CHAPTER--44
Ziaktu: R'z Thangluah✍🏻
Columnist, www.tleirawl.in
"Bawihi,vawiin chu i hman ang tiraw?,"
Chhanna a dawng thei lo,Sangtea chuan a text leh a;
"Bawihi,tinge i reh em em a? Vawiin te chu kan 2 a ni bik a nihkha,"
Chhanna a la dawng thei chuang lo,Sangtea chuan a call ta ringawt a;mahse,phone call pawh a chhang thei chuang lo. Sangtea chu a tho lawk a,Msi te In lam pan chuan a in khalh phei nghal vuk vuk mai a.
"Nu Ruat,khawnge Msi hi?,"a ti lut nghal a. Pi Ruati chuan mak tih hmel takin Sangtea chu a lo en ho mai a,"Nangmah nen in chhuah tur thu min hrilh a,chumi hma chu bazar lawk ka duh a tia a lo la haw lova,"a lo ti a. Sangtea chuan,"Phone call pawh a chhang theilo,a chhuahna rei tawh em?,"a ti leh vat a. Pi Ruati chuan,"Aw rei ve tho,kan call ve chhin nge aw,"tih pahin Msi chu a call nghal a,"Ehee switch off a in ti daih,call ve chhin teh,"a hmel chu hlaihthawnna in a rawn tuam nghal a. Sangtea chuan Msi chu a call leh a,"Switch off a in ti ve tho,tinge le? A chungah eng thil nge thleng ang le?,"a ṭhu hnawk a,a thaw leh hak ṭhin a.
Chawhnu dar 3:00pm velah Msi chu a rawn lang ve hlawl mai,"Nu,in lo ṭha em? Vawiin chu lift ah ka tang a,"a rawn ti nghal mawlh mawlh a. Sangtea chuan,"I ṭha em? Mahse,tinge phone i chhan theih miah lova?,"a lo ti nghal vat a. Pi Ruati pawh chuan,"Min ti hlauthawng lutuk a lawm,"a lo ti ve bawk a. Msi chuan a bag chu a hai nghal a,"Awii ka min lo phone lai ka hre miah lo,ka phone chu lo thi daih nih hi,"tih pahin a phone chu a rawn phawrh a. Pi Ruati chuan,"Min ti hlauthawng hman lutuk a lawm,i phone ngaihsak tawh ang che,"a lo ti leh a.
Sangtea chuan Msi chu a vuan a,"Ka pa bulah pawh engkim ka sawi vek tawh nia aw. Inneih chu nangmah i inpeih hun hunah palai kan rawn tir ang,"a ti a. Msi chuan,"Mahse,ka nu hi pasal ka neihsan thei hleinem,"a ti mauh mai si. Sangtea chuan,"Ni e ka hrethiam che lawm;mahse,thla 1 vel chu kan In lamah kan awm rih a nga. Duh leh nangmah ni In lamah pawh kan phei leh daih a nga ni mai lawm,"a ti zel bawk si. Msi chuan,"Makpa chhung khung nih i duh mi? Â leh lutuk mai,"a lo ti vat a. Sangtea chuan,"Aaaa duh lo mah ila,kan dinhmunin a zir miau si lo a nih hi,"a lo ti zawi sup a. Msi chuan,"Ka nu khan ka tum ka tih hlawhtlin theih nan leh ṭha taka lehkha ka zir theih nan,zah pawh dawn lovin zu a zuar a. Mi tam takin an sêl reng bawk a;mahse,a fanu neihchhun tan engmah tih hreh a nei lo a sin. Ka nu thil tih rah chu ka seng mek a sin,ka nu hi ka la kalsan theilo a ni min hrethiam hram mai rawh,"tih pah chuan a meng khup lap a. Sangtea chuan,"Ka hrethiam lutuk che lawm,i nu hi i tan chuan a hlu lutuk tih pawh ka hria. Ni e,inneih chung chang chu ka sawi tawh lovang,ka tihpalh aw ka hmangaih lutuk che nia,"tih pahin Msi chu a kuah vawng vawng a. Msi chuan,"Ka lawm e aw,keipawn ka hmangaih lutuk che,"a lo ti ve nghal vat a. Sangtea chuan,"Chuan,tun Sunday ah hian chaw lo ei ula i nu nen,ka pa bulah pawh ka sawi lawk vek tawh tho a,"a ti leh a. Msi chuan,"Ka nu bulah sawi la,kei aiin ka nu a thu daih zawk a lawm,"tih pah chuan a rawn nui sen sen. Sangtea chuan,"I nu thu vek anihchuan palai chunhchang pawh i nu ka hrilh mai ang,"a rawn ti zauh a. Msi chuan,"Hmm phakar suh aw,lubuk,"tih pahin Sangtea sam chu a rawn tuai sak leh a. Sangtea chuan,"A va mak e aw ka sam hi tuai kher zel lo la,rawn chhuah dawnin ka uluk ve em em a. Nangpawh i sam tuai thur sak i duh mi?,"tih pahin Msi sam chu a rawn tuai sak nghal a. Msi chuan,"Phubaaaa,"tih pahin Sangtea kut chu a la a,a seh sak vak mai a. Sangtea chuan,"Aaiaaah a na lutuk,"tih pahin Msi biangah chuan a zu fawh sak a. Msi chuan a thlah rang kher mai,"I van zei tawh em em,"tih pahin a rawn nui zui hawk hawk a. Sangtea chuan,"Zei ve bawk ang chu,"tih pahin Msi hmuiah chuan a rawn fawh sak leh nghal a.
