tak chu hla phuah a thiam em em zawk hi a ni. Thuziah ang em em chuan hla lamah a kuthnu hi a tam lo a ni maithei a, mahse a hla phuah te erawh hi chuan Mizoram hi a deng chhuak tih chu kan hre awm e.

H. Lalmuankimi'n 'Damna kim' tih a sak te kha a hun laiin hrelo kan awm awmlo e. Tin tun hnaiah One In Christ te'n an sak 'A hmangaihna a lo ni' tih pawh hi mi tamtak chuan kan ngaithla tawh awm e.

He hla hi a phuah dan leh a phuah hun te Vanneihtluanga hi ka va zawt in min lo hrilh a, a chungah ka lawm hle.

"Aizawl Chanmari Kohhran Hmeichhia-in kum 2000-ah, Drama ziak turin min sawm a, musical drama ka phuahsak a, dialogue awm miah lovin, musical vekin ka siam a. Mizorama Chanchin Ṭha lo thlen hma aṭanga kum 2000 inkar nun tarlanna a ni a. A bikin kan rama Chanchin Tha avanga hmeichhiate hmasawnna lantirna a ni. Chumi musical play hla 4 zinga a hnuhnung ber a ni.

He musical drama ah hian tlar thum zai, hymnal, choral, pakhat ṭheuh leh tuna mi 'A Hmangaihna a lo ni' tih hi a awm a. Kohhran hmeichhiate tana sak awlsam turin thluk awlsam te tein ka siam ni tain ka hria."

A hmangaihna a lo ni

Phuahtu: Vanneihtluanga

Satu: One In Christ

Ka Lalpa min hruaina hi

Thu in ka hril seng dawn lo

Ka zai leh ka banphar te zawng pawh hian

A hmangaih an hril seng lo

Min hmangaihna chhiar dawn ila

Ka hringnun hian a hril phaklo

Ka nun leh neih zawngte nen hian in

A hmangaihna a lo ni.

A malsawm ka chhiar seng lo

Ka mamawh chitin min pe

Lamtluang zim leh thim ka zawh lai pawhin

A hmangaih banin min kai ṭhin

Ka hmabak a eng zel ang

Doral lian a tlawm zel ang

Ka rin leh ka beiseite aia sangin

Min la chawisang zel dawn si

(Website a Fakna awm i lo click zauh khan website man tal a lo tum ve mai thei a sin.)

LAL ISUA I NI EM?

-Rinfela Zadeng

Chu mipa naupang chu cher in thawmhnaw

neilo hle mah se Pathian zarah a hrisel hle a.

Thlasik khawvawt tak hnuai ah chuan kawrlum

haktur tha a neilo a. Hman kum a mi thahnem

ngaite’n kawrlum an pek kha a la ring char char

a; a hluiin a rul nasa tawh a, a phuaiin a chuai

tawh hle. A thiante’n Krismas kawr thar an lei

tur leh an duhzawng an sawi sap sap lai chuan

a ngawi reng a.

Naupang kum 10 mi chauh nimah se an hausa

lo tih chu a hrethiam ve tawh-a thil ngen leh

duhzawng te a nu leh pa te’n an leisak theihloh

avangin. Sikul a kalna ah Sikul Shoe tha a neilo

a. A chip lam chu a pawh tawh avangin a

mawza-kezungpui chhip pawp chu a lang thin a.

A thil thiam leh a thil tih ve chak tamtak chu

mahni insitna avangin a tihloh phah thin. An

sikul in hun pawmawh an hman ah te pawh a

thil thiam zawng leh tih chak zawng te chu mi

neinung fate’n an tihkhalh vek a, a thiamna leh

a theihna pawh retheihna avang chuan a hmang

chhuak ngam ve lo.

A thiante’n Tuikahchik an kah sup sup lai chuan

kah ve a chak em em thin a. A thiante kephah

vawi 100 zat in Tuikahchik silai hmangin tui vawi

5 a kap chik ve thin. A thiante bawlhhlawh

paihsak in halpuah 2 a hlawh thin a. Chhun ah

thingpui hmeh an neih loh avangin chawthing

leh ‘Aji-no-Moto’ chawmpawlhin chaw a ei thin.

