MZP-CHUAN HNAMDANG DAN LOA LUH TUM LEH NRC A CHUANG LO TE ENFIAHNA CHECK GATE SIAM DAWN

Chakma te hi engtikawng zawng mahin Category-I a an awm hi MZP chuan a remti ngai dawn lo a ni.

 Vawiin 16th August, 2018(Ningani) chhun dar 12:00 khan MZP General Headquarters Executive committee meeting neih a ni a. Meeting hi Tv. L.Ramdinliana Renthlei, President chuan kaihruaiin, Meeting-ah hian, National Register of Citizens’(NRC) chungchang, Technical Entrance chungchang leh MZP rorelna sang Assembly,2018 chungchangte rel a ni.

Meeting chuan, National Register of Citizens(NRC) Assam sorkarin a buaipui mek a vangin Mizoram leh hnam tan a him loh zia a hria a, Ni 28th July, 2018 khan Press Conference pawh a lo nei tawh a. Mizoram Sorkar pawh chak taka hmala turin leh an hmalakna Ni 15th August,2018 thleng a nghah tur thu pawh lehkha hmanga ngenna lo thehluh tawh a ni a. Mizoram sorkar hmalakna tun thlenga a taka hmuh tur a la awm loh avangin MZP chuan atul angin hma a la tan dawn a. MZP chuan kan ram leh hnam damna turin Mizoram ramriah hnamdang dan loa lo luh tum leh Assam NRC a chuang lo te lo enfiah a check gate siam nise tha ti a. Inner Liner Permit(ILP) pawh NRC a chuang lo chu tun hnuah pe chhuak tawh lo turin meeting chuan thu neitute a ngen nawn leh a. MZP Headquarters, Sub-Headquarters leh Branch ramri hrula awm te chu atul anga hma la nghal a, hnamdangte lo check nghal tura hriattir an ni bawk a ni.

Meeting chuan MBBS seat 18 leh BDS seat 7 Central Pool Quota seat kan hmu chu lawmawm a ti hle a. Hetih rual hian State Medical & Technical Entrance Examination (SMATEE) 2016 chungchangah Mizoram Chakma Students Union ten Guwahati High Court-ah PIL an thehluh tihtawp(dismiss) tawh an tinung thar leh a, Guwahati High Court-in Mizoram(Selection of Candidates for Higher Technical Courses) Rules 2016 No. 5 suspend order a tih chhuah vanga MBBS leh BDS zirlaite counseling neih chhunzawm theih lova tiam chin awm lova posponed a ni a, Mizo zirlai tam takin zir thei lo tur dinhmuna an ding mek hi MZP chuan pawi a tiin a hrethiam lo hle a. MBBS leh BDS zirturte counseling neih a nih mek laia Mizoram Chakma Students Union ten Mizo zirlaite tihbuai tum hrim hrima harsatna an siam hi MZP chuan kan hrethiam lo hle a, Mizo zirlaite min tihbuai tum hrim hrim ah MZP chuan a ngai a ni.

MZP chuan Chakma Students Union te hi Mizo zirlai rilru thianghlim tak takte tihbuai hrim hrim duhna ah a ngai tlat a, an PIL thehluh dismiss tawh tihnun leh hi a rang thei ang bera hnuk kir leh turin MZP chuan Mizoram Chakma Students’ Union te a hriattir a. Hemi chungchangah hian MZP chuan dan ding lai anga kal a nihna turin theihtawpin hma a la dawn a, a hmalakna kawnga hnam rilru pu a Mizo mipui zawng zawng te thlawpna a ngen nghal bawk a ni. Mizo zirlai ten kan chanvo dik tak kan chan zelna tur leh dinhmun hima kan hnam a awm zelna turin a tawp thlengin MZP chu Mizo zirlai leh Mizo hnam tan a ding zel dawn a, a ram leilungfa nilo Chakma te hi engtikawng zawng mahin Categary-I a an awm hi MZP chuan a remti ngai dawn lo a ni.

Meeting chuan Mizoram Sorkar enkawlna hnuaia hna thawk AK. Sharma; Additional Advocate General, Guwahati High Court-a ding tura a rawih chu a ruaitu Mizote aia hnamdang a duhsak fo hi MZP chuan hriatthiam har a ti hle a. Mizote chan thatna turah a muangchang hle a, Mizote tana tha lo tur leh dinhmun hniam zawkna turah chuan rang takin hriattirna leh court thu leh hla a rawn thlen thin hi MZP chuan Mizoram Sorkar hnuaia hlawh la reng tlakah a ngailova, a hna chelh lai hi chelh chhunzawm lova ban a nih theih nana hma la turin thuneitute kan ngen nghal bawk a ni.

Meeting chuan MZP inkhawmpui lian Assembly a lo hman thin chu kuminah pawh hman leh ngei nise tha a ti a. MZP rorelna sang ber leh inkhawmpui lian MZP Assembly 2018 chu MZP Headquarters, Saitual a neih turin a rel a ni.
           

              Sd/-
(LALNUNMAWIA PAUTU)
       General Secretary