By: J.Lalrorela, President Joint SU.
1.Tuisualral Higher Secondary School
Tuisualral Higher Secondary School, Sakawrdai hi kum-2005 a din niin, kum-2008 ah Lumpsum a hlankai a ni a. He school ah hian din a nih atanga Kum 2017-2018 session Last exam thleng khan zirlai 303 in exam an pe tawh a, chung zingah chuan Zirlai 244 in hlawhtlinna an chang tawh bawk a ni. Tunah hian Teacher hi Principal nen pariat(8) anni a, kum 2018-2019 Session ah Zirlai 77 awmin subject hrang hrang (Pol.Sc, History, Geography, English, Mizo, Sociology leh Education) a awm mek bawk. He School hi Sakawrdai khua chauh ni lo, khaw chheh vel heng khua, 1)Vaitin, 2)khawpuar, 3)New vervek, 4)Lungsum, 5)Damdiai, 6)Thingsat, 7)North Khawdungsei, 8)Upper Sakawrdai, 9)Tinghmun, 10)Mauchar, 11)Palsang, 12)Zokhawthiang leh 13)Manipur te atangin an rawn kal hlawm a, he school hian Result tha tak neiin kum-2012 atanga 2016 phei kha chu 100% an nei a ni. Tin, kum-2017 ah pawh 72.1% annei bawk. He School hi khawtlangin vawiin ni thleng hian ala enkawl a ni.
2.Thingsulthliah Higher Secondary School
Thingsulthliah Higher Secondary School hi kum-2004 ah din niin kum-2008 ah Lumpsum a hlankai anni a, he school hi din a nih atang kum 2017-2018 session thleng khan Zirlai 522 in exam an bei tawh a, chung zinga zirlai 450 in hlawhtlinna an lo chang tawh bawk a ni. Tunah hian Teacher hi paruk(6) leh Office Assistant pakhat(1) awmin kum 2018-2019 session ah Zirlai 136 an awm a, Subject hrang hrang( Pol.Sc, History, Education, Mizo, English, Geography) a awm bawk. He School hi Thingsulthliah khua mai ni lo, a khaw chheh vel, 1)Seling, 2)Sesawng, 3)Thingsul tlangnuam leh khaw dang dang atangin an kal thin bawk. Tin, he school hian Result tha tak nei thinin Top10 leh Subject topper nihna te pawh an lo hauh tawh thin a. He school hi vawin ni thleng hian khawtlangin ala enkawl mek a ni.
3. Farkawn Higher Secondary School
Farkawn Higher Secondary School hi 16.04.2004 a din niin kum-2008 ah Lumpsum ah hlankai a ni a, he school hi din a nih atanga kum 2017-2018 session thleng khan Zirlai359 in Exam an pe tawh a, chung zinga Zirlai 304 chuan hlawhtlinna an lo chang tawh bawk a ni. He school ah hian Teacher paruk(6) awmin kum 2018-19 session ah Zirlai 83 an nei bawk. Subject hrang hrang( Pol.Sc, History, Education, Geography, English,Mizo, Economics) te awmin Result tha tak tak an lo nei tawh bawk a, he school hi Farkawn khua chauh ni lo heng 1))samthang, 2)khankawn, 3)vaphai, 4)thekpui, 5)thekte khua ten an chhawr tangkai hle bawk. He school hi tun thleng hian khawtlang enkawl ala ni.
4. W.Phaileng Higher Secondary School
W.Phaileng Higher School hi 14.05. 2004 a din niin kum-2008 ah Lumpsum a hlankai a ni a, he school hian din a nih atanga kum 2017-2018 session thleng khan Zirlai 310 in exam pe an nei tawh a, chung zinga Zirlai 279 in hlawhtlinna an chang tawh bawk a ni. He school hian Result tha tak tak nei thinin, W.Phaileng khua chauh ni lo, a khaw chhehvel khaw hrang hrang 1)Chhippui, 2)Lallen, 3)Saithah, 4)Phuldungsei, 5)W.Phullpui, 6)Marpara, 7) Silsury, 8)Teirei, 9)Salem Boarding, 10)Damparengpui, 11) Tuipuibari, 12) Ropuichhip, 13) Rajiv Nagar, 14)Pukpui te pawn an chhawr hle a, kum 2018-2019 Session ah Zirlai 60 an awm a, Teacher5 paruk(6) an awm bawk. Subject hrang hrang (Public Administration, sociology, History, Education, English, Mizo) awmin, tunah hian khawtlangin an la enkawl mek a ni.
5. Zobawk Higher Secondary School
Zobawk Higher School hi 13.09.2003 a din niin kum-2008 ah Lumpsum a hlankai a ni a, he school hian din a nih atanga kum 2017-2018 session Last exam thleng khan zirlai 350 in exam an pe tawh a, chung zinga zirlai 239 chuan hlawhtlinna an lo chang tawh bawk a ni. Zobawk higher school hian kum2018-2019 session ah zirlai naupang 66 neiin Teacher panga(5) an nei a, subject hrang hrang ( Public Administration, Education, English,Mizo, Pol.Sc leh Geography)a awm bawk. He school hian result tha tak tak lo nei tawhin Zobawk khua mai ni lo khaw thenawm, 1)New Dawn, 2) New Ralvawn,3)Lungpher, 4) Sairep, 5)Hrangchalkawn, 6)Theiriat, 7)Bualte te pawn he school hi an chhawr tangkai hle a, vawin ni thleng hian khawtlangin an la enkawl a ni.