Max chuan nitin a fanu chu a awm ṭhin a,zu pawh nghei a tum ve tak tak tawh bawk a. A ṭhiante'n zu in tura an rawn sawm pawn a lo hnial fithla ve ṭhak ṭhak ṭhin a,a chhungte pawh an lawm ve khawp mai. Mahse,Kimkimi a rawn lang leh tlat mai,"Bawihte,apa hian a lo enkawl ṭha em?,"tih pahin a fanu biangah chuan a piai sak zauh a. Max-a ngaihdan a nilo nasa mai a,"Nang hian ka fanu hi i kut hmawr pawh khan rawn tawk tawh suh,ka hmuh phak loh ah kal bo leh nghal rawh,"a lo ti vin tuar mai a. Notei chuan a nuṭapa ṭawngri chu a lo hre nghal a,Max te awmna lam chu a rawn pan nghal a,"Bawihte,ka bulah lo kal daih rawh aw,"tih pahin naute chu a rawn pawm a,In chhung lamah a luh pui nghal daih a.
"Ka fanu a nihkha,kei hi a nu ka ni bawk,"Kimkimi chuan Max chu a melh râm râm mai a. Max chuan,"I va han zak theilo e aww,mi tenawmnu thlawkbo nghal rawh. Ka fanu hi engtikah mah i fanu a ni ngai lovang,"a ti vin ṭhak ṭhak mai a. Kimkimi chuan,"Huh...a ṭha lawm dan angin kan kal ang,"a ti vei pang pang a. Max chuan,"I duh duh danin kal la ti nia,i duh lova i tlanbo san tak hi i fanu a ni tawh lo tih hria ang che,"a ti hmak hmak a,In chhung lamah chuan a luh san nghal daih a.
Pathianni tlai a ni a,Msi te nufa pawh Sangtea sawmna angin Sangtea In lama chaw ei turin an inbuat saih ve mek bawk a. Pi Ruati chuan,"Sangtea chu a rawn kal mek a mi a?,"a lo ti a. Msi chuan,"Imm ka rawn kal mek a tia,a rawn thleng ṭep ang,"a lo ti vat a,an nufa chuan Sangtea rawn thlen hun tur chu an lo nghak tawp mai a ni.
Pu Thanga leh Partei chuan Msi te nufa chu an lo lawm thiam khawp mai. Pu Thanga chuan,"Ee kha in rawn thleng thei maw,kan sawmna te min tih hlawhtlin sak a,a lawmawm takzet a ni. He lamah hian lo ṭhu rawh aw,"tiin sitting room lamah chuan an in zui phei nghal a. Partei chuan,"Msi pawh hriat loh karin Doctor i lo ni ve ta reng a,kan tluk lo ve ngawt mai che,"a rawn ti ve siam siam a. Msi chuan,"Aaa chutia mawn le? Eng kan nih bik loh hi,"tih pahin a lo nui sâng a.
An chaw ei pawh an hlim dar dar khawp mai,chaw ei khamah chuan Sangtea chuan,"Nu Ruat,thil dil duh che ka nei a,"a rawh ti hluai a. Pi Ruati chuan,"Ee eng thil nge ni ta a? I duh duh min dil rawh,ka pek theih chi che anihchuan ka ui reng reng lo a nia,"a lo ti nghal vat a. Sangtea chuan,"Iiih...englo a nia,"a ti a,a chawl det a midang ho chu a melh kual a,an lo en ṭhap hlawm a,"Nhaaa min lo en ṭhap lo ula,"tih pahin a nui hak hak a. Partei chuan,"I sawi hunah kan mit kan lo chhing ang,sawi la,"tih pahin a rawn nui har har a.
Sangtea chuan a âw a thian kharh kharh a,"Aaa englo a nia,i fanu hi ka nupui ni turin ka duh a,"a ṭawng zawng chuan a âw a khur dar dar mai a. A zah avangin a hmai te chu a sen ve awp awp bawk a,midang ho chu an ngawi ṭhap a. Pi Ruati chuan a âw a rawn thian ve kharh kharh a,"Aaa nia,hei amah ber hian a hnial lem loh chuan keichuan hnial dan tur pawh ka hre hran lo,"a lo ti a. Sangtea chuan,"Nihchuan remchang hmasa berah palai ka rawn kal tir ang aw,"a la ti ta deuh deuh a. Msi lah chuan Sangtea chu a lo melh rum nasa mai a,Partei lah chu kil khatah a lo nui dir char char thung a.
"Nu,kalsan che ka duh lo a sin. Tinge khatiang khan Sangtea kha i chhan a?,"Msi chuan a nu kut chu a vuan a. Pi Ruati chuan,"Bawihte,i nu hian tu mawng ben te pawh ka chak ve a sin. Pasal i neih khan min kalsan dawn tihna a ni hleinem,"tiin a fanu chu a kuah a. Msi chuan,"Mahse,Nu hmun dangah ka awmsan daih che a nga. Ka thawhrim rah pawh i seng ve hman dawnlo a sin,"a ti leh a. Pi Ruati chuan,"Bawihte,i thawhrim rah chu ka seng chho mek a lawm. Hla te khuaa pasal nei tur pawh i ni lova,tu hmel hmuh te pawh ka chak ve tawh a lawm,"a ti leh a. Msi chuan,"Nu,kum thar lamah ti mai ila. I tan engmah pawh ka la tih loh hi,In nuam tak ka sak sak ang che ka tih kha,"a ti leh a. Pi Ruati chuan,"Imm ni e,kum thar lam te pawh kan dam chuan a ṭha lawm. A neitu tur i ni a,i thu thu lawm palai an rawn tirh hunah pawh min lo nghak turin kan ti mai dawn lawm,"tiin a fanu samah chuan a chul sak hliau hliau a.
No comments:
Thanks for your comment.