CHAPTER--36
Ziaktu: R'z Thangluah
Columnist, www.tleirawl.in
"Awii a zialo e,"Notei chuan Max chu a sawi nawk a. Msi chuan,"Note,nakinah a harh ve mai ang. Tunah chuan a harh thei rih lovang,"a lo ti a. Notei chuan,"An nu in a hriat leh chuan a thinrim leh dawn a sin,a lo ânkhum leh ringawt che a nga,"a ti a. Msi chuan,"Ânkhum lovang,Kimkimi chu a fel a lawm. Tikhan mut tir rih la,duh leh la leng ve rih la ,"a lo ti leh a. Notei chuan,"Nia ka nghak phawt mai ang,an nu chu a rawn kal tak leh keiman ka lo hrilhfiah vek mai ang,"a ti ve bawk a.
Rei vak lo hnuah chuan an rin ang ngei ngeiin Kimkimi chu a rawn lang ta ngei a,"Ka pasal hi in lo hrai rui leh pek tawh mi a? Zu zuar ṭhin tih takah in lo rapthlak khawp mai,"a rawn ti nghal tun tun a. Notei chuan ter at mai a,"I van zaklo tak e aw,khatikhan vawi khat mah U Msi te hi ṭawngkhum tawh suh ang che,"a lo ti ve nghal hmarh hmarh a. Pi Ruati chuan,"Kimkim,i pasal hi hawpui rawh le,"fiah deuh fak hian a rawn ti a. Notei zawk chu inthlahrung tih hriat takin a ṭí dûk a,"Nu Ruat,pawi ka ti lutuk,"a tu mawlh mawlh a. Msi chuan,"Note,i thiamloh engmah a awm lo a nia,"a lo ti vat a.
Kimkimi chuan a pasal chatthla muhil thlurh thlurh chu a sawi nawk nawk a,"Tho teh haw ang,vawi engzatnge hetah hian kal tawh lo turin ka tih che?,"a ti mawlh mawlh a. Pi Ruati te nufa chuan ngawi rengin an lo thlir tawp a,Notei chuan,"Lo va haw mai rawh keiman ka rawn hawpui mai ang,"a lo ti a. Kimkimi chuan,"Tunah rawn haw ang che u,"a ti leh hluk a. Notei chuan,"Aww lo va haw phawt teh,"a lo ti leh a. Kimkimi pawh a kal ve mai a.
Notei chuan,"Huiham Nu Ruat,pawi ka ti lutuk aw. Kan chhungkua hi chuan kan tibuai takzet che u a ni,"a ti leh a. Pi Ruati chuan,"Ee in thiamlo duh reng reng suh,i thiamloh a nilo a nia,"a lo ti vat a. Notei chuan,"Ka va hawpui phawt mai a nge aw,ka pa in hau deuh se a ṭha ang a zahthlak thei e mai,"tiin Max chu a sawi leh nawk nawk a,Max pawh chu a rawn che ṭual ṭual a,"Engnge?,"a rawn chhur chhur a. Notei chuan,"Haw ang,Inah i mu dawn nia,"a lo ti vat a. Max chu a rawn ṭhu chhuak a,"Umm haw ang,"a ti a,a tho a pai ṭuang ṭuang chungin kawngka lam chu a pan a. Notei chuan a zui nghal vat a,"U Ms,nihphawt u aw,"a ti a,Max chu a kai a an In lam panin an in kuah phei a.
