ZU ZUAR FANU 40

CHAPTER--40

Ziaktu: R'z Thangluah

Columnist, www.tleirawl.in

"Khanu bulah khan i lo va rui thle vel mai mai a maw? I nupui leh i fanu hi min ngaihtuah ve miahlo a mi?,"Kimkimi chu a âng nghal hlawih hlawih mai a. Max chuan,"Hmeichhe rapthlak tak i nih hi,ka nei peih tawhlo che chhuak rawh,"a ti vin tuarh mai a. Kimkimi chuan,"Ehee chhuak turin min duh maw? A ṭha lawm ka chhuak khawp ang,nanglo pawh hi mipa an tam lutuk,"a ti leh hlawih hlawih a. Max chuan,"Kei lo mipa an tam chuan chung ho bulah chuan va awm rawh,ka fanu erawh kha chu hruai suh ang che,"a lo ti chhur chhur a. An inhauh buai lai tak chuan Max-a nu leh pa te chu an rawn lut ve nghal a.

Max-a pa chuan(Max-nu leh pa hming hi chapter hma lamah khan ka ti lang lo lak lawh a,hming nei lovin awm law law mai rawh se aw),"Ka fapa chu i ni ve sia maw? Min tih zah zia hi i hria em?,"tiin a fapa chu a zilh mawlh mawlh mai a. Max chuan,"Kha ramhuainu kha ka nei duh tawh lo,"a rawn ti leh a. Max-a pa chuan,"Nupui pasal inneihna hi tih mai mai a nilo tih hi i hria em? Duhtak in i nei a,thihna in in chungah thla a zar te a nih ngawt loh chuan in inṭhen ngai lovang. Mipa zawk i ni a,pasal te zu rui reng chu tu nupuiin nge ning lo bik ang?,"a ti leh mawlh mawlh mai a. Max chuan,"Ka nei duh tawhlo a ni mai lawm,"a ti leh chhur chhur a. Max-a pa chuan,"I ruih a reh hunah ka hau ṭha leh ang che. Chuan,nangpawh Kimkim,eng emaw hlekah tlan tum reng lo la. Ka fapa nupui i nihna ang nilovin ka fanu i nihna angin ka hrilh che a nihchu. Nupa hlim tak ni turin in tan hian Pathian hnenah kan dil reng ṭhin tih hi theihnghilh lo u la,in hauh apianga inṭhen tih vel te kha sawi ri tawh reng reng suh ang che u. Chuan,nangkha i ruih a reh hunah kan Inah rawn chho ang che,"a ti a,a duhtawk a sawi zawh hnu chuan kut hnuk suihin ngawi rengin a chhuak nal nal a.

Max-nu erawh a la awm khawmuang thung a,"Ni e i pa thusawi kha thudik vek a ni a. Chuvang chuan inhau reng lovin insiam ṭhat in tum ve dawn nia aw. In fanu pawh a rawn lian a nga,nu leh pa inhau reng kara seilian tur chuan i phal ka ring bik lo. Keini chuan inṭhen hi kan phallo bur tih hi hre reng bawk ang che aw,"tiin dam thlapin Kimkimi chu a hrilh leh a. Kimkimi pawh chu a bu ve nghat nghat a;mahse,a rilru chhungril erawh thinur na  in a la khat a.

Emily chuan a bungrua vel chu a pack a,"Ka ti thei tawh ngei ngei ang,"tiin a phun sep sep a. A nu chuan a rawn kuah a,"Bawihte,i ṭha ang tiraw?,"a rawn ti a. Emily chuan,"Aww Nu,ka ṭha lawm mahse,harsa ka van ti tak,"tih pahin a nu chu a rawn kuah a. A nu chuan,"Bawihte,nang chuan kum tam fê hlim takin hun i lo hmang tawh a. Mahse,i ṭhiannu erawh chuan i hlimna turin ama hlimna tur zawng zawng pawh a hlan che a sin. Tunah chuan i ṭhiannu hnenah hian khang hlimna a pek che kha i pek let ve a ngai tawh a lawm,"tiin a fanu chu a hrilh malh malh a. Emily chuan,"Nu,Msi hi chu ka tluk lo ngawt mai tiraw? A ni chuan ka nat a duh ngai lova,Sangtea nen kan intih thiamloh pawn ka thiam lohnaah pawh min hau ngai lo. Sangtea zawk a hau ṭhin,Sangtea bulah pawh'Ka ṭhiannu hi i tina tur a ni lo. Hlim deuhin siam ang che,'tiin a sawi a sin. Mahse,Nu...,"a in hnit nghal hlawp hlawp a. A nu chuan a kuah a,"Bawihte,in hmangaih tak te chu Pathianin a in tawn tir ṭhin an tihkha. Pathianin nun bul ṭan ṭha leh turin hun ṭha tak a pe che a,he hun hi i bawh pelh tur a ni lo. Sangtea hi i lo hmangaih miahlo maithei bawk a sin,nakinah i hmangaih em em leh nangmah hmangaihtu chu Pathianin a rawn pe mai ang che,"tiin a fanu chu a hnêm mawlh mawlh a. Emily chuan,"Nu,ka hmangaih che. I thusawi hi ka hre reng ang,zaninah chuan engkim ka sawi vek ang. Nu,min lo ṭawngṭaipui ang che aw,"a ti mawlh mawlh a. A nu chuan,"Awle tehreng mai,lungngai miah suh i nu hian ka pui reng dawn che a lawm,"tiin Emily mittui chu a hruk hul sak a.

