ZU ZUAR FANU 3

CHAPTER--3

Ziaktu: R'z Thangluah

www.tleirawl.in

Sangtea chu zan dar 10.00pm velah rui tawkin a rawn haw a. A pa chuan a lo melh rum kher mai,"Ka fapa chu i ni ve sia aw,i nu nen i bungrua kan pack fel vek tawh a. Naktuk zing dar 6 ah i pi te khaw lama awm turin i nu nen in chhuak ang,"a lo ti nghal mawlh mawlh a. Sangtea chuan,"Nia i fapa chu ka nih ve hi,"a ti duh chauh a. Pu Thanga chuan,"Han in ti fai la mu nghal ang che,"a ti leh a. Sangtea pawh chuan pai ṭuang ṭuang chungin a room lam chu a pan chho a.

Pi Zuali chuan phone khawih mawlh mawlh pahin,"I fapa ania,control pawh i control theilo a nia. Kum 24 na a hmang ve ṭan dawn chauh a,zu ngawl a vei nghal a nia a zahthlak khawp mai,"a lo ti pang pang a. Pu Thanga chuan,"Khatin ti hlek suh aw,kan 2 a kan ṭanrual a ngai nih hi. Nu ber i ni a,in chhung enkawl leh fa te kilkawi chu i hna a lawm. Mahse,nu tih tur hi i ti bik hleinem tiraw? Zan rei tak tak thlengin phone bih in i meng a. Fa te tan erawh meng leh peih mang silo,"a lo ti ve khauh mai a. Pi Zuali lah tlawm duh ṭhak silo,"Nangpawh engnge i nih bik,a hmingin kohhran Upa i ni ve a. Kohhran i nihna chhan te hi keimah vang vek a ni tih hi i hrelo mi a? Ka ṭhiante bulah ka campaign nasat zia kha,i theihnghilh ta a mi?,"a lo ti let nghal tun tun a. Pu Thanga chuan zawi supin,"A tawk e a tawk e,"tih pahin a phone chu a hmet ve leh mual mual a. Pi Zuali chuan,"A chhe ber ber hi min puh a,ka lungawi lo reng reng naktukah pawh Sangtea chu ka kal pui lovang. I duh leh nangman i kal pui dawn nia ka ning,"tih tauh bung bung pahin fridge chu a hawng a,"Khawnge ka thei tui dah kha a awm leh tak a? Tunge lo in zo leh hman tawh? Siam ve peih silo in chiah hi in peih a,"tih pah chuan thinrim zet hian fridge kawngkhar chu a khar chawrh a. Room lamah a lut tau nghawng nghawng a. Pu Thanga chuan a nupui en zui vung vung pah chuan,"Huiham khua hi a va han var lo ṭhin tak em,"tih sup pahin,a phone bawk chu a bih leh ngur ngur a.

Sangtea pawh chu inbual lem lo chuan a khumah chuan a mu tlang nghal a. A harh leh meuh chuan zing dar 9.00am a lo ni der tawh,a hawi kual a a room ah a la awm si. "Nizan khan ka pa khan zing dar 6.00am a chhuak tur angin min hrilh sia. Mahse,hei tunah dar 9 ni tawh si tinge le?,"tih pahin a tho a. Inbual turin bathroom lamah a lut nghal a,a inbual zawh chuan inhnuai lamah chaw ei turin a chhuk thla nghal a.

Sitting room ah chuan hmeichhe tleirawl la naupang tak hian chhuat a lo nawt a. Sangtea chuan,"Tunge i nih a?,"a ti hâ mai a. Chu nu chuan in thla hrun hmel takin,"In hnathawk tu tur,"a lo ti zawi sap a. Sangtea chuan,"A awmzia chu englo...kan awnpui tur tihna,"tih pah chuan a nui suk a. Chu nu chuan,"Aw ni e,chaw ei ka siam sak ang che aw,"a lo ti vat a. Sangtea chuan,"Aih a ngai love,keimahin ka in siam ve mai ang,"tih pahin choka lamah chuan a phei nghal a.

