SUPPORT CHUAUNGO

SUPPORT CHUAUNGO

 (Lawrence S. Khawzawl, 5th Nov.18, Serampore College)

Dikna ziahfung vuana,

Ram leh hnam tana thawka,

Hnaa rinawm țhin kha;

Dorâl hrângin chhem thla.

Zoram khawvêl dêngchhuak e,

U leh nâute țangrualin,

Au chhuah zâi an rêl e;

Ram leh hnam humhalh tûrin.

Mitin lairil a fana,

Mitin thinlai a naa,

Kan âu chhuak e;

Kan ding chhuak e.

Hruikhat vuan hun a ni,

Nghet takin kan vuan ang,

Suihlung rual hun a ni;

Kan țangrual tlat zêl ang.

Dikna'n ro a rêl anga,

Luipui angin a luang ang,

Kan ram a him anga;

Lalpa a thu ber tawh ang.

(#supportchuaungo #shashankout)

IN HUN HAI SUH U

  

 - Vanlalzawta 

September 20, 2018.

1. Mithiam ten kum mila an siam zirlai bu te,
Taima tak a zir ṭhin te tan chuan thiam theih a nih laiin;
Tute nge thiam lo ṭhin le?
Nu leh pa,zirtirtu te thu awihlo ṭhin te,
Zirlai aia thil dang buaipui tlat ṭhin te tan.
Thiam ngaihna a awm mawlh lo a ni.

2. Mi hlawhtling, kan tih ho te hi,
Puitling sa a piang an awm reng em?
E ! Awm lah lo ve a,
Zir bul ṭanna aṭanga nu leh pa,zirtirtute thu awih avanga;
Tun dinhmun thleng thei ta te an ni e.

3.Kawla ni chhuak chhiara zirna run bel,
Mahse thiam belh tumna tak tak nei si lo.
Hun hlutzia hrelo a nun hmang ten,
An nu leh pa,Zirtirtute bum emaw an inti;
Mahse,mahse maw, mahni inbum mai an ni si.
A pawi zia an hriat meuh chuan phengphehlepa khua a tlai zo tawh ang.

4.  Pathian thil siam ropui zia hi aw,
Lehkha thiam,infiam,zai,lirthei khalh;
Mistiri,lo neih,ran vulh,a tam mai.
A engngemaw berah hi chuan a bika siam i ni a sin,
Chuvangin, in ngainep suh la,zam hek suh.
Pathian i ṭih a,i nu leh pa i chawimawi phawt chuan,
Mite awh ruk,mi lungawi i lo ni ang.

5. Zirlai te u,in hun hai suh u,
In in thlamuanna ber in nu leh pa te kha,
An la tar ang,hna an thawk thei lo ang;
A hun lovah chatuan ram an pan thut thei,
Chawma enkawl ve thung chu,
In kovah a la innghat ang in tling zo dawn em le?

VÂNPUI A CHIM E!

Rev K.Lalnunsanga

(Dt 4.June, 2018 zâna Lunglawn leimin tuarte pualin)

Bân zai rêl lo ruahpui sûr e, hràng buan buanin,

Hâwktui lian e Lâwntlângpuiah.

A thliar si lo chhûngkim dâr ang lênlai. 

A hnâwl ta si zarâl iangin.

A ngui ruai e, kei ka vângkhua Lâwntlângpui, 

Vânpui lo chim ta si.

Pâr lai a chuai, hlim ni a tâwp.

Khua a thim, ruah a sûr,

Mangang au râwl a ring.

Ka dâwn ngam lo, hrailêng thlabâr au râwl.

A na êm! Zuapa tàn Chûn leh hrai then chu.

Hrilh a hai hrailêng tan,

Chûn tel lova laikhum zâl chu.

Ka dâwn kîr Bûng khaw pêr pui,

Kan zuang, kan lâm,

Kan fak, kan zai Lal fakin.

Mass pui kan chên Pu Lina rûnah,

Naupiang lâwmin.

A chang ta si hlimna rùn tahna rûnah.

An zalh e laichhuatah, ruang nga.

Rûn a ngui, chhâwntu awm lo thenrual,

An fam ta si rûnlum nuthai leh zuapa.