A nu leh pate’n theihtawp chhuah in hna an

thawk tih a hria a, a mamawh tak tak bak dil

duhlo khawpa finna Pathian in a pe.

Kumkhat chhunga thawmhnaw thar a neihve

theihna hun leh khawpui a Bus chuang a kalve

theihna hun Krismas chu ni 5 chiahin a dang

tawh tih a hria a. Kumtin Tlangsam leh Japan

Hlo a lo par hun chuan Krismas a hnai tih hi

Calendar enlo mah se a hre ve ziah a nih kha!

A thiante’n Krismas thawmhnaw an lei vek tawh

thu leh Bazar ah thawmhnaw nalh tak tak a

tamzia an sawi chu a hre ve reng a. A nu leh pa

te hnen ah an Bazar ve hun tur a zawt ngamlo-

a naute 3 pawh in thawmhnaw an nei ve duh

ngei ang tih a hria.

Nitin in Krismas a lo hnai deuh deuh a, a nu leh

pa te hmel a en chuan Krismas thawmhnaw

neih a beiseina chhete chu a thamral dawn tih a

hria a, a pa hmel phei chu a en ngamlo. A pa

chuan hahtak a hna thawkin nitin a inhlawhfa

tih a hria a; a nau pakhat zawk hritlang

damdawi a leisak lai pawh a hria. Zan a mut

naah a nu leh pa in Krismas ruai thehna tur

pawisa thawh tur an neihloh thu a sawi chu a

hre reng a. A nuam tih ber Krismas ruai theh

velo tur a a inngaihtuah chuan a mittui a tla fap

a. Sunday Sikul a an zir a hriat reng angin Lal

Isua hnen ah Krismas thawmhnaw leh Krismas

ruai thehna tur pawisa dilin a tawngtai a. Lal

Isua chuan an mamawh engkim a nei tih chu a

hre chiang em em a; ringhlel hauh lo in zan ah

chuan tui takin a mu ta a.

A thiante’n an Krismas thawmhnaw thar en tur

chuan nitin zantin an lo sawm bat zat a; ‘I lei

ve tawh em? Engtik nge in bazar dawn?’ tih chu

a zawhna dawn zin ber a ni. Chhan dan a

thiamlo a hrilh hai fo thin. Mahse a thinglung

erawh chuan ‘ Lal Isua’n min pek hun hun ah’

tiin a chhang thin. An Krismas ruai thehna tur

Vawk lianpui mai chu an thlung run tawh a,

naupang ho chuan zingtin an kil a, an sa ei chak

lai te an kawk liam liam thin a. A ni erawh

chuan pawisa an la thawh veloh avang chuan a

kawk ve ngamlo a, a sawi ve ngamlo.

Ni 23 zan ani tawh a, naktuk zan chu Urlawk

zan a ni tawh tih a hria a, naktuk chiah Krismas

thawmhnaw leina hun a awm tawh tih a hria.

Chhun lam ah thing tang ro a put avangin a

chau deuh a, tui takin a muhil a, chutih lai tak

chuan an kawngka kik thawm chuan a ti harh a.

A pa in a va hawn chuan mipakhat lo lut chu a

hmu a. Lo lut thar pa chu a pa nen chuan an titi

a, an inbiak dan vel a tang chuan an ‘Pasitawr

tezawk’ kha ani tih a hria a. An Pasitawr

tezawk chu kum thar ruai theh zawh hnu atang

a lo awm thar ani tih a hria. A nu chuan a nau

paw pah a a thingpui lum chu a pa

leh Pasitawr tezawk chuan an in dun a.