Emily chuan Sangtea chu a kuah vawng vawng a,"Msi te Inah min kalpui leh lawk la aw,a rei dawn chuang lova,"tih pahin Sangtea chu a rawn melh chho a. Sangtea chuan,"Awle tehreng mai,i thu te chu ka hnial ngam hleinem,"tih pahin Emily biangah chuan a rawn fawh sak zauh a. Emily chuan,"I hmuiah khan ka fawh i phal em?,"a rawn ti zawi sap a. Sangtea chuan,"Ka hmuia fawp turin phalna lak a ngai hleinem,"tih pahin a lo nui suk a. Emily chuan Sangtea hmui ah chuan zawitein a fawp a,"Kal tawh ila,"tih pahin Sangtea hmui a fawh chu a thlah a,lehlam a hawia,a kal nghal daih a. Sangtea'n a rawn umphak hma in a mittui chu a a hru hul nghal zung zung a.

Emily leh Sangtea te rawn in kai lut a hmuh chuan a lo hlim kher mai,"Awii nangni pahnih teh hlawl chu,keimah chauhin ka awm laiin in rawn kal a ka van lawm tak. Lo ṭhu rawh u,"a lo ti nghal sawk sawk a. Sangtea chuan,"Hei i ṭhiannu hian a bialpa aia ngaih a nei a,a fair lo khawp mai. Zan zanah kan rawn pan leh che a nih hi,"tih pahin a lo nui sun sun a. Msi chuan,"Nangchu a ngai vak lo che ni maw? I duat lo aniang chu,"tih pahin a lo nui sâng a. Sangtea chuan,"Hmmm duat ang chu le;mahse,engkimah i hming a lam anihkha,"a lo ti hluk a. Msi chu a nui hawk hawk a,"Putarte,i nuihzathlak e,"tih pahin Sangtea sam chu a rawn tuai sak a. Sangtea chuan,"Ka sam hi tuai chhe ziah suh,darthlalang hmaah ka din rei zia pawh i hre lo,"a rawn ti leh hluk a. Msi chuan,"Ka ṭhiannu hi han lerh san vaih teh aw,ka sual thiam khawp ang,"tiin a ṭhiannu thlavang chu a hauh leh nghal ṭung mai a. Emily chuan,"Ka va inthiar lawk,ka pum a dik theilo reng reng,"tih pahin bathroom lam a pan nghal a.

"Ms,ka van tluk lo tak che em. Nang chuan ka hlim na turin i mipa hmangaih em em chu min pe a. Tichung chuan,ka hlim loh hlau in khapa bulah khan ka thlavang i la hauh char char zel leh nghal. I ṭhian ni tlak pawh ka ni lo,i hlimna ka laksak vek ta che a nih hi,"lungchhe zetin a in hnit nghal hlawp hlawp a.

"Hre reng ang che,ka ṭhiannu hi i tina tur a ni lo. Keichu min ngaihtuah suh,ka ṭhiannu hi na turin ka duh lo,"Msi chuan kuhva chu a kheh malh malh a. Sangtea chuan Msi kuhva chehna chu a lak sak a,"Ka hmangaih che tih hi tinge i hriatthiam duh miah lohva? I ṭhiannu hi ka hmangaih chu a ni lo,"tiin Msi kut chu a vuan a. Msi chuan,"Min hmangaih suh keichuan ka ṭhiannu hlimna ka duh ber. A hlim chuan ka hlim a ni mai,"a ti leh a. Sangtea chuan,"Nangpawn min hmangaih tih ka hria a sin. I thinlung hi ka hmuh loh i ring a mi?,"a ti leh a. Msi chuan,"A tawk engmah sawi tawh suh. Ka ṭhiannu thinlung hi tina suh ang che,"a ti a,kuhva chu a kheh leh nghal a.

