Coaching ringawt ni lo, hlawhtlinna result ka duh

file photo

“Coaching ringawt ni lo, hlawhtlinna result ka duh.”

-Joseph Lalhimpuia, Chairman, Mizoram Youth Commission

Thalaite khawvel zauh nana New Delhi-a cham mek Mizoram Youth Commission Chairman Joseph Lalhimpuia chu Alternative Learning System (ALS) hotute nen Mizoram House-ah inkawmin, “Zoram thalaite tana thawh hona tha tak kan neih avangin lawm thu ka sawi a; amaherawhchu, coaching kalpuia sum tam tak sen ringawt hi kan duh tawk lo, hlawhtlinna result ka hmu duh a ni,” a ti. Pu Mahima kawmtu ALS hotu kal khawmte hi  Ritesh Handa, Chief Executive Officer, ALS Satellite Private Limited, Akshay Saxena, Co-operative founder Director, Avanti, JoJo Mathew, Chief Executive Director, leh Taruna Kapoor, Academic Head te an ni.

Inkawm khawmnaah hian MYC hnuaia IAS Coaching-a kal Prelims Exam-a tling  mi 10 chin tan Mains Exam atana inbuatsaih turin New Delhi-ah ALS-in an enkawl zui ang a; chutiang chiah chuan Mains Exam-a tlingte pawh interview thlengin an enkawl ang a. Hetiang chiah hian IIT JEE & NEET Coaching-a kalte, titha zual IIT-JEE & NEET tan hian 25 ALS-in Delhi-ah an enkawl zui dawn bawk a ni. MYC IAS Coaching-a kalte leh, College/University zirlaite hnenah Motivation Programme rawn hmang turin August 2018 chhung hian Aizawl leh Lunglei-ah lo kal an tum thu ALS hotute hian Pu Mahima chu hrilhin, Jojo Mathew hi India rama Speaker tha leh lar ber zinga mi a ni a; amah ngeiin lo kal  a tum thu a sawi nghe nghe a ni. IIT JEE & NEET Coaching-a kalte hnenah pawh Motivational Speech nei turin ALS mi thiam rual an lo kal dawn bawk.

IIT JEE leh NEET bikah hian nikumah pawh ST quota luah khah loh a awm teuh a. State quota aia tam ST quota lut thei tura tan la ho a, ST quota kan lo la hriat chian loh vang leh exam kalphung hriat loh vangte a ni tih an sawi bawk a. General quota-ah chuan seat hmu turin mark 360-ah mark 120 tal hmuh a ngai a; ST quata-ah chuan mark 360 ah mark 30 hmute pawh an tling hial tih sawiin, chuti chung chuan ST quota hnawh khah loh tam tak a la awm hial tih te an lo hrilh a ni.