MARINI

Chutia kan khaw nula hmeltha leh felin in vai fa a rawn pawm haw nawlh mai chuan kan khawtlang a nghawr nghing tak meuh a, kan thinlung a khawih tlângin mak kan ti a, a ngaihna kan hre lo.

Kei nen phei chuan khawikipa inzui reng mai kan nih avangin Marini mizia hi ka hrechiang thawkhat hlein ka hria a, lêr lo, mize zawi raih mai, mi hriatthiamna ngah, zaidam leh nunnem a ni a, a hmelthat em avangin kan khaw tlangval ngaihzawn rawn a ni a, khaw thenawmah pawh a hmelthat em avangin a lâr hle a ni.

Piannalh, sambu mawi tawk tak, a sân ang tawka taksa inphut mawi si, ngo leh vunnalh tak mai a ni a, hmeichhia leh hmeichhia infak vak vak tiin ngaihdan fahrah tak min lo siam khum lo ula, ka thiani hi chu ka chhuang ve êm asin.

Thuruk engkim inhrilh tawn thin kan ni a, ngaihzawng a nei ngai lo tih chu beng pahnih ka nei tih ka hriatchian tluk zetin ka hrechiang ang. A lehkhazirlaiah chauh rilru pek a tum avangin mipa reng a ngaihsak lo, "Pasal fanau te kan nei ve ang a, ka pasal leh ka fate tana innghahna tlaka inzir chhuah ka tum a ni," a ti ve keuh keuh thin.

Mahse mahse thil ni thei awma kan ngaih loh, ni se ti a ngaihdan pawh kan neih ngam ngai loh tur vai fa a rawn pawm haw tlat mai chuan kan rilru a tina a, kan thin a rim a ni. A pa Upa Lianzuala pawhin a tuar na tawk hle niin a hriat, a samtuak a tam sawt a, a tar bâwihin ka hre mai. A inkhawm ngai lo a, khawlaiah pawh a chhuak ngam bawk hek lo. A fanu a lo chhuan ve em emin chutia hnamdang laka nau a rawn pawm haw mai chu tuarna awm reng pawh a ni.

Pachhhunga Univ. College ah BA(eng) a zawh hnu-in NEHU Shillongah MA(eng) a zawm leh kha a ni a, a kumhnihna-ah tihian a rawn mualpho ta a.

An ina ka va chuankai chang hian a chhungte hian an ensan deuhin a lang a, an biak pawhin ram hmakin an bia a, an melh hrek hrek a, Marini tana nuam lo rawih turin tukkhum an chhawnsan a.

Branch KTP a office bearer ni phak ngat, Bial zaipawla a soprano part ti mawitu, sande sikula naupangte ngainat hlawh em em mai thin chu nilai zanah danpawna hnawhchhuah a ni ta, thenkhat lo sawichhe duh tawk lah bo lo.

"Marini saw kawm rawh," tia kan khaw nu leh pate'n an fate an zilh thin chuan keimah bak kawm tur a nei ta lo, a hmazawng kha chuan Marini thian nih an inchuh a, tunah chuan vanlaia tla ang mai a ni ta. Mahse mak ka tih chu nula hrisel ni si hnutetui a nei lo chu mak tihna ka nei nain thil thleng ve fo a nih avangin mak ka ti ta lem lo a.

Nikhat chu dawr ka nghah lai chuan naupang pakhatin min rawn ko a, "u Marini a chau thut a, a nu Puii te'n lo kal rawh an ti," a rawn ti a, dawr ka khar sawk sawk a, thinphu dut dutin Marini te in lam chu ka va pan a.

An in ka va thlen chuan mi an lo tam hle mai a, tukverh atangin a lo tla palh hi a lo ni a, an lo bawihsawm laih laih a, mi an lo hmuh chuan "biak che a duh a, kan rawn ko che a ni," an lo ti a.

A khumah chuan a lo mu a, a nakruh pathum a lo tliak hi a lo a ni a, en mai pawhin a damchhuah leh chu huphurhawm tak niin ka ngai a. A khumah chuan ka thu a, ka khawngaih lutuk chu tah vak mai ka duh a, mahse a rem chiah si lo. A mitmeng atang chuan min be duh niin ka hria a, "Ka diary kha lo en ang che aw, ka thingrem mawngah ka dah kha, thudik tak chu a rawn lang ang, naute nu leh a phone no. ka dah a, Zuimawii a nih kha, ka thian, ka ngai dawn hle mai che," a ti a, a mittui a tla a, a chatthla ta a.

Kan tap chuah chuah mai a, an inchhung chu an singsa vel a, an ri bur bur mai a.