6. Phullen Higher Secondary School
Phullen Higher school hi 23 Jan 2004 ah din a ni a, kum 2008 ah Lumpsum a hlankai niin, din a nih atanga kum 2017-2018 session last exam thleng khan Zirlai168 in he school ah hian exam an bei tawh a, chung zinga zirlai 127 chuan hlawhtlinna an lo chang tawh bawk a ni. Kum2018-2019 session ah zirlai 67 awmin Teacher hi panga(5) an awm a, subject hrang hrang ( Pol.sc, History, Education, English, Mizo, Geography) te a awm bawk. He school hian result tha tak tak neiin Phullen khua chauh ni lo, khaw chhehvel, 1) Phuaibuang, 2)Khawlian, 3) N.E Tlangnuam, 4) Daido, 5) Zawngin, 6) Lamherh 7) North Khawlek, 8)Luangpawn, 9)Thanglailung ten an chhawr tangkai hle bawk. He school hi vawin ni thleng hian khawtlangin an la enkawl a ni.
7. E.Lungdar Higher Secondary School
E.Lundar Higher School hi kum-2003 a din niin, kum 2008 ah Lumpsum a hlankai a ni a, he school hi din a nih atanga kum 2017-2018 session last exam thleng khan Zirlai 256 in he school ah hian exam an bei tawh a, chung zinga zirlai 227 chuan hlawhtlinna an lo chang tawh bawk. Kum 2018-2019 session ah Zirlai 53 awmin, Teacher panga(5) leh Office Assistant pakhat(1) an nei a, Subject hrang hrang ( Pol.Sc, Education, History, Mizo, English, Geography) te a awm bawk. He school hian result tha tak tak lo nei tawhin, E.Lungdar khua chauh ni lo, a khaw chhehvel khaw hrang hrang, 1)Mualcheng, 2)Sailulak, 3) Leng khua ten an chhawr tangkai hle a. He school hi khawtlangin tun thleng hian ala enkawl a ni.
8. NE.Khawdungsei Higher Secondary School
NE. Khawdungsei Higher School hi kum-2003 ah din niin kum-2008 ah Lumpsum a hlankai a ni a, he school hi din anih atanga kum2017-2018 sesion thleng khan Zirlai 150 in he school ah hian exam an pe tawh a, chung zinga zirlai 70 chuan hlawhtlinna an lo chang tawh a ni. Kum2018-2019 session ah zirlai 43 annei a, Teacher panga(5) awmin subject hrang hrang (Pol.Sc, Geography, Education, English, Mizo, History)a awm bawk. He school hian result tha tak tak lo nei tawh thinin NE Khawdungsei khua chauh ni lo, khaw chhehvel khaw hrang hrang 1)khawkawn, 2) chiahpui, 3) Mimbung, 4) Teikhang, 5) Suangbem ten an chhawr hle a, vawin ni thleng hian khawtlang enkawl a la ni.
9. Zawlnuam Higher Secondary School
Zawlnuam higher school hi 1.04.1996 a din niin kum-2008 ah Lumpsum a hlankai a ni a, din a nih atanga kum2017-2018 session last exam thleng khan zirlai 209 in he school atang hian exam an bei tawh a, chung zinga zirlai 133 chuan hlawhtlinna an lo chang tawh bawk. Kumin 2018-2019 Sesion ah zirlai 72 neiin Teacher sawmpakhat(11) an nei a, subject hrang hrang (Pol.Sc, Geography, History, Economics, Mizo,English) te a awm bawk. He school hian result tha tak tak lo nei tawh thinin, zawlnuam khua chauh ni lo heng khaw hrang hrang 1)bungthuam, 2)zawlpui, 3)kanhmun, 4)zamuang, 5)rengdil, 6)Hriphaw, 7)tripura,ten he school hi an chhawr hle bawk. Zawlnuam school hi vawin ni thleng hian khawtlangin an la enkawl a ni.
