ZU ZUAR FANU 4

CHAPTER--4

*R'z Thangluah✍🏻*



Zan dar 8.00pm velah chuan Msi nu te inkhawm bang pawh chu an lo haw tawh a. Dawr sir thim tham zinga Sangtea ṭhu chu Pi Ruati chuan ruk ru emaw tiin hlauthawng takin inah a lut nghal sawk sawk a,"Bawihi,dawr sirah sawn thim zingah tu emaw a awm a nia. Ka hlau deuh reuh,"a ti nghal mawlh mawlh a. Msi chuan nui chungin,"Sangtea nihkha,"a lo ti vat a. Pi Ruati chuan mak tih hmel zet hian a fanu chu a en ho mai a,"Tinge tahsawn a awm a?,"a ti leh a. Msi chuan,"Rawn len a tum a,Anu dil rawh ka tia i inkhawm ban hun a lo nghak che nihkha,"tih pah chuan a nui vur vur a. Pi Ruati pawh chu a nui ve hawk hawk a,"Awiha a vawt si,ka va ko lut a nge,"tih pah chuan pawnah chuan a chhuak nghal a.

Sangtea chu a rawn nui lut tut tut a,"Zan dangah chuan ka rawn len dawnah i nu ka rawn dil hmasa phawt zel tawh ang aw. Anih loh chuan pawn khaw vawtah min ṭhut tir ziah dawn sia,"tih pahin Msi chu a melh zauhva. Msi lah chu zah vangin a hmai a sen leh awp awp tawh mai si,"Nia i dil zel dawn nia,"a lo ti ve mai a. Pi Ruati chuan,"Vawiinah heater lei ka tum tehreng nen,ka buai lutuk a ka chhuak hman leh silova. Naktukah chuan lei tawh a ngai a ni,kan in phei chu ni kan hmu rei lo thei si a vawt thei lutuk a,"tih pah chuan a shawl bah chuan a in tuam ṭha sawt sawt a. Sangtea chuan,"Nia in in hi chu a vawt ve khawp mai,"a lo ti ve leh vat a.

Dar 8.30pm velah chuan Pi Ruati chuan,"Awii naktuk thawh hma ka ngai tak e,Sangte tikhan la leng ve rawh aw ka mut san dawn che u,"tih pahin room lamah chuan a luh san daih a. Sangtea chuan,"Ee engtiknge in exam dawn?,"a rawn ti ve nghal zat a. Msi chuan,"March ni 15 ah kan ṭan ang,"a lo ti vat a. Sangtea chuan,"Eng line ah nge kal i tum ber? Ka sawi awnzia chu eng subject nge i lak a?,"a ti leh a. Msi chuan nui var var chungin,"Amak ka hrilh tawh reng che sia, Science ka la,"a lo ti a. Sangtea chuan,"Ee ni dawn tak e,ka tar tawh a ka hriat rengna hi a ṭha vak tawh lova,"tih pah chuan a nui zui hak hak a. Msi chuan,"Hmmm kum 30 pawh i la tlin loh kha,"tih pah chuan a hmui a rawn ti pawrh a. Sangtea chuan,"Nia ka kum chu naupang a,ka thluak hi a tar tawh niang,"a ti leh hram a. Msi chuan,"Nia ni mai rawh se,thingpui kan lum nge aw,"tih pahin a tho nghal vut a. Sangtea chuan,"Nia pawi hleinem,"a lo ti ve nghal vat a.