"Sawi duh ka nei a,"Emily chu a ṭahna vangin a mit a sen râm mai a. Msi chuan,"Bawih,i chungah engnge thleng a? I ṭap a mi?,"a rawn ti nghal mawlh mawlh a. Emily chuan,"Ka ṭha lawm min ngaihtuah suh,"a lo ti mai a. Mahse,Msi ngaih chu a ṭhalo takzet a ni,"Engnge thleng ka tih chu,"a ti leh a. Emily chuan engmah a sawi tawhlo Msi kut chu a la a,Sangtea kut a la leh a,"In pahnih hian min ngaidam mawlh mawlh ang che u aw,in hmangaih tak te chu Pathianin a intawn tir ṭhin. Ka lo hrethiam ngailo che u ka tihpalh aw,min ngaidam mawlh mawlh ang che u aw. Hlim deuhin awm ang che u aw,"insûm tum viau mah se,a theilo a ni. A biangah chuan mittui a rawn luang thla ngiai ngiai a. Msi leh Sangtea chuan sawi mai tur pawh an hre lo.

"Bawih,eng thil nge i tih hi?,"Msi chuan Emily chu a en hâ mai a. Emily chuan,"Khang hun chhung zawng zawngah khan i hlimna ka lak sak che a,tunah chuan hlim hi i phû ve tawh a sin. I hmangaih tak chu i ta a ni tawh a sin,"Msi chu a kuah a,lungchhe takin a in hnit nghal hlawp hlawp a. Msi chuan,"Bawih,i hlim chuan ka hlim ka tihkha. I hlimna hi laksak che ka duhlo a sin,"a lo ti ve mawlh mawlh bawk a. Sangtea erawh an bulah a lo ṭhu ngawi reng thung a.

"Naktuk aṭangin nun bul ka ṭan ṭha tawh dawn a lawm,min ngaihtuah suh ka ṭhian ka puitling ve tawh a sin. Nang chu hun harsa tak i tawh lai pawn ka tan i awm a,min pui ṭhin. Tunah chuan khang zawng zawng kha ka rul let ve tawh ang che. Khawvela ka ṭhian ṭha ber  i ni reng ang,ka hmangaih che ka ṭhian,"a mittui chu dan tum sateh mah se,a dang zo lo a ni. Msi pawn engmah a sawi thei bik lo,a ṭhiannu chu a kuah a lungchhe em em in a in hnit ve hlawp hlawp mai a.

Emily chuan,"Ka hmuh lai hian hlim taka in inkuah lai ka hmu duh a ni,"a ti tlat a. Msi chuan,"Bawih,i hlimna hi ka duh ber a ni a sin,"a ti leh a. Emily chuan,"Ka hlim a lawm,ka hlim laia i hlim ṭhin ang chiah khan keipawh hi i hlim chuan ka hlim a sin,"a lo ti vat a,a nui sâng a. Sangtea chuan engmah sawi tur a hre lo,ngawi rengin a bula ṭhu hmeichhe pahnih ti ti chu a lo ngaithla ringawt mai a ni. Emily bawk chuan,"Heyy lubuk,ka ṭhiannu hi i hmangaih takzet a nihchuan a kut i vawnna hi thlah suh ang che aw. I hria em? Nitin hlim takin siam ṭhin ang che aw,"tiin Sangtea chu a melh a. Sangtea chuan,"Awle tehreng mai. Chuan,tun aṭangin nang hi ka ex i ni tawh dawn tihna mi?,"tih pahin a nui suk a. Emily chu a nui var var a,"Aih i ex nih ka duh lo,i ṭhian nih ka duh,"a lo ti vat a. Sangtea chuan,"Awle a ṭhat nasat chu ṭhiannu fel deuh ka nei che a nihchu,"a lo ti vat a. Msi erawh chuan,"Tihian kan 3 hian 3 idiots kan ni tihna ni mai lawm. Kan vaiin hmeichhia vek kan ni bawk,"tih pahin a lo nui hawk hawk a. Sangtea chuan,"Hmm hmeichhia ka nilo e a,in duh leh in 2 kha 3 idiots nih rawh u,"a lo ti deuh hmuk a. Emily chuan,"2 chu 3 idiots anih theih a mi? Teh tuh mai,zeilo thei ropui si,"tih pahin a lo nui har har a.