Thingpui hang an inzawh hnu chuan

an Pasitawr tezawk chuan Krismas Prezent ah

tiin a pa chu lehkha sen hi a pe a, a pa chuan

an hawng zawk a-pawisa a lo awm teuh a. A pa

chu a tawng theilo a, a nu chu a ding ngawi

reng tih-room hran an neihloh vangin thosilen

pawp hrup tawh hnuai atang chuan a hmu vek

a.

Khum atang chuan a va tho a. An Pasitawr

tezawk-a bul ah chuan a va ding a-

“ Ka pu, nangmah hi Lal Isua i ni em?”

“ Nilo e. Ngatinge min zawh a?”

“ Isua hnen ah Krismas thawmhnaw leh ruai

thehna tur pawisa min pe rawh ka ti a, tun ah

min lo pe sia”

“ Lal Isua in pe turin min lo tir a… ” (A sawi

zawm theilo a)

Naupangte chuan lawm a vanga mittui tlingpiau

chungin-

“ Lal Isua hi a tha tiraw ka pu?”

CK HI……

- Rinfela Zadeng

CK hi Mizo thalai, WhatsApp leh Facebook khawih thin te chuan kan hre vek awm e. CK lampum tak hi chu kan hre kher lo a nih pawhin a awmzia chu tun laia thalai, nu leh pa tamtak te pawhin kan hre awm e.

Mizoram ah chauh pawh a ni biklo a, khawvel hmun dangah pawh heti zawnga WhatsApp leh Facebook leh Social Network a inbiakna hi a mikhual lo a, ingaizawng te inkarah te, inngaizawng kher lo – pawmlai nei reng - ler ve hrim hrim te inkara inbiakna hluar pawl a ni ti ila kan sawi sual lo mai thei. A lampum lamah chuan buai ta lo ila, a nghawng chuah lam zawk hi sawi ta ila tha awm e.

Kan ‘ck’ hian thu hi tisa ah a chantir a, chu chuan nghawng thalo tam tak a nei a. Heng avang te hian HIV/AIDS  vei emaw a thehdarhtu emaw kan nih phah thei tih te hi hriat a tha. Chutih rual chuan nula tlangval inngaizawng, heti lam hawi reng reng a inbe ngai miahlo hi tamtak kan awm a. Chungte chu an zahawmin an inngaihzawnna pawh hi a tlo deuh nge nge zel a, nupui pasal a innei a chhungkaw hlim tak din ta hi a tam zawk an ni ngei ang.

Nula i nih a, zan rei tak thlenga i online chuan mipa tuemaw lo biak ‘ck’ che tum che hi vawikhat tal chu i tawng ve tawh ngei ang.  A bik takin zanlai pelh tawh hnuah phei hi chuan nula te hian inbox lamah heti ang lam hawi a inbiak tumna hi a mikhual lo hle tih a hre chiang tu in nih kha. Tin, kan sawi tak ang khan WhatsApp lamah te pawh heti ang a min beiseitu mipa hi kan tawng fo a nih kha. Tin, inngaizawngte inkarah pawh a mikhuallo kan tih tawh kha.

Nula te u, hei hi hre reng rawh u – i bialpa in biak ‘ck’ reng che a tum a nih chuan a nupui nitur in a duh tak tak tawklo che tih hi pawm la, i tisual tam lo ang. Sex leh hmangaihna hi a hrang a ni tih hi hriatreng tur. Heti lam hawia in inbiak fo chuan thu hi tisa ah a chang har lo tih chu a hrechiangtu i nih kha!

Tin, biak ‘ck’ mai mai atan chauh i bialpa hian a duh che a nih phei chuan i chan a chhe khawp ang. Tin, nangmah in i zir hmasa a nih chuan mipa i dem ringawt thei biklo ang. Mahse ‘ck’ pui mai mai tlak lek hmeichhia i nih chuan tun atangin insiamtha la, i tan pawh i damchhunga i inchhirlohna tur a ni. Heti anga biak ‘ck’ mai mai i nihlohna turin i incheina leh i nungchang uluk la, nun chhuah pui bawk ang che.

