Ziaktu: C.Lalthazuala
Columnist, www.tleirawl.in
A sa lartu Peter C.Lalrinmawia'n he hla mawi taka a han luanliampui dan lah hi sawisel bo a ni thlawt mai a, a sa fuh em em a, a thluk kalphung hrim hrim hi a ma sak tur liau liau a siam emaw tih mai tur a ni a, a remna rimawi lah hi hun in her chho zelah pawh a fuh chho telh telh dawn niin a lang. He hla an record kum, 1982 hun vel laia Otto Recording Studio vela an hmanraw neih theih tawk turte han ngaihtuah let phei chuan, he hla an record lai leh an record-naa an thiamna hlu tak tak thawhtu 'Musicians' te hi an chhuanawm tak zet a ni.
C.Dinthanga hla 'Kar hla thian' tih hla tha tak mai leh mawi em em mai hian, 1980 chho vela Zo rimawi hartharna thlipui tleh hem hem nen chuan a in nang fuh tiin sawi ta ila a dik khawp ang. Arts & Culture Department peng pakhat, Institute of Music & Fine Arts (IMFA) a, chief music instructor, Joseph Zokunga, Zofate zingah chuan rimawi khawvela a sulsutu pawimawh ber zinga mi chuan, a ngiala ngana sap hla thluk lak chhawn awm miah lo vin 'Kar hla thian' tih hla thu mawi leh ngaihno bei zet mai hi a thluk a irawm ngei maiin a han siam chhuak a, a mawiin a chhuanawm tak zet zet a ni.
C.Dinthanga hian, "He hla Joseph-a nena kan siam dun lai hian ka hla thluk lunglen zawng leh ka rilrua hla thluk lo lang ve mek chu ka lo rum pui vang vang thin a, Pu Joseph-a pawhin a rilruah a thluk a nei ve sa tho bawk a, music zirna school-a zir chhuak, staff notation thlenga thiam a ni a, music note leh a chord-te a han siam zung zung a, he hla thluk mawi tak hi kan puitlin ta a ni," tiin a sawi.
He hla thluk hi Pu Joseph Zokunga hla thluk siam, hla thluk dang ho nena kalphung a dang deuh tlat mai a, ngun taka han ngaihthlak hian, C.Dinthanga'n ama irawm ngeia hla thluk a lo siam ve tawhte nen inlai chinna thuk tak a nei ru ve tlat mai a, musician ropui leh hla thluk siam thiam ropui Joseph Zokunga'n ngun taka hla thluk siam tura a insawr bing mek lai hian a bula lo thu ve reng C.Dinthanga lo rum vei vang vang thin chuan Joseph Zokunga rilru leh ngaihtuahnaah nghawng engemaw tak chu a nei ngei a ni tih hi phat tur a awm lem lo ve.
He hla hi C.Dinthanga hian Saikot, Churachandpur-a a penfriend, a hring a hrana a hmuh phak hauh si loh, hmuh a chak em em thin, Thangliana a phuahna a ni a, telephone-te khawvel ram puma heti taka a la lar hma chuan lehkhathawn hmanga khawvel hmun hrang hrang, ram hran daiha awm te thiana insiam hi a lo lar thin hle mai a, C.Dinthanga leh Thangliana pawh hi lehkhathawn hmangin thian tha taka insiamin, he hla thu mawi tak mai hmang hian an inkara inthian thatna leh inngainatna thuk tak awm mek chu C.Dinthanga hian a hrilhfiah chhuak tha tawk hle a ni.
'Kar hla thian' tih hla hi 1982-ah Otto recording studio-ah record a ni a, engkim an peihfel thlep hnuah All India Radio, Aizawl Station-ah dah chhovin Radio station atanga tih chhuah anih hnu reiloteah Mizoram dung leh vang, chhak leh thlang, chhim leh hmar a deng chhuak nghal a, tun thlengin, kum 30 zet a herliam tak hnuah meuh pawh, Mizo thalaite awmtleitu, Mizo thalaite hla duh berte zinga mi a la ni ta fan reng a, a la ni chho zel dawn a nih hmel hle mai.
IMFA (Institute of Music & Fine Arts) music instructor RK Zothangtluanga (Sena) chuan 'Kar'hla thian' tih bul tanna (Introductory part) atana James B.Ralte Guitar han khawih zet hi chu a kut chhuak rau rauah pawh mawi ka tih ber leh fuh ka tih ber a ni hial awm e' tia sawiin, a felfai thah mai a, chubakah a hla mawina tibelhchhah lehzual turin, James B.Ralte hian Guitarist anga a mawhphurhna a hlenchhuak tha takzet a ni, tiin 'comment' a pe nghe nghe a ni.