Pi Zuali chuan phone bih ngur ngur pahin a nui hawk hawk a,"Awii awii a van nuihzathlak tak,"tiin amah chuan a nui uar uar a. Pu Thanga chuan,"Nang lah hi mi â ang maiin i rawn nui leh thut zel a. Min ti â zo mai dawn,"a lo ti hluk a. Pi Zuali chuan,"Hmmp a nihchu a min lo khak ve ziah suh,"a lo ti hluk a. Pu Thanga chuan,"Ka khak che mi? Engnge maw hlekah 'min khak min khak' ti leh ringawt zel mai. Khak duh che ni ila,khakna tur che ka ngah lutuk in hauh ka duh loh vangin ka khak lo mai mai che a ni zawk,"a lo ti duah a. Pi Zuali chuan,"A nih tak chu a ka thil tih reng reng hi i mil lo vek a lawm. I chhungte lahin min mil duh bawk si lo,"a ti leh hlak hlak a. Pu Thanga chuan,"Ka chhungte hi sawi kai ziah suh,nangman i mil loh vangin ka in dan pui ringawt zawk che a nih hi. Tih tak emah chuan fapa neihchhun ka ni ve a,ka nu leh pa te hian in dan hi an phallo a sin. Mahse,nangmah zawkin ka chhungte i mil theih loh avangin ka in danpui ringawt che a nih hi,"a ti ve ta phiar phiar mai a. Pi Zuali chuan,"I chhungte khan min mil ni se,in dan hi ka sawipui lovang che,"a lo ti leh a. Pu Thanga chuan,"I mil lo zawk chu a nih hi. Ka pa phei chuan a fanu ang chiahin a en che a,a fanu te ber aipawn a duat che a sin. Mahse,i mil duh lo a nihkha ka nu leh pa pawh i ko ngai lova. Tun thleng hian 'Ka nu,Ka pa' tia i koh ve hi an la beisei ve a sin,"a ti ve hmak hmak a. Pi Zuali chuan,"Hmm a nihchu ka ning,ka chhuak lawk dawn nia,"tih pahin a chhuak nghal a. Pu Thanga chuan,"Huiham a va hahthlak bet bet ṭhin ve aw,hetiang hi chuan ram ropui kan thleng lovang,"tiin a phun bul bul a.
Pu Chhuana pawn contract ₹220000 man a hmu ve leh hlawl mai a. A hlim khawp mai;mahse,a fapa te 2 chuan bike thar an ngen tlat mai. Kimkima chuan,"Pa,ka bike hi a ṭawng tawh si a thar ka duh ve tawh a nia,"a rawn ti a. Zomuanpuia pawh chuan,"Pa,keipawh a thar ka duh ve a nia aw,"a rawn ti ve vat a. Pu Chhuana chuan,"Hna thawk peih mang silo hian in duh duh in ngen leh tawh zel mai a,"a lo ti nghal vat a. Zomuanpuia chuan,"I contract a nia,i fa te kan nia kan thawh ve kher a ngai mi?,"a lo ti vat a. Kimkima chuan,"Ni e fapa 2 chiah min nei a,min chawm hneh lo a nia. In hahthlak e mai,"a lo ti bak hluk a. Pu Chhuana chuan,"Khanglang che chuan,khatiang ṭawngkam kha rawn chhak chhuak tawh suh ang che aw,"tiin Kimkima chu a melh rawm rawm a. Kimkima chuan,"Hmm a nih tak chu ka leng dawn ka ning,"tih pahin thinrim zetin a chhuak tau nghawng nghawng a. Pi Zari chuan,"Aww a mak ṭhin e mai,naupang rilru i ti na leh tawh a nihkha. An duh hi chu tih sak ve mai ṭhin la,"a lo ti leh duam a. Pu Chhuana chuan,"Nang lah hian lo ṭan ziah lo teh,nu berin i lo ṭan ṭhin vang hi a nih hi ka thu pawh an awih duh tawh miah loh ni,"a lo ti ve hmak a. Pi Zari chuan,"E khai ka ṭan vak emaw ni le? Kan fa te duh chu kan tihsak zel dawn lawm ni?,"a lo ti leh a. Pu Chhuana chuan,"An duh apiang kan tih sak ṭhin vang anih hi an sual em em ni,"a ti leh a. Zomuanpuia chuan,"Kan duh apiang min tih sak bik hleinem,"a lo ti bung nghut a. Pu Chhuana chuan,"In duh leh mamawh chiah in hria a,hna in thawk peih silova. Ka ning zo zai tawh khawp mai,"a ti ve phiar phiar mai a. Pi Zari chuan,"An duh leh mamawh chu kan tih sak reng dawn lo em ni?,"a lo ti leh a. Pu Chhuana chuan,"Ka ning khawp mai,khati khan ṭawngkam lo nei ziah suh,"a lo ti leh hmak a. Zomuanpuia chuan,"Ka ning ka leng dawn bike chu min lei sak loh chuan ka In chhungah hian ka ruang in kil a ngai ang,"tiin thinrim takin a chhuak ve nghal a. Pu Chhuana chuan,"A va han hahthlak ṭhin e aw,pawisa thawhchhuah harsat zia te hi in hre hlawm silova aw,"a ti zui vawng vawng a.
