NRC DRAFT A CHUANG LO TLANCHHE MEK MIZORAM A LUT TUR DANG TURIN MZP IN SAWRKAR PHUT

Aizawl | August 5, 2018: Nimin August 4, 2018 khan Mizo Zirlai Pawl Gen.Hqrs chuan Press Club ah Press mite kawminAssam -a National Register of Citizen final draft July 30, 2018 a Assam sawrkarin a tihchhuah taka chuang lo  ram dang mi nuai 40 vel tlanchhe mek zingah Mizoram a lut tur dang turin MZP chuan Mizoram sawrkar a phut tih," an pawl president L. Ramdinliana Renthlei chuan a sawi.

Assam State in National Register of Citizens(NRC) final draft ni 30 July, 2018 a a tihchhuah tak avang hian heta hming chuang lo nuai 40 chuang te chuan an State thenawm ah luhna tur an zawng dawn ngei niin a lang a, Mizoram pawh Assam state thenawm kan nih avangin Mizoram chhungah engemawzat an lo lut ngei tura ngaih a ni. Hemi chungchangah hian ni 24th January 2018 khan MZP chuan Aizawl Press Club ah press conference nei in kan thenawm state-te chuan an state-ah an luh loh nan tan an la mek a, kan state hi kan muthlu bik ang tih MZP chuan kan hlau a, Assam atanga foreigner-te rawn luh theihna tur luhkate veng turin thuneitute kan lo ngen tawh nghe nghe a ni. Assam State in National Register of Citizens(NRC) final draft a tihchhuah hnu hian kan state thenawm sorkar te chu lo inveng lawk in nasa taka hma an lak laiin Mizoram sorkar a ngawi reng mai hi MZP chuan a hrethiam lo hle a, Assam leh Mizoram inrina ah hian police force tamzawk dah belh turin sorkar kan ngen nghal bawk a ni. Tin, Assam state atanga lo luh tum ILP dil an awm chuan NRC a chuang lo chu ILP pechhuak lo turin thuneitute kan ngen nghal a, Mizoram chhung hnamdangte uluk lehzuala check turin sorkar thuneitute kan phut bawk a ni.  MZP chuan ni 15th August, 2018 ralhmaa hemi chungchanga Mizoram Sorkarin hmalakna engmah a neilo a nih chuan a tul dan ang zelin check gate te siamin hma a la dawn a ni.

National Register of Citizens(NRC) hi kum 1951 khan neih a lo ni tawh a, kum 1979-ah Assam Bye-Election neih dawnah khan E-Roll ah mihring an lo pun tak vak avangin All Assam Students Union(AASU) te chuan Illegal Migrant te vang a ni tiin campaign protest an tan ta a, kum ruk(6) zet an beih hnuin 1985 khan Assam Accord ah AASU hruaitute leh India Sorkarin Assam Accord hi an sign ta a ni. He Assam Accord ah hian Illegal Migrant te hnawhchhuah thu pawh a tel nghe nghe a ni. Assam state-a eng sorkar mahin hma an la tak tak duh lova mi thahnem ngai ten kum 2006 khan Supreme Court ah zualko in rei tak chai a nih hnuah kum 2014 khan Supreme Court chuan National Register of Citizens(NRC) chu update turin a ti ta a, chumi kal zelah chuan tun dinhmun hi Assam Sorkar chuan a thleng ta a ni.

Assam BJP Sorkar chuan an intiam ang ngeiin National Register of Citizens(NRC) chu a buaipui tan ta a, kum 1971-a an state-a awm hmante leh an thlahte chu khua leh tuia chhiar an tum a. Chuta lang ve lote chu foreigner an ni dawn ta a, ni 30th Juily, 2018 khan National Register of Citizens(NRC) final draft chu a ti chhuak ta a ni. Assam state chhunga awm National Register of Citizens(NRC) a hming chuang lo mihring nuai 40 chuang an awm a, heng mihring nuai 40 chuang te hian Assam khua leh tui an nih loh avangin Assam an chhuahsan mek a. Assam state thenawm heng Megalaya, Tripura, Nagaland, Arunachal Pradesh, Manipur leh Mizoram-ah te an tlan khawm mek ni a hriat a ni a. Hetih lai hian kan state thenawm Megalaya ah chuan Khasi students Union(KSU) te chuan Assam leh Megalaya inrinna bula Infiltration Gate lo siamin Assam atanga luh tum thahnem tak an lo man tawh a, chutiang bawk in Assam State thenawm Nagaland te chuan an sorkar hmalakna in Assam atanga NRC nei lo an rama luh tum uluk taka chech na an nei nghal a, Assam leh Nagaland inrina ah police force thanhem zawk an dah nghal a ni. Assam state thenawm te chuan Assam NRC a chuang lo an state ah an lo luh hlau in uluk takin an inveng nghal a ni.