Ziaktu : Awmpuia Fanai
www.tleirawl.in
ENG VANGA LUT NGE AN NIH?
Heng naupang Wild Boars football team member 12 leh an coach pakhat hian an zinga naupang pakhat kum 16 tlinna Birthday lawm pahin an football practice zo chu eitur tlem kengin Birthday outing nei turin he puk Tham Luang Cave hi June 23 inrinni, 2018 khan an lut a. He puk hi khawchhung bul maia awm anih vangin ahranpa a pan vang vang ngai loin khawchhunga tanga reilo te kal ani tih pawh hre tel ila an luh mai theih dan kan hre thiam zual ang. Abul vel hi inding a tamin huan thlai an ching nasa hle.
Thui tak pawh luh tum an nilo a, thui vak lo chu han fankual erawh an tum. An thirsakawr puk pawnah an hnutchhiah hlawm a, an bag leh phone erawh puk chhung lamah hmuh ani thung. Intihhlim paha Birthday lawm tum an ni. An luh lai hian khua a tha hle a, mahse he puk hi tui luan luh theihna tam tak awmin puk thui zawng pawh km 10 teh meuh ani bawk a, a dawhthleng a zau bawka, heng naupang luh hnua a ruah nasa tak sur chuan an chhuahna tur puk kawngka lamah tuilian siamin chhuak thei loin pukah chuan a dang bet ta ani.
An ni lah chu khua a thim tawh em pawh hre loin beisei nei takin tuilian chu akam deuh hun an nghak, mahse an awmna chin chu a rawn chim zel si a, puk chhung lamah an tawlh lut zel a, an tum lawk leh an duh vang ni miah loin dam taka an hmuh na hmun puk kawngka a tanga km 4 zet ah tawm hulna zawngin an tawlh lut alo ni.
Heng an cycle leh bag hnutchhiahte zan thim thlenga an rawn lam tak loh a vangin helai vel enkawltu chuan tanpuitu a au ta a, tanpuitu an lo thlen pawh hian ruah a tla renga,chu ruah sur chuan nasa taka puk chhungah tui a tih tlin a vangin engmah hmalak theih ani ta loa, hmanraw tha leh chang tluk zawk nen Thai Navy seal punin ruahmanna an siam ta ani.
AN BO TANTIRH LAM
(helai thu hi post siamin ka tarlang tawh, chhiar tawh tan hmeh tawlh thlaka thupui pakhat, AN DAM CHHUAH CHHAN AN COACH? tih atangin chhiar chhunzawm mai nise)
Naupang hoin puk an luh lai hian khua a thiang tha em ema, mahse fur ruahtui tlaklai anih vangin puk pawn lamah pawh July atanga November chu puk luh ahlauhawm thu Warning sign thuneitu ten an tar nghe nghe.
An bo thu hriat anih takah chuan He lai puk hre chiang leh lut fo tawh te leh mithiam te nen ro an rel ta, an awmna ni thei tur awm pawh an chhui thiam ta , an hruaitu an assistant coach hian naupang rilru ti chak turin naupang hi hmundangah ahruai chhuak fo thin a, he puk pawh hi kum 2016 khan an lo lut tawh nghe nghe. Chutiang anih vang chuan ram chin an hre thiam deuh anga, tui in a chim ngai meuh lohna hmun chu an sa himnan an pan an ring ta a, chu lai hmun chu puk kawngka a tang chuan km 4 chuang zet ani. Chu lai hmun thleng tur chuan hna an nei hautak dawn hle tih an hria.
Rei lo te ah khawvel in chu chanchin lungchhiatthlak tak chu ahre ta thuai, ram hrang hrang USA Leh British expert te bakah Australia atangte, Israel, myanmar, China leh hmun dang a tangin chhanchhuaktute tawiawm tur leh chhanchhuaktute zingah tel ve turin puk luh leh midang chhanchhuah kawnga mithiam leh specialist an rawn lut ruih ruih mai ani.
Ni 5 an zawn hnuah pawh engmah beisei tur an la hmuh tak si loh a vangin khawvel chuan angaihven thar ta em ema, news headline ah an thlalak nen a chuang chei chuai mai ani.