I hmalam hunah pasal pangngai tak neih hreh rawk khawpa i awmlohna turin fimkhur la, inveng tlat rawh. I thusawi leh i thlalak te kha nakina nangmah tichhe vek theitu che a ni tih hre reng la, i zahawmna kha pasal i neih hma chuan vawng him tlat ang che - chu chu Pathian thu pawh a ni.

Mipa te pawh hi kan fimkhur a ngai. Hmeichhe online rei nazawng hi va biak ‘ck’ tum ringawt loh tur. Tun laia an ‘screen shot’ hmak hmak a, group ah te an ‘post’ in mipa tan mualphona leh kan zahawmna zawng zawng hlohna a ni. Bakah heti lam ringawt kan bialnu te chung ah rilru kan pu a nih chuan kan inenfiah a ngai hle.

Hmeichhia te hian sex aiin himna, inghahna tlak leh rintlak mipa an duh zawk. Heti lam hawia hmeichhia kan be nghal a nih chuan kan zahawmna zawng zawng hi a bo a, an tan tenawm leh mipa zaktheilo tak nih bak kan hlawh lo.

A hrim hrimin ingaihzawnna inkarah hian ‘ck’ lo in hlim takin a inkawm theih a, kan inhmangaihna hi a pung thei a ni tih te hi kan hriatchian a ngai. Nula tamtak in an sawi fo chu – mipa fel tak tak leh smart tak tak ni a an hriat te pawh heti lam ah hian kan duap ru fu a ni tih hi an sawi a, mipa te kan inefiah a ngai hle.

Kan nun tak tak lan chhuahna pawimawh tak chu tumah min hmuhlohna a kana wm dan ah hian a ni thin. Chung huna nangmah hrechiang ber tu che chu I ‘ck’ pui thinte kha an ni a, ngaihdan tawk che leh teh dan tawk che an nei tih hre reng la.  Thu chu tisa a lo chan a, sual a nih hma hian  sim la, insiamtha ang che.

Vanram a len ka nuam

Tun laia Mizo Gospel Band ah chuan One In Christ hi Pathian in a hman ber pawl  an ni ti ila kan sawi sual awm lo e. An member ah hian Alvin Lalruatfela leh Lalruatdiki te hi ka hmelhriat a. An hla sak chungchang ka zawh te hian phur takin min lo hrilh thin a, an chungah ka lawm hle.

Tun hnaiah hmun hrang hrang ah Pathian faka zaiin rawngbawlna an nei a, an hla sak te hi a nalhin mite thinlung khawih thei hla tha tak tak an sa a, thalai leh nu leh pa te ngaihthlak theih tur hla tha tak tak an sa a, an zai thiam in an fakawm hle.  Tun hnai maia You Tube a an hla dah thar ‘Vanram a len ka nuam’ tih an sak pawh hi an thiam in an sa nung-nalh leh khawp mai. He hla hi ‘I Want To Stroll Over Heaven With You’ tih hla Carl L. Trivette phuah a niin Mizo tawng in Alvin-a hian a letling a, Muantea Hauzel in a harmonized sak a ni.

Carl-a hian he hla hi a nupui Marilee Rasnake, kum 2003 a boral tan a phuah a niin Marilee vuina ah hian an sa a, kum 2006 khan Alan Jackson chuan a sa bawk. He hla thihnu piah lama kan beiseina thurin (eschatology) pawimawh tak pawh kan hmu thei a ni.

He hla a kan hmuh ang hian khawvela malsawmna kan dawn zawng zawng zawng Pathian khawngaihna vanga kan dawn vek a ni a. He khawvel a kan awm chhung hian harsatna leh lungngaihna, thihna te hi kan pumpelh theilo. Nitin kan eizawnna kawng ah harsatna kan tawk fo a, sum leh pai ah kan buai a, inelna khawvel ah hian buai reng rengin kan hun kan hmang ral thin. Mahse heng zawng zawng hi Lal Isua vanga Van ram kan thlen hun ah chuan a bo vek tawh ang a, Amah nen chuan chatuan in hlim takin kan leng dun dawn a ni.