Sangtea bawk chuan choka ṭang chuan,"Khawnge midang ho hi?,"a rawn ti lang lang a. Awmpui nula chuan,"Ka pi chu dawrah a kal tawh a,ka pu pawh office a kal tawh bawk a. Ka u te pawh class an kal tawh,"a lo ti nghal vat a. Sangtea chuan,"Eee i hming min la hrilh lo,keichu Sangtea ka nia,"chaw hmuam ṭun chung chuan a chaw thleng nen chuan a lo phei a. Awmpui nula chuan,"Ka hming chu Mawii nia,"a lo ti leh sap a. Sangtea chuan chaw ei mawlh mawlh chung chuan,"Awle i fel e,vawiin ṭangin mi i rawn awm dawn?,"a ti leh a. Mawii chuan,"Aw ni e,"a lo ti leh vat a. Sangtea chuan,"Nihchuan vawiin chu kan 2 in kan inkawm nileng mai dawn nia aw,"tih pah chuan a nui hak hak a. Mawii chuan zawi supin,"Awle,"a lo ti ringawt a.

Sangtea chuan a chaw ei na thleng chu a sil vek a. Mawii chuan Sangtea chu mak tih hmel tak hian a en hau mai a. Sangtea chuan,"Tinge tiang khan min en a?,"a lo ti vat a. Mawii chuan,"Engmah nilo e,"tih pahin a thil tih lai chu a chhunzawm leh a. Sangtea chuan nui chungin,"Kum engzatnge i nih a?,"a ti leh a. Mawii chuan,"Kum 18,"a lo ti vat a. Sangtea chuan,"Ekhai i la naupang hle mai a,i fel bawk sia,"a rawn ti deuh hluai a. Mawii chuan,"Fel a mawn le?,"a lo ti ve mai a. Sangtea chuan,"Umm fel tak i ni,"a lo ti ve leh vat a.


Pi Ruati zu zawrh thu chu tu vak mahin an la hre lova. A chhan pawh an in a zu in tura kal ṭhin ho chu,Sangtea te ṭhian ho chu an ni mai a. An ni lah chuan miin an hria ang tih hlau tak chungin an inah chuan zu in tur in an kal ṭhin ve tho bawk si.

Sangtea te chhungkua chuan zan riah an kil ṭhap mai a. Ely chuan,"Msi te khuan zu an zuar a ni maw?,"a rawn ti chhuak hlawl mai a. Pi Zuali chuan,"Tu te maw?,"a rawn ti hâ mai a. Ely chuan,"Aww Pi Ruati te,"a rawn ti leh a. Pi Zuali chuan,"I hresual ani lo maw?,"a lo ti vat a. Ely chuan,"Vawiinah an sawi a,"a lo ti leh a. Sangtea chuan,"Tu in maw sawi a?,"a lo ti vat a. Ely chuan,"Zomuana'n a sawi lawm vawiin kan hnatlan naah,"a lo ti leh a. Sangtea chuan engmah a sawi tawh lo,chaw chu a ei mawlh mawlh mai a. Pu Thanga chuan,"Pi Ruati chu kum liam taa,a pasalin a boral san tak kha ni lawm ni?,"a lo ti ve vat a. Pi Zuali chuan,"Ni e a pasal kha a hausak teh reng nen. Kha a pasalin a boral san aṭang a thla reilo te ah a fanu nen an chhuak a ni lawm ni? Chu pawh a pasal chhungte a mil thlawt lo a ni awm e,"a rawn ti nghal zuah zuah a. Sangtea chuan,"Ka nu thudik i hriat loh chuan sawi ve vak vak zel suh,"a lo ti deuh hmak a. Ely chuan,"Zu zawrh chu hmeithai ho tih tur a lawm,"a ti hmiah mai bawk si. Sangtea chuan a farnu ṭawngkam chu a duhlo kher mai,"Ka u,nangpawh kha hmeichhia i ni a. Pasal la nei mai tur i nihkha,tuman hma hun kan hre lo i ṭawngkam kha fimkhur rawh,"a lo ti leh a. Partei chuan,"In va han ninawm hlawm e aw,a duh chuan zu chu zuar se,duh lovin zuar lo se kan tan engmah a pawina a awm lo,"a lo ti ve hlak hlak bawk a. Sangtea chu a tho a,a in ti fai sawk sawka a helmet leh a bike chabi a la a,leng turin a chhuak nghal a. A chhungten a kalna tur an zawh pawh chu a chhang lem lo.