Ni 6 an zawng ta, an hmu lo mai niloin an hnuhma awm reng reng an hmu lo. He tihlai hian puka tui hi khawl hrang hrang hmanga pump chhuah ani reng chungin ruah sur a tawp thei lo bawk nen, tui chuan kam lam pan loin chirh leh hnawl nen a chimchin a sang zel zel tho mai. Chutiang anih vang chuan chhanchhuah hnathawkte pawh an sahim nan an thlen chin atanga an let angai fo thin. Let ngai loin kal tlang zel thei se rang zawkin an hmu dawn, mahse duh angin anche thei silo, lehlamah naupang dinhmun tur an ngaihtuah lo thei si lo, an lu ahai bat bat hle mai.
CHANCHIN LAWMAWM
Ni 7 lai an zawng ta, sunday July ni 1 a ni a, Chhanchhuaktute chuan puk chhunga chamber 3 an tih mai chu an theng ta, ahma chuan an kal chin a tang pawhin tuilian leh an hmanrua chatlak vang tein an let angai fo thin. Tun tumah erawh an thlen chinah light an fit tha a, Oxygen pawh pipe nen la lutin abur tam tak an chhawp kual bawk. Tunah chuan chamber 3 ah inkulh in chuta tang chuan an hmuh hma chu chawl lo leh let tawh lotur an nih thu report ani ta bawk.
He thu hian khawvel chanchinthar aluah nghal a, naupang dam leh dam loh tur an inrin siak leh ta luih luih mai. Ka thu post ngeiah pawh an thi tih news ah an puang tih an rawn comment anih kha , dawt mai anih thu leh an la hmuh loh thu in ka lo chhang diat diat hlawm.
Tawmhulna an neih chuan an la dam ngei an ring, puk chhung tui an inchuan an tan natna a thlen dawn, an in loh chuan tuihal in an boral dawn, tui tel loin mihring hi ni 8 vel bak dam theih lohah an ngai bawk a, chaw tel lo erawh chuan thlakhat chuang dam theih ani an ti thung. Chutiang anih vang chuan chhanchhuak tute an awm mai mai thei lo, tumruhna nen hmalam an pan a, tui rimchhia leh bawlhhlawh karah pawh hmalam an pan zel.
An dam ngei beiseina alian hle a, beisei erawh a sang lutuk lo, tawmhulna emaw, tui intur emaw an hmu em hriat anih siloh vangin hmanhmawh taka an mahni hmuh chu hna hmasa ber ani.
Sunday July ni khat zinglamah chuan T-section an tih mai, puk chhung peng thuam an thleng leh ta, hei zet chu ahma aiin chanchin lawmawm ani ta. An thlen chin a tangin an awmna tura an rin hi ahla tawh lo. He ta tang hian puk chu hmunhnihah akua a, veilam zawk chu an awmna tur lam zawka ngaih chu ani. He ta tang hian reilo te ah an awmna ni a an sawi chu an pawh tawh dawn, chu chanchin thar lawmawm em chu Governor chuan apuang ta. Mahni awmhmun a tangin khawvelin mithiamte hmalakna a ngaichang a, thinthi in tumah an awm thei lo. Ngaihtuahna aluah hlawm hle a, damtaka hmu leh tura duhsakna chu khawvel tawngtaina ani.
CHANCHIN LUNGCHHIATTHLAK
T-section an thlen a tang chuan hmalam panin veilamah pasal tha te an chhuak leh tan ta, July ni 1 2018 sunday zan ani a, an bo a tangin ni 9 na ani tawh, an hmuh vat loh chuan nungdamin an hmu ang em tih chu zawhna lian tak ani tawh, rilru hmanhmawh nen. Hlauhthawnna nen kan ngaichang thup anih kha.
Chhanchhuak tute thui pawh an kal hmain an hma ah chuan Kal ngaihna awm miah lo khawpa chepin lung bang alo awm phei zui mai. Mihring leng tawk tawk ni mahse tui tam leh chirh dup tak leh thim tak vang chuan an hmanrua nen lo chuan luh tlang ngaihna awm silo, naupang te kha tui len hma in helai hi an kaltlang ngei anih an ring. Chu lai hmun a vang chuan an khawtlai leh dawn ta. Mahse chawl muang thei an nilo. Rang taka chu lai chu an thuam famkim nena an kal theih tura zauh chu hna hmasa ber ani ta.
Chu thu chu pawnlamah pawh a darh ta thuaia, khawvel chuan thin phu dep depin an chanchin angai chang reng a, eng ang chiah nge an dinhmun ni ang tih chu an in rinsiak ani ber mai.
