CHAPTER--42
Ziaktu: R'z Thangluah
Columnist, www.tleirawl.in
Msi chu chawhnu lamah chuan a rawn lang leh a,"Engnge in lo an le? A zia deuh em?,"tiin a rawn zawt nghal a. Max-pa chuan,"Aww kan ṭha tawh khawp mai. Nangma zar vek a ni e,kan lawm lutuk a nia aw,"tiin lawmthu a lo sawi nghal mawlh mawlh bawk a. Msi chuan Max-a melh zauh pah chuan,"Khatiang thil kha chu tih tawh loh tur aw,chhungte i ti mangang lutuk. I fanu hi ngaihtuah la,puitling deuhin awm ang che aw,"a ti zui ve mawlh mawlh a. Max chu a rawn nui suk a,"Ni e i sawi dik a lawm,"a lo ti zawi sup a. Msi chuan,"Chuan,tu emaw ber khan min lo zui u la,sawi tur ka nei a,"tiin Doctor room lam chu a pan nghal a,Max-a pa chuan a zui nghal bawk a.
Msi chuan"Kimkimi hian a rawn ngaihsak lo hrim hrim tihna mi?,"a ti nghal tawl mai a. Max-a pa chuan,"Aww ngaihsak lo hrim hrim,"a lo ti hul hak a. Msi chuan,"Max hi a ngaihsak lo anihpawn a fanu tal hi chu rawn ngaihsak ve tur a ni a sin le. Nu hmangaihna dawng lova seilian tur chuan a lainat awm em a tin ni,"a zuai raih a. Max-a pa chuan,"Ni e i sawi dik chiah lawm. Kan fapa thil tih dik loh rah chu kan chhungkua hian kan seng meng a nih hi,"a ti a,a meng khup lap a. Msi chuan,"Imm engpawh nise kha lam kha chu duhtawk phawt i la. Amah hi Max hi uluk deuh a enkawl a ngai dawn a. Damdawiinah pawh in la awm deuh rih a ngai maithei a,a chhanchu a dinhmun hi a ṭhat rualin a la normal chiah lova. Chuvangin hahdam deuha awm hi a mamawh rih a ni,in theih phei chuan Cabin-ah awm thei ula ka duhsak khawp mai che u,"a ti siam siam a. Max-a pa chuan,"Nang berin chutianga i tih te chuan Cabin awl a awm chuan,zanin la la ah pawh lut ila a pawi dawn mi?,"a lo ti vat a. Msi chuan,"Nia awl a awm chuan a pawi miah lo. Cabin awl a awm leh awm loh kan zawt lawk nge aw,"tiin Cabin lam chu a be nghal a.
"Aw 1 a awl anihchu zaninah in lut nghal thei ang,"a ti a,a nui sâng a. Max-a pa chu a hlim khawp mai,"Kan lawm lutuk aw,awmlo la chuan kan fapa hi kan chân tawh ngei ang kan lawm lutuk a nia,"a ti mawlh mawlh mai a. Msi chuan nui chungin,"Ka bulah nilovin Pathian hnenah lawmthu sawi zawk tur a lawm. Pathian aṭang lo chuan keipawh hian engmah ka ti theilo a nia,harsatna in neih chuan min lo be hreh lo ula aw,"a lo ti thung a. Max-a pa chuan,"Awle tehreng mai,kan lawm lutuk a nia. Nihchuan ka kal phawt a nge aw,"a ti a,a tho a a kal nghal a.
Sangtea chuan,"Max chu engnge an tawh a?,"tiin Msi chu a rawn zawt a. Msi chuan,"Umm a zia tawh khawp mai,naktuk ah chuan an chhuak thei tawh ang ka ring,"a lo ti vat a. Sangtea chuan,"A mak ve ngawt mai,hetiang em em hian mihring nun a lo inthlak thei ang tih hi ka ring pha ngai lo,"a lo ti leh a. Msi chuan,"Nia a mak ve ngawt mai,a tlangval lai zawng zawnga tlangval fel tia an sawi kha a ni a. A nupui nei khan a nun a tichhe hneh em a nih hi,"a lo ti ve bawk a. Sangtea chuan,"Nang hi lo nei zawk ta che se la,tiang hian a awm miah awm silova,"tih pahin a nui suk a. Msi chuan,"Hmm i ho e a,"a lo ti ringawt a. Sangtea chuan,"Tak takin Max chu a vanduai ve êm a nih hi. A nupui lah kha a bo vang vang mai sia,"a lo ti leh a. Msi chuan,"Nia a zia lo tak tak a ni,an naute lah saw a la te si ka khawngaih thei a sin aw,"a lo ti ve bawk a. Sangtea chuan,"Ti daih ila palai hi engtiknge ka rawn tirh dawn?,"a ti heu mai a. Msi chuan,"Hmm leh ngawt ṭhin che chuan,pasal nei turin ka la in peih lo a sin,"tih pah chuan a lo nui sâng a. Sangtea chuan,"I parmawina hi ka thliak tawh a sin,"tih pah chuan Msi chu a rawn kuah a. Msi chuan,"Awwi awwi...zak teh zak teh,ka la par lo hrim hrim,"tih pahin Sangtea chu nam sawn mai a tum a,a rin aiin Sangtea chuan a lo kuah nghet sia,"I la par lo maw? Phakar suh aw,par a hun tawh,"tih pahin a rawn nui chhuak hawk hawk a. Msi chuan,"Ka la par chhuak famkim lo a lawm,"tih pahin Sangtea samah chuan a tuai sak a. Sangtea chuan,"Tikhan ka sam tuai ziah suh,darthlalang hmaa ka din rei ṭhin zia pawh i hriat kha,"a lo ti nuah nuah a. Msi chuan,"Hmm ka bula rawn kal turin nalh vak a ngai mi?,"a lo ti deuh hmuk a,a titau deuh reuh a. Sangtea chuan,"Aww duh ber te hmu tur chuan nalh thei ang berin kan in chei ve bawk ang chu,"tih pahin Msi chu a melh zauh a. Msi lah chu a lo tûm lian nasa mai si,"Kan In i rawn thlen hma in midang i hmu ṭhin chiang lutuk,hei i rim pawh hi a dik lo. Nula dang rim i nam,"tih pahin Sangtea kawr chu a rawn hnim kher a. Sangtea chu a lo nui hawk hawk a,"Duhawm lutuk zel lo teh,i thikthu i han pek chhiat hi chuan maw nuam ka ti veng veng ṭhin. A chhanchu maw min hmangaih tih ka hre tlat a,"tih pahin Msi chu a kuah a,a chalah chuan a fawh sak zauh a,"Ka hmangaih lutuk che nia aw,"tih pahin Msi hmuiah chuan a fawp leh vawng vawng a.
