ZU ZUAR FANU 38

CHAPTER--38

Ziaktu: R'z Thangluah
www.tleirawl.in

Msi te In bul an thlen chuan Sangtea chuan a bike chu a ti thi a. Emily chu a chhuk nghal a,"Ka ngai ngawt ang che u,"a ti zawi sap a. Sangtea chuan,"Rei tak thangbo tur ang maiin tinge i awm a? Zanin hi i dang vek ka hrethiam lo che,"a lo ti vat a. Emily chuan nui sen sen chungin,"Ka ṭha lawm kal ila,"tih pahin Sangtea chu a kai a,Msi te Inah chuan a luh pui nghal a.

"Awii nangni 2 teh hlawl chu,lo ṭhu rawh aw,"Msi chuan a lo chiau au nghal vat a. Emily chuan,"Naktuk i hman hmel silova,kan rawn kal chilh mai che anih hi,"a lo ti vat a. Msi chuan,"Ee naktuk bazar kan tum ni kha tiraw?,"a lo ti vat a. Emily chuan,"Aww ni e Monday ah ka kal a ngai sia,"a lo ti vat a. Msi chuan,"Naktuk chu in pahnihin lo bazar ula,Sunday ah kan Inah chaw kan ei khawm leh nga ni mai lawm. Ei tur chu ka tum ve thung a nga,"a lo ti vat a. Emily chuan,"Naktuk chu hman ve la ka tih tehreng nen aw,"a lo ti leh a. Msi chuan,"Nia keipawn ka chak lutuk mahse,naktuk hian damlo zai tur ka nei a. Min lo hrethiam mai la;mahse,Monday ah chuan Airport thleng chu ka rawn thlah hman ang che,"a lo ti thung a. Emily chuan,"Nihchuan a ṭhat hlauh chu,khawnge Nu Ruati hi?,"a ti nghal a. Msi chuan,"Kan In luah tur kha a va en a,engtiknge kan luh theih hun tur tih te a va zawt a,"a ti a. Emily chuan,"Kimkimi chuan a zia a la thlak chuang na nge a?,"a lo ti thung a. Msi chuan,"Nia kan inhnaih sia,kan inhmu lo thei si lova. Ka tan tak hian a nuamlo leh zual a,in sawn chhuah hi a ṭha maiin kan hria a Max-a nu te pawn min hrethiam lutuk. Mahse,Notei ber hi ka khawngaih ṭhin a,"a lo ti a,ti ti mawlh mawlh pah chuan kuhva chu a thel a. Sangtea chuan,"In chhuak har ka ti ngawt zawk a sin kei chu,"a lo ti bung nghut a.

Max-a pawn a mizia a thlak nasa khawp mai. A nupui chuan engkimah a control vek a,Max lah chuan a nupui thu chu a kawi a ngil in a zawm vek zel leh nghal bawk si. Kimkimi lah hian a on thiam em em mai leh nghal a,"Msi te an chhuah dawn chuan In dang ve daih ila,"Kimkimi chuan naute chu a pawm a. Max chuan,"In dan a? Ka pa in a phal i ring a mi?,"a lo ti nghal vat a. Kimkimi chuan,"I nupui ka nih hi min ngai pawimawh ve la. In chhungah hian ka thu lo ropui si,"a la ti zek zui a. Max chuan,"Nu leh pa kan la nei a,an thu hi kan zah tur a ni a sin. Nangin thu neihna chan i tum phet chuan a dik nang,"a lo ti thung a. Kimkimi chuan,"A nih tak chu thla thar kan In dang lo anihchuan ka nu te In lamah ka let leh mai ang,"a ti hmuk a. Max chuan,"Engvanginmaw i haw a nga? Kan fa hi thla 3 vel chiah a la ni a,tih fahrah i duh a mi?,"a ti let ve ngat a. Kimkimi chuan thinrim zetin,"Kan In dang lo anihchuan ka haw mai ang. Ka mizia chu i hriat kha,ka sawi tawh chu ka ti ngei ngei ṭhin. I pa chu i lo sawipui dawn nia,ka chhuak lawk dawn. Naute hi lo duat viau ang che aw,"a ti a,a inchei hlarh hlarh a,a leng turin a chhuak nghal vang vang a.

