ZU ZUAR FANU 37

CHAPTER--37

Ziaktu: R'z Thangluah

www.tleirawl.in

Kimkimi chuan fanu duhawm tak a nei ve ta. Max te chhungkua pawh chu an hlim khawp mai. Notei chuan,"Mam,tunah chuan pa tak tak i ni ve tawh dawn a nia,"a ti a,a hlim khawp mai. Max pawh a hlim ve khawp mai,Kimkimi nu te pawh an rawn thleng kim ve tawh bawk a an hlim kher mai. Damdawiinah chuan zan 1 an riah hnuah a tuk zing chaw eikhamah an chhuak ta a.

Nurse 1 chuan a ṭhiannu bulah chuan,"En ten,tuna chhuak chiah te kha,an pa kha kan Dr. Msi bialpa ṭhin kha a niin ka hria,"a lo ti ru su su a. A ṭhiannu chuan,"Umm ni e ka lo hriat dan chuan mipa khan nupui a neihsan tawp a ni awm e,"a lo ti ve bawk a. An piah a lo ding ve pakhat chuan,"Dr. Msi nupui a netu hi chu mipa vannei tak an ni ngei ang,"a lo ti ve bawk a.

Max-a te naute neih thu chu a darh zau rang kher mai. Ṭhenrual ṭha te ho an lo pungkhawm ṭak ṭak a,Max te nupa leh a nu leh pa chu an lawmpui thu an rawn hrilh malh malh hlawm bawk a.

Jessy leh Siamtei pawh Max-a te naute en turin phurlo zetin an chhuak ve a. Jessy chuan,"Awii ka van phur lo tak,reilo te chiah awm ang aw,"tih pah chuan a ner nung a. Siamtei chuan,"Awii kei tak hi nia phur lo chu,"a lo ti ve bawk a. Phur lo zet chuan Max te In chu an chuangkai ta a.

Notei chuan a lo chiau au vat a,"Aww lo leng rawh u in van fel em em,"a lo ti nghal mawlh mawlh a. Jessy chuan,"Naute thar kan lo en dawn a,a en theih tawh em?,"a ti ve luam a. Notei chuan,"Umm theih tehreng e helamah hian lo kal ru,"tih pahin room lamah chuan a phei pui a.

Max chuan naute chu a lo pawm a,Kimkimi erawh a lo mu thung a. Max chuan,"E nangni in ni maw? Lo kal rawh u,lo ṭhu ru,"a lo ti nghal vat a. Jessy chuan,"Naute chu a hmelṭha em?,"tih pahin a zu bih hnai a,"Awii a hmelṭha lutuk a hnar a nalh si,"a ti nghal mawlh mawlh a. Siamtei chuan,"Khawimaw awii anih hi,a nu hnar a chhun anih hi a hnar a nalh e mai,"a rawn ti ve nghal bawrh bawrh a. Jessy chuan,"Naute nu hi engnge a an a?,"a ti leh a. Max chuan,"Aw a ṭha ni mai,a la che ṭha vak thei lova,"a lo ti vat a. Kimkimi pawh a lo nui ve suk suk a,"In va fel ve a,keichu ka ṭha lutuk a nia,"a lo ti ve bawk a. Siamtei chuan,"Hei aw naute en nan,"tiin naute kawr a lei chu a rawn phawrh a. Jessy pawh chuan a pheikhawk lei chu a rawn phawrh ve nghal a,"Duh ang pawn kan bazar hman lova,duh anga ṭha pawh kan lei thei lo,"a lo ti a. Kimkimi chuan,"A ṭha lutuk a lawm hei bak bak,in ti lawmawm lutuk a nia aw,"a lo ti ve siam siam a. Max pawh chuan,"Ni e hei in rawn lei ṭha lutuk a lawm,a ṭha lutuk a nia,"a lo ti ve mawlh mawlh bawk a.

Sangtea chu a hna ṭang a rawn bang ve chiah a,an In chu a lo reh ṭhuap mai a. Choka ah chuan tumah hmuh tur an awm lova,sitting roomah lah tumah hmuh tur an awm lo bawk si. Ngaihṭhat lohna pawh nei lem lovin a room lam pan chuan a chho tlang nghal mai a;mahse,a nu leh pa te in hau thawm a hriat chuan a ding chat mai a.

Pu Thanga chuan,"I duh thlang rawh kei leh i fate nge kha mihring kha i thlan dawn? Kha mihring kha i thlang dawn anihchuan zan in la la hian kan In hi chhuahsan nghal ang che,"a ti vin ṭhak mai a. Pi Zuali chuan,"Eng a? Chhuak turin min ti a maw? Khapa kha ka tan chuan ṭhian satliah leh sumdawnna a ka ṭhian mai a nihkha,"a lo ti leh ve leh a. Pu Thanga chuan,"Ka mit hian ka hmu a,ka bengin ka hre bawk a sin. Mi â nileng ka nih loh hi,"a ti vin leh ṭhak ṭhak a. Pi Zuali chuan,"Umm a ṭha nihchu ka chhuak khawp ang. Nang ang mipa nep lutuk ka lo nei che hi chu ka inchhir ngawt mai,"a ti hlak hlak a,room aṭang chuan a rawn chhuak a. Room pawna lo ding reng Sangtea chu melh pawh a melh lova,In hnuai lamah chuan a pen thla nghal hlawk hlawk a.