FUIHNA
Puk chhung lamah ram hrang hrang mithiam hna thawk mek ten fuihna an dawng nasa em em a, an oxygen burah te chuan.."dam takin rawn hruai haw ru aw" tihte an ziak a, an infuih tawn a, an in ti chak tawn thin.
Puk pawn lam leh Thailand sikul velah te chuan "Van te u zahngai hram ru aw, kan unaute puk chhungah an tak mek ani, zahngaihna lantir in veng him la, rawn chhuah tir ang che u aw, kan ngen che. Kut suihin kan ngen che" tiin an zai ve bawk. He hla hi tuna thailand rama hla lar ber ani mek ani.
Beidawng suh u aw kan lo kal e tih thuziak te chuan mi mittui a ko chhuak nasa hle.
An chhungkhat lainaten hna thawktute tan leh an fate tan an tawngtai reng bawk a, mutmu an tuah lo ani ber mai. Puk pawn lamah nise tawngtaina hmunnsiamin An tawngtai chawl lo.
CHANCHIN THAR LAWMAWM LEH NAUPANG AN HMUH DAN
July ni 2 thawhtanni ani ta, an zawn tan atanga ni 9na niin an bo ni a tanga chhut chuan ni 10na ani. Hahkhat an hah leh chuan naupang awmna pawh thei turah an in ngai tawh bawk a, an kalkawng tur pawh an leng tawka zauin an siam thei ta a, hmalam an pan leh mek tih chu chanchin thar ber ani.
A changin khuar thuk tak te, tui hleuh ngaih chang leh tuia han pil bawrh chengte neiin an tum ram an thleng ta, mahse an beisei ang ani lo. Tui alo tam hle maia, naupang hmel reng reng a lang lo.
Beidawng suh u aw kan lo kal ania tih slogan chuan a ti beidawng duh lo te pawh ani ang, chhanchhuak tu te chuan an hmuh hma loh chu hmalam pan turin ke an pen leh ta.
British diver pahnih John Volathen leh Rick Stanton te chu Metre 440 vel an kal leh ta, an light chuan Naupang, an sport thawmhnaw hak lai leh an taksa vela Chirh kai nuaih chunga an thu khawm chu an va chhun fuh ta ani. British Expert Diver pahnih hi va hmu hmasa ber tute an ni ta ani.
Mi eng zat nge awm che u?
......13 kan ni
A va lawmawm em..
An la dam vek tih hriatna chuan a ti lawm a, an hmelah nise hlimna hmel alo alangaz rei tak eng hmu tawh lo an nih vangin mitvai chungin an mit an nuaia, an chhanchhuahlaia an hlim hmel hmel leh an tawrhna te ngaihtuahpuiin lainattu mittui ala hul thei chuang lo.
Hetia an bo chhung hi ni engzat nge an an hre lo, British expert diver te pahnih chuan ni 10 lai puk inluh a tangin in bo tawha, tunah dam takin in la awma, in huaisen in in va tawrh chhel tak em an ti a...naupang te chuan"Thankyou" tiin lawmthu an sawi mawlh mawlh bawk.
An mahni hruai chhuak tura kal an nih thu leh tam tak an lokal mek tih an hrilh chuan lawm avangin biangah mittui aluang a, thank you tih ri hriat tur a awm reng bawk.
Engtikah nge kan chhuah theih ang? Vawinah kan chhuak thei ang em tiin naupang te chuan nghakhlel leh hlim takin an zawt.
"vawiin ah chuan chhuak thei lo ang, mahse tunah chuan hlim deuhin awm tawh rawh u, nangmahni chhanhhuak tura lokal kan ni a, kan hnungah tam tak an lola kal bawk an ti a. naupang riltam chuan eitur, eitur , eitur rawn ken tir ru aw, Kan ril tam tawh lutuk tiin an rawn chah lawm lawm mai. vawithum lai a rawn sawi. An ril atam tawh ngang ani ang. Lainatawm rualin alawmawm em em bawk si. He chanchin thar duhawm hian khawvel a deng chhuaka, puk pawnlamah mittui aluang hnem hle
Rei lo te ah Doctor te thurawn angin eitur tuiril protein pai tam chi leh nachhawkna leh antibiotics pek an ni ta a, an vai hian dinhmun ngaihtuah awm an awm lo a. An hriselna pawh an tan rei ngaihtuah chuan pangai tak vek an ni.