Pi Zuali chuan phone a bih leh ngur ngur tawh a. A bula a fapa thusawi pawh chu a hre lo a ni,"Nu,ka thusawi chu i hrelo a mi?,"Sangtea chuan a nu darah chuan a va khawih a. Pi Zuali chuan,"Aww engnge?,"a lo ti hluk a. Sangtea chuan,"Ka bike hi ka hralh a nga,tlem min thawhsak ve la car ka lei ve dawn mawn le ka ti deuh a,"in thlahrun hmel takin a nu chu a rawn melh a. Pi Zuali chuan,"Eng a? Pawisa ka neilo i duh leh i pa dil mai rawh,"a lo ti nghal hmak a. Sangtea chuan,"Ka pa bulah chuan ka sawi tawh a'I nu dil rawh'a tia ka rawn dil che a nih hi,"a ti leh a. Pi Zuali chuan,"I pa chuan a ti mai mai nihchu,pawisa kawl ka nei lo. A thu hrim ah i bike chu a la khalh theih a ni lawm ni?,"a ti leh hlak hlak a. Sangtea chuan,"Khalh theih tho e;mahse,a ṭawng ve tawh a,"a ti leh a. Pi Zuali chuan,"Kan ngaihtuah dawn nia,"a ti duh chauh a. Sangtea chuan,"U Ely chu nise i lei sak leh nghal awm tho sia,"a ti leh kher a. Pi Zuali chuan,"Ely hi chu thik lo mai teh aw,a ni chuan hna a thawk a thawh chhhuah a nei a lawm,"a ti leh hluk hluk a. Sangtea chuan,"Keipawn hna thawh ka neih ve tawh tho hi,tikhan ti kher zel lo la. Chubakah U Ely hian a hlawh hi ama mimal tan bak a hmang ngai lo. In chhung thilah a hlawh a hmang ngai lo,keichuan ka hlawh lak hmasak ber aṭangin ka hlawh zatve chhungkaw pawisa turin ka thehlut nghal zel tih hi i hrelo der nge i hrelo hrim hrim zawk?,"a ti ve piap piap mai a. Pi Zuali chuan,"Ehehe Zothansang,zak teh khatikhan min ṭawngkhum reng reng suh aw. I nu ka nih hi i hria em?,"a ti ve phiar phiar mai a. Samgtea chuan,"Eee ka nu i ni tih chu ka hre khawp mai. Ka nu i ni lo zawk emawn le tih ten ka ngaihtuah zawk ṭhin a sin,"a ti ta deuh deuh a. Pi Zuali chuan,"A tawk min kalsan rih teh,tunah chuan ka be peih rih lo che,"a ti bak hluk a. Sangtea chuan,"Min biak peih lai i nei ngai reng reng mi a?,"tih pahin a room lamah chuan a chho nghal a.
Max chuan Msi leh zu bak ngaihtuah a nei tawh lo. A nupui raipuar luah pawh chu a rilruah a awm lem lo khawp mai. A nupui lah chuan a pasal awmdan chu a hai bik silo,a chhuah hlek tawh chuan Msi te Inah a zawng hmasa ber ziah zel a,a lo awm leh nge nge ṭhin bawk a.