An  zalh e an tu leh fa, an sîrah.

A sûr nguai nguai dan rual lohvin Bûng khaw mittui.

Hlim hmêl awm lo,

Bûng zâr a tliak ta!

Ka dâwn lêt ka vângkhua, Lâwntlangpui rolungmual.

An zâl e ka chûn leh zua,

Vân pasalthate nên.

An fuan e tah chuan Leitlangpui lanu vâl rual,

Khuarêl vânpuichim hnan Pêka laichîn sûnin.

A chân ta si, a thai, a hrai, a zua.

A rûn nuam thawhrim rah remkhâwm nên.

Kîr zai rel hian ka ring lo Vânkhawpuia lâwi,

Hmangaih thên tak te.

Vânpui delh thei hringnun let tûrin. 

Ngui mahse an va mawi em! Leitlang lanu vâlrual.

An zo ze nunmawi

Tlâwmngaihna.

Ka ngen a che aw Lalpa,

Thlafam lusûnte hnem tûrin.

Muan zel rawh aw Lalpa,

Vânpuichim hnan lusûnte.

Thlir tîr ang che i siam thenlohna ram,

Lungngaih mittui kârah.

Hruaikhâwm rawh aw

I âng chhûngah,

Chatuan atân.

Rev. K. Lalnunsanga,

Pastor in Baptist Church Of Mizoram.

writer, www.tleirawl.in

---

TLEIRAWL

www.tleirawl.in
E-mail:  admin@tleirawl.in

---

MICHAEL ZONUNTLUANGA (Mai-a)

By Remmuana Chawngthu, Lunglei

*M*-im ang pianga hringnun duhawm ilo chenin,
*I*- mawi ngei, i nunzia, vullainite chu.
*Ch*-atuan ral theilo ang mai nise i hringnun hi,
*A*- mawi zual zel fo ang i nunmawi chu.
*E*-ngtin awm zel ang maw, hringnun piah ram chu?
*L*-ungduh duhlai ṭhen tâk, Mai-a kalna chu?

*Z0*-nun tivul tura hman hlel,
*N*-ung reng tura duhsam nun neia chu,
*U*-aiin a chuai ta si, a lei taksa duhawm,
*N*-ing lo ten an au a rualduhten.
*T*-hawhlehna ni-ropui nghakin,
*L*-ungmuangin a muhil ta, tunah chuan.
*U*-i chung zelin an au a hmangaihten,
*A* - ram leh hnam tana lunghlu ṭha-mi chu,
*Ng*-aih ala zual ang zirlai tana dingnghet thin-a chu,
*A*- kal ta, a liam ta, a chawl ta; Famkhaw rûn nuam-ah......

(MZP General Headquarters hruaitu hlui Micheal Zonuntluanga, chatuan ram min pansan ta pualin....)

MICHAEL ZONUNTLUANGA

Phuahtu : Samuel Vaiphei
          Veng Keltil

Pic Courtesy ; Ela

Mim ang lo piang,chun zua lawma'n,
Iang zo awm lo, leng zawng zingah.
Chun țang bel a, laitual  lengin,
Her li liai e,  Zawlkhaw mawii'n.

An run a mawi, lenlai a chen,
Engnge ni vei, fa tlum duat ber,
Lo sel suh u, kan duat asin.
Zoram nghahfak, kan bûng dawntuai,
O  i hming sawi,a nuam mang e.

Nuthai rem tir,kan duat bawihte,
Uai a chula'n, i pam lua e;
Ngui riai sakhmel, i thai riang chan,
Tlemte tal paw'n, i dawn lawm ni?


Luaithli an nul, chun leh zua te,
U leh nau leh, lenrual te pawh,
An la tiam lo, rihsang mual liam.
Ngaiin an au, hring chang leh a'n,
A dai hlen ta, a kir tawh law'ng.

(Acrostic verse form)

NU, DAM TAKIN

Lalngilneii tlau

Hun  rei tak  hnua tawng tur chein,
Beiseina nen  ka rawn  pan che a;
Mahse maw, nang tawn chhung a rei si lo.

