FÚR KHAWTHIENG

Ziektu: VL Khawbung, 

www.tleirawl.in 

Ruo a sur hmer hmer a, puon silin ka khuma chun ka zal a, ka taksa chu pindan room le puonin inhuolbet sienkhawm ka ngaituona chu a zalen vieu tho si.

Lekhabu ka tiema, ka zun a suok em lei chun ka lekhabu tiem chu ka sia, ka va’n zuna roomah ka zuk lût nawk a lekhabu zuk tiem ka tum nawk lai mek chun kan panthlanga Vate hung inhram chu a ri a mawi em lei chun ka en châk ta tlat el a; hmu tumin ka bi vang vanga sienkhawm Vate awm reng reng ka hmu thei met nawh.  Iengin am ani a mi zêm tlat a ni? iem a nih danglamna rieu neiin ka’n hriet ta tlat el a, ka khuo dam chu a hung sawt ta em em el ta a. Hi hmun khawsawt taka inthawk hin hadamna a um khiet rawi maw ti’n ka ngaituona hai chu muol za tam tak kan vung khum tira. Sienkhawm, mitkhap kar el chun ka danglam nawk chuoi a, ka pik mup mup in ka hriet. Sum inzing sa mup hai dam chu ni dingin ka ring a.

 Chuonga ngaituon mumal khawm nei lova ka um lai chun ngai ta, hieng hi ka ngaituo suok a. Darkar tam tak liem tah, chu zan re tak hnuoia rinumna ka tuok hai chun ka lungril chu a hung hluo sip ta mup el a; muol pakhat vuong khum ding khawm chun ka ngaituona ka pek sawn thei ta nawh. Ka nakawr a hin inri si lovin a thum tluk tluka, cham lovin hi thu hi ziek dingin a mi turlui ta a nih. 

 Kum kha le chen kha ruo sur hnuoia hun ka lo hmang tak hlak a. Ramhnuoiah intawm hulna ding um țhak nawna hmuna khawm ngampa takin ka lo hmasawn ta hlak. Khang hun laia ka ngaituo tak hlak chu ruo sur hi ma ta sien, nisa êngmawi tak hung inlang  nawk ta sien ka ti hlak. Siemtu in kumkhuoa sur dinga a siem an naw leiin a hunlai chun nghawk umin inlang sienkhawm a re nawk tlawk tlawk el hlak anih. Sum inzing hmu ding um lo khawp rauin van boruok an thiengin a fai nawk hlak. Fûr khawthieng chu an thieng zuol bik anih an ti mathlawn lovin, chu khawthieng nghak chun malsawmna ruo malmak ngam khawp hielin ka lo nghak hlak anih. Chuonga ruo sur chét chêt lai chun, mit khap kar lovin van boruok chu a hung inthieng ta vuk el a, ka nghatna tieng tieng chu an thieng mawi em em a, fur sum inzing le thal romei sumin a bawm hlak  tlang le vadung ruom hai khawm chu hlataka inthawkin an hmu theia, siem zo hlim ang elin an lang thar sieu el a; khuosawt a sukzuolin mit a tlei kher el.

Chu ruo sur chun ka nunah thu ropui tak a hril ta a. Hringnun hin natna, lungngaina, le beidawngna dam hi ruo angin a hung sur hlak. Vai kieng ruol lovin sumpui ang elin a mi zém vel hlak. Hmatieng hun ngaituo le thlir thei der lova, vawisunni hi chu aw” tia tiem liem chang a tam hlak. Ruo khawm a sur a, sum an zing hlak hun sawtnaw te ah a hungin kieng nawk el hlak. Hringnuna khawm hin lungngaina sumpui a hungin zinga, ruopui ang ela mittui a sur chang khawm a tam, a beidawng umin a thawpik thlak hle. Amiruokchu, hringnuna beidawngna le lungngaina a hung tlung hin thil tam tak a min chúktir anih ti hrezingin hlawk taka tuor hi ei inchúk ding anih. Beidawngna hne ban thei ruol lo, lungngainain a chimpil thei lo nun nei ei nih ti hi hriet suok rawp tum hlak  ding a nìh. Harsatna, beidawngna le rinumna hne zo hnunga hlawtlingna pârzu chu a thlum a tak bika, hnuk khawm a fang bik a nih.

Ruo sur chêt chêt hin hringnun sirbi chu an daw a. Chu sirbi chu hrawa, hringnun damlaini tiem dinga nang le kei thlang bik eini hi a ropui ti ro?   Beidawngna vawrtawp, tawng/nei nia inhriet chun, i ta dingin khuovar a hnai anih ti hre la, nun thar nei dingin lampui hraw lem rawh. 

 A harsa zawng le beidawng um ang zawnga hringnun hi i thlier chun, hlimna hin hla taka la tlan siet san a ti che. Arsi lâk tum neka harsa lemin hlimna zawnga i bei a la ngai el thei anih..! Tul le mamaw thaw ding tam tak a um laia ruo a sur vet hlak khawm hi nghawk a um reng anih. Nisienlakhawm, a sur mák hnung, kawl êng riei riei le hramthiem tinreng inhram le thlai hring thar sar zo thlifim hai’n an mût leng sieu sieu hang thlir lem inla; hringnun rimawi kara hlimna innui ri chu i chanvo ani lem dei ding anih. Ruo sur hin mimawl ngaituona hmang thiem lo ka ni ti  amin hriettir lai zingin, nun hi an thim vawng ani nawh ti khawm a min chúktir sa bawk. Ka ta dinga malsawmna ani ang hin i ta ding khawma malsawmna intluntu ni ve sien ka ti ngawt el. AW,  FÛR KHAWTHIENG ka ta dingin i va mawi ngei de!

Mauchar |  20 June 2015