MZP IN ZIRTIRTU KHAIRUAL LO VEI : NRC NEI LO MIZORAM LUH TUM VENG TURIN CHHUAK

Aizawl | August 20, 2018:   MZP chuan Mizoram Sorkar enkawl zirna in hrang hrang (Primary School atanga Higher Secondary School)-a Zirtirtu inkhairuallo lutuk chu tha lo a tiin, hei hian nasa takin zirna In thenkhat ah zirna dinhmun a chhiat phah hle niin a hria a. Zirtirtu indaihlohna school hi a bikin thingtlang khua ah a nasa bik niin MZP chuan a hria in, Mizoram a zirlai thahnem tak in an tuar nasa hle a, hemi chungchangah hian MZP rorelna sang Assembly in a lo rel tawh angin hmalak a ni a. School Education Minister leh official te nen vawi-3 meeting tawh a ni nghe nghe a ni. Zirtirtu indaihlo chungchangah hian MZP te ngenna avangin school education department lam hotute chuan Thingtlang lama zirtirtu indaih lo zualpui phu hruk nan tiin special teacher 35 a la thar a, hei hi school academic year tawp huna an term hi tawp leh mai tura tih a ni.

          School Education Minister Pu H. Rohluna ho in department official te nen ngun taka sawiho a ni a, MZP te chuan khawpui Aizawl lama hian zirtirtu an thahnem si a Thingtlang lama sawnchhuah a semrual turin Minister leh Department official te hi ngen an ni a. Kan School Education Minister Pu H.Rohluna chuan MZP te hnenah chuan "Khawpui Aizawl lama hian zirtirtu chu tlem chuan an tam deuh tih kan hria a, mahse khawpui atanga Thingtlang lama zirtirtu sawn chhuah hi inthlanpui a hnai tawh si a tun dinhmunah chuan kan ngam rih lo a ni. MZP te hian min lo hrethiam mai teh u. Tuna zirtirtu lak thar tur result nghah mek Primary school teacher - 100 leh Middle school teacher - 60 te hi result a lo chhuah hunah chuan an vai hian Thingtlang lam zirtirtu indaih lohna hmunah kan dah vek ang" tiin MZP hruaitute chu a lo hrilh a ni.

       School Education Minister Pu H.Rohluna chhan dan hi MZP chuan mak a ti hle a, Minister berin Thingtlang lam zirtirtu nei tlem school ah Khawpui lam zirtirtu thahnem tak a semrual ngam lo hi pawi a ti hle a, kan sorkar thuneitute hian Thingtlang lama zirlaite hi ngaihsak ve se MZP chuan a duh hle a ni. Tun dinhmunah zirtirtu tur lak ni si school education office hrang hranga attach-a awm MZP in RTI hmanga a zawhna chhanna a lan dan chuan zirtirtu pangngai 109, SSA teacher 45 leh RMSA teacher 4 an vaiin zirtritu tura lak ni si office lama awm hi zirirtu 158 an ni a. Zirtirtu tur a lak ni si office lama heti zat an awm hi MZP chuan a hrethiam lo hle a ni. Mizoram sorkar chu Thingtlang lama zirlaiten zirna tha an dawn ve theih nana hma la turin a ngen nawn leh a ni.

        Tin, MZP chuan Assam sorkar in National Register of Citizens(NRC) a kalpui mekah final draft ti chhuakin Assam khua leh tui nilo mi nuai 40 chuang te chuan an state thenawm ah an tlanchhe khawm mek niin a hria a, hemi chungchangah hian kan thenawm state te chu nasa takin an inveng lawk a. MZP chuan Mizoram sorkar pawh lo inveng lawk turin a lo ngen tawh a, Mizoram sorkar atanga hmalakna liantham hmuh tur a awm loh avangin MZP chuan hma a la tan ta a. Ni 17th Agust, 2018 atang khan Mizoram pumah hnamdang dan lo a awm dapchhuahna neih a ni a, Aizawlah pawh vawikhat hnatlanna ah NRC a chuang lo Assam atanga lo kal mi 4 hmuhchhuah an ni. Tin, MZP Sub-Headquarters Vairengte bultumin Vairengte ILP check gate ah NRC neilo hi lo check ve nghal a ni a, tun dinhmunah Vairengte atang hian NRC list a chuang lo mi 16 chu thawnlet an ni tawh nghe nghe a ni.

            Vawiin ni 20th August, 2018 atang hian MZP General Headquarters hruaitute chu hmun thum(3) Bairabi, Vairengte leh Saiphai ah te inthenin Mizoram chhunga dan lo a lo luh tum leh NRC list-a chuang lo te atul anga dapchhuak turin an kal a ni. MZP hruaitute hian Assam leh Mizoram inrina laia hnamdang lo luh theihna awm te chik zawkin an zirchiang nghal dawn bawk a ni.