Emily chuan nun bul ṭan ṭha turin a pi te khuaah hun rei tak cham turin Zawlkhawpui chu a chhuahsan ta a. Sangtea leh Msi te erawh hlim taka inkawm chho chungin an ṭhiannu rilru dam hma chu in ngaizawng lo turin rilru an siam fel thung a. Mahse,Sangtea erawh chuan Msi chu a bialnu ang chiahin a en a. Zan tin an Inah pawh a leng awl ngai lo,Msi erawh chuan ṭhian ṭha angin a la en thung a.

Max erawh in siam ṭhat aiin a nun chuan chhiat lam a pan zel zawk si. A nupui erawh in phakar takin a nun a hmang chho a,an nupa nun chu a hahthlak takzet a ni. Kimkimi chuan Max-a nu leh pa te tih lawm dan a thiam tawh a,eng pawh thleng se an fapa chu an ṭan ngai lo. Ama thiam loh ah pawh an fapa zawk chuan hauh a tuar leh ṭhin,Kimkimi erawh chuan Max chu a hlat tial tial thung a.

Max pawn a hna a zawm leh tawh a;mahse,a zu in erawh a bansan chuang lo. Office hun chhung erawh chuan a rui ngailo thung a.

Kimkimi chuan engmah thawh chhuah neih loh tawp chu duh lovin,sumdawnna lam pang a ti thar ve a. A tir lam a la ni bawk a, Max-a nu te pawn an tuipui ve khawp mai. Notei pawn a hma aichuan Kimkimi chu a nel ve tawh a;mahse,Msi a nel ang em em chuan a nel lo a ni.

Emily chu a pi te khuaah kar 1 vel zen zawn a awm ve ta. Khawpui boruak aichuan thingtlang boruak chu nuam a ti daih zawk leh nghal a,chhun lamah nise nau awm bak tih tur em em a nei lova. Zan lamah erawh tlangval in leng a nei leh nulh ṭhin a;mahse,chung ho chuan a nun chu an ti hahdam em em thung a.

Msi pawh damdawiin lamah a buai leh map map khawp mai. OPD a duty ni a ni a,OPD a in entir tur ho chu an zi nuai nuai mai a. Msi chuan peihlo viau mah se,a tih tur a ni miau si a chau chung chung pawn a tih tur chu a ṭhulh ngai lo.

Zanah chuan Sangtea chuan Msi te In lam bawk chu a pan leh a. Msi leh a nu an lo awm a,in leng dang mipa 1 an lo nei bawk a. Msi chuan,"Lo kal rawh,rawn ṭhu rawh i va fel ve a,"a lo ti nghal vat a. Sangtea chuan,"Fel vang em em pawh a ni hran lo,"tih pahin za vak lovin a nui suk a. Msi chuan,"Ee hei hi ka doctor zir pui ṭhin a nia,Dr. Mpa a nia chuan a ni hi ka ṭhianpa Sangtea a nih hi,"tiin a in hmelhriat tir nghal a. Mpa chuan,"Hi Mpa ka nia,"tih pahin a kut chu a rawn phar chhuak a,Sangtea chuan,"Sangtea ka nia,"tih pahin Mpa kut chu a lo vuan a,a thlah leh nghal a. Msi chuan,"Tikhan leng reng ru aw,nakinah thingpui tui tawkin kan lum dawn nia,"tih pahin a nui sâng a. Pi Ruati chuan,"Awii ka mut a chhuak tlat,tikhan lo inkawm ru aw ka mutsan mai ang che u,"tih pahin mu turin room lam chu a pan nghal a.

Emily chuan a in leng pa mize zawi zet mai chu a ti ti pui malh malh a,"Vawiin lamte engnge i tih a?,"tiin bul a ṭan phawt a. Hriata chuan,"Vawiin chu thingtuah kan la a,"a lo ti zawi sup a. Emily chuan,"Ee nihchu in lak leh hunah min hruai ve la,i phal em?,"tih pahin a nui sak a. Hriata chuan,"Phal loh pawh awm chuang hleinem,i peih chuan naktukah kan kal dawn nia,"a lo ti leh a. Emily chuan,"Mahse,em phurh hi ka zei vak lova min hruai duh tho a ngem?,"tih pahin a nui zui har har a. Hriata chuan,"Peih tho e,"a lo ti zawi sup a.