MZP sub-headquarters, Vairengte member-te chu August 17 leh 18 zan khan Vairengtea Inner Line Permit (ILP) pek chhuahnaah an duty ve a; Assam-in National Register of Citizens (NRC) draft list a tihchhuaha chuang lo Assam aṭanga Mizorama luh tum mi 16 hmu chhuakin, Assam lamah an lettîr.
MZP chuan ILP pek chhuah danah Mizoram sorkar a fimkhur tâwk loa an hriat avangin, Vairengte MZP-te chu Police checkgate-a ILP pek chhuahna hmunah an duty ve a ni.
Vairengte MZP hruaitute'n Vanglaini an hrilh danin, ILP pek chhuahnaah hian ILP dilte Assam NRC draft list-a an chuan leh chuan loh endik a ni ngai lo a; zan hnih an duty ve chhungin hnam dang ILP dilte chu NRC-a an chuan leh chuan loh an endik zel a ni.
MZP chuan, Assam NRC-a chuang lote chu ILP pek chhuah an remti lo a, an ram lamah an kîrtir leh a; Vairengte MZP hruaitute chuan a ṭul anga duty chhunzawm zel an tum thu an sawi.
No comments:
Thanks for your comment.