"Ka pa,engnge thil awmzia hi?,"tiin Sangtea chuan a pa chu a zawt a. Pu Thanga chuan,"Uire nu anihkha chhuak daih rawh se,"a lo ti hul hak a. Sangtea chu a ṭhu hnawk a,a pa hmela rilru na hmel lo lang chu a hmuh hmaih lo a ni,"Ka pa,ka nu chu i chhuah tir tak tak dawn mi?,"a ti leh a. Pu Thanga chuan,"Uire nu hi ka In chhunga awm reng atan ka duh lo,"a ti leh hmuk a. Sangtea chuan,"Ka pa?,"a ti leh a,a pa chu zawhna a zawt a ang mah zawk a. Pu Thanga chuan,"En ve mai rawh,"tih pahin a phone chu a rawn phawrh a. Sangtea chuan a lo la ve nghal vat a,a pa phone a video chu a en nghal a,"Ka pa,engpawh nise i fapa ka ni a. I lamah ka ṭang zel ang,"tiin a pa kut chu a vuan a. Pu Thanga chuan,"Ka fapa ka lawm hle mai,kha chen kha i nu thu kha ka lo awih ṭhin a. Mahse,vawiin aṭang chuan in tan pa ṭha tak nih ka tum tawh ang,"a ti a,a sawi zawng chuan a mit a khap fuk fuk a. A nupui uire chu a tuar takzet tih a hriat theih mai a.

Sangtea chuan Msi chu a call nasa tluk tluk khawp mai. Mahse,chhanna a dawng theilo vawi 7 vel a call hnu chuan,Msi chuan a rawn chhang ve thei hram a;

"Aw Sangte,"

"I buai a mi?,"

"Buai love ka inbual zo chiah a,i ṭha em?,"

"Ka hre lo,"

"Tinge i âw ki a va dang ta ve,"

"Ka lo kal ang,engkim ka hrilh ang che,"

"Awle fimkhur la aw,"

"Awle ka dah aw,"

"Umm awle,"


"Tinge le? A chungah eng thil nge thleng ang le?,"Msi chu a lo in ngaihtuah buai nasa khawp mai a. Ṭhut pawh a ṭhu hleithei lo,a tei kual sek mai a.

Rei lo te hnuah Sangtea pawh a rawn thleng ve nghal a. Msi chuan Sangtea hmel phelh phung leh hmel hlimlo zet chu a hai lo a ni,"I chungah engnge thleng a? Emi nen chuan in ṭha tiraw?,"a lo ti nghal vat a. Sangtea chuan,"Umm Emi nen chuan kan ṭha lawm,"a lo ti mai a. Msi chuan,"I chungah engnge thleng? I hmel hi a dik miahlo a nia aw,"a ti leh a. Sangtea chuan,"Ms...ka kuah lawk thei che a ngem?,"a rawn ti zawi sup a. Msi chuan,"Umm,"tih pahin Sangtea lamah chuan a âwn phei a,"Engpawh sawi rawh ka lo ngaithla ang,"a ti leh a. Sangtea chuan harsa ti tak chungin a nu in a uire san thu chu Msi bulah chuan a sawi ta a. Msi chuan mak a ti hle mai;mahse,"Mipa i ni a,chak takin i awm tur a ni. I pa tan fapa ṭha tak ni la,in nghahna tlak nih tum ang che aw,"a ti mawlh mawlh a. Sangtea chuan,"Tunah hian ka pa chu a na mek a sin,"a ti leh a. Msi chuan,"I pa tan in hnêmna tlak ni turin chak takin i awm a ngai a lawm. I hrethiam em?,"a ti leh a. Sangtea chuan,"Imm ka hrethiam a lawm;mahse,a harsa êm a ni. Ka pa hmela natna lo lang khan min ti na a ni,"a ti leh a. Msi chuan,"Ka hrethiam lutuk che a nia,i ṭap duh anihpawn ṭap rawh ka dem hauh lo che. Mahse,i pa bulah chuan ṭap suh ang che aw,"tiin Sangtea kut chu a vuan a. Sangtea chu a insum thei tawh bik lo,mipa ni mah se a chunga thil thleng hi nâ a ti ngawih ngawih a ni. A kut pahnihin a hmai a hup a,a inhnit hlawp hlawp mai a. Msi chuan Sangtea ṭap chu hmuh hrehawm a ti khawp mai,"I tan ka awm reng a nia aw,"tiin Sangtea darah chuan a kuah a.


Sangtea nu in an In a chhuahsan aṭang chuan thla 1 a liam leh ta. A nu chanchin an hriat dan chuan khapa a uirena pa nen khan an cheng dun a ni awm e. Mahse,a pa erawhin a hma aiin Pathian a hnaih phah zawk a,kohhran mipui leh ṭhenrual ṭha te'n an ṭawngṭai pui reng bawk a. Rin aiin a tuar dam thei zek a,Ely erawh chuan a nunphung a la thlak chuang lova. A nu bulah pawh a kal fo a,a nu uire chhan chu a pa a puh ziah leh nghal a. Partei erawh a hna avangin thingtlang lamah awmin an chhungkaw boruak chuan a rilru a ti na ve khawp mai. Thla 1 chhung chawlh la in a rawn chho ve rih a ni.