A chunga kan sawi takte khi Lumpsum Aided Higher Secondary School pakuate School dinhmun ka hriat chin ka rawn tarlan a ni a, tihsual palh leh lo hriat diklo palh a awm chuan in mi hriatthiamna ka rawn ngen nghal bawk a ni. Heng school pakuate hi hun rei tak khawtlangin kan lo enkawl tawhte an ni. Kum sawm leh tih vel kal taah heng school hrang hrang atang hian thingtlang mi tam tak khawpui lama lehkha zirna tur nei lo mi 2627 te heng Zirna In hrang hrangah hian school kalin mahni kawtkaiah ngei exam an lo hmachhawn tawh thin a, chung zinga zirlai 2072 lai mai chuan hlawhtlinna pawh an lo chang tawh bawk a ni. Hetiang a nih avang hian School pakuate hi heng khaw hrang hrangte leh a chhehvel khua, lo chhawr thintute tan hian a tangkaiin a hlu takzet a, heng school te hi awm lo se, thingtlang mi a tam zawk hi chu sum harsatna vanga khawpui lama zirna chhunzawm theilo (lehkhathiam lo) an ni ngei ang. Amaherawhchu khawtlang mamawhna vang liau liau a din heng school te hi mi tam takin an lo chhawr tangkai a, khaw thenkhatah phei chuan an kal chhuahna school-ah ngei thawk ve leh tawhte pawh an awm hial tawh a ni. Chungte tan ngat phei chuan ava hlu leh zual em.!!
Hetianga thingtlang mite tana school dina awm hi kan tan hian a hlu takzet a, amaherawh chu heng school hrang hrangte hi, enkawltu khawtlang kan harsat tawh em avangin tunah hian tawp maithei dinhmuna ding deuh vek anni hlawm tawh a ni. Chumi anih avang chuan heng khaw hrang hrang a chengte tana a tangkaina hriain khawtlang hruaituten hetianga school tawp leh mai ai chuan tiin kan Sawrkar hian min chhawk tawh mai se tiin theihtawp chhuahin an lo ngen tawh thin a, amaherawhchu an ngenna erawhin kawngro a su thei chuang si lo.
Hetiang khawpa school tangkai leh result pawh nei tha School te leh heng khaw pakuate khaw thenawm khua heti zatin an chhawr ve zia pawh hre reng chunga khawtlang mamawhna Sawrkarin min ngaihthahsak erawh na kan tiin kan sawrkar hian arang thei ang bera kan mamawhna hi min ngaihtuahsaka, khawtlang harsatna min chhawk vat hi kan duh takzet a ni. Khawvel thiamna lo sang chho zel a, Ram hrang hrangin Zirna kawngah hma an sawn chho zel laiin kan ramah pawh Zirna kawngah hmasawn zel tura kan ngaih lai leh World Class Education tia kan sawi vul chuk reng laia zirna In hrang hrangte hmasawnna tur atana khawih chet an nih loh leh zirnain ngaihsak a hlawh miahlo erawh a makin NLUP leh NEDP ah sum tam tak a awm theih laia zirna tih hmasawn leh tihchangtlun nan erawh sum a awm leh si lo hi thil mak tak a ni. NLUP leh NEDP ringawt hi mi kan ram hmasawnna tur atana kan inghahna tur a ni ta ang le.? Ngaihtuah chian hi ava ngai tak em. Hetiang renga kan zirna te ngaithah a nih reng chuan kan zirlai naupangte, nakina kan ram hrauituturte hi engtin nge an hma hun, an kalna tur kawng kan sah en sak tak ang le.
Mizoram Chief Secretary leh kan Officer lian tak tak, Department hrang hranga Lu ber te pawh Mizo te kan awm ta mang lo. Thiamna kawngah hnam dangin min tlan pel zut zut a, hetih laia kan zirna hrang hrangte hmasawnna tur kawngah a khaipa ber che lova a awm tlat mai hi a pawi khawp mai. Zirlaite leh mithiam tak takten zirna kawngah rual kan awm em em laia, rual awh nachang hrelo ang mai a, a khaipa ber a chet loh miau si chuan kan tu leh fa te nakina ka Pu, ka Pi tia zah taka miin chibai an la buk tur a te hi, ka Pu, ka Pi titu zawkah an tang palh ang tih hi ava hlauhawm tak em. Zirna in te enkawl kawngah hian kan Education Dept hi harh tawh se ka duh takzet a ni. Kan Education system phuaihluai lutuk leh Zirna In te upgration mumal lo lutuk hi chinfela, mumal taka kalpui a nih hma chuan tuna kan buai ang hian kan la buai reng anga, hei aia nasa pawn kan la buai tulh tulh ang tih hi alang chiang reng mai.
A tawp berah chuan tuna Lumpsum Higher Secondary School dinna khua pakuate leh a chheh vel khaw hrang hrangten kan mamawh ber chu Adhoc Grant-in-Aid ah kan Lumpsum Higher Secondary School te hlankai hi a ni. Mihringte hi Inti lawm tawn tura siam kan ni a, heng khaw hrang hrang bialtu MLA/ MINISTER te pawh khaw hrang hrang mipuiten rorel khawl inkutah a awm loh hlau a, in tana theihtawp kan lo chhuah tawhna hi kan Lumpsum Higher Secondary School te, Adhoc Grant-in-Aid hmanga min chhanlet ve hi kan duh takzet bawk a, chutiang tur chuan ngaihngam takin heng kan khaw Lumpsum Higher Secondary School te hi inkutah kan dah bawk e. Rorelna dik chu Luipui angin luang sela, felna chu Luipui kang ngailo angin luang mawlh rawh se.
No comments:
Thanks for your comment.