Chhanchhuak tute pawh an inkuah a. Tu pawh mai chu an hlim em em ani ber mai.
AN DAM CHHUAH CHHAN AN COACH?
Beisei tur an nei chau hle tih an coach chauh chuan ahre thiama, an ei tur neih an ei zawh tawh vang chuan an riltam tawh hle a, an chau bawk, puk an luhna ah khan pem neuh neuh an nei bawk. Puk ah hian an bo ni atanga chhutin an va hmuh inkar hi ni 10 zet ani. Puka tui tling chu an coach chuan in phalsak loin puk bang vel atanga intlak tui thianghlim chauh an in a, heihi mithiam te chuan mihring taka chhut a an damchhuah theihna chhan lian ber a ni an ti.
Vanneih thlak takin an coach hian tunhma in Buddhist puithiam hna (monk) alo thawk tawh a, chuta tanga a zir tam tak chu hmang tangkaiin nasa takin an dam khaw chhuahna hi ahril bawk niin an sawi. An coach hian kum 10 mi anih in a nu leh pa a chan a, Buddhist puithiam ho bulah khawsa ve in thiam thil engemawzat a zir ve a, a hnuah tuna enkawltu api hian rawn la in a chenpui ta a, pawn lamah pawh nu leh pa ai awhin api hian alo hmuak ve ani.
An mut a chhuah chuan A rem ang angin an tlu zal ve maia. Eng ni nge an hre lo a, eng hun nge an hre lo, ai mit thlawn ang hlauh niin tawite pawh an hmu thei lo a, an khawvel chu a zim hle ani. An rawn zawn ngei ring mahse beiseina an nei chau hle. An coach chuan huaisenna leh tumruhna chu naupang rilruah a tuh zela, a tawng thlamuan zel bawk. Km 4 em em a thui erawh an lut tih an in hre bik lo. Chhun nge zan an hre lo a, engni nge an hre hek lo. An tuar tlawk tlawk mai ani.
Thawm an hriat hmasak ber chu chhanchhuak tute thawm ani. Light rawn eng re re an hmuh chuan lawm in thenkhat muhil lai pawh an inkaitho chawpin an hlim emem a, an va hmuh ruala hruaichhuak mai turah te pawh an lo ngai ani.
Puk an awm chhung hian hruai chhuah mai anih loh vang leh an dinhmun vangin an rilru lam pawh an venpui hle a, rilru lam Doctor te pawhin an thlahthlam lo. Pawn lama an lo chhuah thlengin Naupang leh rilru Doctor lamin an thutchilh ani.
HRUAICHHUAH DAN TURAH THUNEITU AN BUAI
Puk an luh anga chhuah mai theih nise a awlsam vek tur hi ani. Mahse tunah chuan ke a an kalna te chu lipui a chang zo a, chhanchhuak tute pawhin an lu ah light vuah mahse tui chu chirh leh leinawi/dum anih vangin an hma zawna an kut pawh an hmu phak mang lo chu ani si. Eng tin nge ni ta ang le? Thuneitute lu ahai.
Puk atanga chhuak tur hian tui thuk ta mai bakah puk kawkel te reuh te, mihring pawh an len tawk tawk na, chu pawh chirh leh dum hnuaiah thuam famkim nena luh ngaia awm, hleuh deuh chunga chho zawnga luh chhoh ngai te ani. Chawl lo a thuitak cave diving tih ngai tur te chu an tan buaipui tham khawpa harsatna lian ani.
An buaina dang leh chu naupangin tui luh an thiam lo. Cave diving an ti maia, chu chu puk chhunga tui tlinga luh/hleuh ani. Puk chhunga tui hleuh hi pawn lama tui hleuh nen chuan thil hrang hlak niin mithiamin an sawi, tunah pawh an buaina chu a chung lam ah inkal pawhna awm loin ahnuaiah zu luh vang vanga rem leh rem loa chirh leh tui inpawlh kara oxygen bur leh thuam famkim nen lehlam pawh tura amawng atanga mihring leng tawka chep a thui tak tawlh ngai chu ani. Hmazawn hmuh theih ani lo. Zero visibility an ti. Ahmuh theih miah loh tihna ani. Hetiang cave diving hi experience leh trained tan chauh a tih tur ani a, naupang tan thuamhnaw pawh design ve ani lo. Tam takin cave diving ah hian nun an lo chan tawh ani. Tin hmun thenkhatah tui akhauh em em bawk si, thuneitute lu ahai hle ani.
