INDIA PM HLUI ATAL BIHARI VAJPAYEE A BORAL

August 16, 2018: India hruaitu ropui, Prime minister hlui 'INDIA ARSI LIAN'  Atal Bihari Vajpayee  chu AIIMS  Delhi ah August 16, tlai dar 5.05 khan  a her liam ta. A thih hian Kum 93 a ni.

A ruang hi dar 7 khan a chenna inah lak a ni a, amah uitu tam takin an zui a.
Naktukah BJP Headquarters ah sunna hun hman a ni ang a. Tlai dar 5 khian Vijay Ghat,  Rajghat bulah vuina hun hman a ni bawk ang.
Sawrkar thuchhuak chuan " Ni 7 chhung sun a ni  ang." 

A pianna state Madhya Predesh chuan ni 7 sunin naktuk khi Public Holiday ah a puang.
August 17, 2018 Public Holiday a puang tawhte:
Madhya Pradesh, UP government, Odisha government, Jharkhand government , Punjab , Bihar Government, Mizoram,

25 December 1924 khan a lo piang a, Gwalior, Madhya Pradesh ah a lo piang a. 
Writer, Politician Poet niin,  Tum thum India prime minister a ni a. Kum 1996 khan ni 13 atan PM a ni a, 1998-99 khan thla 11 chhung a PM leh a, 99-2004 khan a term a tluantlinga hmang zoin a PM leh a ni.

Kum 40 chuang Indian Parliament member a ni a, Lok sabha ah tum 10, Rajya sabha ah tum 2 thlan tlin a ni a. Kum 2009 a politics a chawlhsan thleng khan Lucknow, Uttar Pradesh MP a la ni.

Bharatiya Jana Sangh dintu zinga mi a ni a, Kum 1968 atanga 1972 thleng khan a kaihruai ngh nghe a ni.

Bharatiya Jana Sangh a tlukchhiat khan tuna Bharatiya Janata Party hi a dinpui a, President hmasa ber a ni bawk ani.

Website a fakna awm hi lo click ve la

Morarji Desai. a Prime minister lai khan Minister of External Affairs (26 March 1977 – 28 July 1979 )  a ni a. hetih hunlai hian UN Assembly ah Hindi a thu sawi hmasa ber a ni nghe nghe a ni.

Amah hi India National Congress mi leh sa ni lo Prime minister lalthutthleng luah hmasa ber a ni. 

Kum 2014 khan India civil mi chawimawina sang ber Bharat Ratna hlan a ni a. Kum 2014 vek khan Modi sawrkar chuan a pianni, 25 december chu Good Governance Day a hman turin a puang a ni.

(Naktuk lamah a thlahna leh vuina hun hman dan update kan tum ang.)