Sangtea chuan thingpui khu vut vut chu a chhem heuh heuh a,"Eee kan nula nen khian in inkawm ṭhin mi a?,"a ti leh a. Msi chuan,"Umm inkawm ve ṭhin e,tinge a?,"a lo ti vat a. Sangtea chuan,"Aaa englo ania,ka chanchin i bulah a sawi ṭhin em?,"a ti ringawt a. Msi chuan nui var var chungin,"A sawi i ring em?,"a lo ti vat a. Sangtea chuan,"Hrelo le 50/50 ni ma,"tih pah chuan a thingpui chu a  dawt ri hlup a. Msi chuan,"Hmanni chu thil nuihzatthlak deuh a sawi a,"a lo ti zauh a. Sangtea chuan,"Engnge a sawi a?,"a lo ti vat a. Msi chuan,"I thawh ât thu maw le,"a lo ti vat a,a nui zui hawk hawk a. Sangtea chuan,"Nhaaa van ho tak e aw,"a ti nuah nuah a. Msi chuan,"Mahse,hau kher suh aw nuamlo a ti palh ang,"a lo ti vat a. Sangtea chuan,"Chuti em em in ka sual lo,"a lo ti deuh hluk a. Msi chuan ama hriat tawk lekin,"Hmm deuh hmuk chuan a,"a ti zawi sap a. Sangtea chuan,"Engmaw i sawi a?,"a lo ti vat a. Msi chuan,"5 hmun ka sawi a,"tih pah chuan a lo nui vur vur a. Chu veleh Sangtea chuan a thingpui hmuam lai chu lem hman lovin a phuh ṭhawt mai,"Oooh tihpalh lutuk,"tih pahin nui insum tak hian a hmui chu a zum put put a. Msi chuan nui var var chungin,"Naupang chhia lutuk,"a lo ti leh sap a,tui dehna bula chhuat hrukna an khai chu a va la a. Chhuata Sangtea phuh huh nuai chu a hru hul nghal mawlh mawlh a.

Dar 10.00pm velah pawh Sangtea chu a la haw lova a la ti ti tui khawp mai. Msi lah muthlu thei reng dinhmunah a ding bawk si,a in leng pa chu a en leh vang vang ṭhin a haw a la tum loh hmel si. Han in hnar haw ngawt chu tih chi a ni bawk silo,khaw vawt nen che lova a awm reng chuan a muthlu thei tak ngial dawnin a hria a. A tawpah chuan zung turin bathroomah a lut a,a va in phih harh ta nge nge a.

Sangtea chuan sana a bih zauh a,"Ehe rin aiin a la hma ka ti,"a la rawn ti zui. Dar 10.30pm a ni tawh reng sia,engtinnge la hma a tih theih le? Msi chuan sawi tur pawh a hre tawh lo khawp mai,a khat tawkin a hâm leh bai bai ṭhin a. Zan dar 11.00pm vel ah chuan Sangtea pawh chuan,"Ka han haw chho ve tawh a nge aw,mut hma i duh ang ka ring,"tih pahin a tho ṭuih ṭuih a kawngka lam chu a pan nghal chhat chhat a. Msi pawh chuan engmah sawi lovin kawngka bul thleng chuan a va thlah ve mai a,Sangtea haw tur pawh chu muttui pawh ti lovin ngawi rengin a en liam ringawt a. Sangtea a tlan liam hnu chuan,a in ti fai a mu turin a in puahchah ve nghal a. A mut fel meuh chuan 11 a lo pel leh duai tawh mai a .

Sangtea'n in a thlen chuan an in chu a lo thim ṭhiap tawh a. Sitting room chiah chu a lo eng tawh a,thawm dim thei ang berin a lut ṭhem ṭhem a. Kawngkhar chu a kalh ṭha a,a roomah a lut tlang chho nghal a. A room banga sana intar chu a melh zauh a,dar 11.30pm a lo ni der tawh,"Ehee ka sana hi a dilo mi a?,"tih pahin a sana bun lai chu a bih leh a,a lo in mil thlap bawk si,"Khaaiaaa,nichin khan ka hmu sual a ni maw? Ka van zak tak,tiang chuan ka leng ngam tawh nang van nice lo thei tak,"tih mawlh mawlh pah chuan a khumah chuan a tlu nghal tawp a,"Msi khan mawl min ti ang chu aww,"tiin a phun leh bul bul a.