"Max,tinge tiang hian i awm tak mai le? I tlangval lai zawng zawng pawn hetiang hi i nih ngai loh kha?," Msi chuan Max-a zu rui chatthla chu a en vawng vawng a.
Max a rawn che ṭual ṭual a,"Bawihte,..Bawihte,min lo nghak rawh,"a rawh ti nawk nawk a. Msi chuan a rawn ngaihven nghal vat a,"I ṭha em? I harh em?,"tih pahin Max chu a rawn sawi nawk nawk a. Max chu a rawn meng a,"Khawnge Bawihtei kha?,"a rawn ti bah niai a. Msi chuan,"Ṭhenawm dawrah an kalpui lawk a,awm hahdam rih rawh. Bawihtei chu a rawn let ṭep tawh ang,tui i in duh em?,"a lo ti leh mawlh mawlh a. Max chuan,"Aih in duh love,"a lo ti mai a;mahse,a mit meng chu a la vai vek tih Msi chuan a hai lo. Whatsapp-ah Notei a text nghal a,Max-a awmdan chu a hrilh nghal zung zung bawk a.
Rei vak lo hnuah Notei te pawh an rawn thleng nghal a. Msi chuan,"Damdawiin lam ka lo be tawh a,Cabin awl a awm a kan lut phei nghal dawn nia. Hetiang ringawt chuan a dik dawn lo,"a lo ti nghal zung zung a. Max-a pa chuan,"Kan chhungkua hi chuan kan tibuai ve ngawt mai che. Lawmthu sawi ngaihna pawh ka hre tawhlo kan lawm a ni tawp mai,"a lo ti mawlh mawlh a. Msi chuan,"Hei chu ka tih tur ve reng a lawm,in thlahrunna tur a awm lo nia. Max hi ka ṭhian a la ni reng a lawm,"a lo ti thung a. Pi Ruati chuan,"Ni e in thlahrung duh reng reng suh u,in fapa damna hi a pawimawh ber a lawm,"a lo ti ve bawk a.
Sangtea chuan,"Pa,mo neih i chak ve tawh em?,"a rawn ti zawi sup a. A pa chuan nui suk chungin,"Mo neih te chu kan chak reng a lawm. Mahse,rawn hruai luh tur hi i hmu zo ngut dawn e maw ni le?,"a lo ti a. Sangtea chuan,"Umm rawn hruai luh tur te chu hmu e;mahse,amah hi a la in peih lo deuh a,"tih pah chuan a nui var var a. Partei chuan,"Eeee unaunu thar ka nei dawn mi a? Van nuam ve a,"tih pahin a lo nui ve har har a. Sangtea chuan,"Mahse,Emily kha chu a ni lova,"a lo ti zawi sup a. A pa chuan,"Eee nihchuan hmel thar kan hmu dawn tihna a va nih hmel ve,"tih pahin a nui hak hak a. Sangtea chuan,"Aaa thar em em pawh ni hran lo. Englo ...Msi nia,"a lo ti zawi sap a. Partei chuan,"Tak tak mi? Dawt i sawi vaih aw,"a lo ti phûl hlut a. Sangtea chuan,"Dawt ni love,"a lo ti leh mai a. Partei chuan,"Van ṭha tak Msi te angin an lo duh ve che chu i phûlo hul hual,"a lo ti leh mawlh mawlh a. A pa chuan,"Pi Ruati fanu kha em ni?,"a lo ti a. Sangtea chuan,"Aw ni e,tinge?,"tih pahin a pa chu a en deuh hâ mai a. A pa chuan,"An chanchin ka hriat leh dan hi a duhawm khawp mai. I duh phawt chuan kei chuan ka mo atan ka pawm thei reng a nia,"tih pahin a lo nui sun sun a. Sangtea chu a hlim kher mai,"Ka van lawm tak Pa,ka hmangaih che,"a ti mawlh mawlh mai a. Partei chuan,"Keipawh min hmamgaih ve la,"a lo ti vat a. Sangtea chuan,"Unaunu,nangpawh ka hmangaih em em che,"tih pahin a nui var var a.
Hriata leh Emily pawh an hlim dun khawp mai. Hriata chuan Aizawl lamah hna te thawkin amahin In a luah a,zan tin Emily te Inah chuan a leng ṭhin. Emily chhungte pawn an makpa chei deuh tawp tawh mai a ni. Chhungte hriatpuina ve ve a inkawp an ni bawk a,an chhungte ve ve chuan an hlimpui ṭhin khawp mai.
No comments:
Thanks for your comment.