"A hrim hrimin ka pa pawn a thiam vek bik hleinem,"Ely chuan a ti hlak hlak a. Partei chuan,"Ka nu lamah i ṭang dawn maw? Ka nu lamah i ṭang dawn anihchuan a bulah va awm ta che. Ka pa hi a na a sin,"a lo ti nghal bawrh bawrh a. Ely chuan,"Huh i va rawn inti thu ve a,kan unaua upa ber ka nih hi,"a ti ham ham a. Sangtea chuan,"A lo nih tak chu ka nu bulah chuan va awm rawh. Nilo ka nu ti pawn ka ko tawh lovang,i nu bulah va awm rawh,"a rawn ti ve piap piap mai a. Ely chuan,"Eng vanga uire nge a nih tih te hi hriat tum ve u la,"a ti leh a. Partei chuan,"A lerh vang a ni mai lawm. Ka pa hian heti khawp hian a hmangaih a;mahse,ka nu chuan a uire san ngam a nia,"a ti ve leh hmak hmak a.

An hnial buai lai chuan Pu Thanga chu a rawn kal a,"A tawk e,duhtawk tawh rawh u. I nu chuan a duh a thlang fel tawh a lawm,engmah sawi tawh suh u,"a rawn ti a. A hmel erawh chaw ei ṭha lo tih hria takin a pawr fep a,"Bawiha,vawiin chu i hna kal lo mai ta che aw,"a tih zawm nghal zat a. Sangtea chuan,"A pawi hleinem ka pa,"a lo ti vat a.

Zomuanpuia te unau pawn a pa contract hmuh aṭangin bike thar an lei leh ta. Mi tam takin an sêl luai luai a;mahse,an haider lui tlat thung a. Pawisa an hmuh tawh chuan thil dang an ngaihtuah tawh ngai lo,chapo deuhin an hawi sang em em ringawt mai a ni.

Pathianni zing a ni a,Sangtea pawh inkhawm turin a insiam ve malh malh a. Msi thu chah kha a hre reng a,a pa tan chuan fapa ṭha tak nih a,in hnêmna tlak nih chu a tum nghet tlat a ni.

A pa nen chuan inkhawm turin an chhuak rual a,an hnung lam aṭang chuan bike chak tak rawn tlan chuan horn a rawn pe tuarh tuarh a,"Kawng en ta che uirenu fapa,"tiin bike a chuang chuan a la rawn âu el zui a. Sangtea chu a sa nghal phat mai a,"Zomuanpui,veng khatah kan awm a lawm. Mipa ka nih hi,"a ti hmarh hmarh a. A pa chuan,"Bawiha,a tawk e in bengdai rawh. Inkhawm tur kan nih hi,"tiin a lo khap vat a. Sangtea pawh chu a ngawi ve leh mai a.

"Duat,Monday hian ka zin leh dawn a ka ngai ngawt ang che,"tih pahin Emily chuan Sangtea chu a rawn ngheng a. Sangtea chuan,"I zin rei dawn em?,"a lo ti sup a. Emily chuan,"Thla 1 vel a niang,ka huphurh khawp mai,"a lo ti leh a. Sangtea chuan,"A va rei dawn ve,engnge i tih dawn em em a?,"a lo ti vat a. Emily chuan,"Meeting a ngai a,thuamhnaw lak a ngai bawk a. A dang pawh tih tur neuh neuh chu a awm ṭeuh mai,"a lo ti leh a. Sangtea chuan,"I zin rei thei e,ka lung a leng thei tehmai nia aw,"tih pahin a nui suk a. Emily chuan,"Nia keipawn rei deuh zin chu ka chak bik lo a lawm. Mahse,a ṭul tlat si a nih hi,"a ti leh a.  Sangtea chuan,"Thla 1 aia rei cham awih loh aw,"tih pahin Emily chu a kuah a. Emily chuan,"Min kuah char char rawh aw,zanin bak chu min kuah thei tawh dawn lo a nia,"a ti zawi sep a. Sangtea chuan a hrethiamlo hle mai,"Engnge i sawi awmzia hi? Kalbo tur i ang lutuk,"a ti hu mai a. Emily chuan,"Msi te Inah kal lawk ang aw,"a ti a,leh lam a hawi a Sangtea hmuh loh laichuan a hru zauh a. Sangtea chuan,"Awle i tih dan dan le? Mahse,i ṭha meuh maw?,"a ti leh a. Emily chuan,"Aw ka ṭha lawm,ka ṭha lutuk a lawm,"a lo ti vat a,Msi te In lam pan chuan an in phur phei ta a. Emily chuan Sangtea chu ngai tih hriat takin a kuah vawng vawng mai a;mahse,Sangtea erawh chuan engmah a hrethiam lo a ni.