Chutiang harsatna karah an ni naupang vawikhat pawh tui la lut ngailo leh tui chen hrim hrim pawh thiam lo chu an taksa a chak tawk bawk silo, nunna chan ahlauhawm hle tih mithiam ten an hria, an hruaichhuak ngam lo. Rei tak ro an rel, duh dan a kawkalh nuaih mai. Mizo pa taka hruai chhuah nghal duh pawh an awm, he tih chhung hian chhun zan zawmin pawn lamah puk chhung tui tling chu khawl lian chi hmangin an pipe chhuak reng bawk. A bul vela thlai chinna hmun te chu tui an pump chhuah hnem em avangin tui atling nasa hle.
RUAHMANNA HRANG HRANG
An hruaichhuak vat lo anih chuan ruahtui haw hun lai ani a, July atanga October-ah hian tam tak ruah asur dawn tih an hre sa bawk. Eng tik lai pawha ruahsur tan thei reng ani tawh, ruah hi a sura furpui an tuar anih chuan tui an pump chhuah tawh te chuan awmzia anei dawn lo, tui tam tak luang lut lehin thla tam tak puk chhungah tui kam hun an nghah angai dawn, December emaw January emaw chauh an chhuak thei ang, chu pawh lo nise tuna an awm mekna hi tuilianin a rawn chim leh thei. An dinhmun ahim em em chuang lo. Khawchin lah chuan kartawp lamah nasataka tek leh ruah tla turin a dah ve bawk. Mangan azual hle.
Plan A, Plan B, Plan C. Plan D.... An siam ta. Naupang chu an taksa tih chaka tuiluhna hmanrua hmang thei tura zirtir/trained an ni ang. Tichuan Expereinced ten an chhawm dawl anga, an hruai chhuak thei ang. A dang leh chu puk pawn lam a tanga verh ani. Km 1 vel verh angai, hun a duh rei hle dawn.
A dang leh chu Giant pipe an ti maia, an awmna a tanga ahim chin thleng pipe lian tak oxygen athuam chu an dah anga, a chhungah an vak phei ang, naupangin hmanrua an hman emaw, tuia luh emaw angai dawn lo. Pipe ah chuan vak lutin a hmawr lehlam ahim chinah an chhuak mai dawn ani.
A dang leh chu fur ruah sur tuar zawh thaka tui kam hunah ahma an luh dan anga chhuah leh a ni.
A hmasa ber khi an tum dan ber chu ani. Chu mi tur chuan hma la in naupang pawh tui luh an zirtir a, naupang chuan chhuah an chak tawh bawk nen zuam hle mahse Expereince diver ten ahlauhawm zia an hre si a, chhuah ngawt theih ala ni silo.
NUNNA CHAN AN AWM TA
An ruahmanna ti hlawhtling tur chuan Oxygen bur an chhawp teuh angai, chat lak emaw a awm tur ani lo. Chu tianga ruahman anih vangin Thai Navy a lo tang tawh leh first class Officer, Saman Kunan, kum 38 mi, pension/chawl tawh chuan Volunteer tura a inpek angin oxygen bur supply tur chuan alut a, A let leh lam chu Oxygen tlachham in kawng lakah nikhaw hre loin a awm. A thianten theih tawp chhuah mahse an kaiharh zo ta lo.
July ni 6 zan chuan aboral thu puan niin He thu hian khawvel a deng chhuaka, thuneitute a ti hlauthawng bawk, experienced diver boral hian puk atanga in lak chhuahna hna chu hna ahautak zia leh risk a san zia a tilang chiau viau awm e.
Ti chuan midang tana nunpe Saman Kunan chu ropui thei ang bera chawimawina nen vuiliam ani ta ani. A nupui chuan an in ngaih em em thinthu leh chhunah pawh chaw kan fak tawh leh fak tawh loh chenin kan kalhran pawhin kan in zawt thin tiin mittui nem a sawi a, a pasal chu a chhuan thu a sawi.
Tuntum chhanchhuahna hian ropui taka Hero a puan ani a, khawvel chuan ahming ahre reng tawh ang.
