PI VANLALAWMPUII CHAWNGTHU IN E. LUNGDAR AH HELIPAD HAWNG

E Lungdar | September 10, 2018: Vawiin chawhnu hian Pi Vanlalawmpuii Chawngthu, Minister of State, Sericulture leh bialtu MLA ni bawk chuan a bial chhung E. Lungdar tlanga Helicopter Service na tur Helipad thar a hawng.

A hawnna inkhawm tawi buatsaihah Pi Vanlalawmpuii Chawngthu chuan, a bial chhungah Helicopter Service a awm ve dawn ta chu lawmawm a tih thu sawiin, Helicopter hi mipuiten hmang chur chur kher lo mah ila, damloh nikhua te, Official thil pawimawhah te, rikrum thilah te a tangkai em em a ni. Tin, Helicopter hi mi hausate chauh ban phak angin mi thenkhatten sawi mah se, sawrkar in subsidy sang tak a pek avangin a to lova, chuan hi a harsa lem lova ni, a ti. Minister hian tunlai hmasawnna thang chho zelah lirthei chauh nilo, thlawhna hialin kan rama khaw hrang hrangte a tlawhpawh chho zel chu a ropuiin a hlu hle a ni, a ti a. E. Lungdar mipuite a lawmpui zia sawiin, E. Lungdar atanga damlo Helicopter a phurh thlak ngai awm apiang hun engemawchen chhung chu an chuan man a tum sak tur thu a puang nghal a ni. Tin,  vawiina  Helipad hawnna ah hian E. Lungdar MUP member pali leh khawtlang hruaitute, an vain mi 8 te chu E. Lungdar khaw chungah thlawh kualpui an ni nghe nghe.

A hawnna inkhawm neih dawnah hian Mizoram-a Service mek Pawan hans  Helicopter hi rawn tumin hetah hian Civil Aviation enkawltute Pu Saidenga, Dy. Controller leh Pi Lalrinfeli, LDC te, Pu C. Lallunghnema, CE, PHED te leh Pi Vanlalawmpuii unaute an rawn chuang a, Helipad thar hi Pi Vanlalawmpuii Chawngthu hian hawngin Helicopter rawn tum hmasa ber hi a lo dawngsawng nghal a ni.

He hunah hian Pun Saidenga, Dy. Controller, Civil Aviation pawhin thusawiin E. Lungdar  khua chu a lawmpui thu leh vannei a tih thu a sawi a, E. Lungdar mipuiten ropui taka an lo hmuak chu an lawm hle tih a sawi a ni. Hapta tin thawhtanni (Monday) apianga E. Lungdara  Service tura ruahmanna siam a nih thu leh Ticket hi BDO Office atanga lak tur a nih thu sawiin, a chuan man hi Rs. 2,500 a nih thu a sawi a ni.

Pu. C Lallunghnema, CE, PHED, E. Lungdar khawchhuak, pawhin thusawina hun a hmang bawk a ni.

Inkhawm hi Pu H. Laltana, VCP in a kaihruaia, E. Lungdar mipui leh sawrkar hnathawk , zirlai naupangten Helipad hawnna hi an telpui a ni.

MZP BUATSAIHIN E. LUNGDARAH REMNA NI HMANG

tleirawl.in | 30 June 2018 : Vawiin 30 June 2018 hi mizote leh India Sawrkar-te inremna ni champha a nih angin E.Lungdar bazar kawnah, khaw chhunga NGO hrang hrang, Political party, kohhran hrang hrang te leh zirlai naupang te nen zing dar 6:30 ah Remna ni champha lawmna leh hriatrengna hun Mizo Zirlai Pawl Sub- Hqrs E. Lungdar buatsaihin hman a ni.
He hun hi Pu B.Zonunthara President MZP Sub-Headquarters E.Lungdar chuan kaihruaiin, Pi Zonunthari President MHIP E.Lungdar Branch chuan  hunserh a hmang a. Mimi Remruatsangi (Tuichangral Idol hmasa ber) chuan kal khawm te Pu Rokunga hla 'Ro min rel sak ang che' leh MZP tena kan hla pui, 'Insuihkhawm leh zai i rel ang u' te  sa in a awi.
E.Lungdar Presbyterian kohhran Bialtu pastor Rev RT Lianthanga'n remna thuchah  sawiin, rambuaiin mizo mipui te tawrhna a thlen dan leh remna leh muanna hlut zia thiam takin a sawi bawk.
Vice  President Tv Joseph Zoremmawia'n lawmthu sawiin,  E.Lungdar VCP  Pu H.Laltana'n remna ni pawimawh zia te a sawi a, a sawi zawh hian Pathian hnena tawngtaiin hun a khar.

  MZP Sub-Headquarters E.Lungdar Vice President, Joseph Zoremmawia Chhangte hnen aṭanga thu kan dawn dan chuan, "Remna ni khawtlangin inlungrual taka kan hmang thei hi kan lawm a, hlawk thlak kan tiin, hei aia changtlung zawk a hman chhoh zel kan chak hle a ni." a ti.