Thlasik tawp lam ni mah se,Msi te in chu a la vawt vin tuk mai a. Zing dar 5.30 velah Pi Ruati chu phur lo zet hian a rawn tho ṭuih ṭuih a. Msi pawh a lo harh ve chiah a,"Nu,i van tho hma ve a khawnge i chhuah dawn a?,"a lo ti vat a. Pi Ruati chuan,"Ka bazar ang chu ka ti deuh a,zing kara ka bazar loh chuan chaw eikhamah school i kal leh daih dawn sia,"a lo ti vat a. Msi chuan,"Nu,a la hma e dar 6 velah kan 2 in kan kal dawn nia. Mu leh rih phawt la,"a lo ti a. Pi Ruati chuan,"Kan 2 a kan kal daihin zing karah dawr khar a ngai dawn sin,"a lo ti leh a. Msi chuan,"Nhaaa Nu,mu leh rih phawt teh. Keimah pawn ka bazar thei a lawm,ka puitling ve tawh a lawm. Lo mu leh phawt rawh,"tih pahin a nu chu a rawn kuah a. Pi Ruati chuan,"I bazar thiam ang maw?,"tih pahin a fanu bulah chuan a in thawlh leh nghal sawk sawk a. Msi chuan,"Umm thiam chiang e,i fanu ka nih hi min ring tawp rawh,"tih pahin a nu chu a rawn kuah leh a. An nufa hian khum 1 ah an la mu a ni,Pi Ruati hian a fanu hi naute cheiin a la chei ṭhin a ni.


Pathian zarah Pi Ruati te nufa pawh harsa lutuk lovin an khawsa chho ve naw naw a. Msi pawn a theih tawpin lehkha a zir a,a tet te aṭanga nih a chak em em ṭhin Doctor nih tum chuan a in zir ve ngat ngat a ni. A zir na kawngah chuan a nu pawn a thlawp ṭha khawp mai,a fanu lehkha zir lai chuan thil dang ti turin a fanu chu a tir ngai lo. Mahse,Msi hian a nu hi a hah takzet a ni tih erawh a hai bik lo a ni. Chuvang chuan a hunawl neih chhun chhunah chuan a nu chu a theih ang angin a pui ve ṭhin a ni.

Sangtea pawh pangngai takin class a zawm chho leh a. Mahse,weekend ah erawh chuan zu in lovin a awm theilo a ni. A pa chuan han zilh ve ngial ṭhin mah se,a sawt lem lo khawp mai.

Zirtawpni tlaiah chuan Sangtea chu rui tawkin a rawn haw leh a. An inah chuan an nula chiah a lo awm a,"Mawii,khawnge midang hi?,"a rawn ti chhur chhur a. Mawii chuan hlauh hmel takin,"An la haw lova,"a lo ti zawp sap a. Sangtea chuan thei leh thei lovin a room lam chu a pan chho a,stepah te chuan kal pawh a kal ṭha theilo. A bawkvak chho hi a ni ringawt,Mawii chuan a en zui vawng vawng a,a tawpah chuan a han kai chho ta nge nge a,"Ngatinge heti em em hian i ruih a? I pa in a hau leh mai tur che sin,"tih pahin Sangtea rui zawi ngiai mai chu a kaih kuah a,room lamah chuan a chhoh pui ta a.

Mawii chuan Sangtea chu khumah chuan a keuh tlu tawp a,"Huiham i rit zek lehnghal a,"tih pahin a pheikhawk chu a phelh sak a,a chhuah san ta a.

Zomuanpuia chuan awm mai mai a tum lo chiang khawp mai. Msi chhai thluk chu a tum nasa khawp mai;mahse,a hma anga tha rum hmang ni tawh lovin pangngai deuhin biak a tum a ni. A thuamhnaw zinga a duh ber leh inhmeh a in tih ber te chu a in bel a,darthlalang hmaah chuan a ding rei vang vang khawp mai,"He hmeichhia hi ka chhaithlu theilo anihchuan Zomuanpuia ka ni lovang. Tin,Zothansang,tuai min ti tiraw? Ka tuai leh tuai loh chuan i la hre chho zel mai ang,"tiin amah leh amah chu a inbe mawlh mawlh a. A bike chabi leh helmet a la a,Msi te ina leng tur in a inkhalh chhuak ta puat puat a.

