District tinah FCI kudam dah tum : Ronald Sapa Tlau

Aizawl | September 3, 2018: Rajya Sabha Member of Parliament, Food Corporation of India State Consultative Committee Chairman Ronald Sapa Tlau chuan vawiin khan Aijal Club -ah press conference kovin Food Corporation of India (FCI) in Mizorama district hrang hrangah Godown/storage dah tuma hma a lak mek thu a sawi.

( A thlawna chanchinthar i chhiar zel theihnan website a fakna awm hi lo click ve ta che!)

Ronald Sapa Tlau chuan, Mizoram sawrkarin FCI in kum 99 chhung a hman turin Sairang dinthar- ah ram zau tak mai a lo hlan tawh a. He hmunah hian kudam lian tawk tak sa tura hmalakna kalpui mek a nih thu sawiin, CPWD lama ruahmanna siamin an kalpui dawn tiin a sawi.

He kudam hi mt 10,000 dah theihna tura ruahman a ni a. He thil hi a lo hlawhtling hunah pawh, Tanhril leh a chhehvela miten awlsam zawka Buhfai an hmuh theihna turin FCI Kudam Tanhril-ah  stock tlem azawng chu dah tum tho a nih thu a sawi a.

Tin, hemi bakah hian district tinah FCI kudam dah tura ruahmanna kalpui a nih thu leh FCI danah back load hi a rem loh vangin back load awm lova a kal tluan theih dan tur ngaihtuahin Champhai district-ah hian Kawlkulh ah dah tum a ni a, Siaha leh Mamit-ah pawh dah tum a nih thu a sawi a. Chutihrual chuan district thuneitute'n a hmun tur an ngaihtuahpui erawh a ngai dawn niin a sawi bawk.

Pu Sapa chuan Mizoram pumah buhfai stock capacity 25,490 Matric tone ah matric tone 18,695 lai mai kan la nei a ti.

Storage loss titlem turin thuneitute an thawk tha em em a. FCI dan a ngainatthiam theih chin chu 0.11% a nih laiin, Mizoram-ah chuan 0.11% hnuaiah hlir storage loss hi a awm a ni a ti.

Quality Control chungchang sawii, Civil supply dewpartment lam nen thawk hovin hma nasa zawk a lak zel tum a ni a. An ni lam atangin thawktu inruatin, FCI in training peka hma lak tura ruahmanna kalpui mek a ni.

Pu Sapa chuan FCI staff indaih loh thu sawiin, hemi tur hian Mizoram a thawk turin Mizoram mi ngei la turin ruahmanna kalpui a nih thu a sawi bawk.