CHHANCHHUAHNA ATAN CHET LAK VAT A TUL
Kar tawp ah nasa takin ruahsur leh tekte leh thli te alo thleng dawn tih chu khawchin hrilhlawk dan ani. Ruah sur thei reng anih vangin chhanchhuah na kawngah an muang hman lo. Ruah sur nge hmasa chhanchhuahna tih chu a intlansiak ani ber. Sawi tawh angin ruah a sur leh chuan puk chu ahma ai nasa in tuiin akhat leh dawna, tun dinhmuna chhanchhuah beiseina chu a bo rih dawn ani.
A hma lawkin chhanchhuah ani rih lo ang tiin ahlauhawm zia puang dum dum mahse duhthlan tur dang a awm lo, ruahsur aiin an hmalakna chu a chakzawk angai. Hun leh Khawchin nen an in tlaksiak ani ber a, chakzawk nih an tum ruh hle.
Puk chung tlang ah pawh eng emaw zat an vei reng a, a luh theihna lai tur pawh hmun 18 vel chu beiseiawm a awm, mahse thui tak luh theih ani chuang silo. Kawng chu an dap kim thawkhat viau ani.
LEHKHATHAWN LEH ASSISTANT COACH NGAIHDAM DILNA
Hetianga chhanchhuah dan tur dap anih mek lai hian Divers ten naupangin an nuleh pa te hnenah lehkha thawn an ziahtir chu pawn lamah rawn keng chhuakin Media ah a darh chuai chuai a, " ka nu, Ka pa, Ka tha e. Ka hmangaih che u. Ka lo chhuah hunah chuan...... Tiin an ei duh zawng an ziak hlawm, An goal keeper Bill chuan" Ka nu, ka pa, lungngai suh u , ka tha e. Karhnih vel ka zin bo angah ngai ula, ka lo haw hunah nitin ka pui ang che u, ka lo haw vat ang" tiin a thawn bawk.
Pheeraphat Sompiengjai chu puk a an bo ni June 23 kha kum 16 a tlinna chiah ani. Tlai lamah Birthday Cake nen a chhungten an lo hmuak, mahse an hmuak haw zo ta silo, lehkha thawnah chuan..mama, i brithday cake pawhin ala nghak reng che, i birthday party turin kan nghak thap che ania tiin lehkha an thawn let bawk.
Hei bakah hian a hruaitu ber an coach Ekapol Chanthawong, kum 25 mi in naupang nu leh pa te hnena ngaihdam a dilna chu a lar hle bawk. Nu leh pa te chuan lehkha thawn letin tu nu leh pa mahin an huat loh thu te, an vanduaina chu tihpalh thil anih thu leh khatiang ni 10 chhunga dam taka naupang a lo kaihruai thei leh an rilru ah huaisenna a lo tuh chu an fak zawk zia te ziakin an chhang let ani. Ni e mi tam tak chuan vanduaiina karah an coach hi awm lo se puk tui te kha an in mai mai emaw, an vah darh emaw an ring, mahse him taka hmunkhatah an lo awm thei leh riltam tak chung pawha puk tuibal inlo a puk pang a tanga tui fim an in kha an coach vang hi ani an ti ve bawk.
Nu leh pa pawhin Navy seal te bulah chuan an coach chu naupang mai ala nih ve thu leh enkawl uluk turin an ngen ve bawk.
D-DAY AN PUANG TA, RESCUE MISSION TAN ANI.
July ni 7 inrinni chuan khuaa tha chho tawh hle, Buddist puithiam rual puk bula tawngtai na hmun nena inkulh ho pawhin an tawngtai chhanna anih thu leh hun tha anih thu an sawi ta. Thuneihtute pawhin a hma lawkin chhanchhuahna tan anih mai loh tur thu sawi mahse chu huntha chu bawhpelh chi ah an ngailo. Media ah puanzar nilo mahse chhanchhuahna han tan turin oxygen bur tam zawk an chah lut ruih ruih mai ani
July ni 8 sunday ani a, puk a an bo ni a tanga ni 16-na chiah ani. D-day chu hun pawimawh/operation intanna ni sawi na ani ber. India sana a dar 8:30 ah chuan khawvela chhanchhuahna hna hautak zinga sawi reng tawh tur chu tan ani ta. Chu thu chu mission chief Narongsak Osatanakorn chuan apuang ta dup dup mai. Foreign mithiam 13 leh thai mi 5 te ko ah hruaichhuah hna chu a tla ta, an ni hi mithiam thlan bik niin Doctor pawh an tel nghe nghe.