Tin, kan hmangaih em em, he khawvel lo chhuahsan tawh te nen pawh Vanram ah chuan hlim takin kan awm ho thei tawh ang a, natna leh lungngaihna, tahna leh inthenna reng reng awm tawhlo in Pathian fakin chatuan in kan awm ho tawh dawn a ni.

Lusun leh nun beidawng mek i ni mai thei e, he hla hi han ngaihtla la, Pathian ah beiseina thar i neih ngei ka beisei tlat a ni. Chung i harsatna leh lungngaihna zwng zawng chu Vanram ah chuan a bo vek tawh dawn a ni tih hre reng ang che.   

Vanram a len ka nuam

Translator: Alvin Lalruatfela

Ka dawn changin van lam thilpek ka nuna thleng zawngte leh

Hmangaih vanga malsawmna ka dawn zawng zawng te hi

Lei lal te’n min pek theiloh chu ka dil anga Lalpa chu

Min chhang ngei ang tih ka hriat vang in

Nangnena a len hun ka nghakhlel van hmun nuam ah khian,

Kan buaina zawng leh lungngaihna a bo hlen tawh ang

Chu hmun mawi tak maiah chuan hlim in kan leng ang

Nangnen a vanram a len ka nuam e

Lei mawina leh ropuina te’n he hringnun hi a luah fo

Hun leh ro sum thuneihna khawvel hian min dang si

Mahse chu hmun mawi thlen hun chuan kan ngai tawh lo’ng lei nun hi

Vanram ah hlim in kan leng tawh ang

KAN INNGAIZAWNG EM? 10

CHAPTER - X

- Rinfela Zadeng

Ka hmangaih reng ang che

Bawngkawn ah Rinawma chuan Taxi contri' pui tur a melh a. Chutih lai tak chuan an thianpa First Year zirlai chu Scooty nen a lo tlan a, Rinawma chu chuang ve turin a lo ko hlauh mai a. Rinawma pawh chu lawm takin a thianpa Scooty ah chuan a chuang ta a.

Bawngkawn - Durtlang kawng chho, Halflong an tih fiam mai zawn an tlan lai chuan Taxi 2 leh 407 leh Rinawma te thian chu kawngchhaka lung lo tla thut mai chuan a deng palh ta hlauh mai!

Taxi 2 chu an taxi chung a sawi ve ve a....passenger te an te chul a, hliam erawh an  awm lo. Mahse an taxi hma vel erawh a sawi ve hle a, a rawng a khawk nuaih bawk! 407 erawh chu a ruaka tlan a ni bawk a, a hnungah chuan lung te leh lian ve deuh thahnem fe a tling khawm ruih a, a ri rum rum nghe nghe!

 

Rinawma te thian duh pawh chu lung kehthem chuan an scooty chu a vawm a, an tlu nghe nghe a. Scooty khalhtu chuan Helmet a khum avangin a kiu leh a khup ah bak hliam a nei lo.

Rinawma erawh chuan helmet a khum ve loh a vangin a tukkhum chu lung lian vaklo in a vawm a, a lu chu pawpin an tlukna lamah a sawh bawk nen, nikhaw hrelo in a awm a. 

Chulai vela mi te leh Motor vei vak te chu lo pungkhawm nghal thuai in harsatna tawk te chu an pui a. Midang chu an zia hlawm a, Rinawma te thian dun chu an buaipui ta ber a. A bikin Rinawma, a lu a thisen chhuak zawih zawih chu rang takin Hospital lamah an tlan chhoh pui a. 

Durtlang Hospital ah chuan Nurse leh Doctor te chuan Theihtawp chhuah in Rinawma leh a thianpa chu an buaipui nghal a. Rinawma thianpa chu First Aid an pek hnu ah a zia chho ta mai a. Rinawma erawh chu puan vara a lu vet luk chung leh Oxyen vuah bur chungin ICU ah hmanhmawh takin an nawr lut a.