Sangtea chuan hmanhmawh takin Msi te in lam chu a pan nghal a. Msi te in a thlen chuan a lo reh ṭhap mai a,an kawngkhar chu tala hlui tawh lam lian vak lo hian a lo in kalh a. Sangtea chuan tih ngaihna vak a hrelo hle mai a,Msi te kawngkhar bulah chuan a tei rak rak mai a. Rei fe a nghah hnuah pawh tumah an lo lang thei silo,a beidawng chuan an in luahna nei tu te awmna lamah chuan a chho ta ringawt a. Mahse,an ni pawh chu an lo inkalh ṭhap mai a,"Ngatinge mawn le?,"a ti zawi sup a. Rei fe a din vang vang hnu chuan,"Ehee Zomuanpuia khaa,"tih pahin a phone chu a phawrh a, Zomuanpuia number chu a hmet chhuak nghal a;

"Inah i awm em?,"

"Awmlo engnge?,"

"Khawnge i awm?,"

"Thlanmualah zu kan in,i duh ve mi?,"

"Ka rawn kal ang,"

Sangtea chu thlanmual lam pan chuan a lim thla puat puat mai a. Zomuanpuia chu a ṭhianpa pawh ni se,dim a tum lo a ni. A chhanchu a hre chiang khawp mai,thlanmual a thlen chuan stepah chuan Zomuanpuia leh Lawma leh Zira chuan zu an lo in khawm laih laih a.

Sangtea chuan a bike chu an hung rem te te a,ngawi rengin Zomuanpuia zu in lai chu a rawn hnek thal ṭhuai mai a. Lawma chuan,"Engnge thil awmzia Bawiha?,"tih pahin Sangtea chu a lo man bet nghal vat a. Zomuanpuia chuan,"Engnge a? Engtinnge ka tih che a? Tinge min rawn hnek ngawt a?,"a lo ti nghal vat bawk a. Zira chuan,"Ni e engnge thil awmzia sawi teh,"a lo ve bawk a. Sangtea chuan,"Mipa nge i nih tuai? I lo ṭawngthei zeh zuah khawp mai,i zu in thu hi tu bulah mah kan sawi ngailo a sin. Mahse,nangchuan Msi nu in zu a zawrh thu chu vawiin KṬP hnatlan naah i lo tlangau pui vel a. Hmela,i chaklo ang maw le,"tih pahin Zomuanpuia chu hnek tumin a vai fua mai a. Mahse,Lawma chuan a lo kuah bet hman a,"Bawiha,insum teh insum teh,"a lo ti mawlh mawlh a. Sangtea chuan,"Ka insum lovang,he mihring hi mipa nilovin tuai anih hi,"a ti leh piap piap mai a. Zomuanpuia chuan,"Khanglanga che tuai ka nih leh nih loh chu fiah ila,ṭawngka nilovin kut tum ngei in fiah ila,"a lo ti ve pang pang a. Pum ruaah chuan Zomuanpuia chu upa zawk anihna angin Sangtea aichuan a lian deuh zawk a. Mahse,Sangtea pawh hi a rualpui dangte ngaihtuah chuan lian ve tak chu a ni,"I ngam phawt chuan ka ngam a lawm,a fair in ti ila,"a lo ti let ve hmak hmak mai a. Lawma chuan,"Zomuanpuia pawh i dik bik lo anihchu,tuman sawi chhuah loh tur kan ti vek a. Mahse,in la fel deuhin i lo sawi vel a tunah chuan i lamah ka ṭang lo a nia,"a lo ti ve mauh mai a. Zira erawh chuan,"Keichuan a pawina ka hre lo,khawtlang duhloh thil a nia,"a lo ti ve thung a. Sangtea chuan,"Khawtlang duhloh thil a? Zu in tura an ina kal ṭhin chu keini ṭhian chauh hi kan ni. I thusawi vang khan zak hle rawh,"a lo ti zek a. Zomuanpuia lah chuan,"Tunah chuan YMA leh Local council hovin thu an zawt fiah tawh ngei ang le,"tih pah chuan ngeiawm zet hian a nui a.

