Vawiin khan Kolasib Bialtu MLA Pu PC Zoram Sangliana chuan I&PR Conference Hall Project Vengah kolasib zilla sainik board raising day vawi 8 na (Kolasib Sainik Board, Estd 2011) a hmanpui.
Khuallian chuan thu sawiin India ram himna a tan sipai te chu mi pawimawh berte an ni a, Mizo Sipaia tang mek bakah a bang tawh te pawh Mizo te ti hming thatu an ni a, India ram zau takah Mizoram chu dinhmun zahawm takah hlangkai tu anni a ti. Nunau, khawtlang leh mipuite tan thlamuanna an ni a, ram leh hnam tana an thawh rimna te nunna an hlan zozai te chu khawvel a ral hma loh chuan hriat leh zah a kai reng tawh ang a ti a, Ram tana an inpekna chu a chhuanawm takzet ani a ti bawk. Sipai a tang mek te leh a bang tawh te chu Central bakah Mizoram Sawrkar pawhin a hre reng ani tiin an mamawh leh harsatna te chu inthlahrung hauh loa Mizoram Sawrkarah thleh thin turin a chah bawk ani.
He huna tel ve Brig. SS Mohite, Dy.Commandant & Chief Instructor, CIJWS, Vairengte chuan Sipai a Mizoram quota (vacancy) hnawh khah ani ngailo chuan ati lungngai ani tiin he huna sipai bang (pension) kalkhawmte chu , Ram tan mai bakah taksa hriselna leh mahni invawn leh inthunun (Discipline) nan sipaia tan hlawkzia chu Mizo thalaite hnenah tlangaupui turin a sawm a, Sipai a tang thin he huna kalkhawm te chu zahna chibai bukin kum tamtak dam turin duhsakna a hlan bawk a ni.
Zilla sainik Board Chairman Dr.Arun T, IAS chuan sipai nun chu mahni invawng tak leh inthunun tak ani tiin sipai a an tan lai chauh nilo an chawlhsan hnu ah pawh mahni nun chu uluk taka vawng chhunzawmin vaihlo, zuk leh hmuama fihlim tlat turin a chah a, Chairman a nihna angin Sainik Board chu harsatna an tawhna reng rengah puih a inhuam reng thu a sawi bawk a ni.
He hunah hian Sipai bansan ta te kum 80 chunglam mi 10 hnenah chawimawina hlan a ni a, World war-II veteran mi 3 Lance Naik Lianchama, Naik Orderly Lalthanmawia leh Hav Darkhama te bakah world war –II veteran widows mi 27 hnenah CIJWS, Vairengte chuan cheng 2000/- theuh an hlan a, Sipai tanlaia Ropuina ram kai ta te ralna ‘Assured Deceased Last Rite Scheme’ hnuaiah Martar 6 te ralna cheng 10,000/- theuh CIJWS, Vairengte chuan a hlan bawk a; kum 1971 a India leh Pakistan indo laia ke chan ta Ex Hony Naik Lalhmingliana hnenah chawimawina hlan bawk ani a. Hemi bakah hian Ram tana nunna hlan mi 2 Late Naik Pachhunga (4th Bn Assam Regiment) leh Late Lance Naik Suren singh (8th Bn Gorkha Rifles) te kalsan tak an nupuite (Veer Naris/war widows) hnenah chawimawina hlan bawk a ni.
No comments:
Thanks for your comment.