CHAPTER--39
Ziaktu: R'z Thangluah
www.tleirawl.in
Notei chu a mangang khawp mai,"U Ms,mama hi a thi dawnlo tiraw?,"a ti mawlh mawlh a. Msi chuan,"Umm a ṭha leh vat dawnba lawm. I rilru ti hah duh suh,tunah chuan nachhawkna in a chhawk aniang a muhil mek rih e,"a lo ti nghal vat a. Max-a nu chuan,"Kan chhungkua hi chuan kan tibuai ve ngawt mai che,"tiin in thlahrung tih hriat tak hian Msi chu a rawn melh a. Msi chuan,"In thlahrunna tur a awm hleinem. Hengte chu Doctor kan nihna anga kan tih ve tur reng a lawm. E chuan,amah rawn hruaitu te khan 1000 hi damdawi vel lei nan an ti a,an dah a,"tih pahin Max-a nu chu a pe a. Max-a nu chuan,"Awiawww,a va lawmawm leh zel ve maw le. Tute nge chumi te chu i hre ngai hrim hrim em?,"a lo ti vat a. Msi chuan,"Aih ka hriat ngai mi pawh an ni hran lo,an picnic kal turin kawng sira a lo let reng an hmu a,an lo kal pui tawp a ni awm e,"tiin thil thlen dan chu a sawi chhawng nghal mawlh mawlh a.
"I zu in rah anihkha vawi tam in tawhlo turin ka ti che a. Mahse,i in zel a ngaihsak che pawh hi ka peihlo,"Kimkimi chu a tûm deuh bar a. Max-a nu chuan zaidam deuhin,"Aww i pasal a nia,i enkawl tur chu a ni a lawm. Inneih thutiamah khan a nuamah leh a hrehawmah pawh tiin in tiam vek tawh kha. Khatin mahni fate pa an tu ngai lo,"a lo ti a. Kimkimi chuan,"In fapa hi chu in ṭan ve ngawt mai,a tir aṭang khan min duhlo sa hrim hrim a lawm. Mahse,in fapa hian min duh êm avangin ka nei tlang mai mai zawk a nih hi,"a ti ta phiar phiar mai a. Max chuan khum aṭangin a nupui chu a lo melh rum khawp mai a,"I va han rapthlak e aw,ka nu kha ṭawngkam vin in vawikhatmah be tawh suh ang che. Tuna ṭawngkam vina i biak kha a hmasa ber leh a hnuhnung ber ni rawh se aw,"a lo ti ve hmak hmak mai a. Kimkimi chuan,"Hmm in va in ṭan nufa ve a,in In chhungah hi chuan ka leng ve thlawtlo a lawm tiraw?,"a ti leh hmak hmak a. Max-a nu chuan,"Khatikhan a kawi zawngin la lo la,kan mo neihchhun i ni a. Kan fanu aipawn kan duat che a sin,"a lo ti dam thluam a. Kimkimi chuan,"A lo nihchu ka ning ka chhuak dawn,"tih pahin Walker-a naute chu a paw lawk a,kal mai a tum a. Mahse,Max-a nu chuan a lo dang vat a,"Chhuak turin kan ti reng reng lo che a nia aw,kan thusawi hi khawngaihin hriatthiam tum hram teh,"a ti mawlh mawlh a. Kimkimi chuan,"Ka kal dawn min dang suh,zu rui pa hi ka ning,"a ti a,a chhuak zui nghal a. Max chuan,"A duh duh naah kal rawh se,kan In aia nawmsakna a hre chuang lovang. In hauh deuh hlekin chhuah a tum reng zel a,chhuak daih rawh se,"a lo ti ve bul bul a.
Emily pawh a zinnaah thla 1 chhung teh meuh a cham hnu chuan,a rawn haw ve ta. Mahse,ṭum danga a rawn haw nen a mizia a inang ta lo hle mai,a hmelah chuan hlim hmel hmuh tur reng reng a awm ngai lo. Mahse,a ṭhian ṭha ber leh a mipa hmangaih ber te bula a awm chuan a hlim takin a nui thei ṭhin.
Pathianni zing a ni a,Msi chuan eirawng a bawl malh malh a. A nu erawh chuan kuhva a kheh thung a,"Bawihi,i phone a ri nia rawn chhang rawh,"Pi Ruati chuan sitting room lam ṭang chuan a fanu chu a rawn au lauh lauh a. Msi chuan,"Awle ka rawn kal nghal,"tih pahin a rawn phei nghal a,"Emily nih hi,"tih pahin phone call chu a chhang nghal a.
