ZU ZUAR FANU 35

CHAPTER--35

Ziaktu: - R'z Thangluah

www.tleirawl.in

Kimkimi'n Msi te In chhunga Msi a va ânkhum chu a darh chak hle mai. Rema khan mi zawng zawng bulah,"Max-a nupui rapthlak zia chu,sakei aipawn a rapthlak,"tiin a lo sawi darh nasa mai a. Kimkimi chuan a hre leh zel bawk si,a la thinrim let zawk zamah a,"I ex chu a lo kam tam hle mai,"tiin Max-a bulah chuan a âng leh hlawih hlawih mai a. Max chuan,"I va han rapthlak ve a,Msi sawn tu bulah mah a sawi chhuak lo ange,"a lo ti ve thung a. Kimkimi chuan,"Msi'n sawi chhuak lo se,tu in nge sawi chhuak se i tih a?,"a ti vin hlar mai a. Max chuan,"I va kal lai khan tunge midang awm ve? Mi zawng zawng thusawi te hi i hre ve vek a ni lawm ni? Rema'n tichuan a ti tih vek a nih hi,"a lo ti ve bawrh bawrh a. Kimkimi chuan,"Msi khan Rema kha sawi chhuak turin a fuihpawrh pawh a ni thei a sin,"a lo ti leh a. Max chu a ngawi vang vang a,"Nia ni thei tho mai,Msi te Inah chuan keimah ngei ka va kal a nge,"a ti leh hnu hnawh a. Kimkimi chuan,"Ka rawn kal ve dawn,"a lo ti vat a. Max chuan,"A ngailo rawn kal ve lovang,i âng leh buan buan a nga a ṭha lo,"a lo ti thung a. Kimkimi chuan,"Ka âng lovang ka rawn kal dawn,"a tih tlat vang chuan Max pawh chuan a hnial ta lova.

Max-pa chu sitting room-ah a lo ṭhu a,"Bawiha,khawnge in kal dawn a?,"a lo ti vat a. Max chuan,"Msi te Inah kan kal dawn,"a ti tawl mai a. Max-a pa chuan,"Eng a? Tun ang boruak ah hian Msi te Inah in kal ang maw? Eng rilru nge in put a? Ngaihdam dil tura kal in nihchuan ka dang lovang che u;mahse,ânkhum tura kal in nihchuan in kal lovang,"a lo ti hmak mai a. Max chuan,"Chutiang thil âtthlak kan ti dawn hleinem,kan rei lovang,"a ti a,Kimkimi nen chuan an inzui chhuak ta a.

Msi chuan kuhva a kheh malh malh a,ṭhenawm tlangval Rema pawh a rawn chuang lut leh bawk a,"Max-a nupui han rapthlak zia kha,nizan ka mumangah ka hmu a min lo la um hrep zui,"tih pah chuan a nui huah huah a. Msi chuan,"I ho e mai,kha mi bulah te i lo sawi mai mai a,a tih chi loh e mai. Zep tlat tawh tur aw,"tih pahin a lo nui var var a. Rema chuan,"A rapthlak e nihkha,"a lo ti leh a. Msi chuan,"Rapthlak loh love,a fel lutuk a lawm,"a lo ti leh mai a. Rema chuan,"Nang hi chu i fel ve ngawt mai,nupui tlak i ni. Min duh mai la,"a ti zui zat a. Msi chu a nui bawk bawk a,"Awii U Rem,i sawi ho thei lutuk thingpui ka lum ang che aw,"tih pahin choka lamah chuan a phei leh nghal a.

"Engnge in duh a? Lo leng rawh u,"Msi âw chu a khur lek lek a. Max chuan,"Sawifel tur kan nei a,"a ti bul hmuk mai a. Msi chuan,"Umm lo ṭhu ula,kan sawi dawn nia,"a lo ti leh a. Max leh Kimkimi pawh chu ṭhutna âwlah chuan an ṭhu ve nghal a. Rema chuan Kimkimi chu a melh leh hrek hrek ṭhin a,"Ms,ka haw mai ang aw he nu hi ka hlau deuh tlat,"tih pahin a tho a,a kal nghal nul nul a. Msi chuan,"Aww anih muttui aw,"a ti zui lawm lawm a.