Max chuan naute chu a awrh a,a awi dârh dârh a,"Bawihte,muhil rawh le amaa a lo haw ṭep ang,"tih pahin a fanu thla 3 leka upa chu a nuih var var a. A awih mut hnu chuan In hnuai lamah a chhuk thlak pui a,Sitting roomah chuan Notei chu a lo ṭhu tûm bâr mai a,"Eng ang u nge maw ka neih che hi le? U Msi te an chhuak dawn maw? I nupui hi tinge i hlauh em em a?,"a lo ti nghal hlawih hlawih mai a. Max chuan,"I va mak buan buan e aw,Bawihtei a awm ve reng hi,"a lo ti vat a. Notei chuan,"I fanj kha i ngaihtuah viau anihchuan i nupui hi control ta che,"a ti leh hluk a. Max chuan,"Unaunu fel tak i nih ṭhin kha,tinge tiang hian i awm a?,"a ti dam thluam mai a. Notei chuan,"I nupui hian kan chhungkua a chawk buai êm a tin ni,"a ti a. Max chuan,"Ka nupui a nia,a thu te chu ka zawm ve tur a lawm,"a lo ti mai a. Notei chuan,"Hmm a thu chu i zawm tur chu a ni a lawm. Mahse,i nupui thu hi a kawi a ngilin i zawm vek a nih hi. Miin engtinnge an sawi che i hria em? Nupui hlau lutuk,pa lo an ti che a sin,"a ti leh hlak hlak a. Max chuan,"A tawk ka ning,ka ngaithla peih tawh lo ka leng dawn,"a ti  a,chhuah mai a tum a. Notei chuan,"Khawnge i kal dawn?,"a lo ti zui nghal vat a. Max chuan,"Msi te Inah kuhva ka va lei lawk a nge,"a ti mai a. Notei chuan,"A ngai lo keimah ka va kal mai ang. U Msi te Ina i kal apiangin i nupui hian buaina a siam ziah zel,tikhan lo awm rawh ka va lei mai ang,"a ti a,a chhuak nghal daih a.

Msi te pawh Inrinni zanah in thiar chhuak turin thu an ti tlu ta a. An buai ve map map khawp mai,Chanmari veng chhungah tho ;mahse,Max-a te In aṭanga hla ve pangngaiah chuan an in sawn ta a. Kawngpui ân tho a ni a,dawr tur pawh remchang deuhin a awm nghal bawk a,an lawm khawp mai.

An in sawn chhuah zan chuan Emily leh Sangtea pawh an rawn tel ve bawk a. Zan dar 11.00pm velah an in thiar zo fel ve thei hram a ni. Pi Ruati chuan,"Nangni 2 hi engtiknge in hruai in tum a?,"a rawn ti chhuak hlawl mai a. Emily chu a lo nui suk a,"Mipa lam hi an inpeih chuan keichu ka inpeih sa at tawh,"tih pahin Sangtea chu a va mit sir zauh a. Sangtea chu a lo nui hak hak a,"Ee  makpa puitling tak ni tur chuan la in zir fe a ngai a lawm. Lo lungngai suh u,kum 1 a liam leh chuan naute en turin in rawn kal ve sap sap tawh mai ang,"a lo ti ve hlut a. Msi chuan,"Ni e nangni 2 hi a hun ve tawh viau a nia aw,"tih pahin a lo nui ve sun sun a. Emily chuan,"Eee nilo kan la ti leh theilo,Msi hi kan zawn sak leh phawt a ngai lawm,"tih pahin a nui har har a. Sangtea chuan,"Ee ni dawn tak,ka lo ngaihtuah miah lova,"tih pah chuan a lo nui ve hawk hawk a. Msi chuan,"Luck loh hmel e zawnpui te ka ngai a nia,"a ti a,a rawn nui ve bawk bawk a.

Emily chuan a mut hmunah thil tam tak a ngaihtuah a,"Ka zin phawt a nga,ka zin zawhah Msi dinhmun a zirin ka tih tur chu ka ti zawk mai ang,"tiin thu tlukna a siam fel ta a. Mahse,a thil tih tur hi harsa a ti ve takzet a ni,thih hrehin a hreh a ni.

Pathianni tlai a ni a,Msi te In luah thar lawm ni pahfawmin Msi te Inah chuan chaw chu an eikhawm ngei a. An hlim tlang dar dar khawp mai,"Ee thla la ang u naktukah ka kal tawh dawn sia,damin ka rawn haw dawn nge haw dawnlo pawh a hriat si loh,"tiin Emily chuan a selfie stick chu a rawn phawrh a,a phone chu a fit nghal mawlh mawlh a,"Leeee lo inring ru aw,Nu Ruat lo lang ve la,"tih pahin a selfie stick chu a lek kang va va a. Vawi 5 vel a click hnu chuan,"Awiii lawkin ka partner ka biak lawk a ngai,kan be lawk aw,"tih pahin pawn lamah chuan a chhuak nghal daih a.