"Aww Emi,"
"Bawih,vawiin i inkhawm dawn em?,"
"Aw khawm dawn e,i inkhawm dawnlo mi?,"
"Dawn tho e;mahse,chawhnu chu ka off dawn a. Sangtea nen kan lo len i phal em?,"
"Eee phal ee nidangah pawh ka phalna i la ngai silova,tinge tuna taka min dil vel a?,"
"Ka i thlahrung a lawm,"
"Ṭhiante bulah tunge inthlahrung ngai,chawhnu chu keipawh ka inkhawm lovang in lo kal dawn nia. Duh leh chaw te pawh in ei nghal daih nga,"
"Chaw ei chu ka inthlahrung tawh,chaw kan lo ei ngun thei e mai. Chubakah tunlai chu ka chaw ei a tui lutuk a,mi Ina chaw ei chi pawh ka ni lo,"
"Hmm mi kan nih loh hi i chhungte kan nih hi,ngeiawm viau zel suh,"
"Haha nia ti mai mai nihkha,nihchuan chawhnu chu aww,"
"Umm lo kal ngei ngei ang che u aw,"
"Awle nih ka dah phawt ang aw,"
"Umm bye chaw eitui aw,"
"Umm chaw eitui le,"
Emily chuan a thil tih tur harsa ti hle mah se,tihpuitlin ngei a tum a ni,"Engpawh thleng dawn se,ka thil tih tur hi ka ṭhulh tur a ni lo,"tiin a rilru a siam fel ta a.
Chawhma inkhawm banah chuan Emily leh Sangtea te pawh Msi te In lam panin an rawn in phur phei leh vuk vuk a. Emily chuan Sangtea chu a kuah a,"Lalpa,ka thil tih turah hian chakna min pe mawlh teh aw,"tiin a rilru in a ṭawngṭai mawlh mawlh a. Ni e,a thil tih tur chu thih hrehin a hreh a ni;mahse,a tih ngei a si a rilru a hah a hlim har a ti takzet a ni.
Msi te In chu an thleng ta,a thinphu te chu a hma aiin a phu rang emaw tih mai turin a in thum rawn tlut tlut mai a,a thil tih tur chu a huphurh takzet a ni. Mahse,a la in control thei hram hram a ni.
Msi chuan nui sâng chungin,"Awii lo kal ru in ngaihawm dun lutuk,"a lo ti nghal mawlh mawlh a. Emily chuan,"Awii nang deuh i ngaihawm,tunlai chu kan buai tlang anih hi tiraw? Kan in hmu hman meuh hlawm lo a ni,"a lo ti ve bawk a. Msi chuan,"Ni e a dik chiah lawm i sumdawnna te i tluang em?,"a lo ti leh nghal vat a. Emily chuan,"Imm tunlai chu in hralh pawh a pangngai khawp mai,"a lo ti a,an ṭhian dun chuan an hlim dun khawp mai. Sangtea chuan,"Ka awm ve tho hi,"a lo ti sup a. Msi chuan,"Awii kan lo theihnghilh daih che a,tihpalh lutuk,"tih pahin a nui bawk bawk a. Emily pawh chuan nui hawk hawk chungin,"I ngawi reng a,i awm ve tih kan lo theihnghilh daih a,"a lo ti ve bawk a. Sangtea chuan,"Nimin chu hna kan ngah lutuk a,zan dar 7 velah ka haw ve chiah. Kan hna hi chu Sunday bak kan awl ngai bawk silova,a hahthlak ve angreng khawp mai...Min zawh hma in ka sawi mai ang,"a lo ti nghal zuah zuah a. Msi leh Emily chu an in melh a,an nui hawk hawk a,"Awiii i chau awm sia,hahdam rih la,"Emily chuan Sangtea chu a rawn melh a. Sangtea chuan,"Ka chau lo e a,"a lo ti bung nghut a. Msi chuan,"Bawih,in pa hi a titau in ka hria. Lo in thlem ru aw,thingpui ka va lum daih a nge,"tih pahin choka lamah chuan a phei nghal daih a.
Emily chuan,"Ka va zung lawk,"tih pahin bathroom lam a pan nghal a. Bathroomah chuan a lut a,darthlalang hmaah chuan a ding a,"Lalpa,min pui hram teh keimah chuan ka thei lo a ni. A va hahthlak tak em! Engtinnge ka sawi tak ang? Ka van hupuhurh tak em! Lalpa,min pui mawlh teh,"a mittui chu a rawn luang nghal zung zung a,"Nilo ka ti theilo,tunah chuan ka thei rih lo. Ka inbuatsaih phawt a ngai;mahse,a van hrehawm tak em!,"a mittui chu a hru hul nghal sawk sawk a,bathroom aṭang chuan a chhuak leh nghal a.