Max chuan a âw a thian kharh kharh a,"Hman zan thil thleng vang khan pawi kan ti takzet a ni. Khawngaihin min ngaidam mawlh mawlh dawn nia aw,"tiin in thlahrung tih hriat takin Msi chu a rawn melh a. Kimkimi erawh a meng thip ram thung a,"Hmmp,"tih pahin a hawi tau hmuk a. Msi chuan,"In thiamlo duh suh,Kimkimi pawh ka dem lo a nia. Ngaihdam min dil a ngailo a nia,"a lo ti dam thlap a. Max chuan,"Kan lawm e aw,tun chinah chuan harsatna kan siam tawh lovang che kan haw phei tawh a nge,"a ti a,a nupui chu a kai a a kalpui nghal hlawk hlawk a. Msi chuan,"Aww anih muttui phawt u aw,"tiin a thlah liam ve mai a,Max te nupa erawh chuan engmah sawi lovin an In lam panin an kal phei hlawk hlawk a.

Msi chu a thaw hak a,"A va harsa ṭhin tak em! Hetiang a nih reng dawn chuan kan insawn chhuah pawh a la ngai ngei ang,"a ti zawi sep sep a. Pi Ruati chuan,"Max te nupa chuan ngaihdam an rawn dil che mi a?,"a lo ti nghal vat a. Msi chuan,"Aww mahse,annu kha chu a lungawi vak hmel loh khawp mai. Nu,hetiang kan nih reng dawn chuan in luah tur dang kan zawn mai a ngaih hmel,"a lo ti vat a. Pi Ruati chuan,"Ni e nangin engmah tilo mah la,Kimkimi sawn a thik reng dawn tho che a. In luah tur chu ka lo melh ru chhin dawn nia,"a lo ti ve bawk a.

Kimkimi chu a thinrim ngang mai,"I va nep zel zul ve a,khanu bulah khan mei khupin ngaihdam i dil a maw? Mipa i nilo mi a?,"a ti leh buan buan mai a. Max chuan,"A tawk khawp mai aw,thla 2 vel erh awrh chiah kan la innei a nitin zan tin min ânkhum reng mai chu a nih hi. Hetiang mizia hi i nei tih chu hria ila,ka nei malek ang che maw le,"a ti ve hmarh hmarh mai a. Kimkimi chuan,"Ehee chutiang chuan i sawi ngam vel a maw? Hetiang mipa nep lutuk hi i ni tih hria ila,ka nei bik tawp lovang che,"a lo ti let zek a. Max chuan,"A tawk ngawi tawh rawh ka ning zo zai tawh,"a ti vin ṭhak a. Max-a'n ṭawngkam vin taka a tawk a tih tawh hi chuan Kimkimi pawh hi a ṭawng lui ngam bik ngai lo.

Notei chuan,"Mama nupui rapthlak zia hi mi zawng zawngin an sawi,a zahthlak khawp mai,"a ti ve hlak hlak a. Max-a nu chuan,"Nang leh zel chuan lo ngawihbo pui rih teh,i u nupui a nih hi,"a lo ti thung a. Notei chuan,"Ka u nupui ni sawmsarih mah se,a sual tho a lawm. Mi bulah min lo rel vel lehnghal ka hre leh vek sia,zak theilo lutuk,"a ti leh hlak hlak a. Max-a nu chuan,"Bawihte,duhtawk rih teh a ang lo thei e mai,"tiin a fanu chu a lo khap a.

Sangtea chuan a hna ban pahin Msi tlawh kawi tumin Msi te In lam chu a pan ding nghal a. Emily hnen aṭangin Max-a nupuiin a ânkhum dante pawh chu a lo hre ve tawh a,a thinrim khawp mai. Msi pawh be lawk lem lovin Msi te In lamah chuan a in khalh phei leh ta a.

"Nu Ruat,in lo dam em? Tunlai chu inhmuh a khat hle mai,"tih pahin dawr chhungah chuan a rawn lut nghal a. Pi Ruati chuan,"Aw nangmah elaw? Kan damtlan lai tak a ni e,lo ṭhu rawh nangni in dam zawk em?,"a lo ti nghal mawlh mawlh a. Sangtea chuan,"Umm kan damṭha e,ka chhungte pawh an damṭha e. Msi hi a awm lo mi a?,"a ti nghal a. Pi Ruati chuan,"Aw zanin ṭangin a night dawn a,a kal deuh chiah nihkha. I lo nang hman lo chiah chiah,"a lo ti leh a. Sangtea chuan,"Hman zanah Max-a nupuiin a rawn ânkhum vel a ni maw?,"a ti taawl mai a. Pi Ruati chuan,"Nia kha an pa a rawn kal emaw a tia,a rawn zawng a,"a lo ti mai a. Sangtea chuan,"Khanglang chuan a,ka awm lai a nilo chu a va vannei ve a,"a ti khur khur a. Pi Ruati chuan,"Khaih insum teh,kha ngaihdam te pawh an in dil tawh a lawm,"a lo ti vat a. Sangtea chuan,"A hrim hrimin Max-a nupui chuan a duh duha a ânkhum tur a nilo hrim hrim,"a ti leh hluk a. Pi Ruati chua nui a,"I hna i bang a,i rawn kawi nghal a ni maw? Chaw pawh i la ei awm silova,kan Inah ei nghal mai la,"tiin thudang a rawn sawipui daih a. Sangtea chuan,"Nia ka ril a ṭam ve tawh khawp mai,engnge in hmeh a?,"a ti nghal a. Pi Ruati chuan,"I duh zawng hlir kan hmeh,lo va lut la lo va in siam mai ta che aw. Dawr i lo nghak thiam der awm si lo;mahse,i chhungte hrilh la aw,"a ti leh a. Sangtea chuan,"Ka chhungte chuan ka chaw ei leh ei loh an care ve vak lo,a ho lutuk,"tih pahin choka lamah chuan a phei nghal a.


