Thingdawl | August 2, 2018: Vawiin khan Tuirial bialtu MLA Pu Hmingdailova Khiangte chuan Thingdawl VC House (BNRGSK Hall) ah Thingtlang khuate faina kawnga inelna 'Swachh Survekshan - Grameen 2018' RD Block Thingdawl huam chhunga neih tur a hawng.
Thingdawl BDO Pu Gaston Vanlalhriatpuia chuan inkhawm tawi a kaihruai a. He hunah hian.PHED leh RD Block Thingdawl huam chhunga VC te an tel ṭha hle.
Khuallian Pu Hmingdailova Khiangte chuan faina chungchang chu Mizoram in a ngaihsak hma a, faina hapta pawh kum rei tawh tak atang khan kan hmang tawh a ni a ti a, a bial chhunga VC hrang hrangten faina kawnga inelna pawh an lo nei tawh thin tih a sawi.
Pu Hmingdailova Khiangte chuan India hnampa Mahatma Gandhi khan India mipuite chu faina lamah hma an sawn theihna turin a zirtir nasat thin thu pawh a sawi a, "Independence aiin faina hi kan tan a pawimawh hmasa zawk tiin a sawi hial a ni," a ti.
Report-ah tarlan a nih danin Swachh Survekshan -Grameen kaltlang hian India rampum huapin khawtinte faina kawngah inelna neih mek a ni a, sorkar laipui atanga palai lokal te chuan August 1-30 inkar chhung hian Mizoram khaw hrang hrang an rawn endik ang. Khawchhung faina mai bakah mipui punkhawmna Anganwadi te, school te, damdawiin te an en dawn a, hengah hian inthiarna leh tui thianghlim an ngai pawimawh dawn tih tarlan a ni a, SSG Mobile apps siam a nih thu tarlan a ni bawk.
SSG 2018 hi State huapin neih a nia, State huapa neih tur chu Minister Pu Zodintluanga'n a Pisaah July 26 khan a lo hawng tawh a. District tinah neih tur ni bawkin July 30 khan Kolasib Distrct huapa neih tur chu Kolasib DC Arun T, IAS in a hawng tawh a. Vawiina hawn hi Block level a neih tur a ni.
No comments:
Thanks for your comment.