Sangtea leh Zomuanpuia chu a fair in an in cho bawk a,a fair in an in sual ta a. Sangtea chuan a hneh mah mah a ni,"Hmela,hre reng rawh i ngam chuan Msi te nufa chungchang hi lo sawi leh rawh. Tun aia na hian ka khawih tawh ang che,"tih pahin Zomuanpuia chu a kalsan a,a thuamhnaw a hnahthel kai vel chu a beng fai thuak thuak a. Zira chuan Zomuanpuia chu a lo bawihsawm nghal vat a,"Tikhan hmelma kan ni tawh tih hria ang che u,"a lo ti zauh a. Lawma chuan a meizial ṭan pah chuan,"A ṭha lawm tuai ṭhian kan duh lo,"a lo ti nghal vat a. Zomuanpuia chuan,"Zothansang,ka ruih loh hunah kan in fight ṭha leh dawn nia aw,"a la rawn ti ham ham a. Sangtea chuan,"Kan insual leh chuan i rai palh ang,"a ti duh chauh mai si. Lawma lah chu a lo nui huah huah a,an 2 chuan bike chu an ti nung a Zira leh Zomuanpuia chu an tlansan ta a.

Sangtea leh Lawma chu Msi te inah bawk chuan an lut leh a. Mahse,nidanga an boruak nen chuan a inang thei tawh lo. Sitting room ah chuan Msi leh a nu chu an lo ṭhu ngui nghiai mai a. Sangtea te ṭhian dun rawn leng pawh chu tumah mah chuan an lo be lova,Lawma zawk chuan a âw a han thian kharh kharh a,"Nu Ruat,pawi kan ti takzet a ni. Min ngaidam mawlh mawlh dawn nia aw,"a ti nghal mawlh mawlh a. Pi Ruati chuan,"In thiam loh a ni hleinem,keima thiam loh a lawm,"a lo ti zawi zap a. Lawma chuan,"Nilove keimahni lawm,"a lo ti leh a. Msi lah chu a nu nghengin a awm a,a ṭap nasa a ni tih hriat takin a mit chu a sen rum mai a. Sangtea chuan,"Eng thil nge thleng chiah a? Kan Zomuana chuan eng thil nge a lo tih a?,"a ti nghal mawlh mawlh a. Pi Ruati chuan,"Ka fanu chungchangah hi chuan thudik hi ka zel lovang. Ni e,in ṭhianpa khan nimin tlaiah a zu ruiin ka fanu hi lo khuaikhem a tum a. Ka lo hmu hman sia,ka zilh a ka zilhna kha a hua a ni ngei ang. A chhuah pahin'In la hre khawp ang'a ti a,hei a thil tih chu kan tuar ta a nih hi,"tih pahin a fanu chu a kuah a. Sangtea chu a sa phat mai,"Hmela chu(h)nichin khan ka khawih na lo mah mah a ni,"a ti zui mawlh mawlh a. Pi Ruati chuan,"Engtinnge kan chungchang hi in hriat reng reng a?,"a lo ti vat a.  Sangtea chuan,"Kan chaw ei laiin ka u in a rawn sawi a,"a lo ti vat a. Lawma chuan,"A zia lo khawp mai,pawi kan ti lutuk. YMA ho chuan engtinnge an tih chu a?,"in thlahrung tih hriat tak hian a lo ti a. Pi Ruati chuan,"Tun thla chhungin in luah tur dang zawng turin min ti a,"a ti leh a. Sangtea chuan,"Kan veng aṭangin chhuak turin an ti che u tihna nimaw? Hmel ho chu(h),kan veng aṭang hian in chhuak hauhlo ang,"a ti nghal bawrh bawrh a. Pi Ruati chuan,"In bengdai hram hram rih teh khawngaihin,kan in luahna neitu pawh kan lamah aṭang char char a. Nangni 2 kan lamah in ṭang bawk a,engmah hlauh kan nei bik hleinem. Mahse,tunkar chho chu zu hi ka khawih tawh dawn lova,eizawnna dang dap dan ka ngaihtuah ve tawh dawn a. Ka thil tih a dik lo tih ka hre reng a;mahse,eizawnna dang dap ngaihna ka hriat thlawt loh avangin he thil hi ka ti ve ta a ni a. Mahse,tun aṭang chuan harsa deuh pawh nise eizawnna dang chu ka dap ve thei mai ang. Eizawnna dang ka dap anihchuan YMA ho pawn veng chhungah awm min phalsak dawn a,"tiin a thil tih tum chu a sawi siam siam a. Msi erawh chu a nu bulah chuan ngawi rengin a lo ṭhu a.