Msi te an chhuah hnu chuan Max te pawh In dang turin,Msi te In luah ṭhinah chuan an in suan lut ve ta rawih a. Ṭhenawm khawvengte chuan Kimkimi chu an sawi duh hlawm hle mai,Mo suak tak leh hmeichhe sual tak angin an ngai vek a ni. Max lah chuan a nupui thlavang chu a hauhna em em lawi bawk si. An In dan hnu aṭang chuan a nu leh pa te nen pawh an in tlawh pawh khat khawp mai,building khata awm ni mah se,an inkar chu a khi mek a ni. Tun hmaa a unaupa ngai em em a,a kalna apianga zui tum ziah ṭhin pawh khan,tunah chuan a unaupa chu kar 1 vawikhatmah hmuh loh changte pawh a nei ve ta.


Emily pawh China lamah a sumdawnna lam buaipuiin a buai ve khawp mai. A chhungte leh Sangtea te pawh zan lamah lo chuan a be hman meuh lo a ni.

Sangtea pawh a pa hovin an awm a;mahse,a pa chuan hma lam a pan a a nupui uirena chu theihnghilhin. Pathian hnaih nan a hmang zawk a,tun hma zawng aiin a hmel pawh hmuh a nuam tawh zawk bawk a. Sangtea pawn an In chu nuam a ti ṭhin hle mai. Mahse,Nu awmlohna chhungkua leh Nu awmna chhungkua chu a lo in an loh zia a hre ve zel a. In chhung khurah hian Nu dinhmun pawimawh zia leh an hlutzia erawh a hre chho telh telh thung a. A nu khan a uire san hma khan,thu ṭha hrilhin zilh ve vak ṭhin lo mah se,a awm loh chiah hi chuan nu hlutzia a hre chho ve telh telh mai. Mahse,tunah chuan a nu chuan a uire san a,a duhtak bulah hun a hmang mek chu a ni si a. Ely pawh an bulah chuan a lungawi vak lo a ni ngei ang,a nu bula awm turin a chhuah san ve ta si a. Tunah chuan a farnu Partei leh amah nen chiah a pa chu an awmpui tawh a ni.


Msi chu Casualty-a a duty ni a ni a,an buai map map khawp mai. Tlangval 5 vel hian mipa 1 hliam tuar,thisen nen a inpawlh nuai chu an rawm zawn lut a. Msi chuan a lo buaipui nghal vat vat a,hliam tuar chuan a hmai leh a lu velah hliam a tuar. Msi chuan Max a ni tih a hre nghal a;mahse,a rawn hruaitu te chu a hmelhriat tumah an awm lo thung a,"A chhungte in ni em?,"tih pahin Max-a hliam chu a bawihsawm nghal mawlh mawlh a. A rawn hruaitu zinga 1 chuan,"A chhungte em em pawh kan ni hran lo,picnic tur kan ni a. Kawngpui sirah tihian a lo let reng a kan lo tlanpui tawp a nih hi,"a lo ti a. Msi chuan,"In ti lawmawm lutuk e,tunah chuan kalsan tawh mai rawh u. Keiman ka lo buaipui mai ang,kan veng a mi a nia,"a ti a,Max-a hmai vela thisen kai niai te chu a hru fai a. Tlangval chuan,"Anih kan kal mai ang aw,hei ₹1000 hi a damdawi vel lei nan aw,"tiin ₹500 note 2 hi a rawn phawrh a. Msi chuan,"Aaa a ngailo a sin,la leh rawh,"a lo ti a. Mahse,tlangval chuan a la let duh lova,"Dam deuhin In a thlen ngei theih nan kan lo ṭawngṭai pui dawn nia,kan kal a nge,"tiin an kal ta a.

Msi chuan Max-a hliam vel a buaipui zawh chuan Notei chu a call nghal a;

"Aw U Ms,"

"Inah i awm em?,"

"Aih awm lo tinge? Mahse,ka haw mek a ka thleng ṭep,"

"Tunah damdawiinah rawn kal nghal ru aw,i u in accident a tawk a,"

"Maww? A na viau em? Engtinnge a awm?,"

"Tunah chuan a muhil rih a,a ngaihtuahawm love a theih hram chuan in rawn kal hma dawn nia aw,"

"Awle kan lo kal nghal a ni mai,ka lawm lutuk aw,"

"Awle nih ka dah aw,"

"Awle,"


Max chu zu rim a nam ram ram mai a,Msi chuan a en vang vang a,"Tlangval fel tak ni ṭhin kha,tinge i nun i tihchhiat vek tak mai le?,"tiin a ma hriat tawk lek chuan a phun sep sep a.

Rei vak lo hnuah Notei leh a nu chu an rawn thleng nghal a. Notei chuan,"U Mama chu engtinnge a awm a?,"a rawn ti nghal mawlh mawlh a. Msi chuan,"Tunah chuan ngaihtuahawm a ni tawh love,a muhil rih a,"a lo ti vat a.