Manipur Zofate tân Zoramthar

Ziaktu - Lalmuanpuia Punte

www.tleirawl.in

Naga hnam tana zalenna suala India sorkar laka hel pawl NSCN (IM) leh India sorkar te inbiakna kal zelin a nghawng tel Manipur state-a cheng Zofate chuan mêl lung thar an an chuangkai dawn hnai ta.
India sorkar hian, 'Insurgency should not pay - helnain hlawkna a nei tur a ni lo' tih hi thupui bera neih angin lang mahse, vaiho dawt heh zia lanna kawng khat a ni ber ang chu, helna hian hlawkna chu a nei fo a ni. Mizoram chuan MNF hel te thlemchhuah nan UT aṭangin state kan chuangkai a, 'MNF te ralthuam tun hlawh a ni bik lo' ti niawm takin Arunachal leh Goa te pawh Mizoram rualin UT aṭangin state-ah hlankai an ve an ni. A dik tak chuan MNF te silai tun avangin Mizoramin chu state kan nih phah a, helna chuan hlawkna chu a nei ngei a ni. Thup mawi an tumna lamah Arunachal leh Goa te pawhin hel pawl MNF silai tun zar an zo ve zawk a ni.
India sorkar leh NSCN(IM) inremna pawhin ken tel thil tam taka a neih dawn avangin Manipur state-a cheng Naga te'n dinhmun thar engemaw tak an neih dawn avangin 'NSCN te silai tun vang' a nihzia thupmawi nan, Manipur state-a cheng Zofate pawh dinhmun thar pek ve zel an tum ta a, Bodo helpawl te silai tun hlawh ang Territorial Council pek ve an tum ta.
Amaherawhchu Manipur state-a cheng Zofate zingah khian hel pawl tia sawi ve mai theih silai chelek pawl an tam êm² mai a, chu'ngho chuan inzawmkhawm pawl (Alliance) pahnih, Kuki National Organisation (KNO) leh United Peoples' Front (UPF) ah an inhlawmkhawmq leh a. Tichuan India sorkarin Territorial Council a pek tum pawh chu buaina lianpui la hmachhawn leh thei dinhmuna an din avangin KNO leh UPF te chuan an ngaihtuah ho ṭhin a ni.
A hming turah KNO leh UPF duhdan a inang hlei thei lova, KNO lam hian Kuki hming put an duh a, UPF lamin ZO hming tel an duh thung a. UPF hi Kuki helpawl engemaw zat leh ZRA leh HPC-D te an tel a, UPF Chairman hi pawl tin te'n an in nih chhawk kual a, an election hnuhnung berah khan HPC-D C-in-C Lalropuia(L) kha an thlang a. UPF Chairman nilai Lalropuia (HPC-D) chu vanduai thlak taka a thih tak thut avangin ZRA hotupa Thanglianpau chu aiah an thlang leh ta a.

Vawi tam tak meeting an neih hnuin 29.6.2018 (Friday) khan Churachanpur-ah KNO leh UPF te chuan meeting nei lehin Manipur state chhunga Zofate tana Territorial Council ding tur hming atan chuan hming pahnih : Khul Territorial Council leh Zalengam Territorial Council chu Manipur hnam hrang hrang zinga pawl hrang hrang ho, (civil society organaisation - helaia NGO kan tih ang hi) te nena inrawn tlan hnuah July ni 10, 2018 ah meeting neih leh a, thutlukna siam turin an ṭindarh ta rih a ni.

Manipur-a Zofate te khi district hrang hrangah an awmdarh a, a hlanga an awmna chu Churachanpur district khi a ni a, Manipur tlangram district-ah chuan a lian ber a ni a, MLA constituency pawh paruk lai a awm a, a bakah chuan Naga nen an in chenpawlh thung a. Tun hnaia congress sorkar tawp dawna district thar an hawn belh zinga Sadar Hills district khi Kuki hlang an ni a, CCPur district pawh phelin Pherzawl district hawn thar a ni bawk. Tichuan Manipur-a Zofate chuan an thil la tawn ngailoh thil, Territorial Council neiin hlawm khatah an han awmkhawm dawn ta tihna a lo ni ta a, a hming tur pawh Khul Territorial Council emaw, Zalengam Territorial Council emaw anih dawn hmel ta a nih chu.

Manipur chhung bikah chuan Zofate chuan Zoramthar an tawng dawn ta, an Zoramthar tur chu tuna an awmdan aiin a ṭha zawk dawn nge, ṭha zawk dawn chuang lo nge, a chhe zawk or hrehawm zawk dawn tih erawhchu an khawsak zel danin a la hril ang chu..

An TC hming tur propose-a KHUL tih hi sawifiah hlek ila
Keini Mizorama cheng Duhlian ṭawng hmangte hian Chhinlung chhuak kan inti a, Hmar hnam chuan Chhinlung kan tih chu Sinlung an ti a, Zomi (Paite, Simte, Vaiphei, Zou etc.) leh Kuki ho khian lung pûk aṭanga lo chhuak ve tho nia inngaiin chu chu Chhinlung or Sinlung ti lovin Khul an ti a, chu chu Duhlian ṭawng chuan Khur tihna a niawm e.