SIPAI NUHMEI 2

Chapter - 2

KA PI LUNGSEN NA

Ziektu – Fred Hmarramthar Sanate

www.tleirawl.in

Ka nu chun ami hmu phing leh,bawi i tho an ta? vawizan i mang a si em leiin ka keitho nuomnaw che ani kha ami ti a,mak titak chun ka mang chu kahang ngaituo kier nawk a,mang mak tak el kanei a inthawk hin zana khawm kanu ka bula zal ve hma khat ka in thei ngai nawh.Ka nu hlak chu inleng anei sawt thei si,a chang chu ka khuma ka țapa ka mitthlie a luong ngiei ngiei hlak,vangduoi hi kan ti thei taluo a,ka chienlaia inthawk țapder kani lei in ka khatin thil ramtin ka ngaituo hlaka,ka ruol hai in Moia naunu anmi ti hai dam ka lungrila a cham zinga,mi dukdaklo naunu ti damin chil anmi sak khum hlaka,sienkhawm anni laia pakhat chu nau fahra ana,amapa chun ami thlem hlaka,hi khawvela ka ruolțha tak a nih.A hming chu Jeremy ana J kati hlak.
Chawmkhat chu ka mangin ami rîl san vang vanga,kar khat deu thaw ani tah.Ka nu chu dan pangai angin Moia chun zantin a hung leng zie hlaka,zan sawt tak tak meiphu an awia,anin hohlima chuongchun ka in hnung inchan ni awm fahran hin dar 11 hai hi an meng tling ngei ngei hlak,kala naupanga chu kalungril hi a puitling inhma a,ka taksa le inphulo in ka ngaituo na hai hi nunghak țhenkhat ngaituona nek khawmin anril lem ka ring.Ka nu bo a zuk in chu harsa kati thei khawpel a,thlasik boruok inthieng lai tak ani leiin dei ka ti thei em ema,ka nu hlak chun ami uksak ngainaw si,ka in le in naw hi kanu hin amihung enthla hlaka,kei chu intehlem kalo insier el hlak,chuonga ka in ta maw ti an hriet ping chun zantin a an thaw dan pangai angin an thaw nawk el hlak.
Kei chu lungrilna ngawi ngawi in ka chienglai hringnun chu ka hmangliem a,kum laklaw lai hin ka pa suți anei hlaka thlahni dam a hung chawl ve hlak,ka pa hung chawl suong hin kanu hi hlim hmel khawm a put ngai nawh,țum khat lem chu ka pa lungsenin ka nu chu a hmaia vawithum vel a ben hlawk hlawk nghe nghe nih.Ka nu chu lunginsietna kaneinaw tawp nilo in ka hnam ve hlak,ka pa hung suok phat hin ka hlima inhawi khawm kati a,ka ruol hai bula khawm ka chapo in ka pa hi ka suong em em hlak,tuta țuma ka pa hung suok hin chu ka nu chanchin hril tawp ta ding kati a,amiruok chu ka pan a vuokhlum el thei ding ani leiin ka hril ngam ngai nawh,chu chu ka thil thawsuol a nih.
Ka pa chu a hung suok nawk ta ngei a,keikhawm kalo thleirawl ve vang tah kum 13 lai kalo tling ve ta a,ka pa hin ami duot thei khawpel a,a um suong nana na hin chu inhawi khawm kati hlaka,ka tik hi a thlai a ka ruol hai khawm fakthei kanchawkpek hlak,ka pa kier alo hun nawk der tah,ka pa kier ding hi ka phal ta naw a,ka țap char char a,ka pa bula chun mi țhuoi ve el rawh ka ti a țap pumin ka ngen a,ka pa chun bawi sipai lai chu in umve na chi ani nawh,khan inu le lo um phawt inla ka hung suok nawk un huna in bula ka umsawng ta ding anih ati a,chuongchun ami maksan nawk ta a.
A hma a ka mang ang char kha,ka manga ka hmunawk a,tuta țum hin ka manga ka thil hmu hi kanu bula hril dingin ami ti ta tlat el,i hrilnaw ani chun nang i chunga a thla ding ami ti a,ka ți taluo chu ka țhanghar phat a,ka pindan a inthawk chun ka suok a,tuta țum zet chu ka mang chu a tak ngei in ka hmu tah.Ka țap tawpa,ka mang chu ka nu bula ka hril ta vawnga,ka nu chu inzak ta nek nek in ami hung ben hlawk hlawk a,inzaknaw maw naupang va zal nghal rawh ami ti a,ka pindan tieng chun ami namphei dâwr a,Moia inrang deu in a suok nghala ka nu chu ka bula hung in ipa bula i hril vei vei chun ka that ding che ami ti a,ka bahriksama ami hnuok dâwr dâwr a,puon a hranin amin sil tir a chu zan chun ka in der ta nawh.