Thuneitute chuan tun hi hun tha ber anih thu te, naupang nu leh pa te remtihpuina vek anih thu te, tui pawh a kam lai ber anih thu leh he huntha hi kan bawhpelh thiang lo ani tiin khawvel hriatah an puang ta dum dum mai. "Mission is start " tih chu News headline ani fur mai. Khawvel awm tawh chinah in chhanchhuahna hautak ber tih ngam hial tur chu tan ani ta a, hetiang deuh hian Chile lungalh thei laihna chima tang mi 33 te kha lei verh hmangin ni 69na ah kum 2010 khan lak chhuah an lo ni tawh ani.
Tichuan ruahman lawk aia hma, ruah tui tla pawh a chawlh lai leh puk chhungtui pawh an pump thawl lai ber chuhin Operation an tan ta. Naupang chu group 4-ah an then a, naupang pakhat chu Diver pahnih zelin an veng ang. Naupang awmna atanga puk him chin thlengin hrui thlun ani a, chu mi zui leh ring chuan an chhuak dawn ani.
Rescue day 1
Taksa chak lo zawk te chu lakchhuah hmasak nia an sawilaiin taksa hrisel tha tha chu hruai chhuah hmasak an nih thu sawi a awm bawk., Beisei aiin an tluang a, puk pawn an rawn thlen huntura an beisei aiin an chhanchhuah hmasak ber naupang chuan July ni 8' dar 4 khan puk pawn khawêng a rawn hmu a. Lawm avangin khawvel a au a, tawngtaina pawh lawmthu sawi na leh la chhuak ve lo te tan dilsakna chu a ri chuah chuah mai ani. Ahnu reilo te ah adang pawh rawn chhuak zelin pali lai an rawn chhuak ta a, Abul hnai damdawiin ah ruahmanna anga lak an ni a, Media te takngial pawh tlawhpawh phal an ni lo bawk. Tui hleuh ngai tura an chhut lai thenkhat chu ke in an rawn kal thei. Hei hian nasa taka puiin an beisei ai hma in puk pawn an rawn thleng thei ani.
Media mite kal hnaih an phal loh vang in chanchin kimchang hriat ahar hle a, Naupang 4 an chhanchhuah laiin internatiional news lian tak tak pawhin 6 chhanchhuak angin an ziak hlawm. Hei hian khawvel a nghawrnghin zia a ti fiah chiang hle.
He tih mek lai hian Puk chhungah oxygen supply hman tur an chatlak tak vangin chhanchhuahna chu kalpui chhunzawm loin an chawl lailawk a, Mission chief chuan heng oxygen bur hman leh theih a peih tur chuan darkar 10 tal hun an mamawh thu a sawi ta. Ti chuan July ni 8, Sunday 2018 a puk a tanga naupang pali an hruai chhuah hnu ah nikhatna chu chawlhsan rih ani ta a, a tuk July ni 9 ah an Puk chhungah naupang 8 leh an coach nen an vaiin pakua la tang mek chu chhanchhuah tura rel a ni leh ta.
Rescue day 2:
Zan lamah ruah a sur, mahse pawikhawih tham khawpin a sur lo hlauh. Ti chuan July ni 9, 2018 thawhtanni ah chuan engkim oxygen pawh an inpeih tawh thu leh chhanchhuaktute pawh an lut leh ta tih chu India zing dar 9:30 ah chuan an puang leh ta.
Chanchinthar ngaihvenin mipui kan phe suau suau a tichuan An ram sana dar.4:23 khan pakhat chu dam takin alo chhuak tih an puang leh ta a. Helicopterin damdawiin apanpui lai te chuan puk bul lawkah chuan lawmna kut beng thawm a ri ring hle. Ahnu reilo teah naupang pathum lo chhuah belhin a ni hnihna ah pawh 4 bawk an chhanchhuak leh ta. An vaiin a hma nia an chhanchhuah te nen mi 8 an ni ta a, ruahman ang chuan July ni 10 ah chhunzawm leh tur ani ang. Hmasawnna ropui tak chu ahma ni aiin darkar 2 in an rang zawk hi ani. hlawhtling an in ti hle.
Heng naupang lo chhuak reng reng hi tute nge an nih tih chu thup tlat ani a, puk chhunga la tang mek naupang nu leh pa te rilru tur ngaihtuahna leh chhandang vang tein an thup rih a, mipui hmuh phakah chuan nihliap leh thildang hmangin an dinhliah tlat ani. Damdawiin ah an taksa, thisen leh test tur dang an test zel a, puk atangin natna engemaw inkaichhawn theih an vei thei a, an fimkhur hle. A hmasa bera an chhanchhuah pali zinga pahnih chuan Pnueumonia an vei tih an test result ah ahriat chhunzawm ta bawk.