Jessy chuan,"Max hi a in thlak chiang khawp mai tiraw? A nu leh pa te hi ka khawngaih a sin aw,"a ti ve malh malh a. Siamtei chuan,"Ni e a inthlak ve chiang khawp mai. Msi hi a la ngaihven reng bawk si,ka khawngaih a sin aw. Hmanni pawh Msi khan a sawi zauh a,an nu lah hian a thik thei sia Msi tan pawh a nuam miahlo ang,"a lo ti ve bawk a. Amuani chuan,"Awii keichu Kimkimi hi ka ngei a nia aw. Max hian engtinnge a duh le?,"a lo ti ve bawrh bawrh a. Jessy chuan,"Aww a kherh nasa tih a hriat reng mai a lawm. Msi te ang kalsan duh khawpa a rilru thlak sak theitu chu hmeichhe zei tak a ni ngei ang,"a lo ti vat a. Siamtei chuan,"Msi nen kha chuan an inhmeh a sin,Max-a chhungte pawn Msi hi chu an mo atan an awt a lawm. Mahse,an fapa hian an rin loh lam daih aṭangin nupui a rawn hawn ta sia,"a lo ti ve bawk a. Amuani chuan,"Msi tan chuan a nuamlo ngawt ang,Max-a te building-ah an la awm zui leh nghal,"a lo ti a. Siamtei chuan,"Ni e mahse,Msi hi hmeichhe â tak a ni lo. Hmeichhe â tak chu ni se,an in sawn chhuak daih tawh ang. Chubakah Kimkimi hi a sawichhe ngai miahlo nia,"a lo ti ve bawk a. Jessy chuan,"Ni e Msi hi chu a puitling ngawt mai. Kimkimi hian an In chhungah ngei luh chilhin vawi tam a ânkhum tawh a. Mahse,Msi hian a la dawh char char zawk a nih hi,"a lo ti ve bawk a.
"Rui reng bawk,Msi ngaihtuah reng bawk. Hetiang hi chuan kan inneih rei theih pawh ka ring nek love,"Kimkimi chuan a pasal zu rui chu a ânkhum buan buan mai a. Max chuan,"Nitin zan tin i âng thawm hriat reng hi ka ning,"a lo ti vin hlar mai a. Kimkimi chuan,"Âng lo thei lovin min siam a nih hi,keipawn i zu rui hi ka ning tawh khawp mai,"a lo ti ve leh vat a. Max chuan,"Nangmah vang hian ka nun hi a in thlak vek tawh. Ka nun hi min tihchhiat sak a ni,"a ti bawrh bawrh mai a. Kimkimi chuan,"Engtinmaw i sawi a? I nun ka tichhia maw? Huh..zu in turin ka fuih che mi? Nangma duh thu in zu i in a,i duh thu ngeiin Msi i bialnu hlui,zu zuar fanu pawh i rim ṭhin a ni lawm ni?,"a ti piap piap mai a. Max chuan,"I ṭawngkam fimkhur rawh aw,"a ti vin ṭhak mai a. Kimkimi chuan,"Aaah a na lutuk,"tih pahin a pum chu a dawm nghal a,a kun nghal tlawk tlawk a. Max chuan,"Engtinnge i awm a? Naute i nei dawn mi? Tikhan lo awm rawh aw,ka nu te ka zu ko a nge,"a ti a,In hnuai lamah chuan a tlan thla nghal rawk rawk a.