Lawma chuan,"Ni e Nu Ruat,keini chuan eng thil pawh ti la kan hrethiam lutuk che a nia aw. Mahse,khawiahnge zu kan in tak ang?,"tih pah chuan a nui hak hak a. Pi Ruati chuan,"In nghei mai a ngai dawn nihkha,"tih pah chuan a lo nui ve vur vur a. Sangtea pawh chuan,"Ni e nghei hi a ṭha mai. Keipawh nghei ka duh tawh,"a lo ti ve bawk a. Pi Ruati chuan,"Taka,Sangtea chu  Sunday khan ka pa in min thawnbo dawn kha i ti sia. Hei i rawn lang leh lawi bawk sia,"a lo ti a. Sangtea chuan,"Ka chhungte khian ka ṭhatna turin engmah an ti peih tak tak lo. Tihian,mahni tal tal in kan tal a,pawisa kan mamawh hunah kan dil leh tawp a ni mai,"a lo ti nghal vat a. Pi Ruati chuan,"Khaih kha tin an ti ngailo. Puitling i ni tawh a,chhia leh ṭha hre rual chu i ni ve tawh lawm. Zu nghei pawh chu a ṭha lutuk lawm,in la naupang si nghei hmak thei ula chuan duhthusam a ni,"a lo ti ve bawk a.

Pi Ruati chuan zu zawrh chu bansanin eichawp dawr a siam ve ta a. Ṭhenawmah dawr dang a awm lo bawk a,rin aiin an lûn ve phian a. Mi tam tak chuan,"A hma khan zu zuar lovin,dawr te hi lo siam daih tawh se ṭha tur ania,"tiin an sawi a,ni e mi tam tak ngaihdan chu a dikna chen pawh a awm a. Mahse,khatih hun lai khan bul ṭanna turin sum engmah a neilo a nihkha. Chhungte belh tur lah a nei silo,a neihchhun chu a fanu a ni mai si. A pasal chhungte lah chuan a chhe thei ang berin an chhuaha,rilru hah taka a awm laiin a ṭhiannu hmeithai zu zuar ve tho in a rawn angin zu a zuar ve ringawt kha a ni a. Tunah erawh chuan a zu zawrhnaah a sum hmuh te hmangin eizawnna dang a dap ve thei ta. Mahse,a thil lo tih tawh chuan a fanu tan mualphona nasa tak a thlen ṭan dawn chauh tih erawh a hrelo a ni.

Pi Ruati chuan zu chu zuar tawh lo mah se,mi ṭhenkhat sual ve hrim hrim hi an lo awm ve zel a. Msi chu ZU ZUAR FANU tiin an lo âu nawmnah ṭhin;Mahse,chung zawng zawng chu Msi chuan a nu hnenah sawiin a vupui ngai lo a ni.

Sangtea pawn zu chu nghei a tum ve khawp mai. Inah pawh a tawm tam bawk a;mahse,inkhawm lam erawh a ngaihsak lem lo a ni.

Pathianni zan a ni a,Sangtea te chhungkua amah tih loh chu an awmpui nula thlengin inkhawm turin an insiam sua sua mai a. Sangtea erawh chu sitting roomah Tv en in a ṭhu thluang duai mai a. Mawii inkhawm tur chuan,"USangte,i inkhawm ve dawn lo mi?,"a lo ti a. Sangtea chuan nui hak hak chungin,"Zanin chu kan tlar kan chawl a,"a lo ti mai a. Mawii chuan,"I ho e a ka kal nia aw,"tih pah chuan a chhuak zui nghal a. Sangtea pawh chu nui vur vur chungin ṭhutthleng seiah chuan a mu nghal a.

