Pangzawl | September 5, 2018: Vawiin ni 5.Sept.2018 (Nilaini) zing dar 9:30 AM khan MZP Branch Pangzawl bultumin Ramrikawn atangin 'Zirtirtute Zahna Kawngzawh' neih a ni a, he hun hi H.Lalhmingthanzuala, Secretary MZP Pangzawl Branch chuan kaihruaiin Adviser Lalramhluna'n tawngtaina a hman hnuah kawngzawh hi tan a ni. Zirtirtute chu hnam rohlu an nih thu leh thiamna leh finna min pe tute an nih thu aupui niin Khuanghlum Community Hall ah luh khawm a ni.
Khuanghlum Community Hall-ah MZP Hqrs. Lunglei te nen tangkawpin Zirtirtute Ni lawmna hun hman a ni a, he hun hi H.Lalhmingthanzuala, Secretary MZP Pangzawl Branch chuan kaihruaiin Zirsangzela Tlau, Lecturer Pangzawl H.S.S. sunna hun hman a nih hnuin Lalrammuanawma, President MZP Hqrs. Lunglei chuan thusawina hun a hmang a, mahni hnaa inpe thar tura zirtirtute chahin Politician ropui leh Officer lian tak tak te thlenga dintu zirtirtu te chu an zahawm a, zirlai kan nih lai chauh lo pawhin zah hle tur an ni a ti bawk. Zirlaite tan tuna an zirlai chu a pawimawh ber lai a ni a, zirna tibuai thei tamtak a awm a, chutiang lakah chuan inven thiam a tulzia sawiin zirtirtute thu hrilh awih loh chu mahni inchhirna mai a ni a, khawtlang leh kohhran a inhmanna ah pawh a awm tawk hriat a ngaih thu a sawi. A thiam leh zir peih te din channa khawvel a nih tawh rualin Entrance Exam Oriented a zirlai te zirtir a tul thu a sawi a, Mizoram chhung chauh kan inel tawh loh avangin theihtawp kan chhuah leh zual a ngai a, zirtirtute pawh kan tan a tul a ni a ti bawk. Pu Lalrammuanawma chuan kan naupang te hian theihna an nei a ni a ti a, khawtlang leh kohhran pawh hian zirna atana environment tha leh an zirna tibuai lo tura programme kan duan a pawimawh a, nu leh pa te pawn kan thliarsak a tul a ni a ti. Pianphung a rualbanlo te pawn exam tha taka an pass thei anih chuan keini chuan sang tak kan thleng thei a, mihring hian a tum tak tak chuan theih loh a awm lo a ni a ti a. Tin, aia upa zahna tlahniam ta lutuk a vei thu sawiin, zirtirtute pawh an tih theih ang tawka hnam boralna tur leh ze mawi kan bansanna tur venpui turin a chah bawk. Tawng dang thiam a tha em em a, amaherawhchu kan tawng hi kan thiam ber tur a ni a ti a. Ngaihsan tur dik ngaihsan chungchang hi a pawimawh em em a ni a ti a, kan ngaihsan te hian kan nun dan leh kan zirna a nghawng em em avangin kan ngaihsan tur kan thlan thiam a pawimawh a, chu mai ni lovin khawvelah hian thiamna leh hriatna zau zawk kan neih hi a pawimawh em em a, thil hre ve hlek a sawi ve zul thei nih kan tum a, chu chu hriatna tak tak ni lovin buaina chawk chhuaktu mai a ni thin a, lehkhabu tha kan chhiar tam a ngai a ni. Tin, zirtirtu te chu department dang ang lova mihring enkawl an nih avangin an hnathawhnaa inpekna thar nen, naupang te zia man thiam thei tura in update zel chunga naupang enkawl dan thiam tum zel tura thawk turin a fuih bawk.
He hunah hian Pangzawl a zirtirtute chawimawina par thi hlan niin he hun hi B.Lalvensanga, President MZP Pangzawl Branch chuan a kaihruai a. Pangzawl Educational Staff Union aiawhin zirtirtu te chawimawi tura Rally leh a huho a hmanna programme an buatsaih avanga MZP chunga lawmthu sawina hun a hmang bawk.
Pangzawl VCP Pu Lalrinawma chuan zirtirtu te chu an zahawm em em a, anni aia thiamna sang leh nihna sang kan lo chelh anih pawn anmahni avang chauha chang thei kan nih avangin kan thinlung tak taka kan damchhunga kan zah a pawimawh hle a ni a ti a. Tin, zirtirtute hi min hrechiang bertu an nih angin kan thiam loh leh kan man loh a awm anih pawhin kan chhungte hnenah kan hotute min biaksak a min rawnsak mai tura kan ngen fo hi a tha a, zirna in compound chhung mai ni lovin khawiah pawh kan zirtirtute hi kan zah em em reng tur a ni a ti bawk.
Chawhnu hun Jonathan Lalrintluanga, Finance Secretary MZP Pangzawl Branch kaihhruaiah Pangzawl High School leh Higher Secondary School naupang te tan Education Awareness chu Pu FP Laltlankima, Teacher Gov't. High School Pangzawl chuan neiin Career Guidance chungchang inzirtirna hun Vanlalvena Ralte Kawlni, Joint Secretary MZP Hqrs. Lunglei chuan a hmang bawk.
Sd/-
Secretary
(H.LALHMINGTHANZUALA)
MZP Branch Pangzawl
No comments:
Thanks for your comment.