Max-nu chuan,"Bawihte,Msi va ko mai teh,hmanhmawh deuh la aw,"a ti a,Notei chuan,"Awle,"tih pahin Msi ko tur chuan a tlan chhuak nghal vat a. Kimkimi chuan,"A na lutuk,"tih pahin a ṭhen tlawk tlawk mai a. Max-a pa chuan,"Nang hi i rim a dik lo leh tawh,han in ti fai vat rawh. Damdawiin kal a ngai dawn nia,"tiin Max chu a melh hru hru a. Max chuan,"Awle,"tih pahin in tifai turin in chung lamah chuan a chho nghal a.
Rei lo te hnuah Msi leh Notei pawh an rawn thleng ve nghal a. Msi chuan a en nghal zung zung a,"Damdawiin lamah kalpui vat chi a nih hi,a nei hnai tawh khawp mai. Khawnge Max hi?,"a ti nghal mawlh mawlh a. Max chu In chung lam ṭang chuan a rawn chhuk thla nghal a,"Ka hman e,"a rawn ti nghal vat a. Msi chuan,"Note,Naute puante leh kawr vel in pack tawh em?,"a ti leh a. Notei chuan,"Ka hre miah lo,"a lo ti vat a. Kimkimi chuan,"Kan roomah suitcase dumah khan naute puante leh kawr vel chu ka dah,"a lo ti a. Max chuan,"Ka han la leh lawk a nge aw,"tih pahin a tlan chho leh nghal a,reilo te hnuah a rawn chhuk thla leh nghal a. Msi chuan,"Khawi min rawn kuah rawh,"a ti a,Kimkimi chu a kai a pawn lam pan chuan an chhuak nghal a.
Max chuan motor chu a lo la chhuak nghal bawk a. Max-a nu leh pa chuan Kimkimi chu motorah chuan an kai lut a,Notei pawh chu a ṭhu lut ve nghal a. Max-a nu leh pa pawh chu an ṭhu lut nghal a. Msi chuan,"Chanchin min lo hrilh zel ru aw,puih in ngaih chuan min ko hreh lo u la aw,"tiin a thlah liam ta a.
Max chuan,"Nu,Kimkimi nu kha lo bia la. An remchan chuan lo chho ve se la,Kimkimi tan pawh a nuam deuh ang chu,"a lo ti a. Max-a nu chuan,"Nia kan be nghal a nge aw,"tiin a phone a phawrh a,Kimkimi nu chu a be nghal a.
Nau neihnaah chuan mi an tam khawp mai. Nurse 1 chuan a lo buaipui nghal vat vat a,"Ka pi,amah hi kan lo en a nga. Chumi chhung chuan Casualty ah khan OPD Card in zu la dawn nia aw. Nau nei tur kan nia in ti a nga,in zu la lawk dawn nia aw,"a lo ti nghal a. Notei chu OPD Card la turin a tlan chhuak nghal hlawk hlawk a.
Max-a nu chuan,"Kimkimi nu te pawh an rawn tlan chho nghal dawn a nih chu aw,"a ti a,a phone chu a lek a midang a be kual leh nghal zung zung a. Notei pawh OPD Card keng chungin a rawn let leh a,Nurse 1 lo ding hnenah chuan a pe nghal a. Nurse 1 chuan Kimkimi chu a rawn kai chhuak leh a,"Ka pi,naute hi chu a hnai tawh ang reng a. A chhul kawngka pawh a in hawng tawh a;mahse,reilote a vei ve chu a ngai dawn a nih hi. A kumkuruh a la kau lo deuh a,khum No.14 ah sawn lo va awm phawt ru aw,"tiin a rawn hrilhfiah nghal zung zung a. Kimkimi chu khum lamah chuan an kai phei a,an chhungkua chuan an kil ṭhap mai a. Max chuan,"Zam reng reng suh aw,i nu te pawh an rawn chho dawn a nia,"tiin a hnem ve malh malh a. Notei chuan,"A lum e keichu pawnah ka lo va awm dawn nia aw,lei ngai vel a awm chuan min lo hrilh mai dawn nia aw,"a ti a,pawn lamah chuan a chhuak nghal daih a.
No comments:
Thanks for your comment.