Marini chu thlan khur thuk takah chuan kan thlah liam ta.
YMA lenkhawm tawp zanah chuan a thingrem mawn chu ka va hai a, a diary chu a lo awm ngei a, ka kawrchhungah chuan ka thun vat a, ka haw ta nal nal a.

A pawimawh lai lai hi tarchhuak mai ang.

Dt. 25. 5.2003.
Vawiin ka thil hriat zet chuan ka rilru a va tina tehreng em! Ka thiannu ka hmangaihin hnamdang fa a nei tih min hrilh a, a bialpa lahin a hawsan daih lehnghal a, vaiho tenawm zia hi chu aw, ka thiannu pawh a zeilo ve bawk a ni, tihngaihna ka va hre lo em aw, tawngtaipui chauh lo chu tih theih dang reng ka nei lo...Aw ka Lalpa awmpui ang che aw..

Dt. 28.5. 2003.
Zuimawii chu aw, ka khawngaih viau rualin ka thin a tirim, tihtlak te a tum a, ka zilhna pawh engahmah zu ngai lo a, aw Lalpa engtin nge ka tih ang?

Dt.29. 5. 2003
Ummm...a nih nih ka ni ang, thlarau bo chhanchhuahna a ni mai alawm, tihtlak a tum ai chuan ka fa-ah ka nei mai ang, a kalna tur chu hremhmun a ni si a. Aw Lalpa i bawihnu ka ni e, Mari pawhin ka Lalpa lo pian nan mualpho pawh a ngam a, keipawhin Mari hnungzui turin ka rawn inpe e, ka Lalpa min tichak ang che aw..

Dt. 12. 9. 2003.
Thla kua zet nau a pai hnuin ka fapa tur chu a lo piang ta. Lalpa, Setana angchhunga mi tur chhanchhuak thei tura min puih avangin ka lawm e.

Dt. 9. 1. 2005
Mite min endan hi Lalpa tawrh har ka va ti tawh tak em!Heti reng chuan ka tuar zo lo ang, Lalpa min pui teh...

Heti zawng hi ni mai se, he diary ka chhiar zan hian ka tap zankhua thak asin.

Ka thiannu thihna pawh kum a vei leh ta reng mai, nikhat chu ni a sa vawl vawl a, laikingin bel a rawh chem chem a, khawlai pawh a reh khawp mai a.
Chawchhun fak hun a nih chuan Gypsy soft top la thar tak mai hi a rawn tlan a, ka dawr zawnah a rawn ding chat a, tukverh atang chuan nula hmeltha zet mai leh changkang hmel tak mai hi a rawn dak a, "thiannu khawnge Marini hmanni lawka thi ta kha khawnge an in a awm?" a rawn ti a.

A va hla angreng si a, dawr ka khar a, ka va kalpui ta a..
Nula chuan, min be bawrh bawrh a, a hming chu Zuimawii a ni tih ka hre thei a, ka ngei nghal ringawt a.

An in kan va thleng a, an lo kim thap a, motor khalhtu Zuimawii pa ni awm tak mai chuan, chibai a han sem kual a, thingpui te kan han in a..
Thingpui kan in zawh chuan Zuimawii chu a lo ding a, "Ka pi leh ka pute u, Marini fa ni a in ngaih kha ka fa a nih kha, Assamese bialpa ka nei a, kan chesual a, ka rai a, tihtlak ka tum tlat avangin Marini hian a phal lo a, i tihtlak ai chuan fa atan ka lo nei ange, i mualphona turin engmah ka sawichhuak lo ang, a ti a, chuti na na chu ka nei ta a, ani chuan a rawn hawpui ta a nih kha, ka sual man a tuar a....(a tap a) tichuan hmanni-ah thlarau damna ka chang ve a, ka thiltihsual avanga Marini tuar hnem zia ka hrechhuak uai uai a, in hnenah ngaihdam ka rawn dil a ni," a ti ta a..

Upa Lianzuala chu a tap chhuak phawng mai a, "Ka fanu Marin, ka lo va rinkhum che em! Pathian hming avanga i tawrhna chu a va ropui ve le, kei i pa hian ka va tluk lo tehlul che em!" a ti a

Kan thawm hre pha ho chu an rawn lut tuk tuk a, thil awmzia an hriat chuan sawi tur reng an hre lo..
Upa Lianzuala chu a rawn dingchhuak a, "Hei vawiinah Pathian kan inhnenah a rawn inpuang a nih hi, kan fanu Marini chu kan hnenah awm tawh lo mahse, a rawngbawlna ropui tak avangin thlarau boral mai tur chu chhandamin a awm ta, haleluiah, hawh u i tawngtai rual ang u," a ti a..

Chumi ni baka tawngtai tui ka la nei lo..