Ramri zir chiang tura din Core Committee-in Survey of India ramri siam pawm lo

tleirawl.in | Mizoram leh Assam ramri zir chiang tura Mizoram sorkarin a din, Core Committee-te chuan Survey of India, 1933-in Assam leh Mizoram ramri a siam chu dik tawk loah an ngai a, survey neih ṭhat leh an rêl.

Core Committee tarlan danin, Survey of India, 1933-in ramri leilung awm dan a zâwm tawk lo a, hmun tam takah ram leilung awm dan mila ramri siam loin, a ngil tawpa rìn a ni. Survey of India, 1933-in ramri a siam chu rin thua siam, ramri tak tak a tarlang lo. Survey of India chu ramri atana an tih chin dik tak tichiang tura hriattir an ni a, an chhanna nghah mek a ni.

Core Committee chuan, Mizoram sorkarin boundary map a kawl mek leh Assam leh Mizoram ramri nia sawi ṭhin chu a inmil em tih enfiah turin Kolasib DFO leh Kolasib ASO-te a ruat a, anni hi MZP-in an ṭawiawm ang. Survey hi July 11-13, 2018 chhunga neih tur a ni a, Survey team hian tualchhung mi, ramria chengte pawh thu an zawhfiah an tum.

Home department chu ramri chungchanga document bo a awm chuan zawng chhuak tur te, Assam leh Mizoram ramri tlawh a, ramri chin document nena enfiah turte leh, rami chungchanga gazette notification Topo Sheets Survey of India zir chiang turin Core Committee hi a ruat a ni.

Core Committee-ah hian chairman chu Home additional secretary Lalbiakzama a ni a, member-te chu - chief conservator of forest Lalthlamuana Pachuau, Kolasib DFO Lalnunzira, Land Revenue & Settlement department-a ADS Lalthianghlima, archivist F Lalthanmawia leh MZP aiawhte an ni. 

May 21, 2018-a chief minister Lal Than­hawla hoa Cabinet Room-ah Mizoram leh Assam ramri chungchang sawiho a ni a, chumi ṭum chuan ramri zir chiang tur Core Committee hi din.

Tarlan tawh angin, MZP-in Bairabi Zophai hmuna Zofate Chawlhbuk sak an tum vanga buaina chhuak kal zelah, Ministry of Home Affairs (MHA) Joint Secretary ruahmanna angin, Inner Line Reserved Forest sq.mile 509 huam chhunga dan loa thil tih enfiah a ni. Zophai leh a chhehvel endik zawh tawh a nih laiin, Vairengte lam erawh chu endik a ni dawnah Assam leh Mizoram sorkar thu a inhmuh loh avangin endik hna chawlhsan a ni.

Ramri endik hna chawlhsan a nih hnuah MHA Joint Secretary hoin Silchar Airport-ah Assam leh Mizoram aiawhte an inbia a; MHA Joint Secretary chuan Mizoram sorkar chu duh thlan tur pahnih a siamsak a, Mizoram sorkar erawh chuan chhanna pe loin a ngawi zui thung.

- vanglaini.org