A ni ngawt mai, he hla bul tanna'na James B.Ratea'n electronic effect hmang hauh lo va electric guitar, accostic guitar ri ang mai a, fel fai thehthawha a han thaikual deuh zaih zaih mai hi chu a mak a, a mawi a, a dangdai zar mai a, a hla thluk inthlak chho leh a hla inthlak dan mila 'chord' inthlakthleng ve zel dawh zawmna'na 'guitar-pooling' mawi tak leh lunglen thlak zet maia a han khawih kul vei ngaih ngaih thinte hian James B.Ralte 'creativity' thatzia a pholang chiang teh asin mawle!!!
A awm ve bawk e, Bombay, mood indigo, IIT, PAWAY, hmuna India ram pum huap college literature and cultural festival an nghah tuma tingtang perha pakhatna dinhmun lo zuk hauh tawh kha James B.Ralte hi a ni tlat mai, guitarist anga a mawhphurhna, he hlaah hian a hlen chhuak ve a ni tih hi kan pawm tlan dan tur a ni ber mai ang chu.
Kum 20 vel zet All India Radio, Aizawl kaltlanga Peter C.Lalrinmawia'n a lo larpui hnuin tunhnai maiah Joseph Zaihmingthanga'n a rawn thar thawh ve leh a, 'Sakhmel tawn ni awm si lo' tihlai tlar taka, 'Tawn ni' tih thumal hi a phuahtu rawn lem lo vin 'Tawn tur' tiin a rawn thlakthleng mauh mai a, mite hla phuah, a phuahtu phalna emaw, rem tihna emaw, la hmasa lo va mahni tawka lo thlak ngawt mai hi chin tam fo loh atan a tha fo ngei ang.
Tin, Joseph Zaihmingthanga soundtrack hi tunlai electronic keyboard hmanga siam a nih avangin a hmaa kan han sawi uar tak James B.Ralte-a guitar khawih mawi tak ang deuh a, tunlai guitarist tharlam, talent nei tha takte guitar perh ri hriat tur a awm ve lem lo va, Joseph Zokunga rythm-guitar, struming ri rual mawi theh thawh ang te, Lalduhawma bass guitar perh mawi tak mai leh a hla chang leh a hla chang inthlak kar laka a satu Peter C.Lalrinmawia bass-drum tlawh ri nena, inchawih taka, guitar hrui thum tawlh kual vel ang te, a original version-a kan hriat ang kha hriat tur a awm ve ta lo va, thlang sappui hoin 'Old is Gold' an lo ti ta mek mek bawk a, a dik tak chuan a 'original version' nge nge kha chu, tun hnaia Joseph Zaihmingthanga'n 'Kar hla thian' rawn sak thar ve lehna atana a hman 'music track' hi chuan a phak lo deuh niin a lang.
Aw le, C.Dinthanga'n kum 1982 vela 'Van dumpawl leh boruak thiang karah' tia hla thu hmanga a lo puan chhuah ang tho khan, tun hun, kum 2016 kan hmanlai meka van boruak Zawlkhawpui mawi tak mai chung van boruakte khi, an la dumpawl ruih mai si a, boruak pawh a la thiang nuam viau tho mai si a, he hla mawi dangdai tak mai hi lungchim takin i lo ngaithla nawn leh thin dawn nia.
Kar hla Thian
Phuahtu : C.Dinthanga
Satu: Peter C.Lalrinmawia, Joseph Zaihmingthanga
1. Kawlvalenchhama leng thian duh tak
I tan thaikawi biahthu ka rawn tir a
Aw sakhmel tawnni her lo
Mahse i hlimthla thlirin
Thinlaiah ai ang i cham reng e
2. Van dumpawl leh boruak thiang karah
Awmhar kan run riangteah hian maw
Kei lungmawl hian lungchimte'n
Ka dawn vawng vawng thin che a
Sakhmel tawnni awm si lo, ka thian
Sakhmel tawn loh kar hla thian
Kan kar lam tluang a thui vawng vawng
Ka thinlung chhungrilah
I cham reng aw ka thian
3. Thaikawi biahthu ka hlan tawh che a
Ka tan thaikawi biahthu mi hlan ve la
I sakhmel mawi leh anka mawiin
Lairil a fan ngei e
Engtikah tawnni her ve ang maw
No comments:
Thanks for your comment.