"Khawnge Max?,"Kimkimi chu thinrim tih hriat takin a meng sen râm mai a. Pi Ruati chuan,"A rawn kal miah lo mai hetah chuan,"a lo ti mai a. Kimkimi chuan,"Dawt min hrilh tum suh aw,i fanu nen an chhuak a mi?,"a ti vin hlar mai a. Pi Ruati pawh a dawh thei bik ta lo,"Engang hmeichhia nge nia i inhriat a? I va han zaktheilo ve a,i pasal hi kan Inah a rawn chuang ngai lo,"a ti ve ta phiar phiar mai a. Sangtea pawn an inhau thawm hria in a rawn phei vat a,"Nang hi mi Max-a nupui chu?,"a rawn ti nghal thawr a. Kimkimi chuan,"Khawnge Max?,"a ti leh a. Sangtea chuan,"I pasal awmna chin pawh i hrelo a nia,i va â ve haw rawh,"tih pahin a nui zui hak hak a. Pi Ruati chuan,"Khawngaihin min kalsan teh,ka fanu chuan tunah damdawiinah hna a thawk mek. I pasal erawh a awmna kan hre bik lo a ni,"a ti leh a. Kimkimi chuan,"Hre rawh u ka pasal hi tuman min chhuhsak lovang,"a ti a,thinrim tih hriat takin a kal nghal hlawk hlawk a.

Sangtea chuan,"Khaia Sakei hliam thinrim chu nepte,khatiang em em a hmeichhe rapthlak kha ka vawikhat hmuhna,"a ti a,a nui zui hak hak bawk a. Pi Ruati chuan,"Hetiang hi kan boruak a nih reng dawn chuan In luah tur dang kan zawn pawh a ngai maithei a ni,"a lo ti ve bawk a. Sangtea chuan,"Ni e Msi tan pawh hetiang boruak tawn reng chu a hahthlak dawn e mai. In luah tur chu ka lo zawnpui dawn che u mi?,"a lo ti vat a. Pi Ruati chuan,"Nia a pawi miahlo ang;mahse,kawngpui ân deuh ni thei se aw,"a ti vat a. Sangtea chuan,"Ni e ka lo zawng dawn nia lungngai suh u,"a ti ve bawk a.

Jessy chuan,"Awii Kimkimi han rapthlak zia em em hi,"a rawn ti chhuak hlawl a. Siamtei chuan,"Tinge a?,"a lo ti vat a. Jessy chuan,"Max-a phone ṭangin min rawn text a,'Ka pasal hi minlo chuhbuai tum suh'a rawn ti a nihchu. Awii ka kek chak lutuk,ka thinrim zia hi,"a ti a,a in sehruh nasa mai a. Siamtei chuan,"Khawimaw ka lo chhang a nge,zak theilo lutuk mai a,"tih pahin Jessy phone chu a laksak a,a type nghal mawlh mawlh a.

"Hmeli,zak ve teh aw i pasal lo pawh hi mipa dang an tam lutuk. Chuan maw,i mizia hi thlak rawh hetiang renga i nun i hman chuan Max hian a la ṭhen vat ang che,"

"Eng a? I zak lo mi? Max hian min kalsan theilo tih hre rawh,"

"I hmel a nihchu i rapthlak zia kha hre rawh,"

"I rapthlak fe ka pasal hi lo be tawhlo la a ni mai,"

"Huh a ṭhat nasat chu i pasal hi kan be chak zawk zawk bik hleinem,"

"Nihchuan rawn be tawh suh aw,"

"Rawn be tawh suh i tih vang ni lovin ka be tawh lovang,"

"Huh a va ṭha ve,"

"A nihchu tun bak chu min rawn text tawh suh aw,ramhuai ka text peih tawh lo bye🤣🤣"

"A nihchu,"


Jessy chuan,"Awii a zak theilo e,keichu an Inah hab luh chilh a,han keh buan buan mai a nia ka chak,"a ti leh bawrh bawrh a. Siamtei chuan,"Tunah chuan in bengdai rih rawh aw,engtin emaw min rawn ti leh anihchuan kan 2 in kan luhkhung a nga kan kek hrep dawn nia,"a lo ti vat a.