Msi chuan,"Bawih,i ṭha em?,"tiin a lo zawt vat a. Emily chuan,"Aww ka ṭha lawm tinge a?,"tiin nui lui tih hriat tak hian a ṭhen sak a. Msi chuan,"I ṭap a mi a? I chungah engnge thleng a? I ṭhiannu hi engmah min hrilh i tum lo mi?,"a ti leh mawlh mawlh a. Emily chuan,"Khawnge Sangtea?,"a lo ti thung a. Msi chuan,"A chhuak lawk a,i chungah engnge thleng min hrilh rawh. Hrilh tlakah min ngailo a mi?,"a ti leh mawlh mawlh a. Emily chuan,"Ka ṭha lawm min ngaihtuah suh,"a ti leh;mahse,a mittui erawh a dang zo meuh si lo. Msi lah chu a ngaih a ṭhalo telh telh mai bawk si,"Sangtea nen in inkarah thil thleng a awm mi? Khawngaihin min hrilh teh,"a ti leh mawlh mawlh a. Emily chuan,"Ka ṭhian,ka hmangaih lutuk che. Nakinah engkim chu ka hrilh ang che. Mahse,tunah chuan engmah min zawt rih suh aw. Chuan,Sangtea nen kan inkarah engmah thil thleng a awmlo bawk a nia aw,"tih pahin Msi chu a kuah a,a in hnit hlawp hlawp mai a. Msi chuan,"Awle ṭap tawh suh le,tunah i sawi theilo anihpawn engtik hunah pawh i tan ka awm reng dawn nia aw. I duh hun hunah min hrilh tawp dawn nia aw,"tiin Emily chu a kuah a.
Kimkimi pawh rei a tlan ngam bik lo,a pa zawnte bulah chuan kar 2/3 vel zen zawn chu a awm ve a. Mahse,nuam a ti bik lo a niang Max-a bulah,"Min lo hruai tawh teh,"tiin a chah chhen mai a. Max-a pawh chuan chuti na na na chu tiin a hruai let leh a;mahse,Kimkimi chuan a zia a thlak phah chuang lo reng reng a. Max lah chuan nitin zu a in a,a zu in nasat avangin a hna aṭanga suspend a ni bawk a. An chhungkua chu an buai map map hle mai.
Notei chuan,"Nu,Mama hi a la haw lo nia. U Kimkimi'n min lo text a,"tiin a nu chu hrilh nghal mawlh mawlh a. A nu chuan,"Aww a va hahthlak ṭhin tak em aw,i pa han hrilh teh,"a lo ti nghal a. Notei chu in chung lamah a tlan chho nghal hlawk hlawk a.
Msi pawh a hna aṭanga haw turin a inbuatsaih mek a,a rilruah chuan a ṭhiannu hlir chu a awm a. A ṭhiannu hian a lakah zep ruk a nei tih chu a hre chiang mai a;mahse,chu thil chu engnge ni ta ang? A ngaihtuah nasat poh leh a bo tulh tulh mai bawk si,"Umm engpawh nise,min hrilh hun nghak phawt mai ang,"tiin damdawiin aṭang chuan a chhuak a,kawngpui lam panin kawngpui sirah chuan taxi a chang a.
Rei pawh a chan hma in taxi ruak chu a rawn tlan nghal a,Msi chuan a lo phar a an veng lam panin an tlan chhuak nghal a. Thui pawh an tlan hma in kawng sir footpath ah chuan Max-a rui tawka a lo kal pai ṭuang ṭuang chu Msi chuan a hmu a,"Ka pu,khawngaihin ding lawk a rei lovang,"tiin Taxi pu a hrilh a,Taxi a din rual rual chuan Msi chu a chhuk nghal a,"Max,hetah engnge i tih a? Tinge i va rui ve a,lo kal rawh ka hruai haw ang che aw,"tiin a han kai a. Max chuan,"Khawvel ka chen a nih hi,"a lo ti chhur chhur a. Msi chuan,"Aw lo lut phawt teh,"tiin Taxi ah chuan a nam lut rawk rawk a,"Ka pu,pawi ka ti takzet min lo hrethiam lawk mai rawh aw. Ka ṭhianpa nia,chuan man zawng zawng chu ka pek kep vek mai ang,"tiin thuphâ a chawi nghal mawlh mawlh a. Taxi pu pawh chuan,"Ee hrethiam lutuk e,khawi vengah nge a awm i ṭhianpa chu?,"a lo ti vat a. Msi chuan,"Kan veng a in ang Chanmari ah tho a nia,"a lo ti nghal vat a.
Max te In bul an thlen chuan Msi chuan Notei chu a call nghal a,rei vak lo hnuah Notei leh Kimkimi leh Max-nu chu an rawn chhuak nghal a. Kimkimi chuan,"Nangnu bawk maw? Ka pasal hi zu i lo pe leh mi a? Zak theilo lutuk mai,zu in zuar ṭhin tih hi ka hre ve vek a nia aw,"a lo ti nghal tun tun a. Msi chuan engmah a sawi lo,ngawi rengin Max chu Taxi aṭang chuan a rawn kai chhuak a. Taxi pu chuan mak tih hmel takin Kimkimi chu a rawn en haw mai a,"Ka pi,i va mak ve a. He nula hian i pasal hi kawngsira a zu rui a hmu a,a khawngaih a a rawn hruai haw a nih hi,"a lo ti ve hmak hmak a. Max-nu chuan,"Awii Ms,kan va tibuai ṭhin tak che em. Kan lawm rual rualin pawi kan ti lutuk aw,"tiin thupha chaw pahin lawmthu a sawi mawlh mawlh a. Kimkimi chuan,"Hmm kal ang,"tih pahin a pasal zu rui chu a kai a,in chhung lam panin a kalpui nghal hlawk hlawk a.
No comments:
Thanks for your comment.