Darkar thum a ral chuan Hospital kawt ah chuan Rinawma classmate, College kalpui te leh zirtirtu thenkhat te chuan Rinawma chanchin ngaihven in Hospital kawt ah an awm a. Rinawma nu leh pa pawh Taxi hmangin Lunglei atangin Aizawl an lo pan mek bawk. Hetih hun lai hi tlai dar 3 vel a ni.

Hetih lai hian Mali chu a muhil a, Rinawma chanchin engmah a hre ve lo ang.

Rinawma chuan engmah a la hre lo chhunzawm zel a. ICU ah chuan a la mu reng a. A classmate, an College leh zirtirtu te chuan thil thalo ber a thlenlohna turin an tawngtai a. Rinawma chanchin hria apiang chu chuti ang chuan an tawngtai bawk. 

Mali khan a hre ve tawh ang ngem? Rinawma phone lah chu an tlukna ah khan a keh chhe vek bawk si a.

Zan dar 11:48 PM ah chuan Rinawma nu leh pa chu Hospital ah a lo thleng a. Rinawma nu chu a mittui a tla nasa hle a, Rinawma pa erawh chu rilru na tak in a in sehruh teuh thung.

Rinawma lo tawngvaih thu Nurse te chuan an sawi a. ICU atang chuan la chhuak in Oxgen pawh chu an vuah tawh lo a, a lu erawh a la intuam luk a. A khum bulah chuan Rinawma nu leh pa chu an ding a, Rinawma nu chuan Rinawma kut chu a vawn sak. 

Chutih lai tak chuan Rnawma mit chuan khua a hmu tawh lo a, mahse amah hmangaih em em tu a nu kut erawh a hre chiang hle.

Rinawma: Nu....in lo thleng maw? (..chu thu sawiin Rinawma nu chuan a hria) 

Rinawma Nu: Bawihpui, kan lo thlenna a rei tawh lawm...hei i tha vek tawh a nia. 

Rinawma chuan a nu kut chu a hmer vawng vawng a...tawng tur a awm tawh mang lo a...a pa chu a mangang ru hle a...

Rinawma : Ka hmangaih che ka nu...ka pa...

Rinawma Nu : Bawihpui, keini pawhin kan hmangaih lutuk che...i thiante pawh pawn ah an awm a....an nghak vek che nia class i kal leh hun tur....

Rinawma thaw chu a zawi tial tial a. A lo harh leh deuh a...a  phun sep sep a...

Rinawma Nu: Bawihpui eng nge i sawi? I phone a keh vek a, i thiante kan be theilo...Mali i ti em ni? 

A beng chu Rinawma hmui phun sep sep bul ah chuan a zuk dah a. Hei hi a hriat chhun chu ni-

Rinawma: Ka hmangaih reng ang che.....

Rinawma chu he khawvel ata a kal ta...a nu leh pa, a thiante leh an zirtirtu te chu an va tap nasa em!!

Mali chu a rilru na ve ang ngem? Ka hrelo le....mahse hei hi ka hria-

Mali chu midang ta a ni.

End of Chapter X...

Lal Isua nen bul kan tan leh thei ang em?

A lo rei ve leh ta – ti ila kum thum a liam ve ta reng mai. Ka la hre reng July ni 2 kha! 

Inrinni a lo thlen hian ka rilru ah hian I lo awm leh thin a, lei min an sawi hian ka tum loh deuhin ka hre chhuak leh thin che!

Ka dul a kiar tan tih ka hrilh che a ‘lo kiar deuh deuh rawh se’ I tih kha hei a lo kiar ta fu mai!

Facebook ah thian kan nilo reng a, tunah thian kan ni leh a. Kan ‘status’ hi in ‘like’ sak lo mahila kan hmu ve ve thin ang tih ka hria.

“Bae’ tih a lo lar vak hma khan kan inkoh nasat theih zia kha tiraw? 