Rescue day 3
Day 3 ah chuan an vaiin lak chhuah an tum thu leh mi 19 chu puk chhungah an luh mek thu an rawn puang leh ta a, tuntumah erawh panga la awm te chu an vaia chhanchhuah an tum a vangin a kawng ahautak deuh. mipuiin chanchin thar kan ngaichang thup ani ber. Thailand ram sana dar 4:12pm velah chuan Naupang pakhat an hruaichhuah thu an puang leh ta, ahnu reiloah midang pawh an rawn chhuah thu an sawi chhun zawm a an vaiin mi 11 an hruai chhuah thu leh a hnung berah naupang pakhat leh an coach an lo kal mek e tih chu breaking news ani. Tichuan ahnu rei vak lo India sana dar 5:30 velah chuan an coach nen an vaiin mi 13 te chu dam taka chhanchhuah annih thu an puang ta.
A tuartute hi naupang mai an nih a vangin lainatna nen thlirtu an tam hle a, ngaihven tu pawh tam tak an awm phah nghe nghe ani.
LAWMPUINA LAM
Ram hrang hrang hruaituten Thailand hlawhtlinna an lawmpuia, US President Donald Trump leh British PM Theresa may te pawhin Thailand rescue Operation hlawhtlinna chu lawmpuina thu an thawn ani.
Fifa lam pawhin heng naupang te hi duhsak takin Moscow World cup 2018 final a hmuna enturin official takin a sawm a, mahse Doctor te chuan naupang dinhmun en in thil tha ber niin an hre lo.thung. Thuneitu lam pawhin Damdawiinah hun an la hman angaih an rinthu an sawi ve leh bawka vangin tv atanga an enmai ringtu an tam hle ani.
Divers te chuan akawng ahautak zia hriaiin naupang te pawh an huaisenna an tawp thei lo. Naupang te ber kum 11 tan phei chuan puk atanga chhuak tura abeihna kawng hi sawi ai pawhin a bumboh zawk ani an ti a, an chhuan thu an sawi mawlh mawlh ani ber.
EFFECT THA LAM
Manchester United chuan Old traford tlawhturin an sawm a, Fifa pawhin world cup 2018 final Moscow khawpuia neihturah an sawm bawk. Engliand Player Walker chuan a jersey chu thawn a duhthu asawi a, footballer an nih angin football fans leh player te an awm mai mai theilo. Kan sawi bakah hian Ronaldo leh midang dang pawhin fuihna thu sawiin an chanchin an ngaihven reng a, kan sawi bak pawh hi ngaihsak tu leh vanneihna an la tawng dawn chauh niin alang.
Thailand hi an vanduai khawp mai. Karhmasa lam khan khualzin phur lawng khualzin 105 phur chu tuifawn nasa takin a ti let a, chhanchhuahna leh ruangzawnna an kalpui reng bawk, nimin thleng khan mi 3 la hmuhloh an ni tiin an puang a, helam chu sawi thui vak lo ila a tha awm e a thui tawh si. Thailand navy an hahtakzet ani.
TLIPNA
News lama lang lo tam tak kan ziak ta a, heng hi a hmuna kal te leh thu hre chiang tute sawi an sawi chhawn leh ani a, Nakinah media an hmachhawn hunah pawh an la sawi anga, kan thusawi thenkhat te nen hian a danglam vak lo turah ngai ila a tha awm e.
Mizo in anawl pui anga zawhna kan neih chu chhanna kan hmuh ngei ka beisei. Nakinah documentary te an la siam anga, pu Harry te hoin " i lo thlir ang" ti a kan hma ah an chhawpchhuah hun anghahhlehawm ngawt mai.
Pic : Nunna chan ta Thai Navy chawltawh leh Chhanchhuahna an kalpui dan entirna leh an hmuh tantirh atanga pawn chhuak loa naupang enkawltu Thai Navyseal pali, an ni hi naupang chhuah vek hnuah a hnuhnung berah an lo chhuak nghe nghe.
- Awmpuia Fanai Felfeli pa
Chhiar duh tam takin kan website a an rawn zawn fo vangin kan han dah a ni e .
No comments:
Thanks for your comment.