Kir leh  tawhlo tura ka dawn che hian,
A rukte'n luaithli ka nul thin asin!
Ka thinlung chuan,"Nu, min kalsan tawh suh"
Mahse, duhaisam thamral mai maw lo ni?

Chun leh  zua kar lova hringnun chhiar tur hian,
Mim  ang piangin khuavel ka hmachhawn bik maw?
Aw, chun hmangaihna lem ang der mai Chang tur chuan ka phal lo;
Mahse , a hraileng kalsanin lengdang tang min beisan a,
Ka Nu , min liamsan mai hi rin  har  ka va ti  em!

Chun tel lova hringnun retheihzia ka chhiar thiamlo,
Ka hmangaihzia che hi ka ngaihtuah ngam lo;
Mahse, ka Nu, nang  chuan I rila rah ngei hi,
Sirah min lo hnawl ta mai si maw.

Hun leh ni kal zelah ka hmangaihna che a zual zel a;
Tawn loh chhung rei tak  karah hian,
Nang tawn leh hun  nghakin zanmu ka chhing  thei thin lo.

Ka nu, nang nen  kan intawn leh hun tur hi
Engtika'n her chhuak leh thei  ang maw?
Hlim takin  hringnun hmang la,
Duhsakna sang ber  nen  "Nu, dam takin  aw"

KA LA RING THEI CHUANG LO

By - FIJIKO

Hriatthiam har hringnun hi hriatthiam tumin ka theihtawp ka chhuah ve thin a, mahse, ka hriatthiam lohna bawkin min hneh leh thin si a.

Bawihte.. Nang nen kan in tawn tirh te kha i la hre ve rengin ka ring thin a sin, kan hlim dun ve thin a ni lawm ni.. Mahs, ti nge reilo chungin hlimna chu ka tahna tura i thlakthleng tak mai le.. Ka nuna ka seng luh ni atang che khan maw, kumkhua a ka kianga awm reng tur atan i thatna leh that lohna lai zawng zawng nen kal bo leh tawhlo turin a sin ka seng luh che ni..

Mahse,

*Nang chuan ka hmangaihna che chu i ringhlel nge, ka duh reng vang ni lova ka hringnun hmachhawn avang in min kalsan i duh tak mai ni.. Tunah chuan i kal tawh ti raw,, mahse, ka la ring thei chuang lo a sin, min kalsan duhna thinlung i put chhan hi a dik tak hria ni ila chuan ka tawrh dan pawh a ziaawm ve duh tur a nia, mahse, ka zawhna che chu ngaihdam dilna chauhin min chhang let si a, i lakah tihsual enge ka neih tiin keimah hi ka in zawt nawn leh thin a, chhanna ngai bak ka in pe thei silo, chu chhanna chu KA HMANGAIH EM CHE VANGIN, HMANGAIH DAN TAWK CHE KA LO THIAMLO A NI E.Tih bak chhan na ka hmu si lo..*

*Tunah chuan ka auh phakah i awm ta si lova, i aw rawl hre turin ka beng te chu an ngawng zo ta em ni. Ka thinlung hian hlat tur che in thutlukna a siam thei lova, ka ngaihtuahna te chuan nangmah hlir an la suangtuah che a, ka beiseina te chu nangmah ah bawk an tawp leh si a,*

*I tel lova hringnun khawvel thar hmachhawn chu ka van hreh tak em, nang nena kan lo zawh dun tawh hmangaihna kawng midang zawh pui tur chuan ka chakna pawh hian a tlin dawn em ni.. Tinge, enge a chhan min kalsan tur hian i thinlung kha kuai her tu dang a awm a ni zawk lo maw. Tha taka min hrilh turin ka hrilh thin che kha.*

*Ka khawvel chu lak bo a ni tawh a, chu khawvel chu ka la thlakhlelh ber erawh a ni si a, a kalbo hi ka la ring thei lo a sin..*

*Tap turin ka mittui te chu an kang zo ta, awrawl chhuah turin ka aw te chu an chhang zo ta si a..*

*Min kalsan tawh tih hrereng chung hian, min KAL SAN HI KA LA RING THEI SILO..*