Pi Ruati chuan kuhva hring a lo kheh a,a lo buai khawp mai a. An dawr bul a Zomuanpuia rawn ding a hmuh chuan a ding ngil nghat awt mai a. Mahse,engmah a sawi hma in Zomuanpuia chuan inthlahrun hmel takin,"Nu Ruat,hlau suh ngaihdam dil tur che in ka rawn kal a,"a ti nghal vat a. Pi Ruati chuan,"Engmaw?,"a lo ti hâ mai a. Zomuanpuia chuan,"In chungah ka thil tih kha thil ṭhalo tak a ni tih ka hria,khawngaih takin min ngaidam thei a ngem?,"a ti ta mawlh mawlh mai a. Pi Ruati chuan Zomuanpuia chu a en vang vang a,"Awle kha chu theihnghilh tawh rawh,"a lo ti sam et a. Zomuanpuia chuan,"Chuan,khawnge Msi hi? Msi pawh kha ngaihdam dil ka duh a sin,"a ti a,a hawi kual ruai a. Pi Ruati chuan,"Bawihi chuan lehkha a zir a,ka bula i sawi hi a bula sawi angah in ngai mai rawh. Tunlai chu lehkha a zir ngawrh deuh hlek a,thil dang hian tibuai lo se ka duh a,"a lo ti nghal mawlh mawlh a. Zomuanpuia chuan,"Nia i sawi dik chiah lawm,"a lo ti ve mai a.

Lawma chuan meizial pak khuk hlawt hlawt pahin,"Bawiha,tunlai Zomuanpuia boruak hi i hre ve em?,"a ti a. Sangtea chuan,"Hmana kan insual bak kha ka hre zui tawh lo,"a lo ti vat a. Lawma chuan,"Tunlai chu Msi hi a rim nasa ṭhin a ni awm e. Niminah an in luahna neitu nu khan min hrilh a,"a ti leh a. Sangtea chuan,"Ve a Zomuanpuia khuan Msi hi a bem thlu lo tawp ang,"a lo ti nghal pung pung a. Lawma chuan,"I hre ngawt lo,a zia a thlak vek tawh. Msi te nufa bulah chuan vantirhkoh ang a ni an tih kha,"a ti leh a. Sangtea chuan,"Vantirhkoh suak a nihchu a,"a lo ti sup a. Lawma chuan,"Msi pawh i duh te chuan hma la ve la. Pangngai deuhin leng in be ve la,tianga i awm reng chuan Zomuanpuia zawk hian a la chhaithlu lo ang tih pawh a sawi theih loh,"a ti leh a. Sangtea chuan,"Tak takin tunlai chu Msi khuan lehkha zir lamah a rilru a sawrbing deuh a. Chuvang chuan a nia len pawh ka tih vak loh. Ka len pawn Sunday zan a ni mai,"a lo ti a. Lawma chuan,"I len loh chhung khan Zomuanpuia hian a lo bemthlu keuh a nge aw,"tih pah chuan a nui zui hak hak a. Sangtea chuan,"Teuhlo Msi nu hi ka ring ve tawk. Zomuanpuia te ang mai mai tan a fanu hi a phallo tih ka chiang e mai,"a ti ham ham a. Lawma chuan nui vur vur chungin,"I va confi leh si ve,"a lo ti a. Sangtea chuan,"Mipa kan nih chuan kan nihna ang angin kan lang ngam tur a ni. Chu chu Msi mipa duhzawng pawh a ni,"a ti leh a. Lawma chuan,"Waii in lo kal thui viau tawh a ni maw?,"tih pah chuan a nui hak hak a. Sangtea chuan,"Lo ngai kawi leh ta,Msi chuan a ṭhian ṭha ber angin lawm min en,"a lo ti mai a.

Pi Ruati te nufa chuan zanriah an kil a,"Bawihi,hei i lo nula ve ṭan dawn a. Kei phei chuan naute angin nia ka la en che;mahse,pawn lam mi chuan nula hmuh in an hmu vek tawh dawn che a. Chuvang chuan i nun te uluk la,miin chuti kha ti tia hnung lama an nuih loh nan che i nun hi i fimkhur a ngai takzet a nia. Hmeichhia chu mipa ang kan ni lova,kan mualphona te hi a ho a nia. Eng ang mi pawh ni ila,mi rethei kan ni emaw mi hausa kan ni emaw nun uluk hi a pawimawh ber,"tiin a fanu chu a zilh malh malh mai a. Msi chuan,"Nu ka hria lawm ka tet lai a min hrilh ṭhin pawh kha ka la hre reng a sin,"a lo ti ve bawk a.