Kimkimi pawh a rawn raino chho ve ta,rin aiin a raino chu a la na lova. A raino chhung chuan Max-a nu leh pa te pawn an duat khawp mai a,ei tur tui ṭha ṭha an pe a. Hna hahthlak an thawh tir ngai lova,a hahdam thei ang berin an awm tir ti ila kan sawi sual lovang. Kimkimi pawn tlemin a mizia pawh a thlak ve hret hret a,a hmaa a pasal laka a thikthu chhe lutuk pawh kha tlemin a zia ve tawh a. Mahse,Msi a thik na erawh chu a la reh theilo a ni.

Max erawh chu zan rei tak tak thlengin hna an thawk a,zan dar 10.00pm hma in a rawn haw ngai meuh lo a ni. A rawn haw lah hian zu rim a rawn nam ziah leh nghal a,a nupui nen pawh an inhauh phah leh nge nge ṭhin.

A tlangval lai zawng zawng a kohhran leh khawtlanga in hmang tak ni ṭhin kha,tunah chuan pa thinchhe tak leh zu duh tak a lo ni ta. Mi tam zawkin a chhan bera an puh chu a nupui vang ni berin an hria a;mahse,a nu leh pa te chuan aman an zir lo an ti ve thung a.

Max chu rui tawkin a rawn haw leh a,chumi zan chuan a pa in sitting room-ah a lo la nghak ran mai a,"I rawn rui haw leh tawh a ni maw? I nupui raipuar mek hi ngaihtuah ve ta che,patling i nih tawh hi. Ngatinge i puitlin loh em em a?,"a lo ti a. Max chuan,"Ka pa ka awmdan hi hrethiam ni la,hetiang hian min ti lovang,"a lo ti thung a. A pa chuan,"I awmdan maw? Engnge hriatthiam tur awm a? I nupuiin nau a pai mek a,nang lah i lo rui thle mai mai a. I nupui hian zan rei tak tak thlengin a lo nghak ṭhin che a sin," a ti leh a. Max chuan,"Ka pa,i hrethiam lo a ni,"a ti zawi raih a. A pa chuan,"Engnge ka hriatthiam loh chu sawi ta reng che,"a lo ti vat a. Max chuan,"Ka pa,Msi hi a la inthlak lo a sin,"a ti chhuak phawng mai a. A pa chuan,"Chutiang sawi a hun lo,tunah chuan i duhtak nupuiah i nei tawh a. Midang ngaihtuah kha a thiang tawh lo,han in tifai la i nupuiin a lo la nghak ngei ang che. Zanin bak hi chu i rui hmel ka hmu duh tawhlo a nia,"a ti hmak mai a. Max pawh ngawi rengin,an room lam pan chuan pai chhû chhû chungin a chho ve ta a.

"Tunlai chu Max hian zu a in nasa khawp mai,"Pi Ruati chuan kuhva chu a kheh malh malh a. Msi chuan,"Nia hmanni khan Noteiin min hrilh a,an nu lah a rai lian tawh sia,"a lo ti ve mai a. Pi Ruati chuan,"An nu pawh hian a mizia hi a thlak ve deuh tawhin ka hria,nidang aiin a hmel pawh hmuh a nuam daih tawh a sin,"a lo ti ve bawk a. Chutia an nufaa an ti ti malh malh lai chuan Max chu rui deuh chhû hian a rawn lut hlawl mai a. Msi te nufa chu an meng phawk nasa mai a,Msi chuan,"Max,tinge a? I van rui em em?,"a lo ti vat a. Max chuan,"Khawvel hi ka hne ka ning ngawih ngawih,"tih pahin ṭhutthlengah chuan a mu nghal a,a chatthla zui nghal chu a ni mai,a la hnar burh burh zui a. Msi chuan,"Nu,Notei ka phone mai dawn mi? Hetiang ringawt chuan a dik lo,"a ti nghal chûk a. Pi Ruati chuan,"Nia a pawi lo,be tawp mai rawh,"a lo ti vat a.