TKP DAY HMUN HRANG HRANGAH HMANG

 

Aizawl | July 30, 2018: Vawiin, July 30 hi Baptist Church of Mizoram thalai pawl; Thalai Kristian Pawl din cham a ni a.

Kumin hi Ṭhalai Kristian Pawl  Kum 67na a ni a, Mizoram mai bakah Mizoram pawn Unit dinna hmun hrang hrangah urhsun taka hun hman a ni.

Kohhranah ṭhalaite puala rawngbawlna huang hran siam tura uluk leh fimkhur taka an ngaihtuah hnuah July 30th 1951 khân Serkawn-ah ṭhalai rualte leh kohhran upate chuan zosap Missionary te kaihhruaina hnuaiah ṬKP hi an din a ni.

Headquarters lam aṭangin kohhran leh khawtlangin a hlawkpui theih ang bera hman tura ngenna siam anih angin hmun hrang hrangah khawtlâng hnatlâng leh thisen pëk rünpui buatsaih a ni.

# ṬKP Kolasib Pastor Bial pawhin District Hospital Kolasib tän BCM Kolasib Kohhran Hall-ah thisen pëk rünpui an buatsaih a. Mipa 23 leh hmeichhia 7 in thisen pein District Hospital Kolasib Blood Bank-a thawktuten kohhran Hall-ah kal chilhin thisen an laksak a ni.

Zan lamah ṭhalai inkhawm buatsaih tûr niin thupui thlansa "Pathian chung lam koh chhan" Philippi 3:14 hmangin thuchah ngaihthlak a ni ang.

# Thalai Kristian Pawl  Day denchhen leh MTKP Blood Donation Routine bawhzuiin vawiin 30.7.2018 khan Hnahthial BCM Bazar Pastor bial TKP te chuan BCM Bazar Kohhran Hall-ah Blood Donation Camp an nei a, Civil Hospital Lunglei thawktuten Hnahthial kal chilh in thisen te hi an la a ni. Thisen petute hi hmeichhia 10 leh mipa 41 an vaiin mi 51 a ni.

# ṬKP DAY PUALIN VAIVAKAWN UNIT IN VSP TANPUINA PE

TKP Vaivakawn Unit te chuan TKP Day (July 30) vawi 67 na pualin Vaivakawn Siamtha Pawl (VSP) tanpuina pawisa Rs 1500/-  nimin, 29July 2018 khan an pe. VSP hian Ruihhlo do kawng ah te, Veng chhung thatna turin rim takin hna an thawk thawk țhin a ni.
ṬKP Vaivakawn Unit hian TKP Day apiangin Social Service activity an nei ziah țhin a.
MZI ah tulian tuarte tanpuina pek te, Khawlai phiahfai, home tanpui, tuikhur tihfai thlengin an lo thawk tawh țhin a ni.

* Thu kan dawn danin unit leh bial hrang hrangin mahni awmna khawtlang tana tangkai zawngin hun an hmang a. Thenkhatin thisen pein, veng chhung tifaia hnatlang pawh an awm.

* Zan lamah leh Biak Inah inkhawm a ni a. tawngtai rualna hmangin, thupui inang hmangin an tawngtai a. Ram leh hnam tan, khawtlang tan, ram hruaitute leh Zoram inthlan lo awm tur bakah TKP hruaitute leh Nakkum MTKP Inkhawmpui Tlabunga awm tur pual tein an tawngtai a ni.

* Tun dinhmunah TKP Pastor Bial 84 ah ṬKP unit 418 awmin, member mipa 28444 leh hmeichhia 17711 an awm mëk a ni.



(In unit/bial hman dan report leh thlalak 9402125273 ah thawn ve rawh le...)

_______________________________________________

Thlalak hran hran a hnuaiah kan dah e:

TKP Central Church Unit, Aizawl

TKP New Serchhip Unit

TKP Moria Unit

TKP Lunglawn East Unit , MTKP Organiser hovin

TKP Chaltlang Unit in TKP Day an hmannaa TKP President hmasa ber Pu Lungruala'n 'TKP Day Cake' a zai lai.

TKP  Tobul

Kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh kohhran upate chuan kan Zosap Missionary-te kaihhruaina hnuaiah Thalai Kristian Pawl hi an lo din a. Hruaitu hmasa te chu President – Pu Lungruala; Vice President – Pu Vanlalkunga; General Secretary – Pu K. Lalliana; Treasurer – Pu T. Ropianga; Senior Adviser – 1) Rev.H.S.Luaia; 2) Upa.C.Saizawna; 3) Zomawia Nu (Mrs FJ.Raper) 4) Pu Lalmama te an ni. Executive Committee members Nl. Rothuami; Pu Hrangthanga; Pu Lalsawma; Pu Remkunga leh Pu Thanghmuna te an ni. Thalai Pawl din hi Presbytery (tunah Assembly)-in a lo phalsak tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.

Hetih lai hian Mizoram hi Assam state chhunga district pakhat mai a nih avangin TKP inkhaikhawmna pawh District TKP tih a ni a. District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955)-a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih/thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpuiin 1997 atangin TKP Day hi July 30-ah hman a lo ni ta a ni.