Msi leh Rki chuan Mawii chu an in thlang footpath ah chuan an lo nghak a. Mawii chuan,"Awii min lo nghak rei tawh em? Vawiin tlai chu chaw kan ei tlai lutuk a,"a lo ti nghal mawlh mawlh a. Msi chuan,"Nghak rei lo e,kha i va nalh ve a. Kawr thar i nei nimaw?,"a lo ti vat a. Mawii chuan,"Nia ka piin vawiinah min rawn lei ve a,"a lo ti vat a. Rki chuan,"Kal ila hei a tlai tawh si,"a lo ti ve thung a,an 3 chuan ti ti mawlh mawlh chungin Biak In lam chu an pan hnak hnak a.

Sangtea chuan zu chu thla 1 vel chu a in lo ve thei mai a. Mahse,hun a lo rei a,ṭhian ho chhuah khawm nikhuaah te in mai tur a lo awm leh ṭhin si. Lem khat lek tiin kar 1 vel chu lem 1 lek tiin a hmang ral leh ta. Kar tawpah chuan lem 1 lek ni tawh lovin a hmaa zu heh tak Sangtea tho kha a ni leh ta. Mahse,a ni zu in dan erawh hi chu amahin room ah a in kerh kerh a,a ruih hnuah a mu mai ṭhin a. Chutiang nilova,ṭhiante bula a in erawh chuan duh aiin a rui nawi ṭhin a ni.

Thawhehni zan a ni a,a ṭhianpa damlo kan tum in rui lo hai lovin a chhuak ve a. Mahse,a damlo kan tur ber a ṭhianpa lah chu nula rim in a lo chhuak daih thung a. Chutia a ṭhianpa ber a awm loh takah chuan tiin a lenna tur hrelo chuan Pi Ruati te in lam chu a pan thla leh ta ngawt a.

Pi Ruati te in a thlen chuan an dawr te ah khan Msi leh naupang 2 hi an lo awm a. Msi chuan a phone chuan a lo selfie pui nasa mai a. Naupang ho lah chuan nuam an lo ti nasa mai si,"Kuhva in nei em?,"tih pahin Sangtea chuan naupang 1 lu ah chuan a tuai zauh a. Msi chuan,"Aw nei e,kha i duh ber kha lo thlang rawh,"tiin kuhva awmna chu a kawhhmuh a. Sangtea chuan kuhva pack 1 lak pah chuan,"I nu a inkhawm mi a?,"a ti nghal zat a. Msi chuan,"Aw inkhawm e,an bang ṭep ang lo ṭhu la,"a lo ti a. Sangtea chuan ₹20 zawr zet chu a wallet aṭang chuan a rawn phawrh a,Msi chuan,"Awii i van nei zawr em em,"tih pahin a lo vur vur a. Sangtea chuan,"Nia tunlai chu putar ang mai ka ni. Ka nei zawr thei lutuk,"a lo ti pek a. Msi chuan Sangtea pawisa pek lak pah chuan,"I van chhe reuh tak,"a ti a,a nui sen sen a. Sangtea lah chuan nui miahlovin,"I lo ngai kawi a ni maw?,"a lo ti leh zauh a. Msi zak lutuk chu a hmai a sen nghal awp awp mai,"Aaa...aa.aih a teuhlo mai a,"a lo ti bah niai mai a. Sangtea chuan nui hak hak chungin,"Ka ti mai mai nihkha,tak2in rawn len i phal em?,"a tih zawm zat a. Msi chuan nui chungin,"Anu i dil phawt dawn nia,"a lo ti vat a. Sangtea chuan,"I nu inkhawm a rawn ban hma chu pawnah hian ka lo awm rih ang aw,"tih pahin chhuah leh mai a tum a. Msi chuan,"Umm,"a lo ti ve mai a. Sangtea pawh chu dawr sir ṭhutna an siamah chuan meizial pak khuk talh talh pahin a ṭhu ngawi reng a. Msi zei lo lutuk leh a zak hmel te chu a mitthla vel a,amah chuan thim thamah chuan a nui vur vur mai a.