tleirawl.in | 12 June 2018: Vawiin, Dt.12.6.2018 Thawhlehni dar 11:30 am khan MZP Sub Headquarters Kawnpui chuan, Awithangpa Hall Kawnpuiah Zirlai Tițha Chawimawina hun an hmang a, he hunah hian zirlai 44 chawimawi an ni.
Zirlai tițha chawimawina hi Pu Lungtilenga Varte President, MZP Sub Headquarters Kawnpui chuan a kaihruai a. Nl J. Lalnunpari ECM, Sub Headquarters Kawnpui chu Master of Ceremony niin, Pu Hmingdailova Khiangte MLA, Tuirial Constituency chu khuallian a ni bawk.
Kawnpui MZP te hian HSLC leh HSSLC 1st Division chin chunglam bâkah, Bachelor & Master Degree 2nd Division chin chunglam te hnenah chawimawina hi an hlan a. Distinction te hi Citation leh Thangchhuah Diar bâkah Tangkafai Rs.1000/- țheuh hlan an ni a. A dang zawng hi Citation leh Thangchhuah Diar bâkah Tangkafai Rs.500/- țheuh hlan an ni bawk. HSLC-ah hian mi 18 chawimawi an ni a, HSSLC-ah mi 17 leh Bachelor & Master Degree-ah mi 9 chawimawi an ni bawk.
Zirlai tițhate bâkah hian School/Union panga (5) hnenah Special Award hlan a ni bawk a. Special Award hian Citation (Rs.600/- man hu) leh tangkafai Rs.1000/- a keng tel bawk a ni.
Special Award hlante chu :
1) Pum Award (Kawnpui Teachers Union)
2) Fungki Award (Kawnpui Higher Secondary School)
3) Zawlbuk Award (Govt. High School, Kawnpui)
4) Sahlam Award (Green Hills High School, Kawnpui)
5) Tawlhloh Award (New High School, Kawnpui)
Zirlai tițha chawimawinaah hian Zotlang Cultural Club, Kawnpui te chuan Mizo Hnam Lam hmuhnawm tak tak an entir a, a bîk takin Lalthangkeuva Zaia Cultural Club Naupangte Chheihlam chuan mipui lawm a hlawh fâl hle.
Sub Headquarters MZP Finance Secretary, Nl Zaihruaitluangi bâkah Mizo top singer zinga mi DJ. Lalvenhimi ten zaiin mipui an awi a. Khuallian bâkah Pu B. Vanlaltâna Vice President, MZP General Headquarters hnen ațang ten thu țha tak tak ngaihthlâk a ni bawk.
MZP Sub Headquarters Kawnpui ten Mizo Zirlai Tițha Chawimawina hun an hman hi, MZP General Headquarters, Aizawl leh Kolasib Headquarters hruaitu ten an hmanpui a. Khawtlang hruaitu, VC leh NGO hrang hrang hruaitute bâkah, Sorkar Officer te, Zirtirtu leh Zirlaite bâkah Zirlai nu leh pa ten he hun hi an hmanpui bawk.
No comments:
Thanks for your comment.