Thingdawl | August 2, 2018: Vawiin 02 August 2018 khan Mizo Zirlai Pawl Sub-Headquarters, Thingdawl chuan an huam chhunga kumin a pawl 10 leh 12 pass tharte lawmpuina leh chawimawina hun an hmang a, Bialtu MLA Pu Hmingdailova Khiangte in khuallian niin a hmanpui a, BDO Gaston Vanlalhriatpuia leh MZP Gen.Hqrs assistant general secretary H Lalthianghlima bakah MZP hruaitu dangte'n an hmanpui.
He hun hi MZP Sub-Hqr Thingdawl president V. Lalchungnunga chuan a kaihruai a. Nl Noelle Vanlalruatpuii'n hunserh a hmang.
Khuallian Pu Hmingdailova Khiangte chuan, "Mizote chimral kan nih lohna turin Zirnaah ṭan kan lak a ṭul a. Tum mumal neia lehkha zir a pawimawh." a ti a. Nupui pasal inneih kawngah hnam dang nena inneih pawlh loh a pawimawh thu sawiin, Zirlaiten ṭan kan lak loh chuan kan ram ngeiah hnam dangin min chimral mai a hlauhawm a ni, a ti bawk.
He huna thusawitu MZP Gen. Hqrs AGS H Lalthianghlima chuan, "MZP chuan Mizo Zirlaite zingah inelna thianghlim a awm theihna turin kum tin zirlai tiṭha a chawimawi ṭhin!" tiin, "Mizo Zirlaite hian India civil services bakah India sawrkara hna sang leh dinhmun sang zawk chelh thei tura ṭan kan lak a pawimawh a. Taimakna leh tumruhna nen kan beih a ṭul takzet a ni." tih a sawi a. Ram leh hnam humhalhna kawngah ṭhangtharte kan ṭhanharh a ṭul takzet thu sawiin, Kan ram leh hnam min run mektu HIV AIDS laka fihlim tur leh do turin ṭhalaiten nun kan uluk a ṭul takzet thu a sawi bawk.
MZP Sub-Hqrs Thingdawl Adviser H Lalthuthlunga Zate pawhin thu sawiin, "kan thlen chinah mahni inteh a hmasawn tura mahni inel zel tur a ni," tiin zirlaite chu mi dang el ringawt lovin mahni thlen chinah a aia dinhmun sang thlen tuma ṭan la zel turin a chah.
He hun hi Thingdawl VC ten VCP Zonunthara Khiangte hovin an ṭawiawm a, thu a sawi bawk a. NGO hruaitu hrang hrangte pawhin an ṭawiawm bawk a. JNV Thingdawl zirlaite an kal bawk a ni.
Tin, he hunah hian MZP hruaitu hlui boral ta Pu F Lalfakliana hriatrengna hlan a ni bawk.
No comments:
Thanks for your comment.