ISRAEL FATE THILMAK TAWN (The Split Rock)

 ISRAEL FATE THILMAK TAWN
(The Split Rock)
(Marah tui kha hmuna tui tithianghlim thei Thing kha!)

*SUNDAY POST*

★Opeey-a Khiangte
__________________________________________

Israel fate tui in tur Mosian Lungpui atanga a tianga tui a vuakchhuah kha khawi hmun nge ni ta ang le!

Tun lai chu ka hman lo deuh riau mai a, chipchiar pawn ka ziak lo mai ang e. Tlema zawng chauh chu sawi ve leh thuak teh ang u aw..

Kha tui lo chhuahna hnar ni thei awm kha hmehbelnain an chhui nasa hle a. Sinai Peninsula-a Mt. Musa leh north Saudi Arabia-a Mt Lawz chu, Mosian Lungpui atanga tui a vuak chhuahna nia an rin leh kawhzawn ber pahnih a ni a. Mahse, Mt. Musa, Sinai Peninsula-ah chuan chutianga tui chhuahna rock split a awm hauh si lo. Amaherawhchu, khami hnu khan tui luangchhuak kha a kangchat leh ta pawh a ni thei tho thung. A chhan chu, Earthquakes, sand storms leh erosion-te'n kha lungpui kha an hliahbo ta pawh a ni thei ve tlat a ni.

A lehlamah chuan, Mt. Al-Lawz kha Mosian a tianga tui a vuakchhuahna hmun niin an sawi leh bawk a.

Tunah erawh chutiang tuiluang chu a awm tawh lem lo. chung lui luang an sawite chu kum 3,400 liam ta khan a kangchat vek tawh pawh a ni thei a. chuvangin, hmuhchhuah pawh chu thil namai a ni lo ve leh tlat mai a ni.

Num 20:1-5-ah khan,
1.  Tin, Israela tlah, pungkhawmho zawng zawngte chu thla khatnaah chuan Zin thlalerah an lut a: tin, mipuite chuan Kades-ah awmhmun an khuar a; chutah chuan Miriami chu a thi a, chutah chuan an phum a.

2.  Tin, pungkhawmho chuan tui an nei ta lo a; Mosia leh Arona chungchang thuah an inpun khawm chiam a.

3.  Tin, mipui chuan," LALPA hmaa kan unaute an thih lai khan pathianin min lo tihlum ve ta then zawk se la aw!

4.  Engati nge LALPA mipuihote hi thi tura thlalerah hian i hruai luh ni, keimahni leh kan rante nen?

5.  Eng vangin nge he ram tha lo taka min hruai lut turin Aigupta ram ata min tichhuah ni Buhbal te, theipui te, grep kung te, pawmgranet te awm lohna hmun ani a, tui in tur reng reng lah a awm hek lo," tiin Mosia chu an bei vak a.

6.  Tin, Mosia leh Arona chu mipui zing ata chu inbiakna puan in kawngkaah an kal a, an bawkkhup a; tin, LALPA ropuina an hnenah a lo lang a.

7.  Tichuan LALPA'n Mosia chu a bia a,

8.  "Tiang la la, pungkhawmhote chu awmkhawmtir la, nang leh i unau Arona nen, an mithmuhah lungpui chu a tui tichhuak turin hrilh la; lungpui ata chu tui i lakchhuahsak ang a; tichuan pungkhawmho leh an rante chu i intir dawn nia," tiin.

9.  Chutichuan Mosia chuan LALPA hma ata tiang chu a thupek ang chuan a la a.

10.  Mosia leh Arona chuan pungkhawmho chu lungpui bulah chuan an awmkhawmtir a, an hnenah, "Helhmanghote u, ngai teh u, he lungpui ata hi tui kan lak chhuahsak dawn che u em ni?" an ti a.

11.  Tin, Mosia chuan a ban aphar a, lungpi chu a tiang chuan vawi hnih a han vua a; tichuan tui a lo chhuak ta dur dur mai a, pungkhawmhote leh an rante chuan an in ta a.

A chung Bible changah khian, Kadesh khi Bible-in a sawi lan miau avangin, Kadesh hmunah tuiluang an zawng leh a. Hei pawh hi thil buaithlak tak a ni leh ta tho va, chutiang khawpa tui tam, israel fate chawm thei tur chu hmuh a ni thei leh tlat lo a.

Mahse, a chung lama kan sawi tawh ang tho khian, Kadesh-ah pawh hian tun hmain tuiluang nasa tak a chhuak a, israel fate'na an kalsan hnu khan, zawi zawiin a kangchat leh ta niin mi tam tak chuan an ngai ta a ni.
__________________________________________

Marah tui kha hmuna tui tithianghlim thei Thing kha!

Exodus 15:22-25
22. Tichuan Mosia'n Israel-hote chu TuipuiSen ata a hruai chhuak a, Sur thlaler lam panin an chhuak ta a; tin, thlalerah chuan ni thum zet an kal a, tui an hmu zo ta lo a.

23. Tin, Mara hmun an va thleng a, Mara hmuna tuite chu a lo khak avang chuan an in thei lo a: chuvang chuan a hmingah Mara vuah a ni.

24. Tichuan, mipuite chuan, "Engnge ni kan in dawn le?" tiin Mosia chungah an phunnawi ta a.

25. Tin, ani chuan LALPA chu a au a; tin, LALPA chuan thing pakhat hi a han kawhhmuh a, chu chu tuiah chuan a zuk paih lut a, tichuan tui chu a lo tui ta a. Chutah chuan chuan thuruat leh rorelna a siamsak a; chutah chuan anmahni fiahna a siam a;

Exodus-àh chuan, Israel fate'n Shur thlalera tuihal dangchara an vah hnuin, Mara hmunah awmhmun an khuar a. chulai hmuna tui chu a khak tlat avangin an in thei lo va.

Mahse, tui kha tih thianghlim nan Pathianin Mosia chu thing pakhat tuia thlak turin a hrilh a. Tichuan, tui chu a lo kha ta lo va, intlak a lo ni ta a ni.

Pathian thiltihtheihna hnial kalhtute chuan, khatianga tui tihthianghlim theihna thing kha awmin an ring tlat lo. Kha Thing, tui in tlaka siam theitu kha eng thing nge ni ta ang?! Katianga tui tithianghlim thei tur awma lang chu, thing chi khat Moringa oleifera a ni a.

Hetiang thing hi a tangkai hle a, Sudan ramah chuan an ching nasa hle a ni. Mak ve tak chu, moringa seeds tihkeha tui bal/nu (dirty water) awmna bottle-a thlakin, second rei lo teah, tui chu a fim kak thin.

A awmzia chu, Moringa tuia chiah khan, tuia bal leh nawi awmte chu a mawngah an tlakhawm ta vek a, a chung lam tui a lo fim ta thin a ni.

Hetianga Moringa thing experiment hi kum 1970 chho atang khan an lo buaipui nasa tawh thin hle a, Mosia'n tui kha tihthianghlim nana a hman ngei kha ni thei ngei pawhin a lang.

Moringa thing hi Himalaya tlang bulthut chhim lamah a tam em em mai a. Mahse, hmun dang dangah pawh chin theih a ni a, leitha awm tlemna hmunah pawh awlsam taka nung thei a ni tho bawk.

Tin, 10 metres vela sang a ni thei a. Tunah chuan, Africa, India, Sri Lanka, Guatemala, Australia, Mexico, Malaysia, Indonesia, Philippines leh ram hrang hrangah chin a ni tawh.(Opeey-a Khiangte)

★★★★