Zingkhuo a hung var a ka nu hmel chu sakei angel ani,biek khawm ka biek ngam ta nawh.Kan school a class room a kalo ina ka mangin ka ruolnu chu step lai a thlu pal a,a ke chu thisenin a luongkhum vawnga,Hospitala anlo fepui a a ru thliek leiin tharuk suong a lawn theinaw ding anlo ti a,chu lai tak chun ka bench chu hmawlin anhung hlap ri fawk a,ka har phat a,kan hotupa chun i ruol hai an suok vawng ta țin dar an ri tah inhmaw rawh ati le inruol chun mi pakhat hi na ti hmel takin a hung khek țhawt a,a țap zui nghala,ka tlansuok a,ka ruolnu chu hotu haiin anlo sawngbawl,a ke ka zuk hmu chu thisenin a bit vawnga,kan hotu hai bula chun sir,a keru thliek ani kha tharuk suong lawn theinaw nih,ka zuk ti a.
Kan hotu hai chun chu thil chu iengtinam i hrietthei le? anmi ti a ka mangin ka hmulawksa vawng ani kati pek a,mak ti hmel tak chun anmi en țhup a,damnawnu ngaisak talo hai,a zinga chanchin an hung hriet a,ka thil hril hai ang char chun Doctor in alo hril ve a mak anmi ti khawpel.Karkhat a liem tah ka mangin ka nu chu ka hmu a,Vantirko pakhat hin ka nu bula hril ding thu amilo hrila,chu lai chun ka nu chun ami hung keitho a tleng hai va sawp rawh ami ti a,ka nu bula chun ka mang chu zuk hril ka tuma chu ka hril ngam tlawt nawh.Zantin deu thaw chu mang maktak chu kanei ta leiin hrilnaw thei zinzang ani ta nawh.Ka nu bula chun ka mang chu ka hril ta a,ka nu chun naupang ini kha chuong ang mi hril dingin inzak naw maw,mang chu mang mei mei ani chu ipa hi ka dit leia kanei khawm an le,aman amin vetchil a,ka nau khawm ini naw i nu kha maw….i pan ami dit leiin i nu khan a ditnaw che a a zamsan che ani kha,ati a ami khiek sawk sawk a,ka lungril na taluo chu ka țap thlawk thlawk a,ka pu hai in tieng chun ka tlan tunga,ka pu hai chu ka pi le anlo inzin a kawt chu alo inkal a,kan ina zuk kier ding hlakin ka nu ka ți ta bawk si,ka pu hai varenda a țhungnasei a chun ka țhunga zantieng anlo ni ta leiin khuo a hungin thim mup a thli a hrang vûk vûk a
Sawt raklo hnunga chun ru a hung suor pher pher a,zan dar7 vel in ruo chu a hung inbu huk a anthim mup a khawl anlep phe zuk zuk ti naw chu iengkhawm hmu thei a um nawh,ankhat tawkin țek a thla zing bawk,a dei em leiin ka khuo sik a zingkhuo a hung var a,ka pu hai khawm anhungin lawi tah,ka pi chun ka bawk a hang thema a khuosik nasa khawpel ati a,tui anmin lum pek a,kei chu țawng khawm ka țawng pei nawh,ka hung harsuok deu a thil umzie anmi hang indawn chun ka hril a,ka pi chu a lungsen ta khawpel a,ka pu mansapui a chempui chu a lakdawk Ramthienghlim i rieng ka tan ding a nih ata,ka pu chun a man tlat a, ‘Suol chu suol in thungrul naw la,țhatna in hne lem rawh’ ti ziek a ni kha ati a,ka pi chun hieng ang nikhuo a hin iengtinam ie țhatna in ka hne ding a rieng ka tan ding a nih ata ka pu khawm chu a zuk.sât tum el ta,ka pu chun anthla a,ka pi chu a tlan in a tlansuok ani deu tak,ieng iengam a zu hril ieng am a zu law chu kan hriet naw,darkar chenve lai a zu thang hnung a hungkier a,ka pu chun khawn le i lu lak chu? alo ti a,ka pi chun nang i lu kukha ka lak na hrie țawng țhak naw rawh. a ti a a tawp a ama bawk chun a lo umnaw chu avangnei khawpel anih ati a.