AM FEAR LIATH MOR(Chu Ransa Maktak Chu)

AM FEAR LIATH MOR(Chu Ransa Maktak Chu)

★Opeey-a Khiangte
_______________________________________

Am Fear Liath Mòr chu, Big Grey Man of Ben MacDhui tih leh Greyman ti pawhin an sawi a. Cairngorms tlangchhip sang lai ber, Ben Macdui-a awm thin, ramsa mak tak niin an sawi a. Ben Macdui chu Scotland rama tlangchhip sang ber dawttu a ni.

Ramsa mak tak leh sang tak, hmul awm thuap mai niin an sawi a. Chu tlanga va lawnte chuan an tawk palh hlauh ang tih an hlau rilru thin hle a ni.

Hmu nia insawi leh report a tam hle a, a kehniak nia chhal thlalak pawh tam tak a awm a, chungte chu evidence awmchhun a ni. traditionally atanga dawn chuan, supernatural being niin an ngai a, mahse, Am Fear Liath Mòr chu, Wales rama hmuh thin 'Gray King" te, Himalaya-a an hmuh thin 'Yeti' te leh, North America-a hmuh thin 'Bigfoot' (Sasquatch)-te nen pawh khan thuhmun an ni thei ang em tih leh, thlah khat an ni thei mai law'ng maw tih hi mi thenkhat ngaihtuah thin a ni.

Scotland rama 'Greymen' leh Europe hmun dang dangah Greymen ang deuh an hmuh thin a awm a, Wudewas or 'Wood Men' tih a ni a, 13th century vel atanga an lo hmuh thin kha a ni a, mi thenkhat chuan, relict hominids a nih an ring a ni. Kum 1925 khan, climber hmingthang J. Norman Collie chuan, Ben MacDhui tlangchhipa a thiltawn mak tak a sawi a.

Tlangchhip a lawn laiin a hnung lamah penri mak tak a hria a, penri chuan a zui zel niin a ngai a. Mahse, chhumzing a nasat em avangin, eng thil nge tih leh amah zuitu chu an awm tak tak em tih erawh a finfiah thei ta lo a ni. Tin, climbers dangho pawhin, grey rawng ramsa mak pui mai an hmuh thu an sawi a, thenkhat erawh chuan, a thawm leh riva chauh an hre thung a ni.

Psychologist-te chuan, hlauh rilrukna te, thil hmuhsual te leh, rilru chiai deuhna te hi taksa chauh luattuk vang leh, mahnia awm rei lutuk vang tein a awm thei niin an sawi. Tin, infrasound (mihring hriat tam loh khawpa ri hniam, 20 Hz aia hniam) hi thli thawin a siam thin a. Chu chuan mihringah rilru kaptu leh, tinuam lo deuh riautu awm anga inhriat tlatna a thlen thei a.

Chutiang dinhmunah chuan, paranormal sightings a awm tel tlangpui niin an sawi. Mit khawhmuhsual optical illusion 'Brocken spectre' pawh hi, Big Grey Man legend hrilhfiahna a tling thei maithei bawk a.

Brocken spectre, "mountain spectre" chu, Nizung rawn kal dan angle azirin, Tlang sangah chuan a awm thei a. Nizungin Chhum a kah a, Chhum hlimthla chu humanoid figure ang takin a lang ve thei ta thin a ni.

Amaherawhchu, thilmak tawngtute chuan an hlau thin hle a, hmuhsual leh engemaw vanga hriatsual mai chu a ni lo niin an sawi veleh tlat thung si a ni. Ben MacDhui tlang chu 1309 metres (4296 feet) laia sang a ni.

climber Professor Norman Collie khan, Annual General Meeting of the Cairngorm Club, Aberdeen (December 1925)-ah Tlangchhipa a thilhmuh mak tak chanchin kha a sawi a. Kum 1891-ah tlangchhip chu lawnchhuakin, a chhukthla leh a, chhum lah a zing nasa viau mai a.

Penriin a zui ta tlat mai a, mahse, Chhumzing vang chuan, eng thil nge tih a hmu thei ta lo a ni. Chu lo pawh, Reports dang awm leh ta chu, kum 1920 tir lam khan, Ben MacDhui tlang bul a, Glen Eanaich-a Braeraich tlang lawn a a chhukleh lamah, mountaineer Tom Crowley chuan, a hnung lamah thawm a hria a.

A hawikir nak chuan le! GREY Rawng ramsa tihbaiawm zet mai chu a hmu ta thut mai a ni. Ramsa chu a beng a zum vu a, a ke a sei hle bawk. En rei ngam lo chuan a chhuksan ta thuai a ni.

Wales-ah, Big Grey Man chu Grey King tih leh, Brenin Llwyd or Monarch of the Mist titein an sawi a. Sawi dan dang dang leh hrilhfiahna pawh a tam hle.

Man-beast te, mystical holy man te, geological holograph te, optical illusion 'Brocken spectre' te, marooned extraterrestrial te leh, electromagnetic phantom titein hrilhfiahna pawh a inang ta lo thluah bawk a ni.(Opeey-a Khiangte)

★★★