MZP VEHBUR KHAWN THAWH LINA ZO

Aizawl !Vawiin 30th July, 2018(Thawhtan) hian MZP General Headquarters bultumin MZP in Bairabi Zophaia Zofate Chawlhbuk sak kan tumnaa tlawmngaia thawkchhuak Assam Police ten an vuak leh Silaia an kahna hliam tuar te enkawlna senso leh Assam Police in Zofate Chawlhbuk sa tura mi tlawmngai kal te an tihchhiat sak leh thil bo senso rulhletna tur vehbur khawn hnatlang thawh lina(4) chu chhunzawm a ni a. Vawiin hnatlangah hian Govt. Aizawl North College zirlaite leh Govt. J.Thankima college zirlai zathum(300) chuang hnatlang hian an thawk chhuak.

Vawiin MZP vehbur khawn hnatlang tan hma hian Bawngkawn Govt. J.Thankima College pengah huntawi hman a ni a. He huna thusawitu L. Ramdinliana Renthlei chuan, "Ram leh hnam tana fehchhuak zirlaite bungraw chhia leh damlo enkawlna senso Vehbur khawn a lo ngai ta mai hi a lungchhiatthlak ka ti hle a. Compensation hi Central Sorkar leh Assam sorkarah dil a ni a, chhanna kan hmu lo a. Kan Sorkar hotute thurawn angin Mizoram sorkarah dil a ni leh a, Mizoram sorkar chuan min pek theihloh thuin min chhang leh a, hemi a nih avang hian zirlaiten Vehbur khawn a lo ngai ta a ni. Zofate Chawlhbuk sakna a Bungrua Assam police in an hal chhiat kha MZP Bungrua vek a ni lo a, MZP in kan hawh YMA leh MHIP Bungrua te, Bairabi khawtlang mutbu te, Sintex te, Mike Combo te a ni a MZP in a rulhna mai kan nei si lo a Vehbur kan khawn mai a lo ngai ta a ni."a ti.

He huna thusawitu dang Lalnunpuia Aizawi City College Joint Students Union(ACCJSU) President chuan, "Mizoram Sorkar in ram tana fehchhuak hliam tuar enkawlna senso leh Bungraw chhia compensation a pe duh lo hi vawiin ni ah hian zirlaite kan thinrim hle a, Mizoram Sorkar hi zirlaite chuan kan dem tak zet a ni. Mizoram Sorkar hian he thil hi vei se chuan Vehbur zirlaiten kan khawn hi a ngai lo ang, ramri hi tun aia nasa zawk hian Mizoram sorkar in vei se zirlaite chuan kan duh hle a ni. MZP hmalakna hi Aizawl City College Joint Students Union(ACCJSU) chuan kan thlawp zel dawn a, Zofate Chawlhbuk sak a nih hunah pawh MZP hi theihtawp chhuahin kan pui zel dawn a ni." a ti.

Zofate Chawlbuk sak tumna a tlawmngai a thawkchhuak zirlai te damlo enkawlna senso leh thilbo rulhletna tura mi in phal Mizo thahnem tak kan awm leh tanpuina tura bawma lo thlak zawng zawng te chungah MZP chuan thinlung takin lawmthu a sawi a, bawm hi Aizawl khawpui chhung college hrang hrangah a duh apiangin an thlak theih nan hun a ni a, MZP Pisapui ah a duh apiangin an thlak theih nan hun reng a ni dawn bawk a ni. Vehbur khawna thawkchhuak college zirlai zawng zawngte chungah MZP chuan thinlung takin lawmthu a sawi tak meuh meuh bawk a ni. Zofate Chawlbuk sak tumna a tlawmngai a thawkchhuak zirlai te damlo enkawlna senso leh thilbo rulhletna tur Vehbur khawn hi Mizoram hmun hrang hrangah neih mek a ni a, Mizo mipuite tlawmngaih chhuaha bawmah lo thlak zel turin MZP chuan thinlung takin a sawm nawn leh a ni.