MZP-IN REMNA NI HMAN DAN TUR LEH SAWRKAR HNATHAWK PENSION RAWIH NAWN CHUNGCHANG NGAIHTUAH

tleirawl.in | 11 June 2018: Vawiin 11 June 2018 chhun dar 12:00 khan MZP  Conference Hall, Aizawlah MZP General Hearquarters Executive Meeting an nei a, Meeting hi President Tv. L. Ramdinliana Renthlei chuan kaihruaiin,
Meeting-ah hian June Ni 30 Remna Ni hman dan tur leh tunhnaia Mizoram Sorkar Department hrang hrangah Pension rawih nawn chungchangte an rel.

Meeting chuan, MZP rorelna sang Federal Council Sitting-in a lo rel tawh angin, Ni 30 (Remna Ni) June, 2018 hi Zofate tan chuan ni chhinchhiahtlak  leh hlu tak a nih avangin Mizoram hmun hrang hranga awm Zofa ten he ni hi kan hlut deuh deuh theih nan rualkhai tak leh inlungrual taka kan hman zel theih nan MZP huaihawta Mizoram hmun hrang hranga hman nise tiin a rel a. Hemi Ni hian Aizawlah pawh hman tum a ni. Remna Ni hi Mizorama Political Party hrang hrang te leh NGO hrang hrang te nen a huhoa lungrual taka hman tura ruahman a ni. Remna Ni hi Mizoram hmun hrang hrangah pawh MZP hruaitute ruahmannaa hman tura buatsaih a ni a, he hun hmang tur hian MZP General Headquarters chuan Mizo mipui zawng zawng a sawm nghal a.

"MZP chuan Mizoram Sawrkar hnuaia hna thawk reng reng pension hun tawh service pawhsei sak leh rawih nawn hi țha a ti lova, a duh ngai lo a ni. Mizoram Sorkar hnuaia hna thawk reng reng rawih nawn leh an nih chuan țhangthar lehkha thiamte hmakhua ngaiin MZP chuan a dodal tlat zel dawn a ni. MZP chuan ram leh hnam tana țha ber tur ngaihtuah chunga Mizoram Sorkar hnuaia hnathawk reng reng pension tawh te chu ruai nawn tawh lo turin Sorkar thuneitute a ngen tak meuh meuh a ni. Sorkar hnathawk rawih nawn an awm a nih chuan MZP chuan țhangthar te leh zirlaite hmakhua ngaiin a dodal tlat zel dawn a ni." tiin an thuchhuah chuan a tarlang.