Ka bulah hian la awm tar eng la, tun ai hian ka puilting saw tang nge ka nep zual ang tih hi ka hre chiah lo a. Mahse min kalsan khan ka tan I hlutzia leh ka hmangaih zia che ka hrechhuak a, tun thlengin ka theihnghilh thei tawh lo. 

Ka tana ‘super special’ i nih zia ka hriat chian leh zual hnu hian I thinglungah kei chu engmah ka lo ni tawh lo a, ka thiamloh vek a ni.

Hmanni tlai zanriah kan ei chu, ka ei thei lo lutuk kha hma deuh ah ka kham a. Chutah chuan I WhatsApp ‘Dp’ a midang nen in lak dun ka hmuh tlaia chaw bar khat chiah ka ei a ka kham nghal kha ka hre chhuak!

Engkim kha ka tihsual tih hi ka apwm a. Lal Isua kha lo dah lal ber ila chuan ka bulah tunah hian I la awm reng ang tih ka hria. 

Theihtawp chhuah ah I tana tha ber nih hi ka la tum fan a, ka hmangaih che tih hi ka hrechhuak nawn fo a sin.

Pathian khawngaihna leh hmangaihna in a rawngbawl tura min thlang ve a nih ngai chuan- Lal Isua nen a nun bul tan that leh hi ka duh takzet a sin- I hria em?

Ka ngaizawng lo che a, ka hmangaih che a ni.

Ngaihzawng leh min ngaizawng tu ka nei a, ka hriatchhuah chu ka hmangaih che tih hi a ni.

A lai, a sir, a thlang, a chhak leh engkim ah Lal Isua hi awm se, nangnena kan dam chhung hun hi Lal Isua hnung zuia hmanzawh ka duh takzet. 

Tih theih ka nei lo a, Lal Isua ah ka innghat tawp a, ka theihtawp chhuah ka duh tak zet.

Pathianin hun tha hi min her chhuah sak leh mai thei a, min her chhuah sak tawh lo pawh nise ka vui chuang lo a. Mahse, ka theihtawp chu ka chhuah ang a, kawppui I lo la neilo a nih chuan ka hmangaihna che hi tih tawp a a awm hlen na’n vawikhat chiah min nei turin ka sawm leh ang che. 

Kan inkar ah hian tihtheih engmah a awm tawh lo a, Lal Isua chauh hi engkim chunga thu neitu a ni a. Chu chauh chu ka innghahna a ni. 

Ka hmangaih che a, ka hmangaih takzet che. 

Lal Isua nen bul kan tan leh thei ang em? 

NO, NOT ONE!

Kristian Hla Bu number 134 na kan keu chuan Pastor Johnson Oatman Jr. (1856 – 1922) a Pathian hla phuah Mizo tawnga Rev. JH. Lorrain (1870-1944) a lehlin ‘Kan Isua ang thian dang reng an awm lo’ tih kan hmu ang a. He hla ropui tak mai hi kum 1895 ah khan Pastor Johnson-a hian a phuah a, khawvela Pathian hla ropui leh lar ber pawl a ni tih chu kan hre theuh awm e. 

 

He hla phuahtu Pastor Johnson Oatman Jr. hi kum 1856, April ni 21 ah piang in kum 19 lek upa a nih laiin Methodist Episcopal Church chuan Pastor atan a ngemnghet a. Kum 1878 ah Wilhelmina Reid chu nupui ah neiin fa pthum Rachel, Miriam, leh Percy an nei a. Amah hi hla phuah thiam tak niin Kristian Hla Bu number 48 na ‘Mangang leh lunngngaia tan I tum te hian’ tih hla pawh hi a phuah a ni.

Kum 1893 ah a hriselna te a that tawh loh avangin pastor anga rawng a bawl thin chu a chawlhsan a. A hunt awn tawh te leh a rawngbawlna te ngaihtuah let in he hla ‘Kan Isua ang thian dang reng an awm lo’ tih hi kum 1895 ah khan a phuah a ni. Hetia pastor rawngbawlna a chawlhsan hnu hian Pathian hla sang chuang a phuah a, chungte chu khawvel ah a larin Pathian in nasa takin a hmang a ni. September 25, 1922 kahn Oklahoma ah a boral. 

He hla ah hian Lal Isua chu kan thian , kan harsatna zawng zawng min hriatsak tu a nih zia kan hmu a. He hla changkhatna in a sawi ang hian Lal isua chu kan thiantha ber, kan sualna zawng zawng ngaidam theitu a nih thu kan hmu a. Johana 15: 13-15 na ah kan hmuh angin Lal Isua chu kan thian a ni a. Phillipi 2:5-8 a kan hmuh angin kan thian, kan kawm phak leh a pa Pathian thuawih a kan sual tlanna tur a Kross a thi a nih thu kan hmu a. A ni chu kan sualna leh kan bawchhiatna zawng zawng min ngaidam tu a ni. 

He hla chang 2-n a kan hmuh ang hian Lal Isua chu inngaitlawm leh zaidam tak a ni a. Lal ropui tak leh sualna neilo mithianghlim a ni a. (Heb. 7:26) Chuti khawpa Lal ropui ni mahse la kan tan Lal Isua tlawm taka awm in kan harsatna leh kan phurrit te min chhawk zangkhai turin a lo kal a ni. (Matt. 11: 28-30) Chuti ang tluka mi fel leh tha chu Lal Isua bak mi dang reng reng an awmlo a ni. 

Chang 3 na a kan hmuh ang hian Lal Isua chu kan bul ah a awm reng a. Min vengin min kalsan ngailo a, khawvel tawp thleng pawhin kan hnena awm turin min tiam a nih kha.( Matt. 28:18-20) Zan thim leh hreawm kan tawr thinna laka pawh Lal Isua chauh hi min thlamuana min tidam theitu a ni a. A ni tluka kan tan a rinawm leh tha, thian tha leh rinawm hi khawvelah hian an awm lo a ni. 

He hla chang 4 na ah hian La Isua chu kan thianth ber, min thlathlam a min kalsan ngailo tu a nih zia kan hmu a. Engtikah mah min thlathlam loh tur thu leh min kalsan ngailoh tur thu min hrilh a nih kha. (Heb. 13:5) Lal Isua’n a  hnen a lo kal tawh reng reng chu eng anga misual pawh ni ila min hnar loh tur thu leh min hnawhchhuah loh tur thu min hrilh a nih kha! (Jn. 6:37)

He hla chang tawp ber a kan hmuh ang hian Lal Isua chu min chhandamtu a ni a. Pathianin kan tan liau liau a a thlawna min pek a ni a. (2 Cor. 9:15) Enga a thuk leh sulna nasa pawh nei ila Lal Isua chuan min chhandam duhin min chhandam thei a ni.

Lal Isua hi kan engkim, kan harsatna leh mihringin kan thil tawn zawng zawng hre vek tu awm chhun leh vanram kan kalna tur a kawng min buatsaihtu thian rinawm, awm chhun a ni. Chu Lal Isua, kan thian a ni chu kan va vannei em! Lalpa chu fakin awm rawh se.  

  

NO, NOT ONE!

Composer: Johnson Oatman Jr. (1856 – 1922)
 
 There’s not a friend like the lowly Jesus,
No, not one! No, not one!
None else could heal all our soul’s diseases,
No, not one! No, not one! 

Jesus knows all about our struggles,
He will guide till the day is done;
There’s not a friend like the lowly Jesus,
No, not one! No, not one!

 No friend like Him is so high and holy,  
No, not one! No, not one! 
And yet no friend is so meek and lowly,  
No, not one! No, not one!
 
  There’s not an hour that He is not near us,
  No, not one! No, not one!  
No night so dark but His love can cheer us,
No, not one! No, not one!
 
  Did ever saint find this Friend forsake him?  
No, not one! No, not one!  
Or sinner find that He would not take him?
No, not one! No, not one!    

Was e’er a gift like the Savior given?  
No, not one! No, not one!  
Will He refuse